Luuk 20

B ka bishi Yesu kakpa nɛ mbe eleŋ shi be asheŋ

(Matiu 21:23-27; Maak 11:27-33)

1Kachako Yesu ka wɔ bɔrɛlambu na to a ŋini basa nsaa bɔ baru lela na a sa basa nɛ bɔrɛmatapowuraana na nɛ mbraŋinipoana na nɛ benimuana na ba ndoŋ m ba bishi mo le: 2“Kaŋɛ anyi eleŋ nɛ fo kɔ a wɔtɔ a wora asheŋ ere ŋko wanɛ e sa fo loŋ be eleŋ.” 3Nɛ Yesu kaŋɛ bumo: “Ma alɛ gba beeŋ bishi menyi kesheŋ bishiso ko. 4To, men kaŋɛ ma, Jɔn be kabɔrɛbɛr na be asheŋ daŋ shi ebɔrɛso nna ŋko enyiŋgbasa kutɔ?” 5Ndoŋ nna nɛ b fara a bishi abar kusɔ nɛ baaŋ kaŋɛ Yesu. B yɛ: “Nɛ an baŋ kaŋɛ fanɛ: ‘Ebɔrɛso nɛ a shi’, e beeŋ bishi anyi: ‘Nɛ manɛ e ba nɛ men maŋ yirda mo?’ 6Nɛ anyi alɛ naŋ kaŋɛ: ‘A shi enyiŋgbasa kutɔ nna’, basa ere kikɛ beeŋ kpa anyi ajembu, ŋkpal manɛ so, bumo ere be ekama baŋ yirda mbe kagbene to nna fanɛ Jɔn daa la anebi nna.” 7Amoso, kusɔ nɛ b daŋ kaŋɛ e la fanɛ b maŋ nyi kakpa nɛ a shi. 8Ndoŋ nna nɛ Yesu malɛ kaŋɛ bumo: “To, ma alɛ gba maaŋ kaŋɛ menyi kakpa nɛ eleŋ nɛ ŋ kɔ a wɔtɔ a wora asheŋ na shi.”

Paawuraana be asheŋ

(Matiu 21:33-46; Maak 12:1-12)

9Ade be kaman nɛ Yesu naŋ fara a bɔ keŋasa ere a sa basa na. E yɛ: “Kanyɛn ko e daŋ dɔ ndibi sɔrso be kudɔ nseŋ ta kumo m bɔɔ paawuraana enɔ fanɛ b baa keni so nseŋ yɔ efuli pɔtɛ ko so nɛ e ya wora nchɛnnyɔ. 10Asɔrso na be kechuge be jemanɛ ka ya fo nɛ e shuŋi kenya ko paawuraana na kutɔ fanɛ b sa mo kudɔ na to be asɔrso na be ako. Nɛ paawuraana na bri kenya na nseŋ bɛta mo n yɔ nɛ enɔfuloŋ. 11Nɛ kudɔ na wura naŋ bɛta n shuŋi kenya ko paawuraana na kutɔ nɛ b ya bri mo alɛ gba n wora mo amɔmɔshiasheŋ nseŋ bɛta mo n yɔ nɛ enɔfuloŋ. 12Nɛ e naŋ bɛta n shuŋi kenya sasopo ko nɛ b ya doro mo alɛ gba nseŋ gberge mo n lar kudɔ na to n ya lɛ. 13Ndoŋ nna nɛ kudɔ na wura na fara a bishi mbe kumu le: ‘Naniere nuso nɛ meeŋ wora?’ Ndoŋ nna nɛ le be nfɛra ba mbe kumu to nɛ e kaŋɛ: ‘Meeŋ shuŋi m pibi shaso ere, ashere mo ere, baaŋ bunyaŋ mo.’ 14Ama paawuraana na ka ya wu kebia na nɛ b kaŋɛ abar: ‘Men keni, kudɔ ere wura be kapetɛjipo nde, men shin nɛ an mɔ mo nɛ asɔ na e ki anyeya.’ 15Ndoŋ nna nɛ b gberge mo n lar kudɔ na to n ya mɔ mo.” Nɛ Yesu bishi basa na le: “To, manɛ nɛ kudɔ na wura beeŋ wora paawuraana na? 16E beeŋ ba mɔ paawuraana na nseŋ ta ndibi sɔrso be kudɔ na n sa paawuraana popɔr.” Basa na ka nu kusɔ nɛ Yesu malga na nɛ b kaŋɛ le: 17“Ebɔrɛ e baa pete anyi.” Nɛ Yesu keni bumo nseŋ bishi bumo le: “Mannɛ le nɛ abɔrɛsibɛ na bee kaŋɛ:

‘Kejembu mo nɛ bepɔrpo kini na

e ba ki ebu na be kebonfu be gbaltɔlase lela na’ a?

18Esa kama nɛ e tɔr loŋ be kejembu so, e beeŋ buri to le burburbi nɛ ekama malɛ nɛ k tɔr mo so, e beeŋ bɛa to cheche.”

Lampo be keka be asheŋ

(Matiu 22:15-22; Maak 12:13-17)

19Mbraŋinipoana na nɛ bɔrɛmatapowuraana na ka pin fanɛ bumo nɛ Yesu bɔ keŋasa na nɛ b wora ania a fin kananɛ baaŋ wora m pɛ mo epul na kikɛ to. 20Ama bumo alɛ daa ŋana basa na nna. Nɛ b fara a tɛ mo nseŋ shuŋi basa fanɛ b kute n yɔ mo kutɔ fanɛ b ka la basa lela na n ya lute mo kɔnɔ nɛ e malga n da so nɛ b ta mo m bɔɔ gomena nɛ e daa ji na enɔ. 21Basa na ka ba nɛ b kaŋɛ mo le: “Eŋinipo, an nyi fo ka bee ji kashenteŋ nsaa ŋini basa kashenteŋ be ekpa na, fo alɛ maŋ kɔ ŋkpɛato, kagbene koŋwule nɛ fo kɔ a ŋini basa Ebɔrɛ be ekpa na. 22Amoso, kaŋɛ anyi, anyi be mbra na to k wɔtɔ fanɛ an baa ka lampo a sa Romebi be ewurgboŋ Siza ŋko k maŋ wɔtɔ loŋ?” 23Ama Yesu daŋ pin bumo be kɔnɔnu be kebishi na nseŋ kaŋɛ bumo le: “Men sa ma kemansherbi nɛ ŋ keni.” 24B ka bar kumo nɛ e bishi bumo le: “Esa mo be foto nɛ wanɛ be ketre e deŋ kumo so ere?” Nɛ basa na kaŋɛ: “Ewurgboŋ Siza peya.” 25Nɛ Yesu kaŋɛ bumo: “To, kumo ere, men baa ta asɔ nɛ a la Ewurgboŋ Siza peya a sa mo nsaa ta Ebɔrɛ malɛ peya a sa mo.” 26B daa maŋ tiŋ n ta mbe mmalga na n nya mo basa na to m pɛ. Kananɛ e daŋ sa bumo kamalga na be kifito na daŋ mɔ bumo kɔnɔ ga nɛ b lo to shruum.

B ka bishi Yesu ketiŋi luwu to be asheŋ

(Matiu 22:23-33; Maak 12:18-27)

27Kachako Sadusiebi, bumo nɛ baa kaŋɛ fanɛ ketiŋi luwu to maŋ wɔtɔ na be beko ba Yesu kutɔ m ba bishi mo kesheŋ ere ŋ kaŋɛ: 28“Eŋinipo, anebi Mosis sibɛ n sa anyi fanɛ nɛ enyɛn ta eche a maŋ nya ebi nseŋ wu ŋ ka eche na, enyɛn na mo sipo e ta ekulpoche na ŋ kurge mbia n sa mo da nɛ e wu na. 29To, basa koŋwule beshunu ko e daa wɔtɔ nɛ enimuso ta eche n wu a maŋ kurge mbia. 30Nɛ enyɔsopo na ta ekulpoche na n wu a maŋ nya mbia, nɛ esasopo ta mo a maŋ nya mbia. 31Loŋ koŋwule na e wora bumo beshunu na kikɛ loŋ hale nɛ bumo kikɛ ba wu a maŋ nya mbia. 32Kumo be kaman nɛ eche na malɛ ba wu. 33To, nɛ ketiŋiachɛ na, emo be eche e naaŋ baa la kache na? Ŋkpal manɛ so, bumo beshunu na malɛ kikɛ daŋ ta kache na ŋ ku so.”

34Nɛ Yesu kaŋɛ bumo le: “Durnya ere to be basa nɛ b wɔ ŋkpa to ere be benyɛn wɔtɔ nna a ta beche nɛ beche malɛ bee yɔ kakil to, 35ama benyɛn nɛ beche nɛ b daga ketiŋi luwu to a wɔ ŋkpa to jemanɛ na so na, maaŋ ba kaa ta beche ŋko m ba kaa yɔ kakil to. 36Ŋkpal manɛ so, b maaŋ naŋ tiŋ n wu, baaŋ baa wɔtɔ nna fanɛ emalaika nsaa la Ebɔrɛ be mbia ŋkpal b ka naŋ ba ŋkpa to so. 37To, anebi Mosis gba ŋini basa be ketiŋi luwu to na be asheŋ ashi kupumbi be asheŋ to, ndoŋ nɛ e daŋ tre Enyɛnpe fanɛ Eebraham be Ebɔrɛ nɛ Aizek be Ebɔrɛ nɛ Jeekɔb be Ebɔrɛ na. 38Ebɔrɛ maŋ la bubuni be Ebɔrɛ, e la basa nɛ b wɔ ŋkpa to be Ebɔrɛ nna, ŋkpal manɛ so, mo so nɛ basa kikɛ wɔ ŋkpa to.” 39Ndoŋ nna nɛ mbraŋinipoana na be beko kaŋɛ Yesu: “Eŋinipo, fo malga nɛnɛ.” 40Ŋkpal manɛ so, b daŋ ŋana kenaŋ n tiŋ m bishi mo kusɔ ko.

Esa nɛ Kristo na la be asheŋ

(Matiu 22:41-46; Maak 12:35-37)

41Nɛ Yesu bishi bumo le: “A ji nuso nna nɛ basa bee kaŋɛ fanɛ Ebɔrɛ be esa laraso Kristo na la Ewura Deevid mo Nanabi nna? 42Ŋkpal manɛ so, Deevid gbagba kaŋɛ ashi Nshɛ be Kawɔl na to fanɛ;

Enyɛnpe na kaŋɛ n Nyɛnpe le:

‘Chena ma jisoso nfe

43hale nɛ n ya ta fo doŋana m bɔɔ fo enɔ.’

44Deevid gbagba daŋ tre Kristo na Enyɛnpe nɛ nuso nɛ Kristo na bee wora a la mo nanabi?”

Yesu ka ji mbe bebɛsopo asoe to ŋkpal mbraŋinipoana so be asheŋ

(Matiu 23:1-36; Maak 12:38-40; Luuk 11:37-54)

45Ndoŋ nna nɛ e yili basa na kikɛ be anishito ŋ kaŋɛ mbe bebɛsopo le: 46“Men baa de mbraŋinipoana na so. Bumo e naa sha kebaabuu epiŋi tenteŋ a nite a kilgi to nɛ basa e baa tu bumo kebɛ to a chɔrɔ bumo bunyanso na. Bumo e naa sha kebaachena bunyaŋ be mbɛ so ashi nshɛrbuana to nseŋ naa sha kejigboŋ to be bunyanso be echenakpaana na. 47Bumo e naa puni bekulpocheana a suge bumo be nwu nsaa ta kabɔrɛkule tenteŋ kebirkɔnshiso a kule Ebɔrɛ na. Ŋkpal loŋ be asheŋ ere kikɛ so, bumo be kasogberge beeŋ baa shi a chɔ ekama peya.”

Currently Selected:

Luuk 20: GJNb

Highlight

Copy