Jɔn 19

1Ndoŋ nna nɛ Pailat ta Yesu n shin nɛ b kuya mo so. 2Nɛ esoji na ta ewidibi be ayabi n wora kuwurwuro m buu mbe kumu so. Kumo be kaman nɛ b ta kusɔbuuso peper kunɔkunɔ ko m buu mo 3nsaa yɔ a yɔ mo kutɔ n ya kaa kaŋɛ mo le: “Ebɔrɛ e sa Juwebi be Ewura na ŋkpa tenteŋ,” nseŋ kpa ŋ kpa mo etaŋ.

4Ade kikɛ be kaman nɛ Pailat naŋ lar ŋ kaŋɛ Juwebi na le: “Men keni, meeŋ ta mo m bar menyi nɛ men pin fanɛ ma ere maŋ wu kusɔ lubi kikɛ mo so nɛ k daga mbe kasogberge.” 5Yesu ka buu kuwurwuro na nɛ kusɔbuuso peper kunɔkunɔ na m ba lar nɛ Pailat kaŋɛ basa na le: “To, mo nde!” 6Bɔrɛmatapowuraana na nɛ bumo be bekumpo na ka baŋ wu mo nɛ b ponte ŋ kaŋɛ: “Gbir mo m mata kedibi largato so, gbir mo m mata kedibi largato so!” Ndoŋ nna nɛ Pailat kaŋɛ bumo: “Men gbagba e keta mo n ya gbir m mata kedibi largato so, ŋkpal manɛ so, ma ere maŋ wu kulubi mo so nɛ esa beeŋ kpal kumo so ŋ gberge mo kusoe.” 7Nɛ Juwebi na naŋ kaŋɛ mo: “An kɔ mbra ko nɛ k bee ŋini fanɛ a daga kanyɛn ere ka wu ŋkpal e ka bee tre mbe kumu Ebɔrɛ Pibinyɛn so.”

8Pailat ka nu loŋ na nɛ kufu naŋ pɛ mo n ti so. 9Nɛ e naŋ bɛta n luri mbe lambu to n ya bishi Yesu: “Nnɛ nɛ fo shi?” Ama Yesu daa maŋ tuge mo. 10Nɛ Pailat bishi mo: “Fo la ma to nna a? Fo maŋ nyi fanɛ ŋ kɔ eleŋ nɛ n tiŋ n shin nɛ b gbir fo m mata kedibi largato so ŋko?” 11Nɛ Yesu kaŋɛ mo le: “Nɛ Ebɔrɛ daa maŋ sa fo eleŋ ma so nna, fo daa maaŋ baa kɔ eleŋ ma so. Esa nɛ e ta ma m bɔɔ fo enɔ ere malɛ be kulubi e shi a chɔ feya.” 12Pailat ka nu kesheŋ na nɛ e wora ania nɛ e shin nɛ Yesu e nya mbe kumu a yɔ, ama Juwebi na daa maŋ shuli nsaa ponte a kaŋɛ le: “Fo baŋ shin nɛ kanyɛn ere nya mbe kumu n yɔ jiga, kumo ere mannɛ fo teri e la Ewurgboŋ Siza, ŋkpal manɛ so, esa kama nɛ e bee tre mbe kumu ewura bee kɔ Ewurgboŋ Siza be eleŋ nna na.”

13Pailat ka nu loŋ na nɛ e keta Yesu n lar lambu na to m ba kelɔnɛ so m ba chena demujipowura be echenakpa nɛ baa tre Demuji be Guŋgɔni na. Juwebi be ŋgbar to baa tre kumo Gabata. 14Kebansonchoŋ be Kebelaseachɛ e daa la nɛ kumo be saŋɛ malɛ daa la kapiidi. Amo be saŋɛ na nɛ Pailat kaŋɛ Juwebi na: “Menyi be ewura nde.” 15Ndoŋ nna nɛ b ponte ŋ kaŋɛ: “Men mɔ mo, men mɔ mo. Men gbir mo m mata kedibi largato so!” Nɛ Pailat bishi bumo: “Ŋ gbir menyi be ewura m mata kedibi largato so a?” Nɛ bɔrɛmatapowuraana na kaŋɛ mo le: “Anyi maŋ kɔ ewura kama n naŋ ti Siza so.” 16Ade kikɛ be kaman nɛ Pailat ta mo m bɔɔ bumo enɔ fanɛ b ya gbir mo m mata kedibi largato so.

B ka gbir Yesu m mata kedibi largato so be asheŋ

(Matiu 27:32-44; Maak 15:21-32; Luuk 23:26-43)

17Ndoŋ nna nɛ esoji na keta Yesu n lar n choŋ. B daŋ shin nɛ e lar ndoŋ nna n sulɔ mbe kedibi largato m ba fo kakpa nɛ baa tre Kumuwibi be Kakpa na. Juwebi bee tre ndoŋ Gɔlgata. 18Ndoŋ nɛ b daŋ gbir mo m mata kedibi largato so na. B daŋ gbir basa anyɔ ko gba ndibi largatoana so nna n ti mo so. Yesu e daa wɔ nferinto nɛ ede wɔ mbe kaba ere so nɛ ede malɛ wɔ kaba ere so. 19Ndoŋ nna nɛ Pailat shin nɛ b sibɛ kasibɛ ŋ gbir m mata mbe kedibi largato na so a kaŋɛ le:

“NAZARƐT BE YESU NƐ E LA JUWEBI BE EWURA NA NDE.”

20Juwebi na be bedamta daŋ kraŋ kasibɛ na, ŋkpal manɛ so, kakpa nɛ b daŋ gbir Yesu m mata kedibi largato so na daŋ mata kade to nna, kumo be kaman b daŋ sibɛ kesheŋ na Juwebi be ŋgbar to nɛ Romebi be ŋgbar to nɛ Griikebi be ŋgbar to nna. 21Bɔrɛmatapowuraana na ka wu kasibɛ na loŋ na nɛ b ya kaŋɛ Pailat: “Sa maŋ shin nɛ b sibɛ fanɛ Juwebi be Ewura, shin nɛ b sibɛ fanɛ kanyɛn ere kaŋɛ fanɛ mo e la Juwebi be Ewura na.” 22Nɛ Pailat kaŋɛ bumo: “Kusɔ nɛ n shin nɛ b sibɛ nɛ b sibɛ na.”

23Esoja na ka gbir Yesu m mata kedibi largato na so n loge nɛ b ta mbe asɔbuuso na m barga amo to ntuŋ nna so nɛ soja kama e nya kukoŋwule nseŋ ka asɔbuuso na be kumo nɛ k daa maa kɔ bamurgi nseŋ daa la kukoŋwule peŋgeleŋ na. 24Esoja na ka ta kumo nɛ b kaŋɛ abar le: “Men sa maŋ shin nɛ an kpɛa kumo to. Men shin nɛ an to beri ŋ keni emo nɛ e beeŋ nya kumo.” B daŋ wora loŋ nna nɛ kusɔ nɛ abɔrɛsibɛ na bee kaŋɛ fanɛ: “B daŋ barga ma asɔbuuso to nna n sa abar nseŋ to beri a fin ma piŋi” na e bɔla. Amoso, kusɔ nɛ esoji na daŋ wora nna na. 25Yesu mo nio nɛ mo niokar nɛ Mɛɛri nɛ e daa la Kliopas be eche na nɛ Mɛɛri Magdalin daŋ ba yili nna n taga kedibi largato na to. 26Yesu ka wu mo nio ndoŋ nseŋ naŋ wu ebɛsopo nɛ e daa sha ga na gba ka yil n taga to ndoŋ nɛ e kaŋɛ mo nio le: “Kache manɛ, keni fo pibi nde.” 27Kede be kaman nɛ e kaŋɛ ebɛsopo na malɛ: “Fo nio nde.” Baŋ yili kumo be kamɔnchɛ na kikɛ nɛ ebɛsopo na keta Yesu mo nio n yɔ mo pe nɛ e ya kaa wɔtɔ.

Yesu be luwu be asheŋ

(Matiu 27:45-56; Maak 15:33-41; Luuk 23:44-49)

28Asheŋ ere kikɛ ka wora n choŋ nɛ Yesu pin loŋ nsaa sha fanɛ abɔrɛsibɛ na e bɔlɔ so nɛ e kaŋɛ le: “Achukoŋ kɔ ma.” 29Ndoŋ nna nɛ b ta kiche m pɔlɔ nsa nyannyanso ko ka daa wɔ kusɔ to a yil ndoŋ to nseŋ ta hisɔp be kedibi m maŋ kiche na so n yɔ Yesu be kɔnɔ ase. 30Yesu ka pipe nsa nyannyanso na nɛ e kaŋɛ: “Asheŋ loge.” E ka kaŋɛ le ere n loge nɛ e kur mbe kumu n yuu nseŋ wu.

31Kumo be kachɛ na daa la Kebelaseachɛ nna nɛ kumo be ŋklade malɛ daa la Kewushiachɛgboŋ ko. Ŋkpal Juwebi na malɛ ka daa maa sha basa nɛ b daŋ gbir m mata ndibi na so be eyurana na ka shir a wɔ ndibi largatoana na so ŋkpal kewushiachɛ na so, b daŋ ya kaŋɛ Pailat nna fanɛ e shin nɛ b buri m buri basa na be aya nseŋ lara n lara bumo be eyurana na ndibi largatoana na so. 32Nɛ Pailat sa bumo ekpa nɛ esoji na yɔ n ya buri basa nɛ b daŋ gbir m mata Yesu na be ejuŋkparso be aya nseŋ buri enyɔsopo na malɛ gba peya. 33Ama b ka ba Yesu kutɔ nɛ e teŋ wu, amoso, b daa maŋ buri mo ere be aya. 34Esoja na be ekoŋwule nawule e daŋ baŋ ta kekpa n da Yesu be kekel so n futi, nɛ ŋklaŋ nɛ nchu kleŋklembi ko lar epul na to. 35Esa nɛ e daŋ wu kesheŋ na e malga kumo be asheŋ, saŋɛ na so menyi alɛ gba beeŋ yirda. Kusɔ nɛ e malga na la kashenteŋ nna. Nɛ mo alɛ gba nyi e ka bee ji kashenteŋ. 36B ka daa maŋ buri Yesu be aya na daŋ wora loŋ nna nɛ abɔrɛsibɛ nɛ a bee kaŋɛ fanɛ: “Mbe kuwibi kama maaŋ bu to” na e bɔlɔ so. 37Abɔrɛsibɛ na to be kaboŋ ko gba bee kaŋɛ fanɛ: “Baaŋ keni emo nɛ b ta kusɔ n da na.”

Yesu be kepuli be asheŋ

(Matiu 27:57-61; Maak 15:42-47; Luuk 23:50-56)

38Ade be kaman nɛ Josɛf nɛ e daŋ shi Arimatiya na ba kule Pailat fanɛ e shin nɛ e lara Yesu be kebuni na. Josɛf ere daa la Yesu be ebɛsopo na, ama wulo to nɛ e daa bɛ mo so, ŋkpal manɛ so, e daa ŋana Juwebi be benimuana na nna. Ndoŋ nna nɛ Pailat sa ekpa fanɛ e ya ta Yesu be eyur na nɛ e yɔ n ya ta kumo. 39Nikodimɔs nɛ e daŋ keyɔ Yesu kutɔ kiidiso kachako na nɛ Josɛf na e daŋ yɔ. Nikodimɔs daŋ ta etulale mo nɛ baa tre mir nɛ alowe nɛ b kɔ a gbiti bubuni so nɛ baa dese a chɛr na be weato nna m ba. Amo be egbɛ daa wɔ fanɛ kekargato be pɔŋ kalfa. 40Ndoŋ nna nɛ bumo, basa anyɔ na ta etulale na n wɔtɔ kesaŋɛ lela ko to nseŋ ta kumo m mea Yesu be eyur na, ŋkpal manɛ so, loŋ nɛ Juwebi bee wora bubuni a puli. 41Kudɔbi ko daa wɔ kakpa nɛ b daŋ gbir Yesu m mata kedibi largato so na nɛ kebeelaŋ be nchaŋ popɔr ko nɛ b daa maŋ naŋ ta ebuni kama n nase to malɛ daa wɔ kudɔbi na to. 42Amoso, ŋkpal kumo be kachɛ na ka daa la Juwebi be Kebelaseachɛ nɛ ŋkpal nchaŋ na ka taga to na so, b daŋ ta Yesu nna n nase kumo to.

Currently Selected:

Jɔn 19: GJNb

Highlight

Copy