Chivkeeb 47

1Yauxej moog has rua Falaus has tas, “Kuv txiv hab kuv cov tijlaug, caab puab tej tsaj txhu luj miv hab coj txhua yaam kws yog puab tug, nrug puab tsiv peg tebchaws Kana-aas lug txug lawm, taamsim nuav puab nyob huv cheebtsaam Nkausees.” 2Yauxej coj nwg tsib tug tijlaug moog qha rua Falaus.

3Falaus nug puab has tas, “Mej ibtxwm ua num dlaabtsi?”

Puab teb Falaus has tas, “Peb yog tuabneeg yug yaaj ib yaam le peb tej yawmkoob ibtxwm yug lug lawm xwb. 4Peb tau tsiv lug nyob huv lub tebchaws nuav, rua qhov nyob peg tebchaws Kana-aas muaj kev tshaib nqhes heev, tsi muaj zaub rua tej tsaj txhu noj le lawm. Mas thov koj tso cai rua peb nyob rua huv cheebtsaam Nkausees.” 5Falaus has rua Yauxej has tas, “Nwgnuav koj txiv hab koj cov tijlaug tub lug txug koj lawm, 6lub tebchaws Iziv nuav yeej yog puab lub hab. Ca le tso puab nyob rua huv cheebtsaam Nkausees, yog thaaj chaw kws aav zoo tshaaj plawg huv lub tebchaws nuav. Hab yog puab tseem tshuav cov tuabneeg kws muaj peevxwm yug taug tsaj, koj kuas puab ua cov yug kuv tej tsaj txhu hab.”

7Ces Yauxej txhaj coj nwg txiv Yakhauj moog qha rua Falaus. Yakhauj foom koob moov rua Falaus, 8hab Falaus nug Yakhauj has tas, “Koj noobnyoog muaj pistsawg xyoo lawm?”

9Yakhauj teb Falaus has tas, “Kuv ua lub neej ncig moog ncig lug tau ib puas peb caug xyoo. Kuv lub neej tuab lu hab ntxhuv sab kawg le, kuv noobnyoog tsi ntev le kuv tej yawmkoob thaus u lawm.” 10Yakhauj txawm rov foom koob moov rua Falaus hab tawm lug lawm. 11Ces Yauxej tu aav rua nwg txiv hab nwg cov tijlaug nyob huv tebchaws Iziv, muab thaaj aav zoo tshaaj plawg kws nyob ze lub nroog Lamexes rua puab nyob ua puab tug, lawv le Falaus tau has rua Yauxej lawm. 12Yauxej muab zaub mov pub rua nwg txiv, nwg cov tijlaug, hab taagnrho puab tej quaspuj mivnyuas noj.

Kev Tshaib Nqhes

13Kev tshaib nqhes luj kawg le ua rua txhua qhov chaw tsi muaj mov noj le lawm, ua rua cov tuabneeg Iziv hab cov tuabneeg Kana-aas qaug zug zig vim txujkev tshaib nqhes ntawd. 14Yauxej muab tej nyaj kws cov tuabneeg Iziv hab cov tuabneeg Kana-aas coj tuaj yuav nplej ntawd nqaa taagnrho moog ca rua huv Falaus lub loog huv tuabsi. 15Thaus cov tuabneeg Iziv hab cov tuabneeg Kana-aas siv puab tej nyaj taag lawm, cov tuabneeg Iziv tuaj cuag Yauxej hab has tas, “Thov muab mov rua peb noj, tsi xob ca peb tuag tshaib. Thov nrhav kev cawm peb, rua qhov peb tej nyaj taag lawm.”

16Yauxej teb has tas, “Yog mej tej nyaj taag lawm, mej ca le coj mej tej tsaj tuaj, kuv yuav muab nplej pauv.” 17Yog le ntawd, puab txhaj coj puab tej tsaj tuaj rua Yauxej, Yauxej txhaj muab nplej pauv puab tej neeg, tej yaaj, tej tshis, tej nyuj hab neeg luav. Xyoo ntawd cov pejxeem muab taagnrho puab tej tsaj txhu tuaj pauv Yauxej tej nplej huv tuabsi.

18Xyoo tom qaab puab rov tuaj cuag nwg dlua hab has tas, “Tug tswv, peb has tseeb rua koj, peb tsi zais ib yaam dlaabtsi ca hlo le, peb tej nyaj txag los taag hab peb tej tsaj txhu los peb coj tuaj rua koj taag. Peb tsi tshuav ib yaam dlaabtsi yuav coj tuaj rua koj lawm, tsuas yog tshuav peb lub cev hab peb tej teb lawm xwb. 19Thov koj tsi xob ca peb tuag, nrhav kev cawm peb! Tsi xob ca peb tej teb caj quavpoj. Peb muab peb tej teb lug pauv koj tej mov, peb txhaj tau mov noj. Peb zoo sab yuav moog ua Falaus qhev, hab yuav muab peb tej teb rua nwg. Thov pub mov rua peb noj peb txhaj tsi tuag tshaib, hab muab noob qoob rua peb cog, kuas peb tej teb txhaj tsi dlo dlus ca.”

20Yauxej yuav taagnrho tej teb huv tebchaws Iziv rua Falaus. Txhua tug tuabneeg Iziv puavleej muab teb muag huv tuabsi, rua qhov muaj kev tshaib nqhes heev, hab Falaus tau taagnrho suavdlawg tej teb moog ua nwg tug. 21Yauxej muab cov pejxeem kws nyob huv tebchaws Iziv ua Falaus qhev huv tuabsi. 22Tsuas yog tshuav cov povthawj tej teb, Yauxej txhaj tsi tau yuav. Puab tsi tau muag puab tej teb, rua qhov puab tau noj tau haus tej kws Falaus muab pub rua puab. 23Yauxej has rua cov pejxeem has tas, “Nwgnuav kuv tub yuav mej hab mej tej teb ua Falaus tug taag lawm. Ntawm nuav yog tej noob qoob kws muab rua mej, mej ca le nqaa moog tseb rua huv mej tej teb. 24Thaus txug caij sau qoob mej yuavtsum muab ib feem tsib coj tuaj rua Falaus. Dlua le cov, mej muab khaws tseg ca ua noob hab tseg rua mej hab mej cov quaspuj mivnyuas tau noj.”

25Puab teb has tas, “Tug tswv, koj tau ua zoo kawg nkaus rua peb, koj cawm peb txujsa, peb yuav zoo sab hlo moog ua Falaus qhev.” 26Yog le ntawd, Yauxej txhaj sau ib txuj cai rua lub tebchaws Iziv kuas yuavtsum muab tej qoobloo kws sau tau, ib feem tsib tuaj rua Falaus. Txuj cai nuav cov tuabneeg Iziv tseem coj lug txug naj nub nua. Tsuas yog cov povthawj tej teb, txhaj tsi yog vaajntxwv tug xwb.

Yauxej Coglug rua Yakhauj

27Cov tuabneeg Yixalayees kws nyob huv tebchaws Iziv ntawm cheebtsaam Nkausees, puab npluanuj hab muaj tubki fuamvaam coob kawg le. 28Yakhauj nyob huv tebchaws Iziv tau kaum xyaa xyoo, nwg muaj noobnyoog ib puas hab plaub caug xyaa xyoo. 29Thaus ze lub caij kws nwg yuav tuag, nwg txawm hu nwg tug tub Yauxej tuaj cuag nwg hab has tas, “Muab koj ob txhais teg tso rua huv kuv ceg puabtais#47.29 Muab koj… kuv ceg puabtais: Saib 24.2. hab coglug tseg has tas, koj yuav tsi muab kuv log rua huv tebchaws Iziv nuav le. 30Thaus kuv tuag, koj yuavtsum coj kuv lub cev tawm huv tebchaws Iziv nuav moog log nrug kuv cov yawmkoob ua ke.”

Yauxej teb has tas, “Txiv, kuv yuav ua lawv le koj has ntaag.”#Chk 49.29-32; 50.6

31Yakhauj has tas, “Koj ca le coglug rua kuv has tas, koj yuav ua le kuv has.” Yauxej txawm coglug rua nwg, ces Yakhauj ca le ua Vaajtswv tsaug sau nwg txaaj.

Currently Selected:

Chivkeeb 47: HNJ2000

Highlight

Copy