Chivkeeb 15

Vaajtswv Coglug rua Anplaas

1Tom qaab ntawd Anplaas ua ywgtoog hab nov tug TSWV has rua nwg tas, “Anplaas, koj tsi xob ntshai. Kuv yuav ua dlaim hlau thaiv koj hab kuv yuav muab tej nqe zug kws zoo heev rua koj.”

2Tabsis Anplaas teb has tas, “Tug TSWV kws kaav ib puas tsaav yaam, kuv yeej ibtxwm tsi muaj tub, koj yuav muab nqe zug zoo rua kuv ua dlaabtsi? Tug kws yuav tuav kuv tej qubtxeeg qubteg, ces yog Eli-exes kws yog tuabneeg Damaxes#15.2 Kuv… Damaxes; phoo Henplais has tsi meej. nkaus xwb. 3Koj tub tsi pub mivnyuas rua kuv, ntshai yuav kawg kuv muab kuv tej qubtxeeg qubteg tso rua kuv ib tug tubqhe kws yug huv kuv tsev ua tug tuav.”

4Ces dlhau ntawd lug, nwg rov qaab nov tug TSWV has rua nwg ib zag ntxiv tas: “Tug tubqhe Eli-exes yuav tsi tau ua tug tuav koj tej qubtxeeg qubteg, koj tug tub kws koj yug txhaj yog tug kws yuav tuav koj tej qubtxeeg qubteg.” 5Vaajtswv coj Anplaas tawm moog rua nrau zoov hab has rua nwg tas, “Koj tsaa qhovmuag saib sau ntuj hab suav cov nubqub sau saib koj suav puas txheeb, koj yuav muaj xeebntxwv coob npaum le tej nubqub ntawd ntaag.”#Loo 4.18; Hen 11.12

6Anplaas txhaj ca sab ntsoov rua tug TSWV tej lug. Vim nwg muaj kev ca sab, tug TSWV txhaj txaus sab heev rua nwg hab suav has tas nwg yog ib tug tuabneeg ncaaj nceeg.#Loo 4.3; Kal 3.6; Yak 2.23

7Ces tug TSWV has rua nwg tas, “Kuv yog tug TSWV kws coj koj kev tawm huv lub nroog Ules kws nyob huv tebchaws Npanpiloos lug, hab kuv yuav muab lub tebchaws nuav pub rua koj ua koj tug moog le.”

8Tabsis Anplaas nug has tas, “tug TSWV kws kaav ib puas tsaav yaam, yuav ua le caag kuv txhaj paub has tas, lub tebchaws nuav yog kuv tug tag?”

9Tug TSWV teb has tas, “Koj ca le coj ib tug nyuj, ib tug tshis hab ib tug laug yaaj, mas peb tug tsaj nuav ib tug twg yuavtsum muaj noobnyoog peb xyoos, ib tug nquab dlawb hab ib tug nquab nyeg tuaj fij rua kuv.” 10Anplaas coj tej tsaj nuav tuaj tua fij rua Vaajtswv, hab muab tej tsaj ntawd phua ua ob saab, muab ib saab tso rua ib qho ua ob leej sis ncaag zog, tabsis nwg tsi phua ob tug noog. 11Thaus dlaav npoj yaa lug tsaws rua sau cov nqaj ntawd, nwg txawm muab tej dlaav ntawd lawv yaa huv tuabsi lawm.

12Thaus kws lub nub yuav poob qho, Anplaas txawm tsaug zug heev, hab muaj ib qho tsaus nti lug roog nkaus nwg ua rua nwg ntshai kawg le.#Yaj 4.13,14 13Tug TSWV has rua nwg tas, “Koj tej xeebntxwv yuav moog nrug cov tuabneeg txawv tebchaws nyob, puab yuav moog ua luas qhev nyob lub tebchaws ntawd hab yuav raug kev quab yuam tsimtxom moog txug plaub puas xyoo.#Tsd 1.1-14; Ten 7.6 14Tabsis kuv yuav rau txim rua tsaav tuabneeg kws quab yuam puab ua qhev ntawd, hab thaus puab tawm huv lub tebchaws ntawd lug, puab yuav nqaa nyaj txag txhua yaam ntau heev nrug puab lug.#Tsd 12.40-41; Ten 7.7 15Tabsis koj yuav ua neej nyob laug nkoog, kaaj sab lug moog txug nub tuag, hab koj tej xeebntxwv yuav coj koj lub cev moog log. 16Tom qaab kws dlhau plaub tam tuabneeg lawm, koj cov xeebntxwv yuav tau rov qaab lug rua ntawm nuav, rua qhov kuv yuav tsi ntab cov tuabneeg Amaules tawm moog txug thaus puab ua kev phem kev qas kuas txaus kuv rau txim rua puab tsaiv.”

17Thaus nub poob qho hab tsaus ntuj kag lawm, taamsim ntawd txawm muaj ib cubtawg nchu paa auv nab hab ib teg tsau cig laam lug tshwm lug phua plhawv kem nruab nraab ntawm cov nqaj tsaj ntawd moog lawm. 18Nub ntawd tug TSWV txawm coglug tseg rua Anplaas has tas, “Kuv yuav muab taagnrho lub tebchaws nuav pub rua koj cov xeebntxwv, txij ndlua ntawm Iziv nrimteb lug moog txug ndlua rua ntawm tug Dlej Efalates, #Ten 7.5 19dlua le ntawd, kuv tseem muab cov Kenis, cov Kenixis, cov Kamoos, 20cov Hitis, cov Pelixes, cov Lefayees, 21cov Amaules, cov Kana-aas, cov Kikasis hab cov Yenpus tej tebchaws pub rua koj cov xeebntxwv huv tuabsi.”

Currently Selected:

Chivkeeb 15: HNJ2000

Highlight

Copy