Éxodo 7

1Jayawe Tumpa jei Moisés pe: “Mase, che ayapota mburuwicha wasu umae waerä nderé che rami, jare nderɨkeɨ Aarón re niñee umɨmbeu wae rami,” jei. 2“Ere nderɨkeɨ Aarón pe opaete che jae wae, jare jae jeita mburuwicha wasu pe umaeño waerä Israel iñemoñaa reta re oë yuraa ɨwɨ Egipto wi,” jei. 3-4“Erëi che amɨtätata mburuwicha wasu ipɨa chuwi. Yepe tëi che ayapota chupe mbaembae kɨyete pewa ɨwɨ Egipto pe, erëi jesewe jae uyapɨsakata’ä piñee re. Jáeramo aiporarakata jasɨ katuete rupi opaete ɨwɨ Egipto pewa reta pe. Jare anoeta kuri ɨwɨ Egipto wi Jacob doce taɨ pëti pëti iñemoñaa reta rupi. Echa’ä jae reta che aiparawo wae reta ko,” jei. 5“Jayawe ramo ɨwɨ Egipto pewa reta uikuaata che ko jae Tumpa aikoño mái wae, ayapo yawe chupe reta mbaembae kɨyete pewa anoe waerä Israel iñemoñaa reta ɨwɨ Egipto wi,” jei Tumpa Moisés pe.

6Jayawe Moisés jare Aarón uyapo reta opaete Tumpa jei chupe wae rupi. 7Oo reta umɨmbeu Tumpa iñee mburuwicha wasu pe yawe, Moisés ime wɨreko ochenta año, jare Aarón ochenta y tres año wɨreko.

Aarón ipopoka

8Tumpa jei Moisés jare Aarón pe kuärái: 9“Mburuwicha wasu uipotata pe reta piyapo waerä chupe mbae chembaepuere rupi pikuaaka waerä chupe che ko pomondo wae. Jáeramo nde Moisés, ere Aarón pe tomombo ipopoka ɨwɨ re mburuwicha wasu jowai,” jei. “Jawoi pewa ipopoka uyeyapota mboi.” Jukuärái jei Tumpa chupe reta.

10Jayawe Moisés jare Aarón yuraa mburuwicha wasu jowai, jare uyapo reta kërái Tumpa jei chupe wae rami. Aarón omombo ipopoka ɨwɨ re mburuwicha wasu pe uyeyokui wae itenondewa reta jowai, jare ipopoka uyeyapo mboi. 11Erëi mburuwicha wasu uenika ichoropa wae reta jare ipaye wae reta. Jae reta uyapo wi ichoropa rupi Moisés jare Aarón uyapo rami. 12Kua reta pëti pëti omombo ipopoka ɨwɨ re, jare uyeyapo wi mboi jokua ipopoka reta. Erëitu Aarón imboi opa jou opaete ïru mboi reta.

13Erëi jesewe mburuwicha wasu imeño ipɨatäta, jare uyapɨsaka’ä Moisés jare Aarón re kërái Tumpa jei rami.

Mbaesusere tuwɨ pewa

14Jaɨkue rupi Tumpa jei Moisés pe: “Mburuwicha wasu ipɨatätaete jare jekuaeño umaeño’ä Israel iñemoñaa reta re oë yuraa reta waerä,” jei. 15“Jáeramo pekua mburuwicha wasu kotɨ kuriye ndimbowe, jae oo oï yawe ɨ wasu kotɨ. Peäro ɨ wasu jembeɨ pe piñeñowäiti waerä jae ndiwe joko pe. Awɨye peakañɨ peraa pe ndiwe jokua popoka uyeyapo mboi wae,” jei.

16“Ere mburuwicha wasu pe kuärái: ‘Ore hebreo reta nduiko wae, oreTumpa ikoño mái wae chembou nderowai amɨmbeu ndewe waerä jae iñee. Jae jei ndewe: ‘Israel iñemoñaa reta che aiparawo wae reta ko. Emaeño jese reta oë yuraa reta waerä ɨwɨtini wasu kotɨ, joko pe cheree umbutuicha reta waerä.’ Jukuärái oreTumpa jei tëi ndewe, erëi nde jekuaeño ndiyapɨsaka’ä jese. 17Jáeramo añawe Tumpa jei oï ndewe kuärái: ‘Kua rupi nde ndikuaata che ko Tumpa añetete wae. Mase, ambokuakata aï kua ɨ wasu re kua popoka pɨpe, jare ɨ uyeyapota tuwɨ. 18Opaete pira reta kua ɨ wasu pe ñonoï wae opata umano reta. Jayawe ɨ wasu ineteta utimbo, jare opaete ɨwɨ Egipto pewa reta ipuereta’ä jou ɨ ɨ wasu wi.’ Jukuärái ere chupe,” jei Tumpa Moisés pe.

19Tumpa jei wi chupe: “Ere Aarón pe tueupi jare tupuwëe ipopoka pɨpe opaete ɨ ɨwɨ Egipto pe oï wae kotɨ – jae ko opaete ɨ wasu reta, jare ɨ raɨ reta, jare ɨpa reta, jare ɨkua reta kotɨ. Jare opaete ɨ ɨwɨ Egipto pe oï wae uyeyapota tuwɨ. Jukuärái ikota tuwɨ opaetei ɨwɨ Egipto rupi. Ɨ jɨru reta ɨwɨra pewa jare ita pewa pe awe oïta tuwɨ,” jei chupe.

20Jayawe Moisés jare Aarón uyapo opaete Tumpa jei Moisés pe wae rupi. Mburuwicha wasu jare imborɨa umbɨarakuaa wae reta umae ñonoï jese rambuewe, Aarón ueupi ipopoka jare okua ɨ wasu re. Aramoiño opaete ɨ wasu uyeyapo tuwɨ. 21Jáeramo opaete pira reta jokua ɨ wasu pe ñonoï wae opa umano. Ɨ wasu inete utimbo, jare opaete ɨwɨ Egipto pewa reta ipuere’ä jou ɨ jokua ɨ wasu wi. Jukuärái ime iko tuwɨ opaetei ɨwɨ Egipto rupi.

22Erëi ichoropa mburuwicha wasu pe uyeyokui wae reta jukuärái uyapo wi ichoropa rupi. Jayawe mburuwicha wasu imeño ipɨatäta jare uyapɨsaka’ä Moisés jare Aarón re kërái Tumpa jei rami. 23Joko wi mburuwicha wasu oo ye jëta pe, echa’ä mbae’ä chupe jokua uasa wae. 24Jayawe opaete ɨwɨ Egipto pewa reta oyoo ɨkua reta ɨ wasu jembeɨ rupi uwäe waerä ɨ jesäka wae, echa’ä ipuere’ä etei jou reta ɨ ɨ wasu wi.

Mbaesusere pïte reta rewa

25Uasa ma chiu ara Tumpa uyapoka ɨ wasu tuwɨ pe wae.

Currently Selected:

Éxodo 7: gnwPB

Highlight

Copy