Jɔn 11

Lazɔrɔs be luwu be asheŋ

1Kanyɛn ko e daa wɔtɔ nɛ baa tre mo Lazɔrɔs nɛ e daa lɔ. Mo nɛ Mɛɛri nɛ mo da Maata kikɛ daŋ shi Bɛtani nna. 2Mɛɛri ere e la emo nɛ e daŋ chulgi tulale dufɛso ko n wurge Enyɛnpe be aya so nseŋ ta mbe emin m melti amo na, mo alɛ mo siponyɛn e daa la Lazɔrɔs mo nɛ e daa lɔ na. 3Lazɔrɔs ka bee lɔ na nɛ mo sipocheana na shuŋi fanɛ b ya kaŋɛ Yesu. B yɛ: “Enyɛnpe, fo teri kpakpaso na bee lɔ.” 4Yesu ka nu kubɔya na nɛ e kaŋɛ: “Lazɔrɔs be kulɔ ere be lalaloge maŋ la luwu. K la kusɔ nɛ k beeŋ ba bar Ebɔrɛ kemaŋkura nna, saŋɛ na so nɛ ma, Ebɔrɛ Pibinyɛn na e nya kemaŋkura ashi kumo to.” 5Yesu daa sha Maata nɛ mo sipo Mɛɛri nɛ Lazɔrɔs be asheŋ ga. 6Ŋkeshin nɛ e ka nu fanɛ Lazɔrɔs bee lɔ na nɛ e shir a wɔ kakpa nɛ e daa wɔ na nchɛnnyɔ pɔɛŋ nseŋ ba kaŋɛ mbe bebɛsopo na le: 7“Men shin nɛ an naŋ yɔ Judiya.” 8Ndoŋ nna nɛ b kaŋɛ mo: “Eŋinipo, nchɛnnyɔ ere to nɛ Juwebi na daa sha kekpa fo ajembu ndoŋ nɛ fo naa kaŋɛ fanɛ an yɔ ndoŋ a?” 9Nɛ Yesu bishi bumo le: “Mannɛ awa kuduanyɔ e wɔ yili epeŋi be kepete n ya fo kumo be ketɔr to a? Esa kama malɛ nɛ e bee nite kapaso, maa fiti, ŋkpal manɛ so, durnya ere be kefulto nɛ e bee wu a nite. 10E baa nite kanyɛso nɛ e beeŋ baa fiti, ŋkpal manɛ so, e maŋ kɔ kefulto.” 11Yesu ka malga le n loge nɛ e naŋ kaŋɛ bumo: “An teri Lazɔrɔs bee di, ama mee yɔ nɛ n ya tiŋi mo.” 12Ndoŋ nna nɛ mbe bebɛsopo na kaŋɛ mo: “Enyɛnpe, nɛ e bee di bre, kumo ere e beeŋ nya alenfia.” 13Lazɔrɔs be luwu be asheŋ nɛ Yesu daa malga, ama mbe bebɛsopo na bre daŋ fɛ fanɛ edi gbagba nɛ e daa de. 14Ndoŋ nna nɛ Yesu bugi to ŋ kaŋɛ bumo: “Lazɔrɔs wu. 15Ama ŋkpal menyi so, k par ma ga fanɛ ŋ ka maŋ wɔ ndoŋ nɛ e wu, ŋkpal manɛ so, loŋ e naaŋ shin nɛ men yirda ma asheŋ. Ama naniere, men shin nɛ an yɔ mo kutɔ.” 16Ndoŋ nna nɛ Tɔmas nɛ baa tre kaborobi na kaŋɛ mo braana bebɛsopo na le: “Men shin nɛ an kikɛ e yɔ nɛ anyi nɛ mo kikɛ e ya wu ndoŋ.”

Yesu ka wushi Lazɔrɔs mo sipocheana kagbene be asheŋ

17Yesu ka ba fo Bɛtani nɛ e nu fanɛ b teŋ puli Lazɔrɔs kejembulaŋ to kumo be nchɛ nna. 18Bɛtani nɛ Jerusalɛm daa maŋ fo emayɛl anyɔ, 19amoso, Juwebi damta daŋ shi ndoŋ nna m ba nɛ b ba wushi Maata nɛ Mɛɛri kagbene ŋkpal bumo siponyɛn ka wu so. 20Maata ka nu fanɛ Yesu bee ba nɛ e lar n yɔ nɛ e ya shɛr mo to, ama Mɛɛri bre daŋ shir a wɔ laŋ to nna. 21Maata ka ya tu Yesu nɛ e kaŋɛ mo le: “Enyɛnpe, fo daa wɔ nfe nna n siponyɛn ere daa maaŋ wu. 22Ama naniere gba n nyi fanɛ kusɔ kama nɛ fo kule Ebɔrɛ, e beeŋ sa fo kumo.” 23Nɛ Yesu kaŋɛ mo le: “Fo siponyɛn ere beeŋ naŋ tiŋi.” 24Nɛ Maata kaŋɛ mo: “N nyi e ka beeŋ tiŋi ashi luwu to lalaloge be kachɛ na.” 25Nɛ Yesu kaŋɛ mo: “Ma e la esa nɛ e bee tiŋi basa ashi luwu to a sa bumo ŋkpa na, nɛ esa kama nɛ e yirda ma beeŋ nya ŋkpa hale nɛ e wu gba. 26Esa kama malɛ nɛ e wɔ ŋkpa to nseŋ yirda ma, maaŋ naŋ wu kikɛ. Fo yirda kesheŋ ere a?” 27Nɛ Maata shuli ŋ kaŋɛ: “Mm, Enyɛnpe, n yirda kumo. N yirda fanɛ fo e la Mesaya, Ebɔrɛ Pibinyɛn nɛ Ebɔrɛ kaŋɛ fanɛ e beeŋ ba durnya to na.” 28Maata ka malga loŋ n loge nɛ e bɛta n yɔ epe n ya tre mo sipo Mɛɛri n lar ekarso ŋ kaŋɛ mo: “Eŋinipo na ba nsaa fin fo.” 29Mɛɛri ka nu loŋ nɛ e koso manaŋ n yɔ Yesu kutɔ. 30Jemanɛ na so malɛ nɛ Yesu maŋ naŋ luri kade to nɛ e kraa wɔ kakpa nɛ Maata ya tu mo na. 31Juwebi nɛ bumo nɛ Mɛɛri daa tase ebu to nɛ baa wushi mo kagbene na ka wu kananɛ e kpa ŋ koso manaŋ n lar kowu na nɛ b koso m bɛ mo so a fɛ fanɛ e daa yɔ nchaŋ na akpa nna nɛ e ya shu. 32Mɛɛri ka fo kakpa nɛ Yesu daa wɔ na nseŋ wu mo nɛ e gbir Yesu be anishito nseŋ kaŋɛ: “Enyɛnpe, fo daa wɔ nfe nna, n siponyɛn ere daa maaŋ wu.” 33Yesu ka wu kananɛ e daa shu na nɛ kananɛ Juwebi nɛ b daŋ bɛ mo so m ba na kikɛ daa shu na nɛ mbe kagbene kaa nseŋ jija mo. 34Ndoŋ nna nɛ e bishi bumo: “Nnɛ nɛ men ta mo n nase?” Nɛ b kaŋɛ mo: “Ba keni ndoŋ Enyɛnpe.” 35Yesu shu. 36Ndoŋ nna nɛ Juwebi na kaŋɛ le: “Men keni e bee sha mo pasaa.” 37Ndoŋ nna nɛ beko kaŋɛ le: “Esa nɛ e bee tiŋ a bugi tanpo be anishi, ama e daa maaŋ tiŋ n shin nɛ kanyɛn ere e sa maŋ wu a?”

Yesu ka tiŋi Lazɔrɔs luwu to be asheŋ

38Ndoŋ nna nɛ Yesu be kagbene naŋ kaa nɛ e ta m ba nchaŋ na akpa. Kumo alɛ daa la kejembulaŋ nna nɛ b ta kejembu kpaŋgalaŋ ko m buu kumo be kɔnɔ so. 39Yesu ka ba ndoŋ nɛ e kaŋɛ: “Men ta kejembu na ashi nchaŋ na be kɔnɔ so.” Ndoŋ nna nɛ Maata, kanyɛn na mo sipoche na kaŋɛ Yesu le: “Enyɛnpe, mbe nchɛ nna nna na nchaŋ ere to, amoso, naniere e beeŋ baa dufɛ.” 40Nɛ Yesu bishi mo: “M maŋ kaŋɛ fo fanɛ nɛ fo yirda feeŋ wu Ebɔrɛ be kemaŋkura a?” 41Ndoŋ nna nɛ b lara kejembu na nɛ Yesu keni esoso nseŋ kaŋɛ: “Etuto, mee chɔrɔ fo ga fanɛ fo nu ma kekule. 42N nyi fo ka bee nu ma kekule saŋkikɛ, ama ŋ kaŋɛ loŋ nna ŋkpal basa nɛ b yil nfe ere so nɛ b yirda fanɛ fo e shuŋi ma.” 43Yesu ka malga le n loge nɛ e tre awɔrso ŋ kaŋɛ: “Lazɔrɔs, lar m ba!” 44Ndoŋ nna nɛ ebuni na lar nchaŋ na to m ba nɛ mbe kebuni be ameato kraa mea mo to nɛ kechɛbi ko gba mea mbe anishiakpa. Nɛ Yesu kaŋɛ basa na: “Men saŋɛ n saŋɛ bubuni be ameato na nseŋ shin nɛ e yɔ.”

B ka kre Yesu be kemɔ be nia be asheŋ

(Matiu 26:1-5; Maak 14:1-2; Luuk 22:1-2)

45Ŋkpal kesheŋ ere so Juwebi nɛ b daŋ ba nɛ b ba chɔrɔ Mɛɛri nseŋ wu kusɔ nɛ Yesu daŋ wora na be bedamta daŋ yirda Yesu nna. 46Nɛ beko malɛ yɔ Efarisiana na kutɔ n ya kaŋɛ bumo kusɔ nɛ Yesu daŋ wora na. 47Ndoŋ nna nɛ Efarisiana na nɛ bɔrɛmatapowuraana na shɛr kɔɔtiebi nɛ b daa tre Sanhedrinebi na ŋ kaŋɛ: “Men keni emamachisheŋ damta nɛ kanyɛn ere bee wora ere, nuso nɛ anyeeŋ wora? 48An baŋ yige mo nɛ e wɔtɔ a wora le be asheŋ ere, ekama beeŋ yirda mo nɛ Romebi na e ba m ba jija anyi be bɔrɛlambu ere nseŋ ta anyi be efuli ere kikɛ n ti so.” 49Ndoŋ nna nɛ bumo be eko nɛ baa tre Kayafas nɛ e daa la bɔrɛmatapo nimuso amo be kafɛ na kaŋɛ le: “Men maŋ nyi shɛŋ. 50Men maŋ nyi fanɛ nɛ esa koŋwule wu n sa basa, loŋ bɔ n sa menyi a chɔ efuli ere kikɛ ka mur a?” 51Kesheŋ ere e ka malga ere daa maŋ shi mo gbagba to, ama ŋkpal e ka daa la bɔrɛmatapo nimuso amo be kamoafɛ na so so nɛ e daa wu a kaŋɛ fanɛ Yesu e daa shin nɛ e wu n sa efuli na so ebi na. 52Mannɛ bumo nɛ b daa wɔ efuli na so na nawule gba, ama e daa shin nɛ e wu n sa Ebɔrɛ be mbia nɛ b daŋ pesaŋ to a wɔ mboŋ pɔtɛana na kikɛ gba, saŋɛ na so e beeŋ bar bumo abar so n shin nɛ b ba ki kukoŋwule. 53Amoso, baŋ yili kumo be kachɛ na a yɔ nɛ basa na kre Yesu be kemɔ be nia.

54Amoso, Yesu daa maŋ naa bugi to a nite Juwebi na to. E daŋ lar bumo to nna n yɔ kadebi mo nɛ baa tre Efrayim na nna ashi kasawule nɛ k mata keshishɛrsawule so na nɛ mo nɛ mbe bebɛsopo ya kaa wɔ ndoŋ.

55Saŋɛ na so nɛ Juwebi be Kebansonchoŋ be kejigboŋ be saŋɛ bee fo nɛ basa damta shi ndewurbiana na to n juŋkpar n yɔ nɛ b ya fɔr bumo be amu so pɔɛŋ nɛ Kebansonchoŋ be kachɛ na gbagba e fo. 56Basa na daa wɔ ndoŋ nna a fin Yesu nseŋ ya yili bɔrɛlambu na akpa a bishi abar le: “Nuso nɛ fee fɛ, fo tama fanɛ e maaŋ ba Kejigboŋ ere to nna kuraa ŋko nuso?” 57Saŋɛ na malɛ so bɔrɛmatapowuraana na nɛ Efarisiana na sa ebɔl fanɛ esa kama nɛ e nyi kakpa nɛ Yesu daa wɔ, amodoŋwura e ba kaŋɛ bumo nɛ b nya mo m pɛ.

Currently Selected:

Jɔn 11: GJNb

Highlight

Copy