Jɔn 12

B ka chulgi tulale n wurge Yesu so be asheŋ

(Matiu 26:6-13; Maak 14:3-9)

1A ka ba ka fanɛ nchɛ nshe nɛ Kebansonchoŋ be kejigboŋ na e fo nɛ Yesu yɔ Bɛtani, kade nɛ Lazɔrɔs nɛ e daŋ tiŋi luwu to na daa wɔ na. 2Ndoŋ nna nɛ Lazɔrɔs nɛ mo sipocheana na wora ajibi nɛ b keta Yesu kufɔ. Maata e daa chige ajibi na nɛ Lazɔrɔs malɛ nɛ basa nɛ b daa wɔ ndoŋ na tu Yesu a tase ejikpa. 3Ndoŋ nna nɛ Mɛɛri ta amansherbi damta be tulale dufɛso be kɔlbagboŋ ko m ba ta amo n wurge Yesu be aya so nseŋ gbir n ta mbe emin m melti tulale na ŋ gbiti amo n wɔtɔ Yesu be aya so. Ndoŋ nna nɛ tulale na be efɛa sɔ ebu na kikɛ to verr. 4Ama mbe bebɛsopo na to be emo nɛ b daa tre Judas Iskareɔt nɛ e daa beeŋ debɔr Yesu na bishi le: 5“To, manɛ e ba nɛ b daa maŋ ta tulale ere n fa n nya pɔŋ alfa asa n ta amansherbi na n sa betirpo?” 6Mannɛ fanɛ betirpo be asheŋ ka tir mo so so nɛ e daŋ kaŋɛ loŋ, ama e daa la eyu nna. Mo e daa la katuŋ na be amansherbikenipo, amoso, e daa wɔtɔ nna a lara amansherbi na be ako a wɔtɔ mbe jifa to. 7Nɛ Yesu kaŋɛ bumo le: “Men yige mo. Kusɔ nɛ e daa beeŋ wora ma ma kepuliachɛ nna na. 8Saŋkama menyi nɛ betirpo e naaŋ baa la, ama ma ere nɛ menyi maaŋ baa la saŋkama.”

9Asheŋ ere ka bee wora ere nɛ Juwebi na be bedamta nu fanɛ Yesu ba Bɛtani nseŋ ba nɛ b ba keni mo. Mannɛ Yesu malɛ gba nawule so nɛ b daŋ ba, b daŋ ba nna nɛ b ba keni Lazɔrɔs nɛ Yesu tiŋi luwu to na. 10Amoso, bɔrɛmatapowuraana na daa kre Lazɔrɔs gba be kemɔ nna. 11Ŋkpal manɛ so, mo so nɛ Juwebi na be bedamta daa yɔ Yesu kutɔ n ya kaa yirda mo.

Yesu ka luri Jerusalɛm bunyanso be asheŋ

(Matiu 21:1-11; Maak 11:1-11; Luuk 19:28-40)

12Kumo be ŋklade nɛ jimaŋ damta nɛ k ba Kejigboŋ na to na nu fanɛ Yesu lar m pɛ Jerusalɛm be ekpa nɛ e yɔ ndoŋ. 13Ndoŋ nna nɛ b fɛta n fɛta abii be ayabi n lar n yɔ nɛ b ya tu mo nsaa ponte a kaŋɛ:

“Hosana,

nɛfa la esa nɛ e shi Enyɛnpe be ketre to a ba na peya nna.

Nɛfa la mo, Israɛl be Ewura na peya nna.”

14Saŋɛ ere so nɛ Yesu fin kurmafɔlbi ko n chena kumo so nɛ abɔrɛsibɛ na e bɔla ekpa. A yɛ:

15“O Zayɔn, sa maa lɔ kufu,

keni fo Ewura e dii kurmafɔlbi a ba na.”

16Saŋɛ nɛ asheŋ ere wora na mbe bebɛsopo na daa maŋ pin amo to she saŋɛ nɛ Yesu ba nya mbe kemaŋkura na pɔɛŋ nɛ k ba bumo be nfɛra to fanɛ asheŋ nɛ a daŋ wora na kikɛ daa dese abɔrɛsibɛ na to a kute mbe asheŋ nseŋ naŋ nyiŋi fanɛ b wora mo asheŋ na kikɛ nyam. 17Saŋɛ ere so malɛ kikɛ nɛ basa nɛ b daa wɔ mo kutɔ kachɛ nɛ e tiŋi Lazɔrɔs ashi luwu to nseŋ tre mo ashi nchaŋ to na, wɔtɔ a kɔ loŋ be kubɔya na a kela kaplɛkama. 18Basa damta na daŋ lar n yɔ mo kutɔ nna ŋkpal mamachi be kesheŋ nɛ b daŋ nu e ka daŋ wora na so. 19Ndoŋ nna nɛ Efarisiana na kaŋɛ abar le: “Men keni, an maaŋ tiŋ n wora shɛŋ nna na, ŋkpal manɛ so, durnya kikɛ e muu a bɛ mo so na.”

Griikebi ko ka ba kaa fin Yesu be asheŋ

20Griikebi ko malɛ gba daŋ ti basa nɛ b daŋ yɔ Jerusalɛm to be Kejigboŋ be nshɛr na to nɛ b ya bunyaŋ Ebɔrɛ na so. 21Ndoŋ nna nɛ b ba Filip nɛ e daŋ shi Bɛtsaida nɛ k wɔ Galili na kutɔ m ba kaŋɛ mo le: “Kowurnyɛn, jande, anyee sha kewu Yesu nna.” 22Ndoŋ nna nɛ Filip ya kaŋɛ Andru nɛ bumo benyɔ ya kaŋɛ Yesu. 23Nɛ Yesu kaŋɛ bumo le: “Naniere bre jemanɛ nɛ ma, Nyiŋgbasa Pibinyɛn beeŋ nya kemaŋkura na fo. 24Ma e kaŋɛ menyi kashenteŋto na fanɛ kuyubi baa maŋ tɔr shishɛr to n wu, k beeŋ baa la keduusobi koŋwule nna saŋkikɛ. Ama nɛ fanɛ k baŋ tɔr shishɛr to ŋ kɔr pɔɛŋ nseŋ wu, k bee bar asɔrso damta nna. 25Esa kama nɛ e bee sha mbe ŋkpa ga beeŋ paŋ kumo, ama ekama nɛ e maa ta mbe ŋkpa ere a tre shɛŋ durnya ere to, beeŋ nya mbe ŋkpa nɛ kebaawɔ ŋkpa ere to mbaanaayɔ. 26Esa kama nɛ e bee shuŋ ma, e baa bɛ ma so nɛ kaplɛkama malɛ nɛ n wɔ, ndoŋ nɛ ma kenya gba beeŋ baa wɔ. N Tuto malɛ beeŋ bunyaŋ esa kama nɛ e bee shuŋ ma.”

Yesu ka malga mbe luwu be asheŋ

27Naniere ma kagbene maŋ dese ma, ama nuso nɛ meeŋ wora? Ŋ kaŋɛ n Tuto fanɛ: ‘Etuto, mɔlga ma ashi le be kenishipere ere to,’ ŋko nuso? Ayai, m maaŋ wora loŋ, ŋkpal manɛ so, loŋ so nɛ m ba nɛ m ba ji saŋɛ ere so be awurfoŋ. 28N Tuto, maŋkura fo ketre. Ndoŋ nna nɛ ebɔl shi ebɔrɛso ŋ kaŋɛ: “N teŋ maŋkura kumo, ama meeŋ naŋ maŋkura kumo.” 29Jimaŋ nɛ k daa wɔ ndoŋ na ka nu ebɔl na be egbri na nɛ beko kaŋɛ fanɛ bɔrɛ e ponte to nɛ beko malɛ kaŋɛ fanɛ malaika e malga mo kutɔ. 30Nɛ Yesu kaŋɛ bumo le: “Menyi so nɛ ebɔl na lar na, mannɛ ma so. 31Naniere bre keji durnya ere demu be saŋɛ fo, naniere nɛ kegboŋi durnya ere to be ejuŋkparpo na ashi mbe kejuŋkpar na to na fo. 32Ama nɛ b kaŋ maŋ ma so ashi kasawule ere so bre, meeŋ bar basa kikɛ ŋ kutɔ.” 33E daŋ malga le nna a ŋini luwu mo nɛ e daa beeŋ wu be asheŋ. 34Ndoŋ nna nɛ jimaŋ na kaŋɛ mo le: “Anyee nu ashi anyi be mbra na to fanɛ Mesaya na beeŋ ba kaa wɔ ŋkpa to mbaanaayɔ nɛ a ji nuso nna nɛ fee kaŋɛ: ‘Baaŋ maŋ Nyiŋgbasa Pibinyɛn na so’? Wanɛ nɛ fee tre Nyiŋgbasa Pibinyɛn na?” 35Nɛ Yesu kaŋɛ bumo: “Kefulto na maaŋ naŋ chɛr menyi kutɔ. Amoso, men ka kraa kɔ kumo menyi to ere bre, men baa na kumo to, saŋɛ na so, tentembiri maaŋ luri menyi to. Esa kama nɛ e na tentembiri to maa pin kakpa nɛ e bee yɔ. 36Men ka kraa kɔ kefulto ere bre, men ta menyi be yirda n wɔtɔ kumo to, saŋɛ na so menyeeŋ baa la kefulto be basa.”

E ka malga n loge nɛ e lar basa na to n ya ŋana.

Juwebi ka maŋ kɔ yirda be asheŋ

37Yesu daŋ wora emamachisheŋ damta ere kikɛ bumo be anishito, ama bumo alɛ daa maŋ yirda mo. 38Loŋ be kesheŋ na malɛ daŋ wora nna nɛ anebi Aizaaya be kamalga nɛ e daŋ malga na e bɔla ekpa. Le nɛ e daŋ bishi Ebɔrɛ: “Enyɛnpe, wanɛ e yirda kubɔya nɛ an bɔ na? Nɛ basa mo nɛ Enyɛnpe ŋini mbe eleŋ na?” 39Ŋkpal loŋ so, b daa maŋ tiŋ n yirda, ŋkpal manɛ so, loŋ malɛ nɛ Aizaaya kaŋɛ kakpa ko na fanɛ Ebɔrɛ kaŋɛ: 40“N tan bumo be anishiana nseŋ ti bumo be ŋgbeneana, nɛ mannɛ aloŋ, bumo be anishiana beeŋ bugi asheŋ be kewuto nɛ bumo be ŋgbene e bugi asheŋ be kepinto nɛ b ba ma kutɔ nɛ n lara bumo ashi bumo be kebaawɔtɔ na to n sa bumo kebaawɔtɔ popɔr.” 41Anebi Aizaaya daŋ kaŋɛ le nna ŋkpal e ka daŋ wu Yesu be kemaŋkura nseŋ malga mbe asheŋ na so. 42Ŋkeshin nɛ benimu na to gba be bedamta daŋ yirda Yesu, ama ŋkpal Efarisiana so, b daa maa sha kebugi to ŋ kaŋɛ fanɛ b yirda mo ŋkpal b ka daa maa sha fanɛ b ju bumo ashi nshɛrbuana na to be keluri to so. 43Bumo alɛ ka daa sha mbo ashi basa kutɔ a chɔ Ebɔrɛ kutɔ na so e shin nɛ b daa wora loŋ.

Kusɔ nɛ k bar Yesu be asheŋ

44Ndoŋ nna nɛ Yesu malga awɔrso ŋ kaŋɛ le: “Esa baŋ yirda ma, mannɛ ma nawule nɛ e yirda, ama emo nɛ e shuŋi ma na gba nɛ e yirda. 45E baŋ keni ma, e bee wu esa nɛ e shuŋi ma na nna. 46M ba durnya to nna fanɛ kefulto na, saŋɛ na so, ekama nɛ e yirda ma, maaŋ shir a wɔ tentembiri to. 47Ama ekama nɛ e nu ma mmalga ŋkaa maa ta amo a wɔtɔ mo to, m maa kaŋɛ fanɛ e daga kasogberge, ŋkpal manɛ so, m maŋ ba na nɛ m ba ji durnya demu. M ba na nɛ m ba mɔlga durnya. 48Esa kama nɛ e bee kini ma a maa sɔ ma mmalga na kɔ esa nɛ e beeŋ ji mo demu. Mmalga nɛ m malga na gbagba e naaŋ ki amodoŋwura be demujipo lalaloge be kachɛ na. 49Ŋkpal manɛ so, mannɛ ŋ gbagba be eleŋ to so nɛ m malga, Etuto nɛ e shuŋi ma na e nase kusɔ nɛ meeŋ kaŋɛ nɛ kananɛ meeŋ kaŋɛ kumo n sa ma. 50N nyi mbe kamalga naseso ka bee bar ŋkpa nɛ k maŋ kɔ ekar na, amoso, kusɔ kama nɛ m malga baa la kusɔ nɛ Etuto na kaŋɛ fanɛ ŋ kaŋɛ nna.”

Currently Selected:

Jɔn 12: GJNb

Highlight

Copy