Jɔn 9

Yesu ka chɛ tanpo ko be asheŋ

1Yesu ka na a choŋ nɛ e wu kanyɛn ko b ka kurge mo tanpo. 2Ndoŋ nna nɛ mbe bebɛsopo bishi mo le: “Eŋinipo, kanyɛn ere gbagba be alubi so nɛ e tan ere ŋko mo nio nɛ mo tuto bre e wora alubi?” 3Nɛ Yesu kaŋɛ bumo: “Mannɛ kanyɛn ere gbagba be alubi so ŋko mo nio nɛ mo tuto be alubi so so nɛ e tan. E tan nna nɛ Ebɔrɛ e bɔla mo so ŋ ŋini basa mbe eleŋ be ashuŋ. 4Kefulto ka kraa wɔtɔ ere bre, a daga fanɛ an baa shuŋ esa nɛ e shuŋi ma na be ashuŋ. Kanyɛ bee biri a ba, kumo alɛ baŋ ba, esa maaŋ naŋ tiŋ n shuŋ shɛŋ. 5Ŋ ka kraa wɔ durnya to ere bre, ma e la durnya ere be kefulto.” 6E ka malga le n loge nɛ e tuu echɔl n lɛ kasawule m pɔ shishɛr nseŋ ta amo m mata kanyɛn na be anishi so, nseŋ kaŋɛ kanyɛn na: 7“Yɔ Sailowam be kepa to n ya fɔr amo n lɛ ndoŋ.” Sailowam be kifito e la Shuŋi. Ndoŋ nna nɛ kanyɛn na yɔ ndoŋ n ya fɔr nseŋ fara a wu a ba.

8Mo braana nɛ basa nɛ b daŋ wu mo nɛ e daa tase a kule na ka naŋ wu mo nɛ b bishi abar: “Mannɛ kanyɛn ere e daa tase a kule na a?” 9Nɛ beko kaŋɛ fanɛ mo nna nɛ beko malɛ kaŋɛ le: “Ayai, mannɛ mo nna, b duli abar nna.” Ndoŋ nna nɛ mo gbagba kaŋɛ: “Ma nna.” 10Nɛ b bishi mo: “To, nɛ nuso nɛ fo wora nɛ fo anishi bugi?” 11Nɛ e kaŋɛ bumo: “Kanyɛn nɛ baa tre Yesu na e pɔ shishɛr m mata ma anishi so nseŋ kaŋɛ ma fanɛ n ya fɔr ashi Sailowam. Ma alɛ ka baŋ ya fɔr nɛ n fara a wu epul na to.” 12Nɛ b bishi mo: “Nɛ kanyɛn na wɔ nnɛ?” Nɛ e yɛ: “M maŋ nyi.”

Efarisiana na ka bishi kechɛ na to be asheŋ

13Ndoŋ nna nɛ b keta kanyɛn nɛ e daŋ tan na n yɔ Efarisiana na be anishito. 14Kachɛ nɛ Yesu daŋ pɔ shishɛr na m bugi kanyɛn na be anishi na malɛ daa la kewushiachɛ nna. 15Nɛ Efarisiana na malɛ gba bishi mo kananɛ e wora n nya mbe anishi a wu. Nɛ e yɛ: “Depɔ nɛ e ta m mata ma anishi so nɛ n ya fɔr amo n lɛ nseŋ fara a wu na.” 16Ndoŋ nna nɛ Efarisiana na be beko kaŋɛ: “Kanyɛn na maŋ shi Ebɔrɛ kutɔ kashenteŋto, ŋkpal manɛ so, e maa bɛ kewushiachɛ be mbra na so.” Ndoŋ nna nɛ beko malɛ kaŋɛ: “Nuso nɛ alubipo bee wora a wora le be emamachi be asheŋ ere?” Ŋkpal le so kebarga to daŋ ba bumo to nna. 17Ade kikɛ be kaman nɛ b naŋ bishi kanyɛn na: “Manɛ nɛ fo alɛ kɔ nɛ fo kaŋɛ mbe asheŋ?” Nɛ kanyɛn na kaŋɛ: “Ma ere kutɔ e la anebi nna.” 18Ade kikɛ daŋ wora, ama Juwebi na kraa maa sha keyirda gba kuraa fanɛ kanyɛn na daŋ tan gba, ama b shuŋi nna n tre mo nio nɛ mo tuto pɔɛŋ. 19B ka ba nɛ b bishi bumo: “Men pibi nde a? Men kaŋɛ e daŋ tan nna, nuso nɛ a ji nɛ naniere nɛ e bee wu ere?” 20Ndoŋ nna nɛ kanyɛn na mo nio nɛ mo tuto na kaŋɛ Efarisiana na: “An nyi e ka la an pibi nseŋ naa nyi an ka kurge mo nɛ e tan na, 21ama kananɛ e wora a wu naniere ŋko esa nɛ e chɛ mo bre, an maŋ nyi. Men bishi mo gbagba nɛ e kaŋɛ menyi, ŋkpal manɛ so, mannɛ kebia e la mo.” 22Kanyɛn na mo nio nɛ mo tuto daŋ kaŋɛ loŋ nna ŋkpal b ka daa ŋana Juwebi be benimuana na so so, ŋkpal manɛ so, b daŋ kaŋɛ nna fanɛ ekama nɛ e bugi to ŋ kaŋɛ fanɛ Yesu e la Mesaya na, baaŋ ju mo nshɛrbuana na to be keluri to. 23Amoso nɛ mo nio nɛ mo tuto daŋ kaŋɛ fanɛ: “Mannɛ kebia nna, men bishi mo gbagba na.”

24Ndoŋ nna nɛ b naŋ tre kanyɛn nɛ e daŋ tan na kela nyɔsopo m ba kaŋɛ mo le: “Ji kashenteŋ n sa Ebɔrɛ kemaŋkura, ŋkpal manɛ so an nyi kanyɛn na ka la alubipo.” 25Nɛ kanyɛn na kaŋɛ bumo le: “To, ma ere maŋ nyi ŋko e la alubipo nna ŋko e maŋ la. Ama kusɔ nɛ m baa nyi e la fanɛ n daŋ tan nna, ama naniere mee wu.” 26Nɛ b bishi mo: “Nuso nɛ e wora fo? Nuso nɛ e wora m bugi fo anishi na?” 27Ndoŋ nna nɛ kanyɛn na kaŋɛ bumo: “Kumo nɛ n daŋ kekaŋɛ menyi na, menyi alɛ maa nu. Manɛ e ba nɛ menyi naa sha fanɛ n naŋ kaŋɛ menyi, ŋko menyi alɛ gba naa sha keki mbe bebɛsopo nna?” 28Ndoŋ nna nɛ b tege n tege mo nseŋ kaŋɛ mo: “Fo e baa la mbe ebɛsopo, anyi ere, Mosis be bebɛsopo e la anyi. 29An nyi Ebɔrɛ ka malga n sa Mosis, ama kanyɛn ere bre, anyi maŋ nyi kakpa nɛ e shi gba.” 30Ndoŋ nna nɛ kanyɛn na kaŋɛ: “Asheŋ nde walɛ! Men maŋ nyi kakpa nɛ e shi, ama mo alɛ tiŋ m bugi ma anishi. 31Anyi alɛ nyi fanɛ Ebɔrɛ maa nu a sa alubiworapoana, basa nɛ b kɔ kabɔrɛŋana nsaa wora mbe aparsheŋ na nawule nɛ e bee nu a sa. 32Durnya ka fara kikɛ anyi maŋ naŋ nu esa ka bugi esa nɛ b kurge mo tanpo be anishi kikɛ. 33Nɛ kanyɛn nɛ e bugi ma anishi ere daa maŋ shi Ebɔrɛ kutɔ nna, e daa maaŋ tiŋ n wora shɛŋ.” 34Nɛ basa na kaŋɛ: “Keni, baŋ yili fo kakurgeachɛ kikɛ nɛ fo wɔ alubi to m ba fo mbre nɛ fo ba kaa sha nɛ fo ŋini anyi asheŋ a?” B ka kaŋɛ mo loŋ n loge nɛ b ju mo nshɛrbuana na to be keluri to.

Kiyoyu to be ntaŋ be asheŋ

35Yesu nu b ka ju kanyɛn na nshɛrbuana na to be keluri to nseŋ ya tu mo kakpa ko m bishi mo: “Fo yirda Nyiŋgbasa Pibinyɛn na a?” 36Nɛ kanyɛn na bishi Yesu: “Ebunyampo, wanɛ e la mo? Kaŋɛ ma nɛ n yirda mo.” 37Nɛ Yesu kaŋɛ mo: “Fo teŋ wu mo gba, mo alɛ e naa malga fo kutɔ naniere na.” 38Ndoŋ nna nɛ kanyɛn na kaŋɛ: “Enyɛnpe, n yirda.” Kumo be kaman nɛ e gbir kumuli. 39Nɛ Yesu kaŋɛ: “M ba durnya ere to nna nɛ m ba ji basa demu nɛ betanpo e nya a wu nɛ bumo nɛ baa wu malɛ e tan.” 40Efarisiana ko daa yil ndoŋ nseŋ nu kusɔ nɛ e kaŋɛ na nseŋ bishi mo le: “Fee ŋini fanɛ anyi alɛ gba tan nna ŋko?” 41Nɛ Yesu kaŋɛ bumo: “Men daŋ tan nna, kulubi daa maaŋ baa wɔ menyi so, ama ŋkpal men ka bee kaŋɛ fanɛ menyee wu ere bre, menyi be alubi beeŋ baa kraa wɔ menyi so.”

Currently Selected:

Jɔn 9: GJNb

Highlight

Copy