Chivkeeb 16

Hankas hab Yisamayees

1Xalais kws yog Anplaas tug quaspuj yeej ibtxwm xeeb tsi taug tub le. Tabsis nwg muaj ib tug ntxhais qhev kws yog tuabneeg Iziv hu ua Hankas, 2ces Xalais txawm has rua Anplaas tas, “Tug TSWV tseem tsi tau pub kuv muaj mivnyuas. Koj ca le moog nrug kuv tug ntxhais qhev pw, tej zag nwg yuav muaj taug mivnyuas rua kuv.” Anplaas pum zoo ua lawv le Xalais has ntawd. 3Yog le ntawd, Xalais txhaj muab Hankas rua Anplaas ua nam yau. (Qhov nuav yog tom qaab kws Anplaas tub lug nyob rua huv tebchaws Kana-aas tau kaum xyoo lawm.) 4Anplaas moog nrug Hankas pw, ces Hankas txawm xeeb tub. Thaus Hankas paub tas nwg xeeb tub lawm, nwg txawm khaavtheeb heev hab saib tsi taug Xalais.

5Ces Xalais has rua Anplaas has tas, “Tub yog vim koj ntaag Hankas txhaj le saib tsi taug kuv.#16.5 Tub yog vim koj… kuv; lossis Thov koj tiv txujkev txhum nuav hloov kuv. Kuv yog tug kws muab nwg rua koj, tabsis txij thaus nwg paub has tas nwg xeeb tub lawm, nwg txawm ca le saib tsi taug kuv. Thov kuas tug TSWV txav txim rua wb, saib yog koj ua txhum lossis yog kuv ua txhum!”

6Anplaas teb has tas, “Nwg yog koj tug ntxhais qhev kws koj tswjfwm, koj ca le ua rua nwg lawv le koj pum zoo.” Ces Xalais txhaj le tsimtxom Hankas heev, Hankas txhaj le tsiv lawm.

7Tug TSWV tug timtswv lug ntsib Hankas rua ntawm ib tug dlej txhawv kws nyob huv taj suabpuam ntawm txujkev kws moog rua huv lub nroog Sules 8hab nug has tas, “Hankas kws yog Xalais tug ntxhais qhev, koj tuaj dlaabtsi ntawm nuav hab koj yuav moog qhov twg?”

Hankas teb has tas, “Tub yog kuv tsiv Xalais kws yog kuv tug tswv.” 9Tug timtswv has tas, “Koj ca le rov qaab moog cuag Xalais, hab ua nwg tug ntxhais qhev xwb.” 10Ces tug timtswv rov has ntxiv tas “Kuv yuav pub rua koj muaj xeebntxwv coob heev, kuas tsi muaj leejtwg yuav suav txheeb le. 11Koj yuav yug tau ib tug tub, hab koj yuav tis nwg lub npe hu ua Yisamayees,#16.11 Yisamayees: Lub npe nuav lug Henplais txhais has tas, “Vaajtswv nov.” rua qhov tug TSWV tub nov koj lub suab quaj vim koj txujkev txomnyem sab lawm. 12Tabsis koj tug tub yuav ua lub neej le tug neeg luav qus, nwg yuav tawmtsaam txhua leej txhua tug, hab txhua leej txhua tug yuav tawmtsaam nwg. Nwg yuav ua tuabneeg twmzeej tsi nrug kwvtij nyob ua ke.”

13Hankas xaav has tas, “Puas yog kuv pum Vaajtswv tag, hab kuv tseem muaj sa nyob qha txug zaaj nuav?”#16.13 Phoo nuav txhais has tas muaj sa nyob qha txug zaaj nuav; phoo Henplais has qha tsi meej pestsawg. Yog le ntawd, nwg txhaj tis npe rua tug TSWV kws nrug nwg has lug ntawd tas, “Tug TSWV kws Pum.” 14Vim le ntawd tuabneeg txhaj hu lub qhov tshij kws nyob nruab nraab ntawm Kades hab Npeledis has tas, “Tug kws Pum Kuv hab tug kws Muaj Sa Nyob lub Qhov Tshij.”

15Hankas yug tau ib tug tub rua Anplaas, hab Anplaas tis tug tub ntawd lub npe hu ua Yisamayees.#Kal 4.22 16Lub sijhawm ntawd Anplaas noobnyoog muaj yim caum rau xyoo.

Currently Selected:

Chivkeeb 16: HNJ2000

Highlight

Copy