Teg Num 5

Ananias hab Xafilas

1Muaj ib tug txivneej hu ua Ananias, nwg tug quaspuj hu ua Xafilas. Ananias muab obtug thaaj aav muag, 2Ananias hab nwg tug quaspuj koom sab muab cov nyaj ntawd ibtxha khaws ca lawm, hab coj ibtxha tuaj rua cov timthawj. 3Petus has rua Ananias has tas, “Ananias ua le caag koj yuav ca dlaab Ntxwgnyoog kaav koj lub sab kuas koj dlaag Vaaj Ntsujplig tug Dlawbhuv, cov nyaj kws koj muag koj thaaj aav, koj tub muab ib co khaws ca lawm los sav? 4Thaus koj tsi tau muag koj thaaj aav, thaaj aav ntawd yeej yog koj le; thaus koj muab muag lawm, cov nyaj yeej yog koj le hab. Ua le caag koj yuav muaj lub sab ua le ntawd? Tsi yog koj dlaag tuabneeg, tabsis yog koj dlaag Vaajtswv!” 5Thaus Ananias nov Petus has le ntawd, taamsim ntawd Ananias txawm qaug ntawg hab tuag kag lawm; thaus suavdlawg nov zaaj nuav, suavdlawg ntshai kawg le. 6Cov tub hluas txawm lug muab Ananias lub cev qhwv hab kwv coj moog log lawm.

7Tom qaab ntawd yuav laug peb txoog teev Ananias tug quaspuj tuaj txug, tabsis nwg tsi paub has tas muaj tej xwm ntawd le. 8Petus has rua Xafilas has tas, “Koj qha rua kuv saib, meb muag meb thaaj aav tau nyaj npaum le ntawd xwb tag los?”.

Xafilas teb has tas, “Yog, yeej tau le ntawd xwb tag.”

9Petus txawm has rua Xafilas has tas, “Ua le caag koj hab koj tug quasyawg yuav koom ua ib lub sab dlaag Vaaj Ntsujplig tug Dlawbhuv? Koj saib, cov tuabneeg kws kwv koj tug quasyawg moog log taabtom lug txug ntawm qhovrooj, puab yuav kwv koj moog log ib yaam nkaus hab!” 10Taamsim ntawd Xafilas txawm qaug ntawg rua ntawm Petus kutaw hab tuag lawm. Thaus cov tub hluas lug txug, puab pum has tas, Xafilas tub tuag lawm, ces puab txawm kwv nwg moog log nrug nwg tug quasyawg ua ke. 11Cov ntseeg hab tej tuabneeg kws nov zaaj nuav, puab ntshai kawg le.

Cov Timthawj Khu tej Tuabneeg Muaj Mob

12Cov timthawj ua tej txujci kws xaav tsi thoob ntau yaam rua suavdlawg pum. Cov ntseeg naj nub tuaj nyob ua ke ntawm qhov chaw kws hu ua Xalumoos lub qaab khaav. 13Txawm yog tsi muaj leejtwg lug koom nrug cov ntseeg los suavdlawg qhuas cov ntseeg kawg le. 14Hab pheej muaj tuabneeg lug ntseeg Vaajtswv coob zuj zug, tsi has quaspuj lossis txivneej. 15Cov tuabneeg kws pum tej txujci kws cov timthawj ua, puab coj tej tuabneeg muaj mob tuaj tso rua ntawm ntug kev. Puab muab choj hab muab lev pua rua cov tuabneeg mob ntawd pw, puab ua le ntawd, puab xaav has tas thaus Petus taug kev tuaj, Petus tug dluab yuav roog cov tuabneeg mob ntawd qee leej. 16Tsi yog le ntawd xwb, cov tuabneeg coob coob kws nyob huv tej zog kws nyob ibncig lub nroog Yeluxalees tseem coj puab tej tuabneeg kws muaj mob hab tej tuabneeg kws raug dlaab tuaj rua cov timthawj khu, cov tuabneeg ntawd txhua tug puavleej zoo huv tuabsi.

Cov Timthawj Raug Kev Tsimtxom

17Yog le ntawd, tug Povthawj Hlub hab cov Xadukais kws yog nwg tuab paab txhaj ntxub cov timthawj hab tuavhuv ua phem rua cov timthawj, 18puab txawm nteg cov timthawj coj moog kaw rua huv tsev lojcuj. 19Tabsis mo ntawd tug Tswv ib tug timtswv lug qheb lub tsev lojcuj tej qhovrooj, hab coj cov timthawj tawm moog. 20Nwg has rua puab has tas, “Mej ca le tawm moog sawv huv lub Tuamtsev, hab qha lub neej tshab nuav rua suavdlawg noog.” 21Cov timthawj txawm ua le ntawd, puab txhaj sawv ntxuv moog qha cov tuabneeg kws tuaj rua huv lub Tuamtsev.

Tug Povthawj Hlub hab cov tuabneeg kws yog nwg tuab paab txawm hu cov Yudais tej numtswv hab cov txwjlaug tuaj ua ke saablaaj, puab khaiv tuabneeg moog coj cov timthawj huv tsev lojcuj lug cuag puab. 22Tabsis thaus cov tuabneeg kws puab khaiv moog txug huv tsev lojcuj, puab tsi pum cov timthawj lawm. Puab txawm rov qaab lug has rua cov numtswv has tas, 23“Thaus peb moog txug ntawm lub tsev lojcuj, peb pum lub qhovrooj tseem kaw zoo zoo, hab muaj ntsugphoo ntsug huv tuabsi. Cov tubrog kws zuv los tseem sawv ntawm qhovrooj zuv. Tabsis thaus peb qheb qhovrooj moog txug huv, tsi pum ib tug tuabneeg nyob huv le!” 24Thaus cov tubrog kws zuv lub Tuamtsev tug thawj hab cov thawj ntawm cov povthawj nov puab has le ntawd, puab xaav tsi thoob le, sov cov timthawj dlua twg lawm. 25Taamsim ntawd txawm muaj ib tug txivneej tuaj has rua puab has tas, “Mej noog kuv has, cov tuabneeg kws mej muab kaw rua huv tsev lojcuj, nwgnuav puab taabtom qha suavdlawg huv lub Tuamtsev!” 26Tug thawj tubrog txawm coj nwg cov tubrog moog nteg cov timthawj coj rov lug, tabsis cov tubrog tsi ua phem rua cov timthawj, rua qhov puab ntshai nyob tsaam cov pejxeem muab pobzeb ntaus puab.

27Puab coj cov timthawj lug sawv taabmeeg cov numtswv hab tug Povthawj Hlub taug cov timthawj zaaj. 28Nwg has rua puab has tas, “Peb tub txwv tu nrho has tas, mej tsi xob tuav tug txivneej nuav lub npe qha le nua los sav, ua le caag mej tseem qha hab? Mej saib, tej kws mej qha tub nrov nchaa moog thoob plawg lub nroog Yeluxalees lawm. Mej tseem muab lub txim kws puab tua tug txivneej ntawd rua peb ris hab!”#Mat 27.25

29Petus hab cov timthawj teb has tas, “Peb yuavtsum noog Vaajtswv lug heev dlua le noog tuabneeg lug. 30Mej muab nwg ntsa rua sau tug ntoo khaublig hab muab nwg tua, tabsis tom qaab ntawd peb cov yawmkoob tug Vaajtswv tub tsaa nwg sawv huv qhov tuag rov qaab lug lawm. 31Hab Vaajtswv kuas nwg moog nyob ntawm Vaajtswv saab xis, Vaajtswv tsaa nwg ua tug Thawj hab ua tug Cawmseej. Vaajtswv ua le ntawd kuas cov Yixalayees tso puab tej kev txhum tseg, Vaajtswv txhaj yuav zaam txim rua puab. 32Tej nuav peb hab Vaaj Ntsujplig tug Dlawbhuv yeej ua tau timkhawv. Vaaj Ntsujplig yog tug kws Vaajtswv pub rua cov tuabneeg kws noog Vaajtswv lug.”

33Thaus cov numtswv nov le ntawd, puab chim heev, puab xaav muab cov timthawj tua povtseg taamsim ntawd. 34Tabsis cov numtswv ntawd muaj ib tug hu ua Nkamaliyees, nwg yog cov Falixais hab yog ib tug xwbfwb kws qha Vaajtswv txuj Kevcai kws suavdlawg fwm heev. Nwg sawv hab kuas luas coj cov timthawj tawm moog ib plag nrau zoov, 35ces nwg txawm has rua cov numtswv has tas, “Cov kwvtij Yixalayees, mej tsi xob rawm ua le caag rua cov tuabneeg nuav, mej yuavtsum ua tuab zoo taug puab zaaj tsaiv. 36Mej puas ncu has tas, yaav taag lug The-udas khaav has tas, nwg yog ib tug tuabneeg tseemceeb, hab yuav laug muaj plaub puas leej tuaj nwg tog, tabsis nwg raug luas muab tua tuag lawm. Ces cov tuabneeg kws tuaj nwg tog txawm tsiv ua dlog ua dlig taag, nwgnuav tub tsi nov leejtwg has txug nwg le lawm. 37Tom qaab ntawd, thaus cov numtswv taabtom sau cov pejxeem tej npe saib muaj coob npaum le caag, thaus ntawd muaj ib tug txivneej hu ua Yudas, nwg yog tuabneeg Kalilais. Nwg tuaj ntxag cov pejxeem kuas suavdlawg tuaj nwg tog, tabsis muaj tuabneeg muab nwg tua tuag lawm hab, ces cov tuabneeg kws tuaj nwg tog txawm tsiv ua dlog ua dlig taag lawm. 38Yog le ntawd, kuv has rua mej has tas, mej ca le tso cov timthawj nuav moog, tsi xob ua le caag rua puab. Tej num kws puab ua ntawd, yog tuabneeg kuas puab ua xwb, ces tej ntawd yeej yuav pluj moog, 39tabsis yog Vaajtswv kuas puab ua, ces mej yuav kov tsi yeej puab le. Yog mej tawmtsaam puab, nyob tsaam yog mej tawmtsaam Vaajtswv!”

Cov numtswv pum zoo lawv le Nkamaliyees has. 40Puab hu cov timthawj lug, puab muab cov timthawj nplawm, hab txwv tsi pub puab tuav Yexus lub npe qha leejtwg le, ces puab txawm tso cov timthawj moog lawm. 41Thaus cov timthawj tawm ntawm cov numtswv moog, puab zoo sab kawg le, rua qhov Vaajtswv pum zoo ca cov kws qha Yexus zaaj raug kev txaajmuag. 42Puab naj nub moog qha Txujmoo Zoo kws has txug Yexus kws yog tug Mexiyas huv lub Tuamtsev hab huv puab tej tsev rua suavdlawg noog.

Currently Selected:

Teg Num 5: HNJ2000

Highlight

Copy