Jɔn 20

Yesu be ketiŋi luwu to be asheŋ

(Matiu 28:1-8; Maak 16:1-8; Luuk 24:1-12)

1Kewushiachɛ na ka ji ŋ klade Alediachɛ kare ka maŋ naŋ chɛ n loge nɛnɛ nɛ Mɛɛri Magdalin yɔ nchaŋ na akpa n ya wu fanɛ kejembu nɛ b daŋ ta ŋ kuŋ nchaŋ na be kɔnɔ so na maŋ naŋ kuŋ kɔnɔ na so. 2E ka wu loŋ na nɛ e kilgi n shile m ba Saimɔn Pita nɛ ebɛsopo nɛ Yesu daa sha na kutɔ m ba kaŋɛ bumo le: “B ta Enyɛnpe ashi nchaŋ na to, anyi alɛ maŋ nyi kakpa nɛ b ta mo n wɔtɔ.”

3Ndoŋ nna nɛ Pita nɛ ebɛsopo mo na pɛ nchaŋ na akpa be ekpa. 4Bumo benyɔ na kikɛ daa shile nna, ama ebɛsopo mo na daŋ shile nna n sɔ kejuŋkpar n ya fo ndoŋ pɔɛŋ nɛ Pita fo. 5Ama e daa maŋ luri nchaŋ na to, e daŋ murgi nawule nna ŋ keni to n wu kesaŋɛ na ka dese. 6Ndoŋ nna nɛ Saimɔn Pita nɛ e daa wɔ kaman na ba m ba luri nchaŋ na to. 7Mo alɛ gba daŋ wu kesaŋɛ na ka dese ndoŋ nseŋ naŋ wu kumo nɛ b daŋ ta m mea Yesu be kumu na gba ka dese. K daa maŋ dese m mata kesaŋɛ mo na nseŋ daŋ bɔɔ to a dese kumo nawule. 8Ndoŋ nna nɛ ebɛsopo mo nɛ e daŋ juŋkpar n fo nchaŋ na akpa na malɛ gba luri to n ya wu asɔ na nseŋ yirda. 9B daa maŋ pin ashi abɔrɛsibɛ na to fanɛ Yesu beeŋ tiŋi luwu to. 10Bebɛsopo na ka wu asheŋ ere n loge nɛ b bɛta n yɔ epe.

Yesu ka lar Mɛɛri so be asheŋ

(Matiu 28:9-10; Maak 16:9-11)

11Bumo kikɛ ka choŋ n loge nɛ Mɛɛri yil nchaŋ na ase a shu. E daa yil ndoŋ a shu nna nseŋ naŋ bɛta n ya jule ŋ keni nchaŋ na to 12n wu emalaika anyɔ ka buu asɔ fuful a tase kakpa nɛ Yesu be kebuni na daa dese na. Eko daa tase kakpa nɛ Yesu be kumu ase daa wɔ na nɛ eko malɛ tase aya ase. 13Ndoŋ nna nɛ b bishi Mɛɛri le: “Kache manɛ, manɛ e ba nɛ fee shu?” Nɛ e kaŋɛ bumo: “B ta n Nyɛnpe nna, ma alɛ maŋ nyi kakpa nɛ b ta mo n wɔtɔ.” 14E ka malga le n loge nseŋ gbɛ ŋ keni kaman nɛ e wu Yesu ka yil, ama e daa maŋ pin fanɛ Yesu nna. 15Nɛ Yesu bishi mo: “Kache manɛ, manɛ e ba nɛ fee shu, wanɛ nɛ fee fin?” Mɛɛri daa nyi fanɛ kudɔbi na be ekenipo nna nɛ e kaŋɛ: “Ebunyampo, jande, nɛ fo ta mo nna, fo ŋini ma kakpa nɛ fo ta mo n nase.” 16Ndoŋ nna nɛ Yesu tre mo: “Mɛɛri.” Nɛ Mɛɛri kilgi a yɔ Yesu be kaba so nseŋ boŋ to Juwebi be ŋgbar to ŋ kaŋɛ: “Rabonai!” Kumo be kifito e la eŋinipo. 17Nɛ Yesu kaŋɛ mo: “Sa maŋ pɛ ma to, ŋkpal manɛ so, m maŋ naŋ bɛta n yɔ esoso Etuto na kutɔ. Ama yɔ n niopibiana na kutɔ n ya kaŋɛ bumo fanɛ mee bɛta nna a yɔ esoso n Tuto nɛ men Tuto nɛ ma Ebɔrɛ nɛ menyi be Ebɔrɛ kutɔ.” 18Ndoŋ nna nɛ Mɛɛri Magdalin ta le be baru ere n yɔ bebɛsopoana na kutɔ n ya kaŋɛ bumo fanɛ e wu Enyɛnpe na nɛ e kaŋɛ mo kananɛ e kaŋɛ na.

Yesu ka lar mbe bebɛsopo so be asheŋ

(Matiu 28:16-20; Maak 16:14-18; Luuk 24:36-49)

19Alediachɛ na be kaaseso nɛ bebɛsopo na kikɛ shɛr kaboŋ koŋwule nseŋ ti mbuna ŋkpal b ka daa ŋana Juwebi be benimuana na so so, nɛ Yesu ba yili bumo to nseŋ kaŋɛ bumo le: “Kagbenewushi e baa wɔ menyi to.” 20E ka malga loŋ n loge nɛ e ta mbe enɔana nɛ mbe kekel ŋ ŋini bumo amo be amaŋana na. Bebɛsopo na ka wu Enyɛnpe na nɛ bumo be ŋgbene fuli bumo ga. 21Nɛ Yesu naŋ kaŋɛ bumo: “Kagbenewushi e baa wɔ menyi to. Kananɛ Etuto na shuŋi ma na nɛ ma alɛ gba bee shuŋi menyi na.” 22Kede be kaman nɛ e gberge afu n wɔtɔ bumo so nseŋ kaŋɛ le: “Men sɔ Kiyoyu Cheeŋ na.” 23Kede be kaman nɛ e naŋ kaŋɛ bumo le: “Bekama nɛ men ta bumo be alubi m paŋ beeŋ nya amo be ketampaŋ nɛ bekama malɛ nɛ men maŋ ta m paŋ, maaŋ nya ketampaŋ.”

Yesu nɛ Tɔmas be asheŋ

24Yesu ka daŋ ba bebɛsopo na kutɔ na nɛ Tɔmas, bumo kuduanyɔ na to be emo nɛ baa tre Kaborobi na bre maŋ wɔtɔ. 25Kumo be kaman nɛ bebɛsopo na kaŋɛ mo fanɛ b wu Enyɛnpe na nɛ e kaŋɛ bumo le: “M ba maŋ wu anyembi na be amaŋ na mbe enɔana to nseŋ ta ma keshilbi n wɔtɔ kakpa nɛ anyembi na daŋ luri na nseŋ naŋ ta ma enɔ n wɔtɔ mbe kekel na to ŋ keni, m maaŋ yirda kesheŋ ere.”

26Kumo be bɔkwe be kaman nɛ mbe bebɛsopo na naŋ shɛr a wɔ ebu to nɛ Tɔmas gba wɔ bumo to kamɔnchɛ. B daŋ ber mbuna na kikɛ so nna, ama Yesu daŋ ba yili bumo to nna nseŋ kaŋɛ bumo le: “Kagbenewushi e baa wɔ menyi to.” 27Kumo be kaman nɛ e kaŋɛ Tɔmas le: “Tɔmas, ta fo keshilbi n wɔtɔ ma nfe, keni ma enɔana so. Teŋi fo enɔ to n ta n wɔtɔ ma kekel to ŋ keni. Yirda nsaa maa wora shikashika.” 28Ndoŋ nna nɛ Tɔmas kaŋɛ Yesu le: “N Nyɛnpe nɛ ma Ebɔrɛ!” 29Nɛ Yesu kaŋɛ mo: “Fo ka wu ma so nɛ fo yirda na, ama nɛfa la bekama nɛ b maŋ wu nseŋ yirda na peya nna.”

30Yesu daŋ wora emamachisheŋ damta mbe bebɛsopoana na be anishito nɛ b maŋ sibɛ amo n wɔtɔ kawɔl ere to. 31Ama b sibɛ ade ere nna nɛ men yirda fanɛ Yesu e la Mesaya na, Ebɔrɛ Pibinyɛn na, nɛ menyi alɛ yirda loŋ, men beeŋ nya ŋkpa ashi mbe ketre na to.

Currently Selected:

Jɔn 20: GJNb

Highlight

Copy