Chivkeeb 26

Ixaj Nyob huv Tebchaws Kelas

1Rov muaj dlua kev tshaib nqhes nyob huv lub tebchaws ntawd, ib yaam le tam kws thaus Anplahaas tseem ua neej nyob. Ixaj txhaj le moog cuag Anpimelej kws yog cov Filitees tug Vaajntxwv huv lub nroog Kelas. 2Tug TSWV lug tshwm rua Ixaj pum hab has rua nwg tas, “Koj tsi xob tsiv moog rua nraag tebchaws Iziv; nyob tuabywv huv lub tebchaws nuav ntawm thaaj chaw kws kuv qha rua koj nyob. 3Nyob tuabywv ntawm nuav xwb, kuv yuav nrug nraim koj nyob hab foom koob moov rua koj. Kuv yuav muab taagnrho lub tebchaws nuav pub rua koj hab koj cov xeebntxwv. Kuv yuav ncu ntsoov tej lug kws kuv cog tseg rua koj txiv Anplahaas lawm. 4Kuv yuav pub kuas koj muaj xeebntxwv coob npaum le tej nubqub sau nruab ntug, hab kuv yuav muab taagnrho lub tebchaws nuav pub rua puab. Hab kuv yuav foom koob moov ntawm koj cov xeebntxwv moog rua txhua tsaav tuabneeg kws nyob thoob nplajteb.#Chk 22.16-18 5Kuv yuav foom koob moov rua koj, rua qhov Anplahaas noog kuv lug, hab coj lawv le kuv tej kevcai hab tej lug saamfwm txhua lu.”

6Yog le ntawd, Ixaj txhaj nyob tuabywv huv lub nroog Kelas. 7Thaus cov txivneej kws nyob huv lub nroog ntawd nug txug Ixaj tug quaspuj, nwg teb puab has tas, Lenpekas yog nwg tug muam xwb. Nwg tsi kaam qha has tas, Lenpekas yog nwg tug quaspuj, rua qhov Lenpekas zoo nkauj heev, Ixaj ntshai nyob tsaam cov txivneej kws nyob huv lub nroog ntawd tua nwg povtseg hab yuav Lenpekas.#Chk 12.13; 20.2 8Thaus Ixaj hab Lenpekas tseem nyob huv lub nroog ntawd Vaajntxwv Anpimelej nyob huv tsev xauj ntawm qhovrais pum Ixaj hab Lenpekas obtug taabtom sis tawb. 9Anpimelej txhaj tso tuabneeg moog has rua Ixaj has tas, “Lenpekas tub yog koj tug quaspuj ntaag los sav! Vim le caag koj tseem has tas, nwg yog koj tug muam xwb?”

Ixaj teb vaajntxwv has tas, “Yog kuv qha rua suavdlawg has tas nwg yog kuv tug quaspuj, nyob tsaam muaj tuabneeg sab phem muab kuv tua povtseg hab yuav Lenpekas.”

10Anpimelej rov has tas, “Yog le caag koj txhaj ua le nuav rua peb? Yog kuv cov pejxeem ib tug txivneej ca le moog nrug koj tug quaspuj pw, ces koj yog tug kws coj txujkev txhum ntawd lug rua peb.” 11Anpimelej txhaj ceebtoom rua nwg cov pejxeem has tas: “Yog leejtwg laam moog zig tug txivneej nuav tug quaspuj, mas yuav muab tug ntawd tua povtseg.”

12Ixaj cog qoobloo rua huv lub tebchaws ntawd, hab xyoo ntawd nwg sau tau qoob ntau tshaaj cov noob kws nwg cog lawm ib puas npaug, rua qhov tug TSWV foom koob moov rua nwg. 13Ixaj vaammeej zuj zug hab ua ib tug tuabneeg npluanuj heev. 14Rua qhov Ixaj muaj tej tsaj txhu kws yog yaaj hab nyuj coob, hab nwg tseem muaj tubkhai coob kawg le, txhaj ua rua cov tuabneeg Filitees khib heev. 15Puab txhaj muab tej qhov tshij kws nwg txiv Anplahaas cov tubkhai khawb thaus nwg tseem ua neej nyob txhub taag huv tuabsi lawm.

16Ces Anpimelej txhaj has rua Ixaj tas, “Koj ca le tsiv tawm huv peb lub tebchaws nuav moog, rua qhov koj muaj fwjchim tshaaj peb lawm.” 17Yog le ntawd, Ixaj txhaj tsiv tawm huv lub nroog ntawd hab moog tsaa tsevntaub nyob rua huv lub Haav Kelas, nwg nyob qhov ntawd tau ib ntus. 18Nwg txhaj le rov qaab khawb cov qhov tshij kws thaus u nwg txiv Anplahaas khawb ca lawm dlua ib zag ntxiv, rua qhov tom qaab kws Anplahaas tuag lawm, cov Filitees tau tuaj muab tej qhov tshij ntawd txhub taag lawm. Ixaj tis npe rua cov qhov tshij nuav lawv le tej qub npe kws thaus nwg txiv tis rua lawm.

19Ixaj cov tubkhai moog khawb ib lub qhov tshij huv lub haav ntawd hab txawm muaj dlej txhawv tawm lug. 20Ces cov tuabneeg yug yaaj huv lub nroog Kelas tuaj nrug Ixaj cov tuabneeg yug yaaj sis txeeb hab has tas, “Cov qhov tshij nuav yog peb tug.” Yog le ntawd, Ixaj txhaj muab lub qhovdlej ntawd tis npe hu ua, “Sis Txeeb.”

21Ixaj cov tubkhai rov khawb dlua ib lub qhov tshij, hab puab tseem rov txeeb lub qhov tshij ntawd dlua, yog le ntawd, nwg txhaj tis npe rua lub qhov tshij ntawd hu ua, “Sis Ntxub.” 22Nwg txhaj tsiv tawm ntawm thaaj chaw ntawd moog khawb dlua ib lub qhov tshij. Nyob qhov ntawd puab tsi muaj kev sis caav sis tshe txug lub qhov tshij nuav ntxiv lawm, yog le ntawd, nwg txhaj tis npe rua lub qhov tshij ntawd hu ua “Muaj Aav Dlaav.” Nwg has tas, “Nwgnuav tug TSWV pub peb muaj aav dlaav nyob huv lub tebchaws nuav, hab peb yuav muaj kev vaammeej nyob ntawm nuav moog le.”

23Ixaj txhaj tawm ntawm qhov chaw ntawd hab moog rua tom Npesenpas. 24Mo ntawd tug TSWV txhaj lug tshwm rua nwg pum hab has rua nwg tas, “Kuv yog koj txiv Anplahaas tug Vaajtswv ntaag. Koj tsi xob ntshai, kuv nrug nraim koj nyob. Kuv yuav foom koob moov rua koj hab pub rua koj muaj xeebntxwv coob lawv le kuv tau coglug rua kuv tug tubkhai Anplahaas lawm.” 25Ixaj txhaj teeb tau ib lub thaaj rua ntawd hab pehawm tug TSWV. Ces nwg txawm tsaa nwg lub tsevntaub nyob rua qhov ntawd, hab nwg cov tubkhai rov khawb dlua ib lub qhov tshij.

Ixaj hab Anpimelej sis Coglug

26Anpimelej coj Ahuxas kws yog nwg tug tuavxaam hab Fikaules kws yog nwg tug thawj tubrog nrug nwg tuaj cuag Ixaj.#Chk 21.22 27Ixaj txhaj nug has tas, “Vim le caag nwgnuav mej txhaj tuaj cuag kuv? Yaav nraag ntej mej tub tsi nrug kuv ua phoojywg hab mej tub ntab kuv tawm huv mej lub tebchaws lawm?”

28Puab teb has tas, “Nwgnuav peb paub has tas muaj tug TSWV nrug nraim koj nyob, hab peb xaav has tas tsimnyog peb yuavtsum tau lug sis has kuas hum hab coglug rua koj. Peb xaav kuas koj coglug rua peb 29has tas, koj yuav tsi ua phem rua peb, ib yaam le peb tsi tau ua phem rua koj. Peb yeej ua zoo rua koj hab tso koj moog kaaj sab lug. Peb paub has tas nwgnuav tug TSWV foom koob moov rua koj lawm.” 30Ixaj txhaj npaaj tau ib rooj mov rua puab, puab txhaj noj hab haus txaus nkaus. 31Taagkig sawv ntxuv puab peb leeg ntawd nyag lug leeg nyag lug hab nas homthawj rua nyag dlaim ntawv. Ces Ixaj txhaj xaa puab sawv kev moog tsev kaaj sab lug lawm.

32Nub ntawd Ixaj cov tubkhai txhaj lug pav qha rua nwg has txug lub qhov tshij kws puab tau moog khawb ntawd. Puab has tas, “Peb moog nrhav tau ib lub qhov tshij lawm.” 33Ixaj txhaj tis npe rua lub qhov tshij ntawd hu ua “Coglug.” Vim le ntawd txhaj ua rua lub nroog Npesenpas#26.33 Npesenpas: Lub npe nuav lug Henplais txhais tas, “Lub Qhovdlej Coglug” lossis “Lub Qhovdlej Xyaa Tug Yaaj” (saib 21.31.) tau lub npe nuav.

Exaus Ob Tug Quaspuj Kws Yog Tuabneeg Txawv Tebchaws

34Thaus kws Exaus noobnyoog muaj plaub caug xyoo, nwg yuav tau cov tuabneeg Hitis ob tug ntxhais lug ua quaspuj, Yudis yog Npeelis tug ntxhais, hab Npasemas yog Eloos tug ntxhais. 35Ob tug nyaab nuav ua rua Ixaj hab Lenpekas ua neej lwj sab kawg le.

Currently Selected:

Chivkeeb 26: HNJ2000

Highlight

Copy