ມັດທາຍ 5
5
ພຣະເຢຊູເຈົ້າເທດສະໜາທີ່ໂນນພູ
(ມທ 5–7)
1ເມື່ອພຣະເຢຊູເຈົ້າເຫັນປະຊາຊົນຢ່າງຫລວງຫລາຍເຊັ່ນນີ້, ພຣະອົງຈຶ່ງຂຶ້ນໄປເທິງໂນນພູແຫ່ງໜຶ່ງ ແລະນັ່ງລົງທີ່ນັ້ນ ແລ້ວພວກສາວົກຂອງພຣະອົງກໍມາເຕົ້າໂຮມກັນອ້ອມພຣະອົງ.
ຄວາມສຸກອັນແທ້ຈິງ
(ລກ 6:20-23)
2ພຣະອົງໄດ້ຊົງຕັ້ງຕົ້ນສັ່ງສອນພວກເຂົາວ່າ,
3 “ຜູ້ໃດຍາກຈົນຝ່າຍຈິດວິນຍານກໍເປັນສຸກ,
ເພາະວ່າອານາຈັກສະຫວັນ
ເປັນຂອງຜູ້ນັ້ນ
4 ຜູ້ໃດໂສກເສົ້າກໍເປັນສຸກ,
ເພາະວ່າຜູ້ນັ້ນຈະໄດ້ຮັບ
ການຊົງເລົ້າໂລມ
5 ຜູ້ໃດມີໃຈອ່ອນຫວານກໍເປັນສຸກ,
ເພາະວ່າຜູ້ນັ້ນຈະໄດ້ຮັບແຜ່ນດິນໂລກເປັນມໍຣະດົກ.
6 ຜູ້ໃດອຶດຫິວຄວາມຊອບທຳກໍເປັນສຸກ,
ເພາະວ່າພຣະເຈົ້າຈະຊົງໃຫ້ອີ່ມບໍລິບູນ
7 ຜູ້ໃດມີໃຈກະລຸນາກໍເປັນສຸກ,
ເພາະວ່າຜູ້ນັ້ນຈະໄດ້ຮັບ
ພຣະກະລຸນາຕອບ
8 ຜູ້ໃດມີໃຈບໍຣິສຸດກໍເປັນສຸກ,
ເພາະວ່າຜູ້ນັ້ນຈະໄດ້ເຫັນພຣະເຈົ້າ
9 ຜູ້ໃດສ້າງຄວາມສະຫງົບສຸກກໍເປັນສຸກ,
ເພາະວ່າພຣະເຈົ້າຈະຊົງເອີ້ນຜູ້ນັ້ນວ່າ
ເປັນບຸດ
10 ຜູ້ໃດຖືກຂົ່ມເຫັງເພາະເຫັນແກ່
ຄວາມຊອບທຳກໍເປັນສຸກ,
ເພາະວ່າອານາຈັກສະຫວັນ
ເປັນຂອງຜູ້ນັ້ນ.”
11“ເມື່ອຄົນກ່າວນິນທາແລະຂົ່ມເຫັງເຈົ້າທັງຫລາຍ ແລະເວົ້າຄວາມຊົ່ວອັນບໍ່ຈິງທຸກຢ່າງຕໍ່ສູ້ເຈົ້າທັງຫລາຍ ເພາະເຫັນແກ່ເຮົາ ພວກເຈົ້າກໍເປັນສຸກ. 12ຈົ່ງເປັນສຸກແລະຈົ່ງຊົມຊື່ນຍິນດີເຖີດ ເພາະພວກເຈົ້າມີບຳເໜັດອັນຍິ່ງໃຫຍ່ໃນສະຫວັນແລ້ວ ບັນດາຜູ້ທຳນວາຍໃນສະໄໝກ່ອນກໍຖືກຂົ່ມເຫັງຢ່າງດຽວກັນນີ້ແຫຼະ.”
ເລື່ອງເກືອ ແລະ ຄວາມສະຫວ່າງ
(ມຣກ 9:50; ລກ 14:34-35)
13“ເຈົ້າທັງຫລາຍເປັນເກືອສຳລັບມວນມະນຸດໂລກ, ແຕ່ຖ້າເກືອໝົດຣົດເຄັມແລ້ວຈະເຮັດໃຫ້ເຄັມຄືນໄດ້ອີກຢ່າງໃດ? ມັນບໍ່ມີຄ່າເສຍແລ້ວ. ດັ່ງນັ້ນ ຈຶ່ງມີແຕ່ໂຍນຖິ້ມໃຫ້ຄົນຢຽບຢໍ່າເທົ່ານັ້ນ.”
14“ພວກເຈົ້າເປັນແສງສະຫວ່າງສຳລັບໂລກນີ້. ເມືອງຊຶ່ງຕັ້ງຢູ່ເທິງໂນນພູກໍເປັນທີ່ບັງໄວ້ບໍ່ໄດ້. 15ບໍ່ຫ່ອນມີຜູ້ໃດເມື່ອໄຕ້ໂຄມໄຟແລ້ວຈະເອົາເຂົ້າໄວ້ໃນກະບຸງ, ແຕ່ເຄີຍຕັ້ງໄວ້ເທິງທີ່ສູງເພື່ອໃຫ້ສ່ອງແຈ້ງໃສ່ທຸກໆຄົນທີ່ຢູ່ໃນເຮືອນນັ້ນ. 16ໃນທຳນອງດຽວກັນນີ້ແຫຼະ ຈົ່ງໃຫ້ແສງສະຫວ່າງທີ່ຢູ່ໃນພວກເຈົ້ານັ້ນສ່ອງແຈ້ງຕໍ່ໜ້າຄົນທັງຫລາຍ ເພື່ອວ່າພວກເຂົາຈະໄດ້ເຫັນຄຸນງາມຄວາມດີທີ່ພວກເຈົ້າເຮັດ ແລະພວກເຂົາຈະສັນລະເສີນພຣະບິດາເຈົ້າຂອງພວກເຈົ້າທີ່ສະຖິດຢູ່ໃນສະຫວັນ.”
ຄຳສັ່ງສອນເລື່ອງກົດບັນຍັດ
17“ຢ່າຄິດວ່າເຮົາມາເພື່ອລຶບລ້າງກົດບັນຍັດ ຫລືຜູ້ທຳນວາຍ ເຮົາບໍ່ໄດ້ມາລຶບລ້າງ ແຕ່ມາເຮັດໃຫ້ສຳເລັດຄົບຖ້ວນ. 18ເຮົາບອກພວກເຈົ້າຕາມຄວາມຈິງວ່າ, ຕາບໃດທີ່ຟ້າແລະດິນຍັງຕັ້ງຢູ່ ແມ່ນແຕ່ເມັດ ຫລືຂໍ້ປີກຍ່ອຍອັນເລັກນ້ອຍທີ່ສຸດຂອງກົດບັນຍັດຈະບໍ່ຖືກລຶບລ້າງໄປ ຈົນກວ່າທຸກສິ່ງຈະເກີດຂຶ້ນຄົບຖ້ວນ. 19ດັ່ງນັ້ນ ຜູ້ໃດປະຕິເສດກົດບັນຍັດຂໍ້ເລັກນ້ອຍທີ່ສຸດ ແລະທັງສັ່ງສອນຄົນອື່ນໃຫ້ປະຕິເສດ, ຜູ້ນັ້ນຈະເປັນຜູ້ນ້ອຍໃນອານາຈັກສະຫວັນ, ແຕ່ຜູ້ໃດທີ່ປະຕິບັດຕາມກົດບັນຍັດ ແລະສັ່ງສອນຄົນອື່ນໃຫ້ປະຕິບັດຕາມ ຜູ້ນັ້ນຈະເປັນຜູ້ໃຫຍ່ໃນອານາຈັກສະຫວັນ. 20ເຮົາຈຶ່ງບອກພວກເຈົ້າວ່າ, ຖ້າການປະຕິບັດຂໍ້ຄຳສັ່ງຂອງພຣະເຈົ້າຂອງພວກເຈົ້າ ບໍ່ລື່ນກວ່າການປະຕິບັດຂອງພວກທຳມະຈານ ແລະພວກຟາຣີຊາຍແລ້ວ ພວກເຈົ້າຈະເຂົ້າໄປໃນອານາຈັກຂອງພຣະເຈົ້າບໍ່ໄດ້.”
ຄຳສັ່ງສອນເລື່ອງຄວາມໂກດຮ້າຍ
(ລກ 12:57-59)
21“ເຈົ້າທັງຫລາຍເຄີຍໄດ້ຍິນຄຳທີ່ກ່າວໄວ້ແກ່ຄົນບູຮານວ່າ, ‘ຢ່າຂ້າຄົນ ຖ້າຜູ້ໃດທີ່ຂ້າຄົນຈະຕ້ອງຖືກນຳຂຶ້ນສານເພື່ອຕັດສິນລົງໂທດ.’ 22ແຕ່ເຮົາບອກເຈົ້າທັງຫລາຍວ່າ, ຜູ້ໃດທີ່ໂກດຮ້າຍເຄືອງໃຈ ຕໍ່ອ້າຍເອື້ອຍນ້ອງຂອງຕົນ ຈະຖືກນຳຂຶ້ນສານເພື່ອຕັດສິນລົງໂທດ ຜູ້ໃດທີ່ເອີ້ນອ້າຍເອື້ອຍນ້ອງຂອງຕົນວ່າ, ‘ຄົນໂງ່ຈ້າ’ ຈະຖືກນຳຂຶ້ນສານສູງເພື່ອຕັດສິນລົງໂທດ ແລະຜູ້ໃດທີ່ເອີ້ນອ້າຍເອື້ອຍນ້ອງຂອງຕົນວ່າ, ‘ຄົນບ້າ’ ຜູ້ນັ້ນຈະຕົກບຶງໄຟນະຣົກ. 23ດັ່ງນັ້ນ ເມື່ອເຈົ້າເອົາເຄື່ອງບູຊາມາຖວາຍທີ່ເທິງແທ່ນບູຊາ ແລະທີ່ນັ້ນ ເຈົ້າຄິດໄດ້ວ່າອ້າຍເອື້ອຍນ້ອງຂອງເຈົ້າມີຂໍ້ຂຸ້ນເຄືອງໃຈກັບເຈົ້າເພາະເລື່ອງໃດເລື່ອງໜຶ່ງ, 24ຈົ່ງວາງເຄື່ອງຖວາຍຂອງເຈົ້າໄວ້ຕໍ່ໜ້າແທ່ນບູຊາ ແລ້ວກັບໄປຄືນດີກັບອ້າຍເອື້ອຍນ້ອງຂອງຕົນສາກ່ອນ ຈຶ່ງກັບຄືນມາຖວາຍເຄື່ອງບູຊາຂອງເຈົ້າ.”
25“ຈົ່ງຮີບປອງດອງກັບຄູ່ໂຈດຂອງຕົນ ໃນຂະນະທີ່ຍັງຢູ່ກາງທາງນຳກັນ ຢ້ານວ່າໂຈດນັ້ນຈະມອບເຈົ້າໄວ້ກັບຕຸລາການ ແລະຕຸລາການຈະມອບເຈົ້າໄວ້ກັບເຈົ້າໜ້າທີ່ ແລ້ວເຈົ້າຈະໄດ້ຖືກຂັງໄວ້ໃນຄຸກ. 26ເຮົາບອກເຈົ້າຕາມຄວາມຈິງວ່າ, ເຈົ້າຈະອອກຈາກຄຸກບໍ່ໄດ້ ຈົນກວ່າເຈົ້າໄດ້ຈ່າຍໜີ້ຄົບທຸກອັດ.”
ຄຳສັ່ງສອນເລື່ອງການຫລິ້ນຊູ້
27“ເຈົ້າທັງຫລາຍເຄີຍໄດ້ຍິນຄຳທີ່ກ່າວໄວ້ວ່າ, ‘ຢ່າຫລິ້ນຊູ້ສູ່ຜົວເມຍທ່ານ.’ 28ແຕ່ຝ່າຍເຮົາ ເຮົາບອກພວກເຈົ້າວ່າ, ຜູ້ໃດແນມເບິ່ງແມ່ຍິງດ້ວຍໃຈຄິດຢາກລ່ວງເກີນຍິງນັ້ນ ຜູ້ນັ້ນໄດ້ຫລິ້ນຊູ້ໃນໃຈກັບຍິງນັ້ນແລ້ວ. 29ຖ້າຕາເບື້ອງຂວາຂອງເຈົ້າເປັນຕົ້ນເຫດພາໃຫ້ເຈົ້າເຮັດບາບ ຈົ່ງຄວັດອອກແລະໂຍນມັນຖິ້ມໃຫ້ໄກຈາກເຈົ້າເສຍ ທີ່ເສຍອະໄວຍະວະສ່ວນໜຶ່ງໃນຮ່າງກາຍ ກໍດີກວ່າທັງໝົດຕົນຕົວຕ້ອງຖືກໂຍນຖິ້ມລົງໃນໝໍ້ນະຣົກ. 30ຖ້າມືເບື້ອງຂວາຂອງເຈົ້າເປັນຕົ້ນເຫດພາໃຫ້ເຈົ້າເຮັດບາບ ຈົ່ງຕັດອອກແລະໂຍນມັນຖິ້ມໃຫ້ໄກຈາກເຈົ້າເສຍ ເສຍອະໄວຍະວະສ່ວນໜຶ່ງໃນຮ່າງກາຍ ກໍດີກວ່າທັງໝົດຕົນຕົວຕ້ອງຕົກໃນໝໍ້ນະຣົກ.”
ຄຳສັ່ງສອນເລື່ອງການຢ່າຮ້າງ
(ມທ 19:9; ມຣກ 10:11-12; ລກ 16:18)
31“ຍັງມີຄຳກ່າວໄວ້ວ່າ, ‘ຖ້າຜູ້ໃດທີ່ປະຮ້າງເມຍຂອງຕົນ ໃຫ້ລາວເຮັດໜັງສືຢ່າຮ້າງໃຫ້ນາງ.’ 32ແຕ່ເຮົາບອກເຈົ້າທັງຫລາຍວ່າ, ຖ້າຜູ້ໃດປະຮ້າງເມຍຂອງຕົນດ້ວຍເຫດຜົນອື່ນໃດ ນອກຈາກການຫລິ້ນຊູ້ກັບຊາຍອື່ນ. ກໍເທົ່າກັບວ່າຜູ້ນັ້ນເຮັດໃຫ້ນາງຫລິ້ນຊູ້ ເມື່ອນາງແຕ່ງງານໃໝ່ ແລະຜູ້ທີ່ແຕ່ງງານກັບນາງນັ້ນ ກໍມີຄວາມຜິດໃນຖານຫລິ້ນຊູ້ເໝືອນກັນ.”
ຄຳສັ່ງສອນເລື່ອງການສາບານ
33“ອັນໜຶ່ງອີກ ເຈົ້າທັງຫລາຍໄດ້ຍິນຄຳທີ່ກ່າວແກ່ຄົນໃນສະໄໝບູຮານວ່າ, ‘ຢ່າເຮັດຜິດຕໍ່ຄຳສາບານ, ແຕ່ຈົ່ງປະຕິບັດຕາມທີ່ຕົນໄດ້ສາບານໄວ້ກັບອົງພຣະຜູ້ເປັນເຈົ້າ.’ 34ແຕ່ບັດນີ້ ເຮົາບອກເຈົ້າທັງຫລາຍວ່າ, ຢ່າສາບານເລີຍ, ຢ່າສາບານໂດຍອ້າງເຖິງສະຫວັນ ເພາະສະຫວັນແມ່ນບັນລັງຂອງພຣະເຈົ້າ 35ຫລືໂດຍອ້າງເຖິງແຜ່ນດິນໂລກ ເພາະແຜ່ນດິນໂລກແມ່ນບ່ອນຮອງຕີນຂອງພຣະອົງ ຫລືໂດຍອ້າງເຖິງນະຄອນເຢຣູຊາເລັມ ເພາະນະຄອນເຢຣູຊາເລັມແມ່ນນະຄອນຂອງກະສັດຜູ້ຍິ່ງໃຫຍ່. 36ຢ່າສາບານໂດຍອ້າງໃສ່ແມ່ນແຕ່ຫົວຂອງເຈົ້າເອງ ເພາະເຈົ້າເອງຈະເຮັດໃຫ້ຜົມຂາວຫລືດຳແມ່ນແຕ່ເສັ້ນດຽວກໍບໍ່ໄດ້. 37ແຕ່ຈົ່ງໃຫ້ຖ້ອຍຄຳຂອງເຈົ້າເປັນດັ່ງນີ້, ‘ແມ່ນ’ ກໍວ່າ ‘ແມ່ນ’ ຫລື ‘ບໍ່ແມ່ນ’ ກໍວ່າ ‘ບໍ່ແມ່ນ’ ສ່ວນຄຳເວົ້າທີ່ເກີນກວ່ານີ້ແມ່ນມາຈາກມານຊົ່ວຮ້າຍ.”
ຄຳສັ່ງສອນເລື່ອງການແກ້ແຄ້ນ
(ລກ 6:29-30)
38“ເຈົ້າທັງຫລາຍກໍໄດ້ຍິນຄຳທີ່ກ່າວໄວ້ວ່າ, ‘ຕາແທນຕາ ແຂ້ວແທນແຂ້ວ’ 39ແຕ່ເຮົາບອກພວກເຈົ້າວ່າ, ຢ່າແກ້ແຄ້ນຜູ້ທີ່ເຮັດຜິດຕໍ່ພວກເຈົ້າ ຖ້າຜູ້ໃດຕົບແກ້ມເບື້ອງຂວາຂອງເຈົ້າ ຈົ່ງປິ່ນໃຫ້ເຂົາຕົບແກ້ມເບື້ອງຊ້າຍດ້ວຍ. 40ຖ້າມີຜູ້ໃດຟ້ອງເອົາເສື້ອຊັ້ນໃນຂອງເຈົ້າ ຈົ່ງໃຫ້ເຂົາເອົາເສື້ອຊັ້ນນອກດ້ວຍ. 41ຖ້າຜູ້ໃດຈະເກນເຈົ້າໃຫ້ແບກໄປໜຶ່ງຫລັກ ຈົ່ງແບກໄປເຖິງສອງຫລັກ. 42ເມື່ອຜູ້ໃດຂໍສິ່ງໃດນຳເຈົ້າ ຈົ່ງໃຫ້ເຂົາ ຢ່າປິ່ນຫລັງໃສ່ຜູ້ທີ່ຂໍຢືມນຳເຈົ້າ ຈົ່ງໃຫ້ເຂົາຢືມ.”
ຄວາມຮັກສຳລັບສັດຕູ
(ລກ 6:27-28,32-36)
43“ເຈົ້າທັງຫລາຍໄດ້ຍິນຄຳທີ່ກ່າວໄວ້ວ່າ, ‘ຈົ່ງຮັກເພື່ອນບ້ານແລະຊັງສັດຕູ.’ 44ແຕ່ເຮົາບອກເຈົ້າທັງຫລາຍວ່າ, ຈົ່ງຮັກສັດຕູຂອງເຈົ້າ ແລະພາວັນນາອະທິຖານເພື່ອຜູ້ທີ່ຂົ່ມເຫັງເຈົ້າ, 45ເພື່ອວ່າເຈົ້າທັງຫລາຍຈະກາຍເປັນບຸດແຫ່ງພຣະບິດາເຈົ້າ ຜູ້ຊົງສະຖິດໃນສະຫວັນ ເພາະພຣະອົງບັນດານໃຫ້ແສງຕາເວັນຂອງພຣະອົງສ່ອງໃສ່ທັງຄົນຊົ່ວແລະຄົນດີເໝືອນກັນ ແລະໃຫ້ຝົນຕົກໃສ່ທັງຄົນທີ່ຊອບທຳແລະບໍ່ຊອບທຳ. 46ຖ້າເຈົ້າທັງຫລາຍຮັກຄົນທີ່ຮັກພວກເຈົ້າແຕ່ເທົ່ານັ້ນ ພວກເຈົ້າຈະໄດ້ຮັບບຳເໜັດຫຍັງຈາກພຣະເຈົ້າ? ແມ່ນແຕ່ຄົນເກັບພາສີກໍຍັງເຮັດຢ່າງນັ້ນບໍ່ແມ່ນບໍ? 47ຖ້າເຈົ້າຄຳນັບພີ່ນ້ອງຂອງຕົນເທົ່ານັ້ນ ພວກເຈົ້າໄດ້ເຮັດຫຍັງດີລື່ນຄົນອື່ນແດ່? ແມ່ນແຕ່ຄົນບໍ່ເຊື່ອພຣະເຈົ້າກໍເຮັດເຊັ່ນນັ້ນເໝືອນກັນ. 48ດ້ວຍເຫດນັ້ນ ເຈົ້າທັງຫລາຍຕ້ອງເປັນຄົນດີທີ່ສຸດ ເໝືອນຢ່າງພຣະບິດາຂອງເຈົ້າຜູ້ສະຖິດຢູ່ໃນສະຫວັນເປັນຜູ້ດີທີ່ສຸດ.”
Currently Selected:
ມັດທາຍ 5: ພຄພ
Highlight
Share
Copy
Want to have your highlights saved across all your devices? Sign up or sign in
@ 2012 United Bible Societies. All Rights Reserved.