Chivkeeb 31

Yakhauj Tsiv Tawm ntawm Lanpaas

1Yakhauj nov Lanpaas cov tub has tas, “Yakhauj tau muab txhua yaam kws yog peb txiv le tug coj moog taag huv tuabsi lawm. Nwg muaj txag npluanuj tub yog tau lug ntawm peb txiv nkaus xwb.” 2Hab nwg paub has tas, Lanpaas tsi nrug nwg sis raug zoo le ibtxwm muaj yaav taag lug lawm. 3Ces tug TSWV txhaj has rua Yakhauj has tas, “Koj ca le rov qaab moog rua tim koj txiv hab koj cov kwvtij lub tebchaws. Kuv yuav nrug nraim koj.”

4Yog le ntawd, Yakhauj txhaj tso tuabneeg moog has rua Laxees hab Le-as, kuas obtug tuaj ntsib nwg rua tom teb kws yog qhov chaw cov tsaj nyob. 5Nwg txhaj has rua obtug tas, “Kuv paub lawm has tas, meb txiv tsi nrug kuv sis raug zoo le ibtxwm kws nwg ua rua kuv lug lawm, tabsis kuv txiv tug Vaajtswv yeej ibtxwm nrug nraim kuv. 6Meb yeej paub zoo lawm has tas, kuv rau sab ntso ua num rua meb txiv kawg kuv tug dlaag tug zug le. 7Txawm yog kuv tub ua npaum le ntawd los nwg tseem nyag hab hloov txu kuv tej nqe zug kaum zag lawm. Tabsis Vaajtswv tsi pub nwg ua phem rua kuv. 8Thaus kws Lanpaas has tas, ‘Muab cov tshis kws txaij tej teev ua nqe zug rua koj,’ ces cov tsaj txawm yug tau mivnyuas txaij taagnrho. Thaus nwg has tas, ‘Muab cov tshis kws txaij tej kaab ua nqe zug rua koj,’ ces cov tsaj txawm yug tau mivnyuas txaij ua tej kaab taagnrho. 9Vaajtswv tau muab cov tsaj ntawd tshem tawm ntawm meb txiv hab coj lug rua kuv.

10“Thaus txug caij kws cov tsaj sis phuv kuv txawm ua ib zaaj npau suav, kuv pum cov laug tshis kws taabtom phuv maum ntawd yog cov txaij ua tej teev hab txaij ua tej kaab. 11Vaajtswv ib tug timtswv lug has rua kuv huv zaaj npau suav ntawd has tas, ‘Yakhauj!’ Kuv teb has tas, ‘Kuv nyob ntawm nuav.’ 12Nwg has ntxiv tas, ‘Koj saib maj cov laug tshis kws taabtom phuv maum ntawd puavleej yog cov txaij ua tej teev hab txaij ua tej kaab xwb. Kuv taabtom ua kuas muaj tej nuav tshwmsim lug, rua qhov kuv pum tej kws Lanpaas ua tsi zoo rua koj. 13Kuv yog tug Vaajtswv kws lug tshwm rua koj pum nraag Npethees, ntawm thaaj chaw kws koj muab lub pobzeb lug teeb ua chaw ncu txug kws koj muab roj txiv ntoo laub rua sau ua khoom fij hab yog thaaj chaw kws koj coglug rua kuv ntaag. Nwgnuav koj ca le npaaj kuas txhij hab rov qaab moog rua nraag lub tebchaws kws yug koj.’ ”#Chk 28.18-22

14Laxees hab Le-as teb Yakhauj has tas, “Wb yeej tsi tshuav ib yaam qubtxeeg qubteg kws wb txiv tseg rua wb nyob huv wb txiv tsev le. 15Nwg saib wb ib yaam le yog tuabneeg txawv tebchaws xwb. Nwg muab wb muag, hab nwgnuav nwg muab tej nyaj kws yog wb tej nqe ntawd siv taag huv tuabsi lawm. 16Txhua yaam kws Vaajtswv muab ntawm wb txiv lug lawm, puavleej yog peb hab peb tej mivnyuas tug lawm. Koj ca le ua lawv le tug TSWV tau has rua koj lawm.”

17-18Yog le ntawd, Yakhauj txhaj sawbsim txhij hab rov qaab moog cuag nwg txiv rua nraag tebchaws Kana-aas. Nwg muab nwg cov mivnyuas hab nwg ob tug quaspuj tsaws caij sau cov ntxhuav nrausqaum, hab lawv taagnrho nwg cov tsaj moog ua nwg ntej, hab coj txhua yaam kws nwg khwv tau huv tebchaws Mexuputamias lug. 19Lanpaas taabtom moog txav plaub yaaj lawm, ces thaus kws nwg tsi nyob huv tsev lawm, Laxees txawm moog nyag tau nwg txiv cov mlom zuv tsev coj moog lawm. 20Yakhauj nyag kev tsiv ntsag tu tsi qha rua Lanpaas paub has tas nwg tsiv moog lawm. 21Yakhauj coj txhua yaam kws yog nwg tug hab maaj ceev nrooj moog hlaa tug Dlej Efalates hab taug kev moog rua tim lub laaj roob Nkile-as lawm.

Lanpaas Caum Yakhauj

22Tau peb nub tom qaab muaj tuabneeg moog qha rua Lanpaas paub has tas, Yakhauj tub tsiv lawm. 23Nwg txhaj txhij nwg cov tuabneeg nrug nwg moog caum Yakhauj qaab tau xyaa nub, puab txhaj caum cuag Yakhauj rua ntawm lub roob Nkile-as. 24Mo ntawd Vaajtswv lug has rua Lanpaas huv nruab npau suav has tas, “Koj ceevfaaj tsi xob moog thaab Yakhauj hlo le.” 25Yakhauj txhaj tsaa tsevntaub su sau laaj roob, Lanpaas hab nwg cov tuabneeg kuj tsaa tsevntaub su rua sau lub roob Nkile-as ntawd hab.

26Lanpaas has rua Yakhauj has tas, “Vim le caag koj nyag kev tsiv tawm ntawm kuv hab coj kuv ob tug ntxhais tsiv ib yaam le tej quaspuj kws luas nteg tau huv tshaav rog lug? 27Vim le caag koj ua sab dlub nyag kev tsiv ntsag tu tsi qha rua kuv paub? Yog koj qha kuv paub, kuv yuav xaa koj sawv kev lug ntawm kev zoo sab nrug tej suab hu nkauj lomzem hab nkauj nogncaas. 28Koj txawm tsi pub kuv nwj kuv cov xeebntxwv hab kuv ob tug ntxhais ua kev sis ncaim le. Qhov kws koj ua taag lug ntawd mas yog ruag kawg nkaus le! 29Kuv muaj cuabkaav yuav ua rua koj raug kev puamtsuaj tau, tabsis naag mo koj txiv tug Vaajtswv lug txwv tsi pub kuv ua le caag rua koj hlo le. 30Kuv paub qhov kws koj tsiv, rua qhov koj maaj rov qaab moog txug tsev heev, tabsis vim le caag koj nyag kuv cov mlom lug lawm hab?”

31Yakhauj teb has tas, “Rua qhov kuv ntshai nyob tsaam koj coj koj ob tug ntxhais tsiv tawm ntawm kuv moog, mas kuv txhaj tsi qha rua koj. 32Tabsis yog koj nrhav tau peb cov ntawm nuav leejtwg tau coj koj cov mlom lug lawm, ca le muab tug ntawd tua povtseg. Peb cov tuabneeg puavleej nyob ntawm nuav nrug ua timkhawv, tshawb txhua yaam kws yog koj tug nqaa huv tuabsi rov qaab moog.” Yakhauj tsi paub has tas, Laxees yog tug nyag Lanpaas cov mlom ntawd lug.

33Lanpaas txhaj moog tshawb huv Yakhauj tej tsevntaub taag, ces nwg maam moog tshawb huv Le-as lub tsevntaub, hab huv ob tug ntxhais qhev ob lub tsevntaub, tabsis nwg nrhav tsi tau nwg cov mlom ntawd le. Ces nwg maam moog tshawb huv Laxees lub tsevntaub. 34Laxees yeej tau muab cov mlom kws zuv tsev ntawd hab nwg muab qhwv ntsaws rua huv lub nraa ntxhuav hab nwg nyob quastsawg sau. Lanpaas moog tshawb thoob plawg huv cov tsevntaub, tabsis nwg nrhav tsi pum cov mlom ntawd le. 35Laxees has rua nwg txiv tas, “Txiv, thov koj tsi xob chim rua kuv, qhov kws kuv tsi muaj cuabkaav lug sawv ntawm koj xubndlag, tub yog kuv taabtom coj khaub dluag.” Lanpaas nrhav kawg, tabsis tsi pum nwg cov mlom ntawd le.

36Yakhauj chim heev tswj tsi tau nwg lub sab le lawm. Nwg txhaj nug npautawg vog has tas, “Kuv tau ua txhum koj dlaabtsi? Kuv tau ua txhum txuj cai twg txhaj ua rua koj muaj cai tuaj caum kuv txug qhov nuav? 37Nwgnuav koj tub tshawb taag kuv tej khoom huv tuabsi lawm, koj puas pum muaj ib yaam khoom twg kws yog koj le? Ca le muab rhu tawm lug tso taabmeeg rua koj cov tuabneeg hab kuv cov tuabneeg pum, hab ca puab txav txim rua wb ob tug nuav saib leejtwg txhaj ua yog. 38Kuv nrug koj nyob tau neeg nkaum xyoo, ua rua koj tej yaaj tej tshis fuamvaam tsi tu ncua, hab kuv yeej tsi tau tua koj tej yaaj ib tug noj le. 39Thaus kws ib tug yaaj twg raug tsaj qus tum lawm, kuv yeej them tug ntawd huv tuabsi rua koj. Kuv tsi tau coj lug qha rua koj rua qhov tsi yog tim kuv. Koj tseem yuam kuas kuv them tej tsaj kws tubsaab nyag nruab nub hab mo ntuj lawm huv tuabsi rua koj. 40Ntau zag kuv tiv tshaav ntuj kub thaus nruab nub hab tiv no thaus tsaus ntuj. Kuv tsi tau zoo pw tsaug zug hlo le. 41Yeej zoo le nuav lug tau neeg nkaum xyoo kws kuv nrug koj nyob. Kuv ua num kaum plaub xyoo lug pauv koj ob tug ntxhais, hab rau xyoo lug tu koj cov tsaj nkaus xwb. Ua npaum le ntawd los koj tseem hloov hab txu kuv tej nqe zug kaum zag lawm. 42Yog kuv txiv tug Vaajtswv, Anplahaas hab Ixaj tug Vaajtswv, tsi nrug nraim kuv nyob, ntshai koj tub muab kuv xaa rov qaab teg dlawb teg nplag lawm. Tabsis Vaajtswv pum kuv tej kev nyuaj sab hab tej num kws kuv tau ua taag lug lawm, naag mo nwg txhaj tau lug txav txim.”

Yakhauj hab Lanpaas sis Has Hum

43Lanpaas teb Yakhauj has tas, “Ob tug ntxhais nuav yog kuv ob tug, obtug cov mivnyuas los yeej yog kuv tug, hab tej tsaj nuav los puavleej yog kuv le. Txhua yaam kws koj qhovmuag pum ntawm nuav puavleej yog kuv tug. Tabsis nub nua kuv yuav ua caag taav tau kuv ob tug ntxhais hab obtug cov mivnyuas kev, 44kuv txhaj npaaj sab yuav nrug koj sis has kuas hum xwb. Ca wb khaws pobzeb lug teeb ua ib qhov chaw ncu txug wb cov lug cog tseg nuav.”

45Yog le ntawd, Yakhauj txhaj khaws tau ib cov pobzeb lug teeb ca ua lub cim ncu txug. 46Yakhauj txhaj has kuas nwg cov tuabneeg moog khaws pobzeb lug teeb ua ib pawg ca. Ces puab txawm rau mov noj ua ke nyob ntawd pawg pobzeb ntawd ib saab. 47Yog le ntawd, Lanpaas txhaj tis npe rua pawg pobzeb ntawd hu ua Yenkas Xahaduthas,#31.47 Yenkas Xahaduthas: Lub npe nuav lug Alamais txhais has tas, “pawg pobzeb kws ua lub cim rua wb ncu ntsoov.” tabsis Yakhauj tis npe rua pawg pobzeb ntawd hu ua Nkale-es.#31.47 Nkale-es: Lub npe nuav lug Henplais txhais has tas, “pawg pobzeb kws ua lub cim rua wb ncu ntsoov.” 48Lanpaas has rua Yakhauj has tas, “Pawg pobzeb nuav yuav ua lub cim ncu txug wb tej lug cog tseg.” Tub yog vim le nuav txhaj tis npe rua thaaj chaw ntawd hu ua Nkale-es. 49Lanpaas has ntxiv tas, “Thov kuas tug TSWV tsomkwm wb thaus wb sis ncaim ib leeg moog nyob rua ib qho lawm.” Yog le ntawd, txhaj muab thaaj chaw ntawd tis npe hu ua Mixepas.#31.49 Mixepas: Lub npe nuav lug Henplais txhais has tas, “yog qhov chaw kws saib ntsoov.” 50Lanpaas tseem has ntxiv tas, “Yog koj tsimtxom kuv ob tug ntxhais lossis moog yuav nam yau, txawm yog kuv tsi paub txug tej kws koj ua ntawd los xij, kuas koj ncu ntsoov has tas Vaajtswv yeej saib ntsoov wb ob leeg huv tuabsi. 51Ntawm nuav yog cov pobzeb kws kuv sau lug teeb nruab nraab ntawm koj hab kuv, hab ntawm nuav yog tug ncej zeb kws ua lub cim coglug tseg ca. 52Pawg pobzeb hab tug ncej zeb nuav, yog ua lub cim kws ncu ntsoov ca. Kuv yuav tsi hlaa pawg pobzeb nuav tuaj tua koj, hab koj yuav tsi hlaa pawg pobzeb nuav lossis tug nce zeb kws yog lub cim ncu txug nuav tuaj tua kuv le. 53Ca Anplahaas tug Vaajtswv hab Nahaus#31.53 Anplahaas… Nahaus: Anplahaas yog Yakhauj yawm, hab Nahaus yog Lanpaas txiv. tug Vaajtswv ua tug txav txim rua wb ob leeg huv tuabsi.” Ces Yakhauj txhaj tuav Vaajtswv tug kws nwg txiv Ixaj pehawm lub npe coglug tseg. 54Yakhauj txhaj muab ib tug tsaj lug tua fij rua sau lub roob ntawd, hab nwg caw taagnrho nwg cov tuabneeg lug noj. Tom qaab kws puab noj mov taag lawm, puab tseem rov pw ib mos sau lub roob ntawd ntxiv hab. 55Nub tom qaab thaus sawv ntxuv Lanpaas txhaj moog nwj nwg cov xeebntxwv hab nwg ob tug ntxhais hab foom koob moov rua puab taag, ces nwg txawm ncaim puab rov qaab moog tsev lawm.

Currently Selected:

Chivkeeb 31: HNJ2000

Highlight

Copy