Luuk 19

Yesu nɛ Zakiyes be asheŋ

1Nɛ Yesu ba bɔla Jɛriko be kade to a choŋ. 2Kanyɛn ko malɛ daa wɔtɔ nɛ baa tre mo Zakiyes. E daa la elamposɔpoana na be enimu ko nna a la damawura nseŋ daŋ wora ania ga nɛ e wu esa nɛ Yesu daa la, 3ama e daa maŋ tiŋ ŋkpal jimaŋ nɛ b daŋ shɛr ndoŋ na nɛ kananɛ mo gbagba daa du shiimbi so. 4Ndoŋ nna nɛ e kpal loŋ so n ta ekpa nɛ Yesu beeŋ bɔla so na so n shile n juŋkpar n ya dii sikamɔɔ be kedibi a tase so nɛ Yesu e ba kaa bɔla ndoŋ a choŋ nɛ e wu mo. 5Yesu ka ba fo kedibi na ase nɛ e maŋ kumu so ŋ keni mo nseŋ kaŋɛ mo le: “Zakiyes nya manaŋ ŋ gbelge m ba, ŋkpal manɛ so, kabre a daga ŋ ka yɔ fo pe n ya ki fo efɔ.” 6Ndoŋ nna nɛ Zakiyes nya manaŋ ŋ gbelge ŋ keta Yesu kagbenefuliso n yɔ mo pe. 7Basa na kikɛ ka wu loŋ nɛ b bile asheŋ ŋ kaŋɛ: “Men keni, e ka yɔ alubiworapo pe n ya ki mbe efɔ.” 8Nɛ Zakiyes niŋi to n yili nseŋ kaŋɛ Enyɛnpe le: “Enyɛnpe, keni, meeŋ barga ma asɔ to ntuŋ anyɔ so n ta barga to ko ŋ kɛ betirpo, nɛ esa kama malɛ nɛ m puni, meeŋ leŋi amodoŋwura be kusɔ na ntuŋ nna n sa mo.” 9Nɛ Yesu kaŋɛ: “Kabre kumɔlga ba laŋ ere to ebi so, ŋkpal manɛ so, Zakiyes gba la Eebraham mo nanabi nna. 10Ma alɛ Nyiŋgbasa Pibinyɛn ba na nɛ m ba fin basa nseŋ mɔlga bumo ashi bumo be alubi to.”

Eshuwa be amansherbi be keŋasa be asheŋ

(Matiu 25:14-30)

11Basa na ka yil a nu asheŋ na nɛ Yesu naŋ bɔ bumo keŋasa ere ŋkpal e ka daŋ taga to Jerusalɛm nɛ ŋkpal b ka daa tama fanɛ epul na to nɛ Ebɔrɛ be kuwura na daa shin nɛ k lar efuli so so. 12Ndoŋ nna nɛ e kpal loŋ so ŋ kaŋɛ bumo: “Ebunyamponyɛn ko e daŋ lar mo pe n yɔ efuli wɔfɔ ko so nɛ e ya ji kuwura nseŋ bɛta m ba. 13E ka daa shin nɛ e yɔ nɛ e tre mbe anya kudu ko n ta pɔŋ kudu m bɔɔ bumo enɔ nseŋ kaŋɛ bumo le: ‘Men baa kɔ amansherbi ere to a ji yawu hale nɛ n naŋ ya bɛta m ba.’ 14Mbe efuli so ebi malɛ daŋ kishi mo ga, amoso, e ka yɔ nɛ b shuŋi mbɔ fanɛ b bɛ mo so n ya kaŋɛ bumo nɛ baaŋ buu mo kuwura na le: ‘Anyi ere maa sha kanyɛn ere ka ki anyi be ewura.’ 15Kanyɛn na ka nya mbe kuwura nseŋ bɛta m ba epe nɛ e shin nɛ b tre mbe anya nɛ e daŋ ta amansherbi na n sa na nɛ e bishi bumo etɔnɔ mo nɛ b ta amansherbi na n ji yawu n nya. 16Ndoŋ nna nɛ ejuŋkparso na ba kaŋɛ mo le: ‘Enyɛnpe, n ta fo pɔŋ koŋwule na n nya pɔŋ kudu n ti so.’ 17Nɛ enyɛnpe na kaŋɛ mo: ‘Mbo, kenya lela, fo wora asɔ. Fo ka baŋ ta gbrɛbi ere n shuŋ le ere nɛ m pin fanɛ meeŋ tiŋ n yirda fo, amoso, naniere n sa fo nde kudu nɛ fo baa keni so.’ 18Ejuŋkparso na be kaman nɛ enyɔsopo ba kaŋɛ mo le: ‘Enyɛnpe, n ta fo pɔŋ koŋwule na n nya pɔŋ anu n ti so.’ 19Nɛ enyɛnpe na kaŋɛ mo alɛ le: ‘N sa fo alɛ nde anu nɛ fo baa keni so.’ 20Nɛ emo nɛ e naŋ bɛ so malɛ ba kaŋɛ enyɛnpe na le: ‘Enyɛnpe, fo pɔŋ koŋwule na nde. N ta kumo nna n wɔtɔ kechɛbi to ŋ kre n nase, 21ŋkpal manɛ so, n daa ŋana fo kagbene nna. Ŋkpal manɛ so, n nyi kananɛ fo la kumukpakpasowura. Kusɔ nɛ fo maŋ ta n nase, kumo nɛ fee ta, asɔ nɛ fo maŋ duu, amo nɛ fee teŋi.’

22Nɛ enyɛnpe na kaŋɛ mo le: ‘Kusɔ nɛ fee malga ere gbagba nɛ meeŋ ta n ji fo demu, kenya lubi ere. Fo yɛ fo nyi ŋ ka la kumukpakpasowura a ta kusɔ nɛ m maŋ ta n nase nsaa teŋi asɔ nɛ m maŋ duu ŋko? 23Nɛ manɛ e ba nɛ fo daa maŋ ta ma amansherbi na n ya yili amansherbi be eyilikpa nɛ n daŋ ba m ba nya nchu.’ 24Ndoŋ nna nɛ e kaŋɛ anya nɛ b daa yil ndoŋ na le: ‘Men sɔ pɔŋ koŋwule na mo kutɔ n sa emo nɛ e nya pɔŋ kudu na.’ 25Nɛ b bishi enyɛnpe na le: ‘Enyɛnpe, nɛ mo alɛ ka kɔ pɔŋ kudu ai?’ 26Nɛ enyɛnpe na kaŋɛ: ‘Ma e kaŋɛ menyi na fanɛ ekama nɛ e kɔ beeŋ naŋ nya n ti so nɛ ekama nɛ e maŋ kɔ, gbrɛ nɛ e kɔ na gba, baaŋ sɔ kumo mo kutɔ.’ 27Ade kikɛ be kaman nɛ enyɛnpe na kaŋɛ le: ‘To, naniere men ya pɛ ma doŋana nɛ b daŋ kaŋɛ fanɛ m maaŋ ki bumo be ewura na m ba teŋ bumo ma anishito.’ ” 28Yesu ka malga asheŋ ere kikɛ n loge nɛ e naŋ pɛ Jerusalɛm be ekpa n juŋkpar bumo a yɔ.

Yesu ka luri Jerusalɛm bunyanso be asheŋ

(Matiu 21:1-11; Maak 11:1-11; Jɔn 12:12-19)

29A ka ba ka gbrɛbi nɛ e fo Bɛtfagi nɛ Bɛtani be nde to nɛ a wɔ kebee nɛ baa tre Ɔlifs be kebee na ase, nɛ e ta le be kubɔya ere n shuŋi bebɛsopo na be benyɔ ŋ kaŋɛ bumo: 30“Men yɔ kadebi nɛ k ya kaa wɔ menyi be anishito ere to. Men baŋ ya kaa luri kumo to, menyeeŋ wu b ka chɛ kurmafɔlbi ko m muni. Esa kikɛ maŋ naŋ dii kumo. Men saŋɛ kumo m bar ma nfe. 31Nɛ esa kama nɛ e kaŋ bishi menyi le: ‘Manɛ e ba nɛ menyee saŋɛ kumo?’ Men kaŋɛ mo le: ‘Enyɛnpe na e naa sha kumo.’ ” 32Ndoŋ nna nɛ bumo nɛ Yesu shuŋi na yɔ n ya wu fanɛ asheŋ nɛ Yesu kaŋɛ bumo na gbagba kikɛ chap e wora. 33B ka ya kaa saŋɛ kurmafɔlbi na nɛ kurmawuraana bishi bumo le: “Manɛ e ba nɛ menyee saŋɛ kurmafɔlbi na?” 34Nɛ b kaŋɛ bumo le: “Enyɛnpe na e naa sha kumo.” 35Kumo be kaman nɛ b keta kurmafɔlbi na m bar Yesu nseŋ ba ta bumo be asɔbuuso ko n deŋi kumo so nseŋ shin nɛ Yesu dii n chena so. 36Yesu ka bee dii kurma na a yɔ nɛ basa ta bumo be asɔbuuso ko a parga to a nase ekpa to. 37E ka ba taga to Ɔlifs be kebee so be kegbelge na nɛ mbe bebɛsopo kikɛ fara a di Ebɔrɛ epaŋ awɔrso nɛ kagbenefuliso, ŋkpal emamachisheŋ damta nɛ b daŋ wu na kikɛ so. 38Le nɛ b daŋ kaŋɛ:

“Nɛfa la Ewura nɛ e shi Enyɛnpe be ketre to a ba na peya nna.

Kagbenewushi e baa wɔ ebɔrɛso

nɛ kemaŋkura e baa la Enyɛnpetale peya.”

39Ndoŋ nna nɛ Efarisiana nɛ b daa wɔ jimaŋ na to na be beko kaŋɛ Yesu le: “Eŋinipo, kaŋɛ fo bebɛsopo ere nɛ b lo to.” 40Nɛ Yesu kaŋɛ Efarisiana na le: “Ma e kaŋɛ menyi na fanɛ nɛ b lo to gba ajembu ere beeŋ boŋ to n di ma epaŋ.”

Yesu ka kpal Jerusalɛmebi so n shu be asheŋ

41Yesu ka ba kaa taga to Jerusalɛm be kade na to nseŋ keni kumo, 42e shu na nseŋ kaŋɛ le: “Alako kabre, menyi alɛ gba daa nyi asɔ nɛ a bee bar kagbenewushi nna. Ama b ta amo ŋ ŋana menyi so. 43Ŋkpal manɛ so, saŋko beeŋ ba nɛ men doŋana e ba pɔr egbal ŋ kulti menyi be kade ere nseŋ chambɔ kaba kama so ŋ kulti kade na 44nseŋ da menyi be kade ere n lɛ kasawule nseŋ mur menyi kikɛ nɛ kumo to be egbalana ere kikɛ e buri to nyam n deŋi abar so le kululu. Ŋkpal manɛ so, men daa maŋ pin jemanɛ nɛ Ebɔrɛ daŋ ba nɛ e ba mɔlga menyi na.”

Yesu ka ju yawujipoana ashi bɔrɛlambu na to be asheŋ

(Matiu 21:12-17; Maak 11:15-19; Jɔn 2:13-22)

45Ndoŋ nna nɛ Yesu luri bɔrɛlambu na to n fara a ju bumo nɛ b daa wɔ kumo be kelɔnɛ so a ji yawu na a lar kowu 46nsaa kaŋɛ bumo le: “Abɔrɛsibɛ na bee kaŋɛ fanɛ Ebɔrɛ kaŋɛ: ‘A daga ma kowu ka la kabɔrɛkule be kakpa.’ Ama menyi ere ta kumo ŋ ki beyu be eŋanakpa.” 47Ade be kaman nɛ e wɔtɔ a yɔ bɔrɛlambu na to kachɛ kama n ya kaa ŋini basa abɔrɛsheŋ. Ndoŋ nna nɛ bɔrɛmatapowuraana na nɛ mbraŋinipoana na nɛ kade na to be benimuana fara a fin kananɛ baaŋ wora m mɔ mo. 48Ama bumo alɛ daa maŋ tiŋ n nya shɛŋ n wora ŋkpal kananɛ basa daŋ baa wɔtɔ a nu mbe kamalga na so.

Currently Selected:

Luuk 19: GJNb

Highlight

Copy