Chivkeeb 46

Yakhauj Tsev Tuabneeg Tsiv Moog nraag Tebchaws Iziv

1Yakhauj sau taagnrho txhua yaam kws nwg muaj coj huv tuabsi moog, hab thaus nwg moog txug nraag lub zog Npesenpas, nwg muab tsaj lug tua fij pub rua nwg txiv Ixaj tug Vaajtswv. 2Mo ntawd nwg ua ywgtoog pum Vaajtswv lug has rua nwg hab hu nwg has tas, “Yakhauj, Yakhauj!”

Yakhauj teb has tas, “Vaajtswv, kuv nyob ntawm nuav.”

3Vaajtswv has tas, “Kuv yog Vaajtswv, kuv yog koj txiv tug Vaajtswv ntaag. Koj tsi xob ntshai qhov kws koj moog nyob nraag tebchaws Iziv, kuv yuav pub kuas koj cov xeebntxwv fuamvaam coob ua tau ib tsaav tuabneeg tseemceeb nyob rua nraag. 4Kuv yuav nrug koj moog nraag tebchaws Iziv, hab kuv yuav coj koj cov xeebntxwv rov lug nyob rua huv lub tebchaws nuav. Yauxej yuav nrug koj nyob thaus koj tuag.”

5Yakhauj txawm sawv kev tawm huv lub zog Npesenpas moog. Yakhauj cov tub muab Yakhauj, puab cov mivnyuas kws tseem yau, hab puab tej quaspuj tsaws caij cov tsheb neeg kws Falaus tso tuaj tog puab. 6Puab caab puab tej tsaj txhu hab coj puab tej cuabyeej toomtxeem kws puab muaj huv tebchaws Kana-aas moog nraag tebchaws Iziv huv tuabsi. Yakhauj coj taagnrho nwg cov xeebntxwv nrug nwg moog, xws le: #Ten 7.15 7Nwg cov tub, cov ntxhais, hab cov ntxhais xeebntxwv.

8Taagnrho Yakhauj tsev tuabneeg txhua tug kws nrug nwg tsiv moog nyob nraag tebchaws Iziv, Lunpees yog nwg tug tub hlub, hab 9Lunpees cov tub yog: Hanauj, Palus, Hexeloos hab Kalimis. 10Xime-oos cov tub yog: Yemuyees, Yamees, Auhas, Yakhees, Xauhas, hab Sa-ules kws yog tug quaspuj tuabneeg Kana-aas tug tub. 11Levis cov tub yog: Nkesoos, Kauhas, hab Malalis. 12Yudas cov tub yog: Selas, Pelej hab Zelas. (Yudas muaj dlua ob tug tub yog Eles hab Aunaas, obtug tuag rua huv tebchaws Kana-aas lawm.) Peles ob tug tub yog: Hexeloos hab Hamaules. 13Ixakhas cov tub yog: Taulas, Puahas, Yasus hab Simeloos. 14Xenpuloos cov tub yog: Xelas, Eloos hab Yahelees. 15Ntawm nuav yog cov tub kws Le-as yug rua Yakhauj thaus nyob peg tebchaws Mexuputamias, xaam nwg tug ntxhais Dinas nrug puab. Taagnrho nwg cov tub hab cov ntxhais kws Le-as yug muaj peb caug peb leeg.

16Khas cov tub yog: Xefoos, Hankis, Sunis, Exenpoos, Elis, Alaudis hab Alelis. 17Aseles cov tub yog: Eenas, Isevas, Isevis, Npeliyas hab puab tug muam kws hu ua Selas. Npeliyas ob tug tub yog Henpeles hab Makhiyees. 18Kaum rau leej nuav puavleej yog Yakhauj cov xeebntxwv kws yog Le-as tug ntxhais qhev Xilepas kws Lanpaas muab rua nwg tug ntxhais Le-as yug.

19Laxees kws yog Yakhauj tug quaspuj yug tau ob tug tub rua Yakhauj yog: Yauxej hab Npeenyamees. 20Nyob huv tebchaws Iziv Yauxej muaj ob tug tub, Manaxes hab Efalayees, obtug yog Pautifelas kws yog tug povthawj kws nyob huv lub nroog Aunis tug ntxhais Axenas yug.#Chk 41.50-52 21Npeenyamees cov tub yog: Npelas, Npekeles, Asenpees, Nkelas, Na-amas, Ehis, Lauses, Mupees, Hupees hab Alaudis. 22Kaum plaub leeg nuav puavleej yog Yakhauj cov xeebntxwv kws yug lug ntawm Laxees.

23Daas tug tub yog: Husees. 24Nathalis cov tub yog: Yahexees, Nkunis, Yexes hab Silees. 25Xyaa leej nuav puavleej yog Yakhauj cov xeebntxwv kws yog Laxees tug ntxhais qhev Nilehas kws Lanpaas muab rua nwg tug ntxhais Laxees yug.

26Taagnrho Yakhauj cov tub hab cov xeebntxwv kws nrug nwg tsiv moog nyob nraag tebchaws Iziv muaj rau caum rau leej, tsi suav Yakhauj cov nyaab. 27Xaam Yauxej ob tug tub kws yug nraag tebchaws Iziv rua hab, Yakhauj tsev tuabneeg muaj xyaa caum leej kws tsiv moog nyob nraag tebchaws Iziv.#Ten 7.14

Yakhauj Tsev Tuabneeg Moog Nyob Tebchaws Iziv

28Yakhauj khaiv Yudas ua ntej moog nug Yauxej kuas qha kev moog rua ntawm Nkausees. Thaus puab tub lug txug rua ntawm cheebtsaam Nkausees lawm, 29Yauxej txhaj caij tsheb neeg moog ntsib nwg txiv rua ntawm Nkausees. Thaus obtug sis ntsib, Yauxej puag nkaus nwg txiv hab quaj ntev loo. 30Yakhauj has rua Yauxej has tas, “Txawm yog kuv tuag los kuv yeej zoo sab, rua qhov kuv tub pum koj hab kuv paub has tas koj tseem muaj sa nyob.”

31Yauxej has rua nwg cov tijlaug hab nwg txiv tsev tuabneeg has tas, “Kuv yuav moog qha rua Falaus paub has tas, kuv cov kwvtij hab kuv txiv tsev tuabneeg kws nyob peg tebchaws Kana-aas tub lug txug kuv lawm. 32Kuv yuav qha rua Falaus has tas, mej yog cov tuabneeg yug yaaj hab tu tsaj txhu, mas mej caab mej tej tsaj luj, tsaj miv hab coj taagnrho mej tej cuabyeej toomtxeem kws mej muaj nrug mej lug. 33Thaus Falaus hu mej moog nug saib mej ua num dlaabtsi, 34mej teb nwg has tas, ‘Peb hab peb cov yawmkoob yeej yog tuabneeg yug tsaj thaus u lug txug naj nub nua.’ Mej yuavtsum teb le nuav, nwg txhaj yuav ca mej nyob ntawm cheebtsaam Nkausees nuav.” Yauxej has le nuav rua qhov cov tuabneeg Iziv yeej ibtxwm tsi nyam cov tuabneeg yug yaaj.

Currently Selected:

Chivkeeb 46: HNJ2000

Highlight

Copy