Éxodo 8
8
1Jayawe Tumpa jei Moisés pe: “Ekua ye mburuwicha wasu jowai jare ere chupe: ‘OreTumpa jei ndewe kuärái: ‘Emaeño aiparawo wae reta re oë yuraa reta cheree umbutuicha reta waerä. 2Erëi nemaeño’ä oë yuraa reta yawe, aiporarakata ndewe. Ambouta jetaete pïte reta opaete kua ndeɨwɨ rupi. 3Aramoiño uyekuaata jetaete pïte reta ɨ wasu rupi rani. Jokua pïte reta oëta ɨ wasu wi jare uiketa nerëta japɨpe, jare ndero ndeke pɨpe wae japɨpe, jare nderupa pe wi. Uiketa reta wi nemborɨa nembɨarakuaa wae reta jëta japɨpe rupi, jare opaete ndeɨwɨ pewa reta jëta japɨpe wi. Uiketa reta wi horno reta japɨpe jare mbatea reta mbɨyape piyapo pɨpe wae pe. 4Pïte reta upɨrɨrɨkɨta nderé, jare opaete ndeɨwɨ pewa reta re, jare opaete nemborɨa nembɨarakuaa wae reta re.’ Jukuärái ere chupe,” jei Tumpa Moisés pe.
5Jare jei wi chupe: “Ere Aarón pe tueupi ipopoka jare tupuwëe opaete ɨ wasu reta kotɨ, ɨ raɨ reta kotɨ, jare ɨkua reta kotɨ. Jukuärái tuyapo yuweru waerä jetaete pïte reta opaete ɨwɨ Egipto rupi,” jei Tumpa Moisés pe.
6Jayawe Aarón uyapo jukuärái, jare oë ɨ wi jetaete ye ye pïte reta jare opa tɨnee ɨwɨ Egipto. 7Erëi ichoropa wae reta uyapo wi ou waerä ɨwɨ Egipto pe pïte reta.
8Joko wi mburuwicha wasu uenika Moisés jare Aarón jare jei chupe reta: “Amaeñota aï peré peë peraa piyuka mbaemɨmba reta pemee waerä peTumpa pe,” jei. “Jayawe piyerure peTumpa pe umbɨsɨrɨ waerä kua pïte reta chewi jare cheɨwɨ pewa reta wi,” jei chupe reta.
9Jayawe Moisés jei chupe: “Jaekawi, erëi nde iparawo mbae nunga ora pe etei ayerure waerä Tumpa pe nderé, nemborɨa nembɨarakuaa wae reta re, jare ndeɨwɨ pewa reta re. Jayawe ramo ko pïte reta uyembɨsɨrɨta pewi jare perëta wi. Mbaetɨta pïte jembɨre; jaeño ɨ wasu pe ñonoïta,” jei Moisés chupe.
10Jayawe mburuwicha wasu jei Moisés pe: “Iyapo kuriye woi,” jei chupe.
Jare Moisés jei: “Jayawe ayapota nde ndere chewe wae ndikuaa waerä mbaetɨ ko ïru tumpa oreTumpa ikoño mái wae rami. 11Pïte reta opata uyembɨsɨrɨ ndewi, nemborɨa nembɨarakuaa wae reta wi, jare opaete ndeɨwɨ pewa reta wi. Mbaetɨta pïte jembɨre; jaeño ɨ wasu pe ñonoïta,” jei Moisés chupe.
12Jayawe Moisés jare Aarón oë ye yuraa reta mburuwicha wasu jowai wi. Jare Moisés uyerure Tumpa pe umbɨsɨrɨ waerä ɨwɨ Egipto wi jokua pïte Tumpa ombou wae reta. 13Jare Tumpa uyapo Moisés uyerure chupe wae rupi. Jayawe pïte tëta reta rupi, jare oka rupi, jare ñana rupi ñonoï wae reta opa woi umano. 14Jayawe ɨwɨ Egipto pewa reta umbatɨmbatɨ pïte jeöwekue reta. Jare inete utimbo opaete ɨwɨ Egipto rupi.
15Erëi mburuwicha wasu uikuaa ma yawe opa umano pïte reta wae, ipɨatäta yewɨ jare uyapɨsaka’ä Moisés jare Aarón re kërái Tumpa jei uyeyapota wae rami.
Mbaesusere mbariwi reta rewa
16Jayawe Tumpa jei Moisés pe: “Ere Aarón pe tokua ɨwɨ re ipopoka pɨpe mbariwi uyekuaa waerä ɨwɨkuí wi opaete ɨwɨ Egipto rupi,” jei chupe.
17Jayawe jukuärái uyapo reta. Aarón okua yawe ipopoka pɨpe ɨwɨ re, jawoi pewa opaete ɨwɨkuí wi uyeyapo jetaete ye ye mbariwi reta opaete ɨwɨ Egipto rupi. Jare mbariwi reta uichuu opaete kuimbae jare kuña ɨwɨ Egipto pewa reta jare jɨmba reta wi. 18Jare ichoropa wae reta omboporowa tëi wi uyapo waerä mbariwi ichoropa rupi, erëi ipuere’ä ma uyapo reta. Jare jokua rambuewe, mbariwi reta uichuu opaete kuimbae jare kuña ɨwɨ Egipto pewa reta jare jɨmba reta wi.
19Jayawe ichoropa wae reta jei mburuwicha wasu pe: “Tumpa ko aipo uyapo oï kua,” jei reta chupe. Erëi mburuwicha wasu imeño ipɨatäta jare uyapɨsaka’ä Moisés jare Aarón re kërái Tumpa jei uyeyapota wae rami.
Mbaesusere mbutu reta rewa
20Tumpa jei Moisés pe: “Pepüa kuriye ndimboweasɨ, jare pekua peäro mburuwicha wasu jae oo oï yawe ɨ wasu pe. Jare pere chupe kuärái: ‘OreTumpa ikoño mái wae jei ndewe kuärái: ‘Emaeño che aiparawo wae reta re oë yuraa cheree umbutuicha reta waerä. 21Erëi nemaeño’ä oë yuraa reta yawe, aiporarakata ndewe, echa’ä ambouta jetaete ye mbutu reta nderé. Ambouta wi nemborɨa nembɨarakuaa wae reta re, jare opaete ndeɨwɨ pewa reta re. Jatäti yeta mbutu reta tɨnee opaete ɨwɨ Egipto pewa reta jëta japɨpe rupi, jare opaete ɨwɨ rupi. 22-23Erëitu mbutu reta ou yawe, oyata’ä che aiparawo wae reta re ɨwɨ Gosén#8.22 Ɨwɨ Gosén oï wi ɨwɨ Egipto japɨpe. rupi ñonoï wae reta. Jukuärái ndikuaata oyowake’ä amae ndeɨwɨ pewa reta re kërái che aiparawo wae reta re amae wae rami. Jukuärái ayapo aï nde ndikuaa waerä che ko jae Tumpa aikoño mái wae jare nde ndikuaa waerä che aï kua ɨwɨ Egipto pe wae. Kuriye uyeyapota kua mbaesusere kɨye pewa,’ jei ndewe oreTumpa.’ Jukuärái pere chupe,” jei Tumpa Moisés pe.
24Jayawe Tumpa uyapo jukuärái. Jetaete ye ye tatäti rami mbutu reta ou mburuwicha wasu jëta rupi, jare imborɨa umbɨarakuaa wae reta jëta rupi, jare opaetei ɨwɨ Egipto rupi. Jayawe opaete ɨwɨ Egipto pewa reta ipuere’ä uparawɨkɨ mbutu reta jeko pewa.
25Jáeramo mburuwicha wasu uenika ye Moisés jare Aarón jare jei chupe reta: “Pekua peraa mbaemɨmba reta piyuka pemee waerä peTumpa pe, erëi kua ɨwɨ Egipto peño,” jei chupe reta.
26Erëi Moisés jei chupe: “Ndarau ikawi nduyapo waerä jukuärái,” jei. “Echa’ä mbae kachiete wae ikota ɨwɨ Egipto pewa reta pewarä nduyuka mbaemɨmba yawe numee waerä oreTumpa pe. Jukuärái nduyapo yawe kua ɨwɨ pewa reta jowake, nombopochɨkata orekotɨ jare oreyukata reta ita pe,” jei. 27“Ore ndoota ko kua wi mbapɨ ara rupi ɨwɨtini wasu kotɨ nduyuka numee waerä mbaemɨmba reta oreTumpa ikoño mái wae pe kërái jae jei orewe wae rupi,” jei Moisés mburuwicha wasu pe.
28Jayawe mburuwicha wasu jei chupe reta: “Amaeñota peré peo waerä ɨwɨtini wasu kotɨ, erëi awɨye mbɨrɨete pekua,” jei. “Jare añawe piyerure cheré,” jei mburuwicha wasu Moisés jare Aarón pe.
29Jare Moisés jei mburuwicha wasu pe: “Kua wi aë rupiwe ayerureta aï oreTumpa pe nderé. Jare kuriye mbutu reta opata usɨrɨ ndewi, nemborɨa nembɨarakuaa wae reta wi, jare opaete ndeɨwɨ pewa reta wi,” jei. “Erëi awɨyeta ko orembɨtawɨ ye noë ndoo waerä,” jei Moisés mburuwicha wasu pe.
30Jayawe Moisés oë ma oo yawe mburuwicha wasu jowai wi, uyerure Tumpa pe. 31Jare Tumpa uyapo Moisés uyerure chupe wae rupi, jare umbɨsɨrɨ mbutu reta jatäti ye wae mburuwicha wasu wi, imborɨa umbɨarakuaa wae reta wi, jare opaete iɨwɨ pewa reta wi. Jembɨre’ä pëti awe mbutu.
32Erëitu mburuwicha wasu jekuae uyembɨpɨatäta ye jare umaeño’ä Israel iñemoñaa reta re oë yuraa reta waerä.
Currently Selected:
Éxodo 8: gnwPB
Highlight
Share
Copy
Want to have your highlights saved across all your devices? Sign up or sign in
© 2017, Ethnos360 (New Tribes Mission). All rights reserved.
