Teg Num 2
2
Vaaj Ntsujplig tug Dlawbhuv Lug
1Thaus txug nub Peetekos, cov ntseeg suavdlawg tuaj nyob ua ke rua huv ib lub tsev.#Lek 23.15-21; 2 Kev 16.9-11 2Ua cav txawm muaj ib lub suab nrov nroo ntwg sau ntuj lug ib yaam le ib nthwv cua hlub hlub lug rua huv lub tsev kws suavdlawg taabtom nyob ua ke. 3Puab pum ib yaam zoo le tug nplaim tawg lug faib pis rhe lab vog moog rua puab txhua tug. 4Vaaj Ntsujplig tug Dlawbhuv lug kaav taagnrho puab txhua tug lub sab, ces puab txawm has tau lwm yaam lug lawv le Vaaj Ntsujplig kuas puab has.
5Thaus ntawd cov Yudais kws fwm Vaajtswv tuaj txhua lub tebchaws kws nyob huv qaab ntuj nuav tuaj su rua huv lub nroog Yeluxalees. 6Thaus puab nov tej suab ntawd, cov tuabneeg coob coob ntawd txawm tuaj saib yog le caag. Thaus puab nyag nov nyag lub tebchaws tej lug kws cov ntseeg ntawd has, puab xaav tsi thoob le. 7Puab tsi paub yuav has le caag, ces puab txawm has tas, “Cov tuabneeg kws taabtom has lug nuav puavleej yog tuabneeg Kalilais los sav! 8Ua le caag peb nov puab has tau peb tej lug? 9Peb cov ntawm nuav muaj ibtxha yog tuabneeg Pathias, tuabneeg Medias, hab tuabneeg Elaas: Muaj ibtxha tuaj tim tebchaws Mexuputamias tuaj, tuaj huv tebchaws Yudas tuaj, tuaj peg tebchaws Kapadaukias tuaj; tuaj peg tebchaws Pootus hab tebchaws Axias tuaj, 10tuaj peg tebchaws Felinkias hab peg tebchaws Paafilias tuaj, tuaj nraag tebchaws Iziv tuaj, tuaj huv tej cheebtsaam huv tebchaws Linpias kws nyob ze tebchaws Kilenes tuaj. Peb ibtxha tuaj tim lub nroog Loos tuaj, 11tsi has cov Yudais hab lwm Tsaav Tuabneeg kws kaav xeem ua tuabneeg Yudais, hab peb ibtxha tuaj tim koog Povtxwv Kaletes hab nraag tebchaws Alanpias tuaj, txawm yog peb tuaj txhua qhov chaw tuaj los peb puavleej nov puab has txug tej txujci tseemceeb kws Vaajtswv tau ua lawm. Peb totaub, rua qhov tej lug kws puab has ntawd puavleej yog peb tej lug!” 12Puab nov le ntawd, puab xaav tsi thoob le, puab sis nug zum zawg has tas, “Tej nuav yog le caag?”
13Tabsis muaj ibtxha luag cov ntseeg zum zawg has tas, “Cov tuabneeg ntawd qaug cawv lawm!”
Zaaj Kws Petus Qha
14Thaus ntawd Petus hab kaum ib tug timthawj tseem sawv ntsug, ces Petus has nrov nrov rua cov tuabneeg coob coob ntawd has tas, “Cov kwvtij Yudais hab mej txhua tug kws nyob huv lub nroog Yeluxalees nuav, mej ua tuab zoo noog tej kws kuv qha rua mej. 15Nwgnuav nyavnyuas cuaj teev sawv ntxuv xwb, cov txivneej nuav tsi yog qaug cawv le mej has. 16Tej kws muaj nuav yog lawv le Yau-ees kws yog tug cev Vaajtswv lug tau qha tseg lawm has tas:
17‘Vaajtswv has tas, thaus txug tam
kws nplajteb yuav kawg,
kuv yuav ua le nuav:
Kuv yuav pub kuv tug Ntsujplig
rua txhua tug.
Mej tej tub tej ntxhais yuav
cev kuv tej lug.
Mej tej tub hluas yuav ua ywgtoog,
hab tej laug yuav ua npau suav.#Yau 2.28-32 (LXX)
18Tsi yog le ntawd xwb, thaus txug
tam ntawd,
kuv yuav pub kuv tug Ntsujplig
rua kuv cov tubkhai,
tsi has quaspuj hab txivneej
huv tuabsi.
Puab yuav cev kuv tej lug.
19Kuv yuav ua tej txujci tseemceeb
rua sau nruab ntug,
hab huv nplajteb nuav.
Yuav muaj ntshaav, muaj nplaim
tawg hab paa tawg;
20thaus tseem tsi tau txug nub
tseemceeb
kws ci ntsaa ab kws tug
Tswv lug,
lub nub yuav tsaus, hab lub hli
yuav lab le ntshaav.
21Thaus ntawd tug kws thov
tug Tswv paab,
tug ntawd yuav dlim.’
22“Cov kwvtij Yixalayees, mej ca le noog tej lug kws kuv yuav qha nuav! Vaajtswv khaiv Yexus tug kws yog tuabneeg Naxales lug ua tej txujci tseemceeb qha Vaajtswv lub fwjchim rua mej. Tej kws mej pum ntawd qha rua mej paub has tas, Yexus yog tug kws Vaajtswv khaiv lug tag. 23Qhov kws Vaajtswv muab Yexus rua mej, mej muab nwg rua cov tuabneeg txhum coj moog ntsa rua sau ntoo khaublig, hab mej kuas puab muab nwg tua povtseg, qhov ntawd tub yog lawv le Vaajtswv pum zoo hab npaaj tseg lawm.#Mat 27.35; Mak 15.24; Luk 23.33; Yhs 19.18 24Tabsis Vaajtswv tub dlaws Yexus dlim hab tsaa Yexus sawv huv qhov tuag rov qaab lug lawm; txujkev tuag lub fwjchim yuam tsi tau nwg.#Mat 28.5-6; Mak 16.6; Luk 24.5 25Rua qhov Daviv has txug nwg has tas:
‘Kuv naj nub pum tug Tswv
nrug kuv nyob;
Nwg nyob ntawm kuv saab xis,
kuv txhaj tsi ntxhuv sab.#Pnk 16.8-11 (LXX)
26Tub yog vim le nuav kuv
txhaj zoo sab,
hab tej lug kws kuv has ua rua
suavdlawg paub has tas
kuv zoo sab.
Txawm yog kuv yog tuabneeg
xwb los
kuv tseem muaj kev ca sab,
27rua qhov koj yeej yuav tsi tso
kuv tug ntsujplig
rua huv tubtuag teb; koj yuav tsi ca
koj tug tubkhai
kws ncaaj nceeg cev nqaj lwj
rua huv qhov ntxaa.
28Koj tub qha txujkev kws coj
tuabneeg
moog txug txujsa rua kuv
paub lawm,
hab qhov kws koj nrug kuv
nyob,
ua rua kuv zoo sab kawg le.’
29“Cov kwvtij, kuv yuav qha rua mej paub txug peb yawmkoob Daviv. Nwg tub tuag hab puab muab nwg lub cev coj moog log lawm, naj nub nwgnuav nwg lub ntxaa tseem nyob. 30Thaus Daviv tseem ua neej nyob, nwg yog ib tug kws cev Vaajtswv lug. Nwg paub tseeb has tas Vaajtswv tub coglug rua nwg has tas, Vaajtswv yuav tsaa nwg ib tug xeebntxwv lug ua vaajntxwv ib yaam le nwg.#Pnk 132.11; 2 Xam 7.12-13 31Daviv tub paub ua ntej lawm has tas, tug Mexiyas yuav sawv huv qhov tuag rov qaab lug. Daviv txhaj has tas:
‘Vaajtswv yuav tsi tso nwg tseg
rua huv tubtuag teb;
nwg cev nqaj yuav tsi lwj rua
huv qhov ntxaa.’
32Tug Yexus nuav yog tug kws Vaajtswv tsaa sawv huv qhov tuag rov qaab lug, peb ua timkhawv has tas, nwg tub sawv huv qhov tuag rov qaab lug lawm tag. 33Vaajtswv tug kws yog Yexus Txiv, nwg coj Yexus moog nyob ntawm nwg saab xis, hab Vaajtswv pub Vaaj Ntsujplig rua Yexus lawv le Vaajtswv tau coglug tseg lawm. Nwgnuav Yexus tub pub Vaaj Ntsujplig rua peb lawm, lawv le mej nov hab mej pum nuav. 34Daviv yeej tsi tau moog sau ntuj ceebtsheej dlua le, tabsis Daviv has tas:
‘Tug Tswv has rua kuv tug
Tswv has tas:
koj ca le lug nyob ntawm
kuv saab xis #Pnk 110.1
35moog txug thaus kuv muab koj cov
yeebncuab lug rua koj tsuj.’
36“Yog le ntawd cov Yixalayees, mej suavdlawg yuavtsum paub has tas, tug Yexus kws mej muab ntsa rua sau ntoo khaublig yog tug kws Vaajtswv tsaa ua tug Tswv hab ua tug Mexiyas lawm.”
37Thaus suavdlawg nov Petus has le ntawd, puab nyuaj sab kawg le, puab txawm nug Petus hab cov timthawj has tas, “Cov kwvtij, peb yuav ua le caag?”
38Petus teb puab has tas, “Mej txhua tug nyag yuavtsum tso nyag tej kev txhum tseg hab ua kevcai raus dlej ntawm Yexus Khetos lub npe, Vaajtswv txhaj yuav zaam txim rua mej; hab mej txhaj yuav tau txais Vaaj Ntsujplig tug dlawbhuv. 39Rua qhov Vaajtswv coglug tseg has tas, nwg yuav pub tej nuav rua mej, mej cov mivnyuas, hab rua cov tuabneeg kws nyob dleb tug Tswv kws yog peb tug Vaajtswv hu lug ua nwg tsaav tuabneeg.”
40Petus tseem ntuag hab qha puab ntxiv has tas, “Mej yuavtsum nrhav kev tsiv kuas dlim, mej txhaj tsi raug txim le cov tuabneeg sab phem nuav!” 41Cov tuabneeg kws nov Petus qha, muaj ntau leej ntseeg hab ua kevcai raus dlej. Nub ntawd cov kws lug ntseeg muaj kwvlaam le peb txheeb leej. 42Puab naj nub tuaj kawm tej kws cov timthawj qha, puab sis hlub sis paab, puab koom noj Yexus rooj mov hab thov Vaajtswv ua ke.
Cov Ntseeg Yexus Lub Neej
43Thaus suavdlawg pum tej txujci tseemceeb kws cov timthawj ua, puab xaav tsi thoob le. 44Cov ntseeg suavdlawg koom ib lub sab, nyag nqaa nyag tej qhov txhua chaw tuaj tso ua ke ua suavdlawg tug.#Ten 4.32-35 45Puab muab puab tej aav hab tej khoom kws yog puab tug muag, hab puab muab tej nyaj ntawd faib rua txhua tug lawv le tug kws muaj chaw siv. 46Puab naj nub moog pehawm Vaajtswv huv lub Tuamtsev, hab puab noj Yexus rooj mov, hab noj mov ua ke huv puab tej tsev ib lub dlhau ib lub, txawm yog muaj ntau muaj tsawg los puab suavdlawg zoo sab noj. 47Puab ua Vaajtswv tsaug tsi tseg tsi tu, hab tej tuabneeg suavdlawg puavleej fwm puab. Tug Tswv naj nub coj tuabneeg lug ntseeg coob zuj zug ntxiv rua cov ntseeg.
Currently Selected:
Teg Num 2: HNJ2000
Highlight
Share
Copy
Want to have your highlights saved across all your devices? Sign up or sign in
© 2000 United Bible Societies. All rights reserved.