Chivkeeb 30

1Tabsis Laxees tsi muaj ib tug mivnyuas rua Yakhauj le, hab nwg ntxub nwg tug taislaug heev, nwg txhaj has rua Yakhauj has tas, “Koj yuav muab mivnyuas rua kuv lossis koj yuav ca kuas kuv tuag.”

2Yakhauj chim heev rua Laxees, nwg txhaj teb Laxees has tas, “Kuv yog Vaajtswv los? Vaajtswv yog tug kws tsi pub koj muaj taug mivnyuas los sav.”

3Laxees has tas, “Kuv tug ntxhais qhev Npilehas nyob ntawm nuav, koj ca le moog nrug nwg pw kuas nwg muaj mivnyuas rua kuv. Ua le nuav kuv txhaj yuav tau ua tug tub ntawd leej nam.” 4Yog le ntawd, Laxees txhaj muab Npilehas rua nwg tug quasyawg yuav, hab Yakhauj txhaj moog nrug nwg pw. 5Npilehas txawm xeeb tub hab yug tau ib tug tub rua Yakhauj. 6Laxees has tas, “Vaajtswv txav txim lawv le nwg txujkev ncaaj nceeg. Nwg nov kuv tej lug thov hab pub rua kuv muaj ib tug tub lawm;” Yog le ntawd, nwg txhaj tis tug tub ntawd npe hu ua Daas.#30.6 Daas: Lub npe nuav has le Henplais lu lug kws has tas, “txav txim lawv le lub sab nyam.” 7Npilehas rov xeeb tub hab yug tau ib tug tub rua Yakhauj. 8Laxees has tas, “Kuv tau tawmtsaam kuv tug taislaug nyaav heev, nwgnuav kuv txhaj yeej nwg lawm”; yog le ntawd, nwg txhaj tis tug tub ntawd npe hu ua Nathalis.#30.8 Nathalis: Lub npe nuav has le Henplais lu lug kws has tas, “sis tawmtsaam”.

9Thaus Le-as paub has tas nwg tsi muaj mivnyuas lawm, nwg txawm muab nwg tug ntxhais qhev Xilepas rua Yakhauj ua nam yau. 10Ces Xilepas txawm yug tau ib tug tub rua Yakhauj. 11Le-as has tas, “Kuv moov zoo kawg”; yog le ntawd, nwg txhaj tis tug tub ntawd npe hu ua Khas.#30.11 Khas: Lub npe nuav lug Henplais txhais has tas, “moov zoo kawg.” 12Xilepas rov yug tau ib tug tub rua Yakhauj, 13hab Le-as has tas, “Kuv zoo sab kawg nkaus le lauj! Nwgnuav tej quaspuj yuav hu kuv has tas, tug zoo sab”; yog le ntawd, nwg txhaj tis tug tub ntawd npe hu ua Aseles.#30.13 Aseles: Lub npe nuav lug Henplais txhais has tas, “tau kev zoo sab.”

14Thaus txug caij hlais nplej Lunpees moog yos ua si tom teb hab nwg pum ib cov zaub ntug hauvpaug,#30.14 Cov zaub ntug hauvpaug: Txheej laug thaus u ntseeg has tas, noj mas ua rua tug quasyawg muaj zug hab muaj taug mivnyuas. nwg txawm rhu tau ib cov nqaa lug rua nwg nam Le-as. Laxees has rua Le-as has tas, “Thov muab koj tug tub cov zaub ntug hauvpaug ob peb lub pub rua kuv.”

15Le-as teb has tas, “Koj tub coj kuv tug quasyawg moog lawm ne, tseem tsi tau txaus koj sab hab los? Nwgnuav koj tseem tuaj thov kuv tug tub cov zaub ntug hauvpaug hab.”

Laxees teb has tas, “Yog koj muab koj tug tub cov zaub ntug hauvpaug ob peb lub rua kuv, ib chim tsaus ntuj kuv ca Yakhauj nrug koj pw.” 16Thaus yuav tsaus ntuj Yakhauj rov tom teb lug, Le-as txawm moog tog Yakhauj hab has tas, “Mo nuav koj yuavtsum moog nrug kuv pw, rua qhov kuv tub muab kuv tug tub cov zaub ntug hauvpaug ndlav koj lawm.” Yog le ntawd, mo ntawd Yakhauj txhaj moog nrug Le-as pw.

17Vaajtswv teb Le-as tej lug thov, nwg txhaj rov xeeb tub hab yug tau ib tug tub rua Yakhauj yog tug tsib. 18Le-as has tas, “Vaajtswv muab nqe zug rua kuv, rua qhov kuv muab kuv tug ntxhais qhev rua kuv tug quasyawg yuav”; yog le ntawd, nwg txhaj tis tug tub ntawd npe hu ua Ixakhas.#30.18 Ixakhas: Lub npe nuav has le Henplais lu lug kws txhais has tas, “tug tuabneeg kws luas ndlav” hab “cov nqe zug.” 19Le-as rov xeeb tub hab yug tau ib tug tub rua Yakhauj yog tug rau. 20Le-as has tas, “Vaajtswv muab tau ib qhov khoom pub rua kuv zoo kawg nkaus le. Mas zag nuav kuv tug quasyawg yuav hlub kuv, rua qhov kuv tub yug tau rau tug tub rua nwg lawm”; yog le ntawd, nwg txhaj tis tug tub ntawd npe hu ua Xenpuloos.#30.20 Xenpuloos: Lub npe nuav has le Henplais lu lug kws has tas, “txais” hab “pub.” 21Ces tom qaab ntawd nwg yug tau ib tug ntxhais, hab nwg tis npe rua tug ntxhais ntawd hu ua Dinas.

22Vaajtswv tseem ncu ntsoov txug Laxees; nwg txhaj teb Laxees tej lug thov hab pub kuas nwg muaj taug mivnyuas. 23Laxees txhaj xeeb tub hab yug tau ib tug tub. Nwg has tas “Vaajtswv pub kuv muaj tug tub nuav lug tshem kuv txujkev txaajmuag tawm. 24Thov kuas tug TSWV pub rua kuv rov muaj dlua ib tug tub ntxiv hab”; yog le ntawd, Laxees txhaj tis tug tub ntawd npe hu ua Yauxej.#30.24 Yauxej: Lub npe nuav has le Henplais lu lug kws has tas, “thov kuas nwg muab pub ntxiv dlua lwm zag” hab “nwg nqaa moog lawm.”

Yakhauj Thov Ncaim Lanpaas

25Tom qaab kws Laxees yug tau Yauxej lawm, Yakhauj txawm has rua Lanpaas has tas, “Thov koj tso kuv rov qaab, kuv yuav rov qaab moog nyob nraag kuv txiv lub tsev hab lub tebchaws. 26Thov muab kuv ob tug quaspuj hab kuv cov mivnyuas kws kuv ua zug tau rua kuv, kuv yuav sawv kev moog. Koj yeej paub has tas kuv ua txhua yaam rua koj tav log lawm.”

27Lanpaas teb rua Yakhauj has tas, “Thov ca rua kuv has le nuav: Lawv le kuv saib yaig mas, vim muaj koj, tug TSWV txhaj foom koob moov rua kuv. 28Xaam taagnrho tej nqe zug kws koj ua saib raug pestsawg kuv yuav them rua koj.”

29Yakhauj teb has tas, “Kuv tau ua num zoo npaum le caag rua koj hab koj tej tsaj kws kuv tu fuamvaam npaum le caag los koj yeej paub zoo lawm. 30Ua ntej thaus kuv tsi tau lug koj muaj tsaj tsawg heev, nwgnuav koj tej tsaj kuj fuamvaam coob kawg le lawm, hab tug TSWV tub foom koob moov rua koj txhua yaam kws kuv ua hab txhua qhov kws kuv moog.#30.30 txhua qhov kws kuv moog; lossis vim tau lug ntawm kuv. Ua le yuav thaus twg kuv maam le yug taug kuv lub cuab lub yig?” 31Lanpaas txhaj nug has tas, “Yog le ntawd, kuv yuav muab dlaabtsi lug ua nqe zug rua koj?”

Yakhauj teb has tas, “Kuv tsi yuav ib yaam dlaabtsi le. Yog koj kaam mas kuv yuav nyob tu koj cov tsaj moog ntxiv, xws le: 32Nub nua ca kuv moog ncig saib thoob plawg koj cov tsaj hab muab txhua tug mivnyuas yaaj dlub#30.32 Ib phoo qub txhais has tas, txhua tug mivnyuas yaaj dlub; phoo Henplais has tas, txhua tug yaaj txaij, hab txaij ua tej teev, hab txhua tug yaaj dlub. hab tej mivnyuas tshis kws txaij lossis txaij tej teev xaiv ca rua ib qho. Cov tsaj nuav lauj, yog cov kws ua nqe zug rua kuv. 33Thaus koj tuaj saib koj txhaj paub has tas, kuv yeej ua ncaaj nceeg tag. Thaus kws koj tuaj tshuaj saib kuv tej nqe zug, yog kuv tseem muaj tej tug mivnyuas tshis tsi txaij lossis tsi txaij tej teev lossis muaj ib tug mivnyuas yaaj tsi dlub le, ces koj txhaj paub has tas yog kuv nyag lug xwb.”

34Lanpaas teb has tas, “Kuv pum zoo yuav le kws koj has ntaag.” 35Tabsis nub ntawd Lanpaas muab cov laug tshis kws txaij lossis txaij tej teev hab cov maum tshis kws txaij lossis txaij ua tej teev lossis dlawb tej teev cais, hab nwg muab taagnrho cov yaaj dlub cais tawm rua ib qho. Nwg tso nwg cov tub ua cov saib tej tsaj ntawd, 36hab muab cais moog nyob nrug dleb peb nub ke ntawm Lanpaas cov tsaj kws tseg ca rua Yakhauj tu.

37Yakhauj muab tej ceg cev, ceg txiv dluaj, hab ceg seb laws tawv txaij ua tej kaab kuas pum tug txhaa ceg ntoo dlawb paug. 38Nwg txhaj muab cov ceg ntoo ntawd coj moog tso rua ntawm lub dlaab dlej kws cov tsaj lug haus dlej. Nwg coj cov ceg ntoo moog tso rua ntawd, rua qhov cov tsaj sis phuv thaus puab lug haus dlej ua ke. 39Yog le ntawd, thaus cov tshis lug sis phuv rua ntawm cov ceg ntoo ntawd, cov tshis txawm yug tau cov mivnyuas txaij ua tej kaab hab txaij ua tej teev.

40Yakhauj txawm muab cov mivnyuas yaaj hab mivnyuas tshis kws txaij cais tawm ntawm cov maum laug hab muab cov maum laug tso tig taubhau rua tom Lanpaas cov tsaj kws txaij hab dlub. Qhov kws nwg ua le nuav, tub yog nwg faib kuas nwg muaj nwg ib paab tsaj ua nwg tug hab muab cais tawm ntawm Lanpaas cov moog rua ib qho.

41Thaus cov tsaj kws zoo hab khov kho sis phuv, Yakhauj muab cov ceg ntoo ntawd coj moog tso rua ntawm lub dlaab dlej, qhov chaw kws cov tsaj lug haus dlej, kuas cov tsaj lug sis phuv nyob ntawm cov ceg ntoo ntawd. 42Tabsis nwg tsi muab cov ceg ntoo ntawd tso rua ntawm dlaab dlej thaus cov tsaj kws tsi khov lug haus dlej. Txij ntawd lug Lanpaas txhaj tau cov tsaj kws tsi khov lawm xwb, tabsis cov tsaj kws khov puavleej yog Yakhauj cov. 43Tub yog vim ua le nuav Yakhauj txhaj npluanuj. Nwg muaj tsaj txhu, tubqhe, ntxhuav hab neeg luav coob heev.

Currently Selected:

Chivkeeb 30: HNJ2000

Highlight

Copy