Lukas 1
1
Cov Lug Kws Sau rua The-aufilaus
1The-aufilaus, muaj ntau leej tau sau qha tej kws tub muaj huv peb lawm, 2lawv le kws muaj qee leej pum tej ntawd thaus nyavnyuas pib muaj lug, puab yog cov kws qha Txujmoo Zoo hab qha tej ntawd rua peb paub. 3Kuv tub ua tuab zoo saib tej ntawd txhij txhua thaus hauvpaug lug lawm. Yog le ntawd, The-aufilaus, koj yog tug kws paub qaabhau, kuv txhaj sau tej ntawd txhua zaaj, txij thaus hauvpaug moog txug thaus kawg rua koj paub. 4Koj txhaj yuav paub tseeb txhua zaaj kws puab qha rua koj lawm.
Qha Has Tas Yuav Yug Yauhaas
5Lub sijhawm kws Helauj ua vaajntxwv kaav lub xeev Yudas,#1.5 Yudas: Lu lug nuav siv has taagnrho rua lub tebchaws Palexatees. muaj ib tug povthawj hu ua Xakhaliyas, nwg yog Anpiyas paab povthawj. Nwg tug quaspuj hu ua Elixanpes. Elixanpes yog Aloos ib tug xeebntxwv.#1 Xvn 24.10 6Vaajtswv pum has tas obtug yog tuabneeg ncaaj nceeg, noog Vaajtswv lug hab ua lawv le Vaajtswv txuj kevcai txhua nqai, tsi muaj ib qho kws luas yuav thuam tau obtug. 7Obtug tsi muaj mivnyuas, rua qhov Elixanpes yeej ibtxwm xeeb tsi taug tub, hab obtug tub laug laug lawm.
8Muaj ib nub Xakhaliyas taabtom ua nwg teg num huv lub Tuamtsev lawv le cov povthawj naj nub ua. 9Lawv le cov povthawj txuj kevcai, puab rhu ntawv tau Xakhaliyas moog hlawv moov tshuaj tsw qaab rua sau lub thaaj huv lub Tuamtsev. 10Yog le ntawd, nwg txhaj moog rua huv tug Tswv lub Tuamtsev, lub sijhawm kws Xakhaliyas hlawv moov tshuaj tsw qaab, cov tuabneeg nyob saab nrau thov Vaajtswv. 11Tug Tswv ib tug timtswv lug sawv ntawm lub thaaj kws hlawv moov tshuaj tsw qaab saab xis. 12Thaus Xakhaliyas pum dlheev tug timtswv ntawd, nwg poob sab hab ntshai kawg le. 13Tabsis tug timtswv has rua Xakhaliyas has tas, “Koj tsi xob ntshai! Vaajtswv tub nov koj tej lug thov lawm. Koj tug quaspuj yuav yug ib tug mivtub rua koj. Koj yuav tis nwg lub npe hu ua Yauhaas. 14Thaus yug tau tug mivtub ntawd, koj yuav zoo sab kawg le, hab yuav muaj tuabneeg coob coob nrug koj zoo sab, rua qhov tug Tswv suav has tas, 15nwg yog ib tug tuabneeg tseemceeb. Nwg yuav tsi haus cawv txiv maab lossis cawv ntxws hlo le. Nwg yuav puv npo Vaaj Ntsujplig tug Dlawbhuv huv nruab thab lug, #Tnp 6.3 16nwg yuav coj cov Yixalayees coob leej rov lug cuag tug Tswv kws yog puab tug Vaajtswv. 17Nwg yuav muaj tswvyim hab muaj fwjchim ib yaam le Eliyas tug kws cev Vaajtswv lug, nwg yuav ua tug Tswv ntej moog ua kuas tej txiv tub rov sis hum; nwg yuav ua kuas cov tuabneeg kws tawv ncauj hloov ua tuabneeg ncaaj nceeg; hab nwg yuav npaaj ib cov tuabneeg rua tug Tswv.”#Mal 4.5-6
18Xakhaliyas nug tug timtswv ntawd has tas, “Yuav ua le caag kuv txhaj paub tej kws koj has ko? Kuv tub laug heev, hab kuv tug quaspuj los tub laug laug lawm.”
19Tug timtswv teb has tas, “Kuv yog Khali-ees, kuv nyob ntawm Vaajtswv xubndlag, Vaajtswv khaiv kuv lug qha txuj xuv zoo nuav rua koj.#Dan 8.16; 9.21 20Thaus txug lub sijhawm lawm yeej yuav muaj lawv le kuv has nuav tag, tabsis vim koj tsi ntseeg kuv tej lug, koj yuav has tsi tau lug moog txug nub kws muaj lawv le tej kws kuv tub has rua koj lawm.”
21Thaus ntawd cov tuabneeg kws nyob saab nrau tog Xakhaliyas, puab xaav tsi thoob sov yog ua le caag Xakhaliyas yuav nyob huv lub Tuamtsev ntev ua luaj le. 22Thaus nwg tawm lug, nwg txawm has tsi tau lug rua puab le, nwg ua ruag pav rua puab xwb. Puab xaav has tas tej zag yog muaj ib yaam dlaabtsi tshwm lug rua nwg pum huv lub Tuamtsev.
23Thaus Xakhaliyas ua num huv lub Tuamtsev taag lawm, nwg rov qaab moog tsev. 24Tom qaab ntawd tsi ntev, Elixanpes kws yog Xakhaliyas tug quaspuj txawm xeeb tub, Elixanpes nyob huv tsev tau tsib lub hlis, nwg tsi tawm moog qhov twg le. 25Elixanpes has tas, “Nwgnuav tug Tswv paab kuv hab nwg ua rua kuv tsi txaajmuag rua leejtwg le lawm!”
Qha Has Tas Yuav Yug Yexus
26Thaus Elixanpes xeeb tub tau rau lub hlis lawm, Vaajtswv khaiv nwg tug timtswv Khali-ees lug rua huv lub nroog Naxales kws nyob huv lub xeev Kalilais. 27Tug timtswv ntawd lug cuag ib tug nkaujxwb hu ua Malis, tug kws Yauxej kws yog Vaajntxwv Daviv tug xeebntxwv tub qhab tseg lawm.#Mat 1.18 28Tug timtswv lug has rua Malis has tas, “Koj yuav tau zoo nyob kaaj sab lug! Tug Tswv nrug nraim koj nyob hab foom koob moov ntau kawg rua koj lawm!”
29Thaus Malis nov tug timtswv has le ntawd, nwg nyuaj sab heev, nwg xaav tsi thoob le, sov tug timtswv has le ntawd, yog has txug dlaabtsi. 30Tug timtswv has rua Malis has tas, “Malis, koj tsi xob ntshai, Vaajtswv tub foom koob moov rua koj lawm. 31Koj yuav xeeb tub hab yuav yug tau ib tug mivtub, koj yuav tis nwg lub npe hu ua Yexus.#Mat 1.21 32Nwg yuav ua tug tseemceeb, hab suavdlawg yuav hu nwg lub npe has tas, nwg yog Vaajtswv tug kws muaj Fwjchim Luj kawg nkaus tug Tub. Tug Tswv kws yog Vaajtswv yuav tsaa nwg ua vaajntxwv, ib yaam le nwg yawmkoob Daviv, #2 Xam 7.12,13,16; Yay 9.7 33nwg yuav ua vaajntxwv kaav Yakhauj cov xeebntxwv moog ibtxhis; hab nwg lub tebchaws yuav nyob moog tsi paub kawg le!”
34Malis nug tug timtswv has tas, “Kuv yog ib tug nkaujxwb, yuav ua le caag muaj tau le ntawd?”
35Tug timtswv teb has tas, “Vaaj Ntsujplig tug Dlawbhuv yuav lug rua sau koj, hab Vaajtswv lub fwjchim yuav roog koj. Vim le nuav suavdlawg txhaj yuav hu tug mivtub kws dlawbhuv kws yuav yug lug ntawd has tas, nwg yog Vaajtswv tug Tub. 36Koj saib koj tug pujnyaaj Elixanpes kws suavdlawg has tas, nwg ibtxwm xeeb tsi taug tub, txawm yog nwg laug laug lawm los nwgnuav nwg tub xeeb tub tau rau lub hlis lawm, 37rua qhov yeej tsi muaj ib yaam dlaabtsi kws Vaajtswv yuav ua tsi tau le.”#Chk 18.14
38Malis has tas, “Kuv yog Vaajtswv tug ntxhais qhev, thov kuas muaj lawv le koj has ko rua kuv.” Ces tug timtswv txawm ncaim Malis moog lawm.
Malis Moog Saib Elixanpes
39Tsi ntev tom qaab ntawd, Malis txawm sawv kev hab rau sab ntso moog txug ntawm ib lub nroog kws nyob sau laaj roob huv lub xeev Yudas, 40nwg moog rua huv Xakhaliyas tsev hab has noj qaab nyob zoo rua Elixanpes. 41Thaus Elixanpes nov dlheev Malis lub suab has rua nwg, ces nwg tug mivnyuas huv plaab txawm nti cuag dlaabtsi. Hab Elixanpes puv npo Vaaj Ntsujplig tug Dlawbhuv, 42hab Elixanpes has nrov nrov rua Malis has tas, “Koj yog tug kws tau koob moov ntau tshaaj plawg txhua tug quaspuj huv tuabsi, hab koj tug mivnyuas huv plaab los tau koob moov hab. 43Vim le caag kuv yuav tau txais txujkev hlub luj npaum le nuav, kuv tug Tswv leej nam tseem tuaj saib kuv hab? 44Thaus kuv nov dlheev tej lug kws koj has rua kuv, kuv tug mivnyuas kws nyob huv kuv plaab zoo sab hab nti cuag dlaabtsi. 45Koj yuav zoo sab heev, rua qhov koj tub ntseeg has tas, yuav muaj lawv le tej lug kws tug Tswv has rua koj lawm!”
Malis Zaaj Nkauj Qhuas Vaajtswv
46Malis has tas, “Kuv lub sab
ca le qhuas tug Tswv; #1 Xam 2.1-10
47Vaajtswv kws yog kuv tug
Cawmseej,
nwg ua rua kuv zoo sab
kawg le.
48Rua qhov kuv yog nwg ib tug
ntxhais qhev
kws tsi tseemceeb los nwg tseem
ncu txug kuv hab!
Txij nuav moog txhua tsaav
tuabneeg
yuav hu kuv has tas tug kws
tau koob moov, #1 Xam 1.11
49vim tej kws Vaajtswv tug
kws muaj Fwjchim
Luj kawg nkaus tau ua rua
kuv lawm.
Nwg lub npe dlawbhuv
kawg nkaus;
50Vaajtswv hlub txhua tug kws
fwm nwg
ib tam dlhau ib tam.
51Nwg tsaa nwg txhais teg kws
muaj fwjchim
ua kuas cov tuabneeg kws
khaavtheeb
tsi sis hum hab tawg paab
tawg pawg.
52Vaajtswv muab cov vaajntxwv
kws muaj fwjchim
txu ntawm puab lub zwmtxwv,
hab Vaajtswv muab
cov tuabneeg kws tsi muaj fwjchim
tsaa rua qhov chaw sab.#Yaj 5.11; 12.19
53Vaajtswv pub tej zaub mov zoo
rua cov tuabneeg kws
tshaib nqhes tau noj tsau npo.
Nwg ntab cov tuabneeg npluanuj
tsiv moog
teg dlawb teg nplag.
54Nwg ua lawv le nwg tau
coglug tseg
rua peb cov yawmkoob lawm,
hab nwg tau lug paab cov
tuabneeg Yixalayees
kws yog nwg cov tubkhai.
55Nwg ncu ntsoov hlub Anplahaas
hab Anplahaas
cov xeebntxwv moog ibtxhis le!”#Chk 17.7
56Malis nrug Elixanpes nyob yuav laug tau peb lub hlis, nwg maam le rov moog tsev.
Yug Yauhaas Tug Kws Muab Tuabneeg Ua Kevcai Raus Dlej
57Thaus txug caij kws Elixanpes yug mivnyuas, nwg yug tau ib tug mivtub. 58Nwg cov kwvtij neejtsaa hab tej tuabneeg zej zog nov has tas, tug Tswv foom koob moov rua nwg lawm, puab nrug nwg zoo sab kawg le.
59Thaus tug mivnyuas ntawd muaj yim nub lawm, puab tuaj muab nwg ua kevcai txav tawv, hab puab yuav tis nwg lub npe hu ua Xakhaliyas lawv le nwg txiv.#Lek 12.3 60Tabsis Elixanpes teb has tas, “Tsi yog le ntawd! Yuavtsum tis nwg lub npe hu ua Yauhaas.”
61Puab has rua Elixanpes has tas, “Koj tub tsi muaj ib tug kwvtij npe hu le ntawd los sav!” 62Puab txawm ua ruag pav rua tug mivtub leej txiv nug saib nwg nyam tis tug mivtub ntawd lub npe hu le caag.
63Xakhaliyas kuas puab muab ib dlaim ntawv lug rua nwg, hab nwg sau has tas, “Tug mivtub nuav lub npe hu ua Yauhaas.” Puab xaav tsi thoob le! 64Taamsim ntawd Xakhaliyas txawm rov has tau lug, hab nwg ua Vaajtswv tsaug. 65Tej tuabneeg zej zog ntshai kawg le, hab zaaj ntawd txawm nrov nchaa moog thoob plawg tej zej zog kws nyob peg tej laaj roob huv lub xeev Yudas. 66Cov tuabneeg kws nov zaaj nuav txawm khaws zaaj nuav ca rua nruab sab hab puab sis thaam has tas, “Tug mivnyuas nuav luj hlub lug nwg yuav ua dlaabtsi?” Rua qhov Vaajtswv lub fwjchim nrug nraim tug mivnyuas nuav.
Xakhaliyas Qha Tej Kws Yuav Muaj Lug Yaav Tom Ntej
67Xakhaliyas kws yog Yauhaas txiv puv npo Vaaj Ntsujplig tug Dlawbhuv, hab nwg qha ib zaaj kws yuav muaj lug yaav tom ntej has tas:
68“Peb ca le ua tug Tswv kws
yog cov Yixalayees
tug Vaajtswv tsaug!
Rua qhov nwg lug paab nwg
tsaav tuabneeg
hab nwg tub tso puab dlim
lawm.
69Vaajtswv khaiv ib tug Cawmseej
kws muaj fwjchim lug paab peb.
Nwg yog Vaajtswv tug tubkhai
Daviv ib tug xeebntxwv.
70Lawv le Vaajtswv tau
coglug tseg
rua cov cev Vaajtswv lug
kws dlawbhuv
thaus u lug lawm has tas,
71nwg yuav cawm kuas peb
dlim
ntawm peb cov yeebncuab
txhais teg.
Hab dlim ntawm txhua tug
kws ntxub peb.
72Vaajtswv has tas, nwg yuav hlub
peb cov yawmkoob
hab yuav ncu ntsoov tej
lug tseemceeb
kws nwg tau cog tseg lawm.
73-74Nwg coglug tseeb tseg
rua peb yawmkoob
Anplahaas has tas nwg yuav paab
kuas peb dlim
ntawm peb cov yeebncuab
txhais teg,
hab yuav paab kuas peb muaj
sab tawv ua tau
nwg teg num tsi ntshai le,
75kuas peb ua tau tuabneeg zoo
hab ncaaj nceeg
lawv le Vaajtswv lub sab nyam
moog taag peb tam neej.
76“Kuv tug Mivtub, suavdlawg
yuav hu koj has tas,
koj yog ib tug cev Vaajtswv tug
kws muaj Fwjchim
Luj kawg nkaus lug.
Koj yuav ua tug Tswv ntej
moog khu kev tog nwg,#Mal 3.1
77Hab qha rua Vaajtswv tsaav
tuabneeg,
kuas puab paub has tas, Vaajtswv
yuav zaam puab
lub txim kuas puab dlim.
78Rua qhov peb tug Vaajtswv
yog tug kws
hlub peb kawg nkaus.
Nwg txujkev cawm dlim ci tuaj
rua peb ib yaam le
tug dluab tshaav ntuj ci thaus
sawv ntxuv,
79hab yuav ci moog rua txhua
tug kws nyob
huv qhov tsaus ntuj kws yog
txujkev tuag,
txhaj yuav coj tau peb moog
taug txujkev
kws peb yuav tau nyob
kaaj sab lug.”#Yay 9.2
80Tug mivtub ntawd luj hlub zoo hab nwg muaj tswvyim heev zuj zug, hab nwg nyob tom roob mojsaab qhua moog txug nub kws nwg tawm lug rua cov Yixalayees pum.
Currently Selected:
Lukas 1: HNJ2000
Highlight
Share
Copy
Want to have your highlights saved across all your devices? Sign up or sign in
© 2000 United Bible Societies. All rights reserved.
