ເຊກາຣີຢາ 13
13
1ເມື່ອເວລານັ້ນມາເຖິງຈະມີນໍ້າບໍ່ໜຶ່ງໄຫລອອກມາ ເພື່ອຊຳລະບາບຂອງເຊື້ອສາຍຂອງກະສັດດາວິດ ແລະຂອງປະຊາຊົນເຢຣູຊາເລັມ ເພາະພວກເຂົາຂາບໄຫວ້ບັນດາຮູບເຄົາຣົບ. 2ພຣະເຈົ້າຢາເວກ່າວວ່າ, ໃນເວລານັ້ນ ເຮົາຈະກຳຈັດບັນດາຮູບເຄົາຣົບໃຫ້ໝົດໄປຈາກດິນແດນ ແລະຈະບໍ່ມີຜູ້ໃດຈົດຈຳພວກມັນໄດ້ອີກເລີຍ. ເຮົາຈະກຳຈັດທຸກໆຄົນທີ່ອ້າງຕົວເອງວ່າເປັນຜູ້ທຳນວາຍ ແລະຈະທຳລາຍຄວາມປາຖະໜາທີ່ຈະຂາບໄຫວ້ບັນດາຮູບນັ້ນ. 3ແລ້ວຖ້າຜູ້ໃດຜູ້ໜຶ່ງຍັງທຳນວາຍຕໍ່ໄປ ພໍ່ແລະແມ່ຂອງຜູ້ນັ້ນກໍຈະບອກວ່າ, ລາວຈະຖືກປະຫານຊີວິດຍ້ອນລາວເວົ້າຕົວະໃນນາມຂອງພຣະເຈົ້າຢາເວ; ເມື່ອລາວທຳນວາຍນັ້ນ ພໍ່ແມ່ຂອງລາວຈະຕົບຕີລາວຈົນຕາຍ. 4ເມື່ອເວລາມາເຖິງ ຈະບໍ່ມີຜູ້ທຳນວາຍຄົນໃດອວດອ້າງຈອງຫອງວ່າ ຕົນໄດ້ເຫັນນິມິດ ຫລືສະແດງຕົນເປັນຜູ້ທຳນວາຍ ຫລືນຸ່ງເສື້ອຄຸມຂອງຜູ້ທຳນວາຍຫາຫລອກລວງປະຊາຊົນ. 5ແຕ່ລາວຈະເວົ້າວ່າ, ‘ຂ້ອຍບໍ່ແມ່ນຜູ້ທຳນວາຍ ຂ້ອຍເປັນພໍ່ນາເພາະຂ້ອຍເຮັດນາມາຕະຫລອດຊີວິດ.’ 6ຖ້າມີຄົນຖາມວ່າ, ‘ບາດແຜຫຍັງທີ່ໜ້າເອິກຂອງເຈົ້າ?’ ລາວກໍຈະຕອບວ່າ, ‘ຂ້ອຍໄດ້ຮັບບາດເຈັບທີ່ເຮືອນຂອງໝູ່ຂ້ອຍ.”’
ພຣະເຈົ້າສັ່ງໃຫ້ຂ້າຜູ້ລ້ຽງແກະຂອງພຣະອົງ
7ພຣະເຈົ້າຢາເວອົງຊົງຣິດອຳນາດຍິ່ງໃຫຍ່ກ່າວວ່າ, “ດາບເອີຍ ຈົ່ງຕື່ນຂຶ້ນແລະໂຈມຕີຄົນລ້ຽງແກະ ທີ່ເຮັດວຽກໃຫ້ເຮົາ ຈົ່ງຂ້າລາວເສຍ ແລະຝູງແກະຂອງເຮົາກໍຈະກະຈັດກະຈາຍໄປ. ເຮົາຈະໂຈມຕີປະຊາຊົນຂອງເຮົາ.” 8ພຣະເຈົ້າຢາເວກ່າວວ່າ, “ແລະສອງສ່ວນສາມຂອງປະຊາຊົນທົ່ວປະເທດຈະຕາຍໄປ. 9ແລ້ວເຮົາກໍຈະທົດສອບເບິ່ງປະຊາຊົນສ່ວນທີສາມ ທີ່ລອດຊີວິດຢູ່ນັ້ນ ແລະເຮົາຈະຫລໍ່ຫລອມພວກເຂົາໃຫ້ບໍຣິສຸດ ດັ່ງເງິນທີ່ຖືກຫລໍ່ຫລອມດ້ວຍໄຟ. ເຮົາຈະທົດສອບເບິ່ງພວກເຂົາ ດັ່ງມະນຸດທົດສອບເບິ່ງຄຳ. ພວກເຂົາຈະພາວັນນາອະທິຖານໃນນາມຊື່ຂອງເຮົາ ແລະເຮົາຈະຕອບພວກເຂົາ. ເຮົາຈະບອກວ່າ, ‘ພວກເຂົາເປັນປະຊາຊົນຂອງເຮົາ.’ ແລະພວກເຂົາກໍຈະກ່າວວ່າ, ‘ພຣະເຈົ້າຢາເວ ເປັນພຣະເຈົ້າຂອງພວກເຮົາ.”’
Currently Selected:
ເຊກາຣີຢາ 13: ພຄພ
Highlight
Share
Copy
Want to have your highlights saved across all your devices? Sign up or sign in
@ 2012 United Bible Societies. All Rights Reserved.
