Jɔn 8

[ 1Nɛ Yesu malɛ yɔ Ɔlifs be kebee so. 2Kare ka bee chɛ nɛ e naŋ ba bɔrɛlambu na to nɛ basa na kikɛ shɛr ŋ kulti mo nɛ e kilgi n chena a ŋini bumo abɔrɛsheŋ. 3Ndoŋ nna nɛ mbraŋinipoana na nɛ Efarisiana na bar kache ko b ka pɛ kesakalea to m ba shin nɛ e yili jimaŋ na be anishito nɛ b kaŋɛ Yesu le: 4“Eŋinipo, b pɛ kache ere kesakalea to nna geeŋ. 5Mbra na malɛ to Mosis kaŋɛ anyi fanɛ an kpa loŋ be beche na ajembu m mɔ. To, nɛ nuso nɛ fo alɛ kaŋɛ?” 6B daŋ bar le be kesheŋ bishiso ere nna nɛ b ba lute mo kɔnɔ n nya kusɔ ko n yili so n wu mo kulubi. Ama Yesu daŋ kilgi nna m murgi n ta mbe keshilbi n fara a sibɛ kasawule so. 7B ka kraa wɔtɔ a bishi mo na nɛ e niŋi to n yili ŋ kaŋɛ bumo: “Menyi be ekama nɛ e maŋ kɔ kulubi e fara ŋ kpa kache ere kejembu.” 8Kumo be kaman nɛ e naŋ murgi a sibɛ kasawule so. 9Yesu ka kaŋɛ loŋ na nɛ bumo nɛ b nu na fara a yɔ kukoko to. Benimu e daŋ fara loŋ hale nɛ Yesu nawule ya ka nɛ kache na malɛ kraa yil ndoŋ. 10Nɛ Yesu niŋi to m bishi mo: “Kache manɛ, b wɔ nnɛ? Esa kama maŋ ka nɛ e kaŋɛ fanɛ fo daga kasogberge a?” 11Nɛ kache na kaŋɛ Yesu: “Ebunyampo, esa kama maŋ ka.” Nɛ Yesu kaŋɛ mo: “To, ma alɛ gba maaŋ kaŋɛ fanɛ fo daga kasogberge. Baa yɔ, ama sa maŋ naa wora alubi.”]

Yesu ka la durnya be kefulto be asheŋ

12Yesu ka naŋ ya malga basa na kutɔ nɛ e kaŋɛ bumo le: “Ma e la durnya be kefulto. Esa kama nɛ e bɛ ma so maaŋ nite tentembiri to kikɛ, ama e beeŋ baa kɔ kefulto nɛ k bee sa ŋkpa.” 13Ndoŋ nna nɛ Efarisiana kaŋɛ mo: “Too, fo kumu so be shɛda nɛ fee ji na, amoso, asheŋ nɛ fee malga ere maŋ la kashenteŋ.” 14Nɛ Yesu kaŋɛ bumo: “Hale nɛ n ji ma kumu so be shɛda gba, asɔ nɛ mee malga ere kɔ kashenteŋ, ŋkpal manɛ so, n nyi kakpa nɛ n shi m ba nseŋ naa nyi kakpa nɛ mee yɔ, ama menyi ere maŋ nyi kakpa nɛ n shi m ba nɛ kakpa nɛ mee yɔ. 15Dimɛdi be ekpa so nɛ menyee bɔla a ji esa demu, ma ere maa ji esa kama demu. 16Hale nɛ n ji esa demu gba, ma demuji daa beeŋ baa kɔ ekpa, ŋkpal manɛ so, mannɛ n nawule nna, ma nɛ Etuto nɛ e shuŋi ma na nna. 17Menyi alɛ gbagba be mbra to nɛ b sibɛ fanɛ basa anyɔ baŋ ji kesheŋ koŋwule be shɛda, kesheŋ na la kashenteŋ nna. 18Ŋ gbagba bee ji ma kumu so be shɛda nɛ Etuto nɛ e shuŋi ma na malɛ gba bee ji ma shɛda.” 19Ndoŋ nna nɛ basa na bishi mo: “Nnɛ nɛ fo tuto wɔ?” Nɛ Yesu kaŋɛ bumo: “Men maŋ nyi ma, menyi alɛ maŋ nyi n Tuto gba. Men daa nyi ma nna, men daa beeŋ baa nyi n Tuto gba.”

20Bɔrɛlambu na to be kakpa nɛ k mata kaboŋ nɛ baa yili amansherbi be edekana na nɛ Yesu daŋ yili ŋ ŋini asheŋ ere kikɛ, ama esa kikɛ daa maŋ pɛ mo, ŋkpal manɛ so, mbe saŋɛ daa maŋ naŋ fo.

Basa ka maaŋ tiŋ n yɔ kakpa nɛ Yesu bee yɔ na be asheŋ

21Kede be kaman nɛ Yesu naŋ lɔŋɛ ŋ kaŋɛ bumo: “Meeŋ yɔ nɛ menyi e fin ma ŋ gben nseŋ wu menyi be alubi to. Kakpa nɛ ma ere bee yɔ na, menyi maaŋ tiŋ n yɔ ndoŋ.” 22Ndoŋ nna nɛ Juwebi na bishi abar: “E bee sha kemɔ mbe kumu nna so nɛ e yɛ: ‘Kakpa nɛ mee yɔ na, menyi maaŋ tiŋ n yɔ na’, ŋko nuso?” 23Nɛ Yesu naŋ ta mbe kamalga n chuge so ŋ kaŋɛ: “Kasawule ere nfe nɛ menyi ere shi, ama esoso nɛ ma ere shi, durnya ere to nɛ men shi, ama mannɛ durnya ere to nɛ ma ere shi. 24Amoso nɛ ŋ kaŋɛ menyi fanɛ menyeeŋ wu menyi be alubi to na. Menyi alɛ baa maŋ yirda fanɛ ma e la esa nɛ ŋ kaŋɛ fanɛ n la ere, menyeeŋ wu menyi be alubi to.” 25Ndoŋ nna nɛ b bishi mo: “Nɛ wanɛ e la fo bre?” Nɛ Yesu kaŋɛ bumo: “Kumo nɛ m baa wɔtɔ a kaŋɛ menyi sososo na kikɛ na. 26Asɔ damta wɔtɔ nɛ n yili amo so m malga menyi be asheŋ nseŋ ji menyi demu, ama esa nɛ e shuŋi ma na la Kashenteŋjipo nna. Ma alɛ, kusɔ nɛ mee nu ashi mo kutɔ nɛ mee ta a kaŋɛ durnya.” 27B daa maŋ pin fanɛ mo Tuto be asheŋ nɛ e daa kaŋɛ bumo na. 28Amoso, le nɛ Yesu daŋ kaŋɛ bumo: “Men kaŋ maŋ ma, Nyiŋgbasa Pibinyɛn so m mata kedibi so na, menyeeŋ pin esa nɛ ŋ kaŋɛ fanɛ n la ere, kumo alɛ be saŋɛ na so nɛ menyeeŋ pin fanɛ m maa wora shɛŋ ma kumu so, asɔ nɛ Etuto na bee ŋini ma nawule nɛ mee malga. 29Esa nɛ e shuŋi ma na malɛ maŋ yige ma n to, e wɔ ŋ kutɔ, ŋkpal manɛ so, saŋkikɛ kusɔ nɛ k bee par mo nɛ mee wora.”

Basa nɛ b la Eebraham be mbia gbagba be asheŋ

30Basa damta ka daŋ nu Yesu be mmalga na nɛ b yirda mo. 31Juwebi nɛ b daŋ yirda mo na, le nɛ Yesu daŋ kaŋɛ bumo: “Nɛ men baa bɛ ma keŋini ere so, menyeeŋ baa la ma bebɛsopo kashenteŋto. 32Saŋɛ na so, menyeeŋ pin kashenteŋ na nɛ kashenteŋ na e shin nɛ men lar kenyaya to.” 33Ndoŋ nna nɛ Juwebi na kaŋɛ mo le: “Eebraham mo nanabiana e la anyi, anyi ere maŋ naŋ ki esa kikɛ be anya, nɛ a ji nuso nna nɛ fee kaŋɛ fanɛ anyeeŋ lar kenyaya to?” 34Nɛ Yesu kaŋɛ bumo: “Ma e kaŋɛ menyi kashenteŋto na, esa kama nɛ e bee wora alubi la alubi be kenya nna. 35Kenya maŋ la laŋ to be esa saŋkikɛ mbaanaayɔ, ama ebi bre, laŋ to be esa nna saŋkikɛ mbaanaayɔ. 36Nɛ Ebɔrɛ Pibinyɛn baŋ lara fo kenyaya to, fo nya fo kumu kashenteŋto pasaa.

37N nyi men ka la Eebraham mo nanabiana, ama menyi alɛ bee sha kemɔ ma nna, ŋkpal manɛ so, men maa sha kesɔ ma keŋini. 38Asɔ nɛ n wu n Tuto na kutɔ be asheŋ nɛ mee malga nɛ menyi alɛ bee wora asɔ nɛ men nu ashi men tuto kutɔ.” 39Ndoŋ nna nɛ b kaŋɛ Yesu: “Eebraham e la an tuto.” Nɛ Yesu kaŋɛ bumo: “Nɛ men daa la Eebraham be mbia nna, men daa beeŋ baa wora asɔ nɛ Eebraham daŋ wora. 40Ama kumo nɛ menyee sha kemɔ ma na ŋkpal ŋ ka kaŋɛ menyi kashenteŋ nɛ n nu ashi Ebɔrɛ kutɔ so. Le be asheŋ nɛ Eebraham daŋ wora a? 41Asɔ nɛ men tuto bee wora nɛ menyee wora na.” Nɛ b kaŋɛ Yesu le: “Mannɛ ayurbi e la anyi. Etuto koŋwule nɛ an kɔ, mo alɛ e la Ebɔrɛ na.” 42Nɛ Yesu kaŋɛ bumo: “Nɛ Ebɔrɛ daa la men tuto nna, men daa beeŋ baa sha ma asheŋ, ŋkpal manɛ so, Ebɔrɛ kutɔ nɛ n shi m ba kaa wɔ nfe naniere na, m maŋ ba ŋ gbagba be kumu so. Mo e shuŋi ma. 43Men nyi kusɔ nɛ k ba nɛ men maa pin ma mmalga to ere a? Kusɔ nɛ k ba e la fanɛ men maaŋ tiŋ n nu amo. 44Men tuto e la alubipo na nɛ menyee sha kebaawora mbe aparsheŋ. Emɔpo e la mo sososo kikɛ, mo alɛ be shɛŋ maa ji kashenteŋ to, ŋkpal kashenteŋ ka maŋ wɔ mo to so. E baa ku efɛ, kananɛ mbe kapɔr du nɛ e bee ŋini, ŋkpal manɛ so, e la efɛpo nna nseŋ naa la efɛ kikɛ amo tuto. 45Ŋ ka bee ji kashenteŋ na so so nɛ men maa yirda ma na. 46Men be emo e naaŋ tiŋ ŋ ŋini kulubi kama nɛ n daŋ wora? To, nɛ kashenteŋ nɛ m baa ji, manɛ e ba nɛ men maa yirda ma? 47Esa kama nɛ e la Ebɔrɛ peya bee nu asɔ nɛ Ebɔrɛ bee kaŋɛ nna. Men ka maŋ la Ebɔrɛ peya so e shin nɛ men maa nu asɔ nɛ e bee kaŋɛ na.”

48Nɛ Juwebi na kaŋɛ mo: “Kashenteŋ nɛ an ji ŋ kaŋɛ fanɛ fo la Samɛrianyɛn nsaa kɔ kiyoyu lubi fo to na.” 49Nɛ Yesu kaŋɛ bumo: “Kiyoyu lubi kama maŋ wɔ ma to. N Tuto nɛ mee bunyaŋ nɛ menyi alɛ maa bunyaŋ ma. 50Ma ere gbagba maa fin kemaŋkura nna a sa ma kumu, esa ko e naa fin kumo, mo alɛ e naa ji ma asheŋ amo be ekpa so na. 51Ma e kaŋɛ menyi kashenteŋto na fanɛ nɛ esa baa ta ma kamalga na a wɔtɔ mbe kagbene to, e maaŋ wu kikɛ.” 52Ndoŋ nna nɛ Juwebi na kaŋɛ: “To, naniere nɛ an pin fanɛ kiyoyu lubi e wɔ fo to kashenteŋto, ŋkpal manɛ so, Eebraham nɛ anebiana na kikɛ wu n wu, ama kumo nɛ fee kaŋɛ fanɛ nɛ esa baŋ ta fo kamalga na n wɔtɔ mbe kagbene to, e maaŋ wu na. 53Fo chɔ an tuto Eebraham nna a? Mo nɛ anebiana na kikɛ wu. To, nɛ wanɛ nɛ fee tama fanɛ fo ere la?” 54Nɛ Yesu kaŋɛ bumo le: “Nɛ m baa maŋkura ma kumu, kumo ere ma kemaŋkura na maŋ kɔ kifi, ama n Tuto nɛ menyee tre menyi be Ebɔrɛ na e la esa nɛ e bee maŋkura ma. 55Men maŋ nyi mo, ama ma ere nyi mo. Nɛ ŋ kaŋɛ fanɛ m maŋ nyi mo, meeŋ baa la efɛpo fanɛ menyi, ma ere nyi mo nsaa ta mbe mmalga a wɔtɔ ma kagbene to. 56Men tuto Eebraham be kagbene daŋ fuli mo ga ŋkpal e ka daa shin nɛ e nya ma saŋɛ n wu so. Kashenteŋto malɛ, e wu kumo nɛ mbe kagbene fuli mo.” 57Nɛ Juwebi na kaŋɛ mo: “To, fo maŋ naŋ fo nfɛ adunu gba nɛ fo wu Eebraham a?” 58Nɛ Yesu kaŋɛ bumo: “Ma e kaŋɛ menyi kashenteŋto na fanɛ pɔɛŋ nɛ b kurge Eebraham nɛ n wɔtɔ.” 59E ka malga le ere nɛ b ta ajembu nɛ b kpa mo nɛ e ŋana mbe kumu nseŋ bɔl basa na to n lar bɔrɛlambu na to.

Currently Selected:

Jɔn 8: GJNb

Highlight

Copy