Jɔn 18

Kananɛ b pɛ Yesu be asheŋ

(Matiu 26:47-56; Maak 14:43-50; Luuk 22:47-53)

1Yesu ka kule mbe kabɔrɛkule na n loge nɛ mo nɛ mbe bebɛsopo na lar ndoŋ n yɔ Kidrɔn be ketaŋɛ be kaba ndoŋ. Ketaŋɛ na be kaba ndoŋ malɛ daa kɔ kupo ko nɛ Yesu nɛ mbe bebɛsopo na ya luri kupo na to. 2Judas edebɔrpo na daa nyi kakpa nɛ b yɔ na, ŋkpal manɛ so, ndoŋ daa la kakpa nɛ Yesu nɛ mbe bebɛsopo na daa tiŋ a yɔ nna. 3Amoso, ndoŋ nɛ Judas daŋ keta esoji be katuŋ ko nɛ bɔrɛlambu to be bekumpo ko mo nɛ bɔrɛmatapowuraana na nɛ Efarisiana na daŋ shuŋi na n yɔ. B daa kɔ akɔsɔ nɛ mbulpi nɛ efitila to nna. 4Yesu daa nyi asɔ nɛ a daa beeŋ nya mo kikɛ, amoso, e daŋ lar m ba anishito nna m ba bishi bumo le: “Wanɛ nɛ menyee fin?” 5Nɛ b yɛ: “Nazarɛt be Yesu na.” Nɛ Yesu kaŋɛ: “Ma nna na.” Saŋɛ na so nɛ Judas edebɔrpo na yil bumo to ndoŋ. 6Yesu ka daŋ kaŋɛ fanɛ: “Ma nna na” na, b daŋ lar kamanto nna gbrɛ n tɔr kasawule. 7Ndoŋ nna nɛ e naŋ laŋɛ m bishi bumo: “Wanɛ nɛ menyee fin?” Nɛ b yɛ: “Nazarɛt be Yesu na.” 8Nɛ Yesu kaŋɛ bumo: “N teŋ kaŋɛ menyi fanɛ ma nna na, ama nɛ ma nɛ men baa fin bre, men shin nɛ bede bre e baa yɔ.” 9E daŋ kaŋɛ loŋ nna nɛ mmalga nɛ e daŋ malga saŋko fanɛ: “Etuto, bumo nɛ fo ta m bɔɔ ma enɔ na be ekama maŋ foe ma enɔ to” na e bɔla. 10Ndoŋ nna nɛ Saimɔn Pita nɛ e daa yil ndoŋ a kɔ tokobi to na pe kumo ŋ ŋe bɔrɛmatapo nimuso be kenya ko be jisoso be kusoe n chuge. Kenya na be ketre e daa la Malkes. 11Ndoŋ nna nɛ Yesu kaŋɛ Pita: “Bɛta fo tokobi na n wɔtɔ kumo be efar to. Fee tama fanɛ m maa sha keji tɔrɔ nɛ n Tuto yili fanɛ n ji na ŋko nuso?”

B ka yɛr Yesu Anas be anishito be asheŋ

(Matiu 26:57; Maak 14:53; Luuk 22:54)

12Kede be kaman nɛ esoji na nɛ bumo be enimu nɛ Juwebi be bekumpo na pɛ Yesu ŋ kre mo nseŋ ta mo n yɔ Anas kutɔ pɔɛŋ. 13Anas daa la Kayafas nɛ e daa la bɔrɛmatapo nimuso amoafɛ na mo sha nna. 14Kayafas koŋwule na malɛ e daŋ kaŋɛ Juwebi na fanɛ nɛ esa koŋwule wu n sa basa bɔ efuli ere kikɛ ka mur na.

Pita be kelar Yesu kaman be asheŋ

(Matiu 26:69-70; Maak 14:66-68; Luuk 22:55-57)

15B ka daŋ pɛ Yesu a yɔ na nɛ Saimɔn Pita nɛ ebɛsopo ko bɛ mo so. Ebɛsopo na nɛ bɔrɛmatapo nimuso na daa nyi abar nna nɛnɛ, amoso, mo ere daŋ bɛ Yesu so nna n luri bɔrɛmatapo nimuso na be laŋ na to. 16Ama Pita bre daŋ shir a yil kabuna to nna ashi kowu. Ndoŋ nna nɛ ebɛsopo nɛ mo nɛ bɔrɛmatapo nimuso na nyi abar na naŋ lar kowu n ya malga kebichebi nɛ e daa yil kabuna to a de so na kutɔ nseŋ keta Pita n luri laŋ na to. 17Pita ka daa yil ndoŋ na nɛ kebichebi na bishi mo le: “Kanyɛn na be bebɛsopo na be eko e la fo alɛ gba ŋko?” Nɛ Pita kaŋɛ mo le: “M-m, m maŋ la mbe ebɛsopo.” 18Awo daa wɔtɔ nna, amoso, anya na nɛ bekumpo na daŋ ta adundumbi nna m puga edɛ a yil ŋ kulti amo a wɔl. Saŋɛ na so nɛ Pita malɛ gba yil ndoŋ a wɔl edɛ na.

Bɔrɛmatapowura nimuso na ka bee bishi Yesu asheŋ be asheŋ

(Matiu 26:59-66; Maak 14:55-64; Luuk 22:66-71)

19Saŋɛ ere malɛ so nɛ bɔrɛmatapo nimuso na wɔtɔ a bishi Yesu mbe bebɛsopo nɛ mbe keŋini be asheŋ. 20Nɛ Yesu kaŋɛ mo: “N daa bugi to a malga nna a sa ekama. Nshɛrbuana na to ŋko bɔrɛlambu na to, kakpa nɛ Juwebi kikɛ bee kaa shɛr na nɛ n daa malga saŋkikɛ, n daa maa malga shɛŋ wulo to kikɛ. 21Nɛ manɛ e ba nɛ fo naa bishi ma le be asheŋ ere? Bishi bumo nɛ b daŋ nu ma mmalga na nɛ b kaŋɛ fo, ŋkpal manɛ so, m baa nyi fanɛ b nyi asheŋ nɛ n daa malga na.” 22Yesu ka malga le ere n loge nɛ bekumpo nɛ b daa yil ndoŋ na be eko kpa mo etaŋ nseŋ bishi mo le: “Le nɛ baa malga bɔrɛmatapo nimuso kutɔ a?” 23Ndoŋ nna nɛ Yesu kaŋɛ mo: “Nɛ m malga nna n da so, feeŋ tiŋ m bugi to ŋ kaŋɛ ekpa mo so nɛ m malga n foe, ama nɛ m maŋ malga nna n foe, manɛ e ba nɛ fee ŋmɛa ma?” 24B daŋ kraŋ kre Yesu loŋ nna nɛ Anas shin nɛ b yɛr mo bɔrɛmatapo nimuso Kayafas kutɔ.

Pita ka naŋ lar Yesu kaman be asheŋ

(Matiu 26:71-75; Maak 14:69-72; Luuk 22:58-62)

25Jemanɛ ere kikɛ so nɛ Saimɔn Pita yil a wɔl edɛ na nɛ basa bishi mo le: “Kanyɛn na be ebɛsopo na be eko e la fo alɛ gba ŋko?” Ndoŋ nna nɛ e chɛ ŋ kaŋɛ: “M-m, m maŋ la mbe ebɛsopo.” 26Ndoŋ nna nɛ bɔrɛmatapo nimuso na be anya na be eko nɛ e daa la kenya mo nɛ Pita daŋ ŋe mbe kusoe n chuge na be esa na bishi Pita le: “Mannɛ fo nɛ kanyɛn na nɛ n wu kupo na to nna a?” 27Ndoŋ nna nɛ Pita naŋ laŋɛ n chɛ fanɛ mannɛ mo e daa la. Epul na malɛ to nɛ koshinyɛn boŋ.

B ka yɛr Yesu Gomena Pailat be anishito be asheŋ

(Matiu 27:1-2, 11-14; Maak 15:1-5; Luuk 23:1-5)

28Juwebi na ka bar Yesu Kayafas pe nɛ b naŋ keta mo n lar ndoŋ n yɔ Romebi be gomena be lambu to. Saŋɛ na so nɛ kare bee chɛ, amoso, ŋkpal daŋkare be eyurpi be kenya so, Juwebi na daa maŋ luri gomena na be lambu na to, ŋkpal manɛ so, b daa sha ketiŋ n ji Kebansonchoŋ be kejibi na nna. 29Amoso, Gomena Pailat daŋ lar nna m ba bumo kutɔ m ba bishi bumo le: “Nuso be kulubi nɛ men wu kanyɛn ere so?” 30Ndoŋ nna nɛ b kaŋɛ Pailat: “E daa maŋ la alubiworapo nna, an daa maaŋ ta mo m ba bɔɔ fo enɔ.” 31Nɛ Pailat kaŋɛ bumo le: “Men gbagba e ta mo a yɔ n ya bɔla men gbagba be mbra so n ji mo demu n wɔtɔ luwu be kasogberge to.” Nɛ Juwebi na kaŋɛ mo: “An gbagba maŋ kɔ ekpa nɛ an tiŋ m mɔ esa ai.” 32Le be asheŋ ere daŋ wora nna nɛ asheŋ nɛ Yesu daŋ malga a laŋɛ luwu nɛ e daa beeŋ wu na be kaplɛa so na e bɔlɔ so.

33Ndoŋ nna nɛ Pailat naŋ bɛta n luri mbe lambu to nseŋ tre Yesu n ya bishi mo le: “Fo e la Juwebi be Ewura na a?” 34Nɛ Yesu bishi mo: “Fo gbagba be nfɛra to nɛ kesheŋ ere shi ŋko basa ko e malga ma asheŋ ŋ ŋini fo?” 35Nɛ Pailat bishi mo: “N la Juw nna a? Fo gbagba be basa nɛ fo bɔrɛmatapowuraana e ta fo m bɔɔ ma enɔ. Manɛ nɛ fo wora?” 36Nɛ Yesu kaŋɛ mo le: “Ma kuwurji maŋ la durnya ere to peya. Nɛ k daa la durnya ere to peya nna, ma anya daa beeŋ kɔ n sɔ ma ashi Juwebi ere be enɔ to, ama ma kuwura na malɛ shi kaboŋ pɔtɛ nna.” 37Ndoŋ nna nɛ Pailat bishi mo: “Kumo ere, ewura e la fo nna ŋko?” Nɛ Yesu kaŋɛ mo: “Kumo nɛ fo baa kaŋɛ na. Kesheŋ nɛ mee sha kekaŋɛ ere so nɛ b kurge ma. Kumo koŋwule na malɛ so nɛ m ba durnya ere to fanɛ m ba malga kashenteŋ na be asheŋ. Esa kama malɛ nɛ e wɔ kashenteŋ na to bee nu nna a sa ma.” 38Nɛ Pailat bishi mo: “Manɛ e la kashenteŋ?”

B ka yɛ Yesu daga luwu be asheŋ

(Matiu 27:15-31; Maak 15:6-20; Luuk 23:13-25)

Pailat ka bishi Yesu loŋ nɛ e naŋ lar n yɔ Juwebi na kutɔ n ya kaŋɛ bumo le: “Ma ere maŋ wu shɛŋ mo so nɛ k daga b ka gberge mo kusoe.

39Ama menyi be daŋkare ko bee ŋini fanɛ a daga fanɛ Kebansonchoŋ be kejigboŋ be jemanɛ kikɛ to n lara menyi be keparso be esa ashi kabuti to n sa menyi. Amoso, menyee sha fanɛ n yige Juwebi be ewura na n sa menyi a?” 40Ndoŋ nna nɛ b ponte awɔrso ŋ kaŋɛ: “Ayai, mannɛ mo nɛ anyee sha. Barabas nɛ anyee sha.” Barabas ere daa kɔ ewura be eleŋ nna kelantokɔ to.

Currently Selected:

Jɔn 18: GJNb

Highlight

Copy