Chivkeeb 27
27
Ixaj Foom Koob Moov rua Yakhauj
1Nwgnuav Ixaj laug heev hab qhovmuag tsi pum kev lawm. Nwg tso tuabneeg moog hu nwg tug tub hlub Exaus lug hab nwg has tas, “Mivtub!”
Exaus teb has tas, “Txiv, kuv nyob ntawm nuav.”
2Ixaj has tas, “Koj pum has tas kuv tub laug heev hab kuv yuav tuag nub twg los tsi paub le. 3Nqaa koj raab neevnti hab cov xub, moog yos tom haav zoov hab tua nqaj nruab nraag lug rua kuv noj. 4Ua ib pluag zaub mov qaab kws kuv nyam, hab nqaa lug rua kuv noj. Tom qaab kws kuv noj taag lawm, kuv yuav foom koob moov rua koj zag kawg ua ntej kuv tuag.”
5Thaus Ixaj taabtom has rua Exaus ntawd, Lenpekas txawm nov. Yog le ntawd, thaus Exaus tawm moog yos tua nqaj lawm, 6Lenpekas txawm has rua Yakhauj tas, “Kuv nov koj txiv has rua Exaus tas, 7‘Koj ca le moog yos tua nqaj hab ua ib pluag mov qaab lug rua kuv noj. Tom qaab kws noj npluag mov ntawd taag lawm, kuv yuav foom koob moov rua koj taabmeeg tug TSWV ua ntej kuv tuag.’ 8Lenpekas has tas, ‘Taamsim nuav ntaag lauj, mivtub, koj ca le noog kuv has hab ua lawv le kuv qha.’ 9Koj moog nraag paab tsaj hab nteg ob tug mivnyuas tshis kws rog lug rua kuv, kuv yuav muab ob tug tshis ntawd tua ua ib pluag nqaj qaab qaab kws koj txiv nyam heev rua koj txiv noj. 10Koj nqaa moog rua koj txiv noj, hab nwg yuav foom nwg tej koob moov rua koj ua ntej nwg tuag.”
11Tabsis Yakhauj has rua nwg nam has tas, “Koj yeej paub has tas Exaus yog tuabneeg tuaj plaub, tabsis kuv tej tawv nqaj dlu lug xwb. 12Nyob tsaam kuv txiv cev teg plhw kuv, ces nwg paub has tas yog kuv dlaag nwg, kuv ua le nuav kuas kuv tau koob moov, tabsis ntshai kuv yuav tau nwg lu lug foom tsi zoo xwb.”
13Nwg nam teb has tas, “Kuv tub, txhua yaam kws koj txiv foom tsi zoo ca poob rua kuv ris huv tuabsi, ca le ua lawv le kuv tub has rua koj lawm, moog nteg ob tug mivnyuas tshis lug rua kuv.” 14Yog le ntawd, Yakhauj txhaj moog nteg tau ob tug mivnyuas tshis caab lug rua nwg nam, ces leej nam txhaj muab tua ua ib pluag nqaj qaab heev kws nwg txiv nyam noj. 15Ces Lenpekas txawm moog muab Exaus kws yog nwg tug tub hlub, cev rig tsho zoo tshaaj plawg kws nwg khaws ca, lug rua Yakhauj naav. 16Lenpekas txhaj muab ob dlaim tawv tshis lug qhwv Yakhauj ob txhais ncej npaab hab qhwv Yakhauj lub cejdlaab qhov tsi tuaj plaub. 17Ces Lenpekas txawm muab cov nqaj kws qaab ntawd, hab cov mov kws nwg ua tau lawm, rua nwg tug tub Yakhauj.
18Ces Yakhauj txawm nqaa moog rua nwg txiv hab has tas, “Txiv!”
Ixaj teb has tas, “Koj has dlaabtsi, koj yog kuv ob tug tub tug twg?”
19Yakhauj teb has tas, “Kuv yog Exaus, koj tug tub hlub ntaag, kuv tub ua nqaj tav taag lawv le koj tau has rua kuv lawm. Koj ca le sawv lug hab noj tej nqaj kws kuv nqaa lug rua koj, hab foom koj tej koob moov rua kuv.”
20Ixaj nug has tas, “Mivtub, koj moog yos qhov twg, koj yuav tua tau nqaj lug sai ua luaj le?”
Yakhauj teb has tas, “Tug TSWV kws yog koj tug Vaajtswv paab kuv, kuv txhaj moog nrhav tau sai.”
21Ixaj has rua Yakhauj has tas, “Koj ca le txaav lug rua ntawm kuv nuav, kuv yuav cev teg plhw koj saib koj puas yog Exaus tag los tsi yog?” 22Yakhauj txhaj txaav zog moog rua ntawm nwg txiv, Ixaj txhaj cev teg tuaj plhw Yakhauj hab has tas, “Koj lub suab has lug zoo le Yakhauj lub, tabsis koj ob txhais npaab zoo le Exaus ob txhais.” 23Nwg tsi paub Yakhauj lawm rua qhov Yakhauj ob txhais npaab tuaj plaub nplwg loo zoo le Exaus ob txhais hab. Nwg tub yuav foom koob moov rua Yakhauj, 24tabsis nwg tseem rov nug dlua ntxiv has tas, “Koj yog Exaus tag los?”
Yakhauj teb has tas, “Kuv yog Exaus tag.”
25Ixaj has tas, “Tsaws cov nqaj lug rua kuv noj. Thaus kuv noj taag lawm, kuv maam le foom kuv tej koob moov rua koj.” Yakhauj txhaj tsaws hlo tsum mov lug rua nwg txiv noj hab tseem laub cawv lug rua nwg txiv haus huv tuabsi. 26Ces Ixaj has rua Yakhauj has tas, “Mivtub, koj ca le txaav lug ze hab nwj kuv.” 27Thaus Yakhauj txaav zog lug nwj Ixaj, Ixaj na Yakhauj lub tsho tsw Exaus tug ntxhab, nwg txhaj foom koob moov rua Yakhauj. Nwg has tas:
“Kuv tug tub nuav tug ntxhab
tsw ib yaam le thaaj teb
kws tug TSWV tub foom
koob moov rua lawm
tug ntxhab ntaag.
28Thov Vaajtswv tso lwg
sau ntuj lug rua koj tej teb
kuas zoo qoobloo heev!
Thov nwg pub rua koj tej nplej,
tej txiv maab kuas ntsu heev!
29Thov kuas txhua tsaav tuabneeg
tau lug ua koj tubkhai,
hab thov kuas tej pejxeem
txhus caug ndlua pe koj.
Thov kuas koj tau ua tug kaav
taagnrho koj tsoom kwvtij,
thov kuas koj nam cov xeebntxwv
txhus caug pe koj.
Thov kuas cov kws tsawm foom koj
raug foom tsi zoo,
hab thov kuas cov kws foom
koob moov rua koj tau txais
koob moov zoo.”#Hen 11.20#Chk 12.3
Exaus Thov Ixaj Foom Koob Moov rua Nwg
30Ixaj foom koob moov taagnrho xwb, Yakhauj tawm plawg lawm, ces Yakhauj tug tijlaug Exaus kws moog yos tua nqaj, txawm lug txug ndlua. 31Nwg muab cov nqaj ntawd ua tau nqaj qaab heev hab nqaa moog rua nwg txiv. Nwg has tas, “Txiv, koj ca le sawv lug hab noj tej nqaj kws kuv moog tua tau hab ua nqaa lug rua koj, koj yuav foom koj tej koob moov rua kuv.”
32Ixaj nug has tas, “Koj yog leejtwg?” Exaus teb has tas, “Kuv yog koj tug tub hlub, Exaus ntaag.”
33Ixaj poob sab nthaav hab ua ib ce tshee nyo, ces nwg txhaj nug has tas, “Tug puastaab tua tau nqaj lug rua kuv noj taag lawm, tsua yog leejtwg? Kuv noj taagnrho ces koj txawm lug txug ndlua ntaag. Kuv tub foom kuv tej koob moov kws yog zag kawg rua nwg, hab nwg yeej tau txuj koob moov ntawd moog ibtxhis le lawm.”
34Thaus Exaus nov dlheev le ntawd, nwg mob sab heev tsaa hlo suab quaj hab has tas, “Txiv, koj ca le foom koob moov rua kuv ib yaam nkaus hab los mas!”
35Ixaj teb has tas, “Koj tug kwv tub lug dlaag kuv, mas nwg tub tau koj tej koob moov lawm.”
36Exaus has tas, “Zag nuav yog zag ob kws nwg txhaav kuv tug. Nwg lub npe yeej phim hu ua Yakhauj lawm tag.#27.36 Yakhauj: Lub npe nuav has le Henplais lu lug kws has tas, “nyag tuabywv lawm tsi pub luas paub.” Nwg tub txeeb kuv lub meejmom kws yog tijlaug lawm, nwgnuav nwg tseem txhaav kuv tej koob moov lawm hab. Koj txawm tsi tshuav koob moov seem rua kuv le los?”#Chk 25.29-34
37Ixaj teb has tas, “Kuv tub tsaa nwg lug ua num ua tswv kaav koj, hab kuv tub foom kuas nwg cov kwvtij tau lug ua nwg tubkhai huv tuabsi lawm. Kuv tau foom koob moov kuas nwg muaj qoobloo hab txiv maab nplua mag. Mivtub nwgnuav kuv tsi tshuav ib yaam dlaabtsi yuav foom rua koj ntxiv le lawm!”
38Exaus rov taij nwg txiv has tas, “Txiv, koj tej lug koob lug moov tsuas muaj npaum ntawd xwb los? Thov foom koob moov rua kuv hab los mas!” Nwg rov quaj dlua.#Hen 12.17
39Ces Ixaj has rua Exaus has tas,
“Koj yuav nyob lub tebchaws
kws tsi zoo qoob,
hab tsi muaj dlej naag yug
koj tej qoobloo.
40Koj yuav nrhav noj nrhav haus
ntawm koj raab ntaaj,
tabsis koj yuav ua koj
tug kwv qhev.
Yog thaus twg koj ntxeev sab#27.40 ntxeev sab; lossis luj tsi paub kawg le.
koj txhaj le dlim ntawm
nwg kev tswjfwm.”#Hen 11.20#Chk 36.8; 2 Vnt 8.20
41Exaus txawm ntxub Yakhauj heev, rua qhov nwg txiv foom koob moov rua Yakhauj lawm. Nwg xaav has tas, “Kuv txiv nub tuag tub lug ze lawm, thaus dlua nwg lawm, kuv yuav muab Yakhauj tua povtseg.”
42Tabsis thaus Lenpekas nov has tas Exaus tuav tswvyim le ntawd, nwg txhaj moog has rua Yakhauj tas, “Koj tug tijlaug Exaus tuav tswvyim yuav tua koj povtseg pauj qhov kws koj ua rua nwg. 43Mivtub, taamsim nuav koj ca le ua le kuv has. Koj ca le sawbsim tsiv moog nrug kuv tug nug Lanpaas nyob tim lub nroog Halaas, 44hab nrug nwg nyob ib ntus, kuas koj tug tijlaug tej kev chim xaam 45hab nwg tsi ncu qaab txug tej kws koj ua rua nwg lawm tsaiv. Ces kuv maam nrhav tuabneeg tuaj tog koj rov qaab lug. Vim le caag kuv yuav ua tuab nub pluj kuv ob tug tub le?”
Ixaj Tso Yakhauj Moog nrug Lanpaas Nyob
46Lenpekas has rua Ixaj tas, “Kuv dlhuav Exaus ob tug quaspuj kws yog cov tuabneeg Hitis ntawd hwv lawm. Yog Yakhauj tseem moog yuav cov tuabneeg Hitis nuav ib tug ntxhais lug ua quaspuj hab, ntshai kuv yeem tuag moog zoo dlua.”
Currently Selected:
Chivkeeb 27: HNJ2000
Highlight
Share
Copy
Want to have your highlights saved across all your devices? Sign up or sign in
© 2000 United Bible Societies. All rights reserved.
