Chivkeeb 28

1Ixaj txhaj hu Yakhauj lug cuag nwg, foom koob moov rua nwg, hab has rua nwg tas, “Mivtub, koj tsi xob laam yuav cov tuabneeg Kana-aas nuav tej ntxhais. 2Ca le moog lawm tim koj yawm Npethuyees tsev kws nyob tim tebchaws Mexuputamias, hab moog yuav cov ntxhais tid ib tug lug ua koj quaspuj, yuav koj txivdlaab Lanpaas cov ntxhais ib tug ntaag. 3Thov Vaajtswv tug muaj fwjchim luj kawg nkaus foom koob moov rua koj hab pub koj muaj tubki coob, kuas koj tau ua ntau tsaav tuabneeg tug yawmkoob. 4Thov kuas nwg foom koob moov rua koj hab koj tej xeebntxwv ib yaam le nwg foom koob moov rua Anplahaas, hab thov kuas koj tau thaaj aav kws Vaajtswv muab pub rua Anplahaas kws koj tau lug nyob nuav lawm ua koj tug.”#Chk 17.4-8 5Ixaj txhaj tso Yakhauj moog rua tim tebchaws Mexuputamias, moog nrug Lanpaas kws yog Npethuyees kws yog tuabneeg Alamees tug tub kws yog Yakhauj hab Exaus obtug nam Lenpekas tug nug hlub nyob.

Exaus Yuav Dlua Ib tug Nam yau

6Exaus paub has tas, Ixaj foom koob moov rua Yakhauj hab saamfwm tsi pub kuas nwg yuav cov tuabneeg Kana-aas tej ntxhais lug ua quaspuj, hab tso nwg moog nrhav yuav quaspuj rua tim tebchaws Mexuputamias lawm. 7Exaus paub has tas Yakhauj yeej noog nam noog txiv lug hab nwg tau moog rua tim tebchaws Mexuputamias lawm tag. 8Ces Exaus txhaj paub has tas, nwg txiv Ixaj tsi nyam cov quaspuj kws yog tuabneeg Kana-aas. 9Yog le ntawd, nwg txhaj moog yuav Anplahaas tug tub Yisamayees tug ntxhais Mahalas kws yog Nenpayaus tug muam lug ua quaspuj.

Yakhauj Ua Npau Suav

10Yakhauj sawv kev ntawm lub nroog Npesenpas moog rua tim lub nroog Halaas. 11Nwg moog txug ntawm ib thaaj chaw#28.11 thaaj chaw; lossis thaaj chaw dlawbhuv. nub poob qho lawm, nwg txhaj pw ib mos ntawm ib tog kev. Nwg muab ib lub pobzeb lug rau ncoo pw tsaug zug. 12Nwg ua npau suav pum ib tug ntaiv tuam huv aav nuav moog nto plawg sau ntuj, muaj cov timtswv nce moog hab nqeg lug ntawm tug ntaiv ntawd.#Yhs 1.51 13Ua cav txawm pum tug TSWV sawv nreg nreeg ntawm nwg ib saab.#28.13 ntawm nwg ib saab; lossis sau tug ntaiv. Tug TSWV has tas, “Kuv yog Anplahaas hab Ixaj tug Vaajtswv, kuv yuav muab thaaj aav kws koj taabtom pw ntawm ko pub rua koj hab koj cov xeebntxwv ua mej tug.#Chk 13.14-15 14Koj cov xeebntxwv yuav coob npaum nkaus le cov moov aav huv nplajteb nuav. Puab yuav nthuav puab lub tebchaws kuas dlaav moog rua txhua faab, hab kuv yuav foom koob moov ntawm koj hab koj cov xeebntxwv moog rua txhua tsaav tuabneeg#28.14 ntawm koj… txhua tsaav tuabneeg; lossis txhua tsaav tuabneeg yuav thov kuv foom koob moov rua puab ib yaam le kuv foom koob moov rua koj cov xeebntxwv. kws nyob thoob nplajteb.#Chk 12.3; 22.18 15Ncu ntsoov has tas kuv yuav nrug nraim koj hab tsomkwm koj txhua qhov chaw kws koj moog, hab kuv yuav coj koj rov lug nyob rua ntawm thaaj aav nuav dlua. Kuv yuav nrug nraim koj moog txug thaus kuv ua txhua yaam tav taag lawv le kuv tau coglug rua koj lawm.”

16Yakhauj tsim dlheev lug hab nwg has tas, “Tug TSWV yeej nyob ntawm nuav tag lauj! Nwg yeej nyob ntawm thaaj chaw nuav, tabsis yog kuv tsi paub xwb!” 17Nwg ntshai heev hab nwg has tas, “Qhov chaw nuav ua rua kuv ntshai heev! Lub chaw nuav yeej yog Vaajtswv lub tsev hab yog rooj ntug ceebtsheej ntaag lauj.”

18Taagkig kaaj ntug Yakhauj txhaj muab lub pobzeb kws nwg muab lug rau ncoo ntawd teeb ua qhov chaw tseemceeb ncu tseg. Ces nwg muab roj txiv ntoo laub rua sau lub pobzeb hab muab fij rua Vaajtswv. 19Nwg txhaj tis npe rua thaaj chaw ntawd hu ua Npethees#28.19 Npethees: Lub npe nuav lug Henplais txhais has tas, “Vaajtswv lub tsev”. (Lub nroog ntawd thaus u hu ua Lexes.) 20Yakhauj txawm coglug rua tug TSWV has tas, “Yog koj nrug nraim kuv nyob hab tsomkwm kuv taug kev moog, pub mov rua kuv noj hab rig tsho rua kuv naav, 21moog txug thaus kuv rov qaab lug txug rua huv kuv txiv tsev kaaj sab lug, mas koj txhaj yog kuv tug Vaajtswv tag. 22Lub pobzeb kws kuv teeb ua chaw ncu txug nuav yuav yog qhov chaw pehawm koj ntaag, hab kuv yuav muab txhua yaam kws koj muab rua kuv lawm ib feem kaum rua koj.”

Currently Selected:

Chivkeeb 28: HNJ2000

Highlight

Copy