Loˇmaˆ sahˬ boꞈ 7

Miˬ zaˬ gaˇ kawˆ yaw jeˬ ma jeˬ

1Aˬ yuiꞈ aˬ nyiˇ Ka li zaˬ deuˬ-oˇ, nymˬ-mˇ ngaˇ ehˇ-eu lehˇ gʼeh-eu gaˇ kawˆ heu-ahˇ naw maꞈ gʼoˆ shaw nya tehꞈ-a. Aˬ jeˬ miˇ neh ehˇ naˇ, naw maꞈ dawˬ tawˆ luꞈ zahˇ dawˬ kʼoꞈ dawˬ gaˇ kawˆ siˬ nya meh. Zahˇ dawˬ kʼoꞈ dawˬ-aˬ, tsawˇ haˬ zaˬ maˬ shiˇ-ehˇ kʼaˇ dehꞈ kʼoeˇ keuˆ ni tehꞈ-ehˇ uˆ lahˇ-eu meh. 2Yaw jeˬ ma jeˬ ja ngeh, dahˬ dzaˬ-iˇ-euˬ zaˬ miˬ zaˬ tiˬ gʼaˬ-aˬ, yawˬ ha-euˬ kʼaˬ dzeˇ zaˬ kʼoeˇ gʼaˬ maˬ shiˇ-ehˇ kʼaˇ dehꞈ kʼoeˇ keuˆ ni aˬ yawꞈ-euˬ miˬ zaˬ pyeuꞈ-eu meh lehˇ zahˇ dawˬ kʼoꞈ dawˬ ehˇ-eu meh. Ehˇ kawꞈ, kʼaˬ dzeˇ zaˬ gʼaˬ shiˇ dzeuˇ ngeh jawˇ, zaˬ miˬ zaˬ koeˇ gʼaˬ aˬ yawꞈ-euˬ miˬ zaˬ meh lehˇ zahˇ dawˬ kʼoꞈ dawˬ maˬ paˇ ehˇ nya meh. 3Kʼoeˇ miˇ neh, yawˬ ha-euˬ kʼaˬ dzeˇ zaˬ maˬ shiˇ mi naˆ-ehˇ aˬ cawˬ nehˬ-ehˇ jawˇ naˇ, aˬ cawˬ-euˬ miˬ sawˇ yo zaˬ-ahˇ bahˬ-euˬ tsawˇ haˬ lehˇ bi myahˇ tehꞈ-a. Ehˇ kʼawꞈ, yawˬ ha-euˬ kʼaˬ dzeˇ zaˬ shiˇ dzeuˇ ngeh jawˇ, kʼaˬ dzeˇ zaˬ maˬ paˇ baw-euˬ miˇ neh, yawˬ gʼaˬ yawˬ-ahˇ dahˬ dzaˬ paˇ-iˇ kʼawꞈ, bahˬ-eu muˆ-eu lehˇ maˬ paˇ sawˇ nya meh. 4Aˬ yuiꞈ aˬ nyiˇ Ka li zaˬ deuˬ-oˇ, naw maꞈ kʼawꞈ kʼoeˇ gaˇ duˇ leˇ-eu meh. Zahˇ dawˬ kʼoꞈ dawˬ-ahˇ taꞈ leˇ-eu jeˬ laꞈ kʼoeˇ, naw maꞈ shiˇ dzeuˇ jiˇ-euˬ gaˇ duˇ-eu meh. Aˬ jeˬ miˇ neh ehˇ naˇ, naw maꞈ Yeˬsuˇ Ka liˬ-euˬ gʼawˇ mawˇ-ahˇ taꞈ leˇ gʼaˬ-euˬ meh. Miˬyehˇ-euˬ gaˇ laꞈ kʼoeˇ aˬ dui gaˇ dahˇ tsoeˬ-eu tsawˇ haˬ pyeuꞈ laˇ ni, naw maꞈ-aˬ, shiˇ dzeuˇ-euˬ gaˇ Miˬyehˇ neh paˇ bi gʼoꞈ dehꞈ laˇ-euˬ tsawˇ haˬ pyeuꞈ laˇ-euˬ meh. 5Aˬ jeˬ miˇ neh ehˇ naˇ, aˬ dui shiˬ shaˬ jiˇ-euˬ nui noeˬ dehꞈ luꞈ ngeh, Zahˇ dawˬ kʼoꞈ dawˬ baˬ da neh iˬ baˇ mˇ mawꞈ-eu nui kʼahˇ aˬ duiˬ-euˬ gʼawˇ mawˇ laꞈ kʼoeˇ gaˇ mˇ luꞈ-awˇ, aˬ dui kʼaˇ mˇ kʼaˇ shaˇ-euˬ yawˬ jeˬ na luꞈ shiˇ-eu jeˬ-ahˇ aˇ saˬ saˬ leˇ-eu meh. 6Ehˇ kʼawꞈ, nymˬ-mˇ poˆ jawˇ-aˬ, Zahˇ dawˬ kʼoꞈ dawˬ uˬ moˆ aˬ dui buˬ-iˇ law-iˇ gʼaˬ-euˬ ma. Aˬ jeˬ miˇ neh ehˇ naˇ, dzeuˇ laˇ ngeh aˬ dui-ahˇ paꞈ tawꞈ taˬ-euˬ jeˬ-ahˇ aˬ dui shiˇ dzeuˇ-euˬ ma. Boꞈ doˆ taˬ-euˬ zahˇ dawˬ kʼoꞈ dawˬ-ahˇ taꞈ-eu gaˇ ma yaw oeˇ-ahˇ gʼoe-awˇ Miˬyehˇ-euˬ gaˇ-ahˇ aˬ dui mˇ luꞈ-eu maˬ ngeuˇ. Yaw sahˇ Miˬyehˇ-ahˇ taꞈ-eu gaˇ ma yaw shuiꞈ-ahˇ gʼoe-awˇ mˇ luꞈ-eu ma.

Zahˇ dawˬ kʼoꞈ dawˬ baˬ da neh iˬ baˇ mˇ-eu

7Toˆ-ehˇ ngeuˇ naˇ, Zahˇ dawˬ kʼoꞈ dawˬ kʼoeˇ aˬ yawˇ yawꞈ iˬ baˇ ahˇ meh lehˇ aˬ dui ehˇ nmˇ loˇ. Maˬ ngeuˇ-a. Ehˇ kʼawꞈ, Zahˇ dawˬ kʼoꞈ dawˬ jaˆ-eu baˬ da neh iˬ baˇ ehˇ-eu aˬ jeˬ-a lehˇ aˬ dui siˬ nya laˇ-euˬ ma. “Aˬ cawˬ-euˬ myawˬ-ahˇ mehˇ juiˇ taˬ juiˇ” lehˇ Zahˇ dawˬ kʼoꞈ dawˬ laꞈ kʼoeˇ maˬ ehˇ taˬ law nmˇ-aˬ, kʼoeˇ loꞈ-ehˇ mehˇ juiˇ juiˇ-eu jeˬ-ahˇ ngaˇ maˬ siˬ nya-aˇ. 8Ehˇ kʼawꞈ, zahˇ dawˬ kʼoꞈ dawˬ kʼoeˇ dawˬ jaˆ-eu baˬ da neh, ngaˬ-euˬ nui ma laꞈ kʼoeˇ mehˇ juiˇ juiˇ-eu gʼawˬ mya jeˬ pyeuꞈ doˆ laˇ ni iˬ baˇ ngaˬ-ahˇ kawˆ noeˬ nehˬ laꞈ nya-eu meh. 9Zahˇ dawˬ kʼoꞈ dawˬ kʼoeˇ dawˬ maˬ jaˆ law nmˇ-aˬ, iˬ baˇ ehˇ-eu jeˬ yaw shiˇ-ahˇ duˇ tehꞈ-a. Maˬ muiˬ-eu jeˬ maˬ ya mˇ ni zahˇ dawˬ kʼoꞈ dawˬ kʼoeˇ dawˬ ngaˬ-ahˇ maˬ laˆ tsoeˬ le kʼoeˇ keuˆ ni-aˬ, ngaˇ yaw dehꞈ ma. Ehˇ kʼawꞈ, zahˇ dawˬ kʼoꞈ dawˬ kʼoeˇ dawˬ oe keuˆ ngeh, iˬ baˇ dehꞈ doˆ laˇ-awˇ, 10ngaˇ shiˇ-euˬ gaˇ duˇ miˇ-a. Dehꞈ-eu jeˬ bi keuˆ le-eu gʼaˇ duˬ pyeuꞈ-eu zahˇ dawˬ kʼoꞈ dawˬ kʼoeˇ dawˬ-aˬ, shiˇ-eu jeˬ bi keuˆ le gaˇ duˇ miˇ-a. 11Aˬ jeˬ miˇ neh ehˇ naˇ, iˬ baˇ kʼoeˇ zahˇ dawˬ kʼoꞈ dawˬ-ahˇ gʼoe-eu laꞈ kʼoeˇ ngaˬ-ahˇ jaˬ myawꞈ myawꞈ-awˇ sehꞈ nehˬ laꞈ-euˬ meh.

12Kʼoeˇ miˇ neh, Zahˇ dawˬ kʼoꞈ dawˬ-aˬ yaw muiˬ yaw shawˇ meh. Yawˬ dawˬ na luꞈ yaw shawˇ meh. Yaw dawˇ meh. Yaw muiˬ meh. 13Toˆ-ehˇ maˇ-iˬ, muiˬ-eu jaˬ-eu jeˬ kʼoeˇ neh ngaˬ-euˬ kʼoeˇ taˆ shiˇ-eu jeˬ bi keuˆ le-euˬ ta loˇ. Maˬ ngeuˇ-a. Kʼoeˇ loꞈ-ehˇ jahˇ nehˬ laꞈ-euˬ kʼoeˇ-aˬ, iˬ baˇ neh meh. Aˬ yawꞈ maˇ maˇ ni iˬ baˇ pyeuꞈ-eu gaˇ kawˆ bya cehˆ ni bi mawˇ duˬ laˇ-eu gʼaˇ duˬ, yaw muiˬ jeˬ-ahˇ gʼoe-awˇ ngaˬ-euˬ kʼoeˇ taˆ shiˇ-eu jeˬ bi keuˆ le-euˬ meh. Kʼoeˇ miˇ neh, zahˇ dawˬ kʼoꞈ dawˬ baˬ da neh iˬ baˇ kʼoeˇ yaw beh naˆ maˬ tseˇ doeˇ dzehˬ-eu mawˇ duˬ laˇ-eu meh.

Aˬ dui-euˬ laꞈ kʼoeˇ deuˆ ceh ceh luꞈ-eu

14Zahˇ dawˬ kʼoꞈ dawˬ-aˬ, guiˬ lahˬ saꞈ laˬ-ahˇ taꞈ leˇ-eu jeˬ meh lehˇ aˬ dui siˬ nya ma. Ehˇ kʼawꞈ, ngaˇ-aˬ, iˬ baˇ-euˬ zaˬ kʼaˆ geuꞈ-eu lehˇ bi ahˬ ahˇ taˬ-euˬ shiˬ shaˬ jiˇ pi luꞈ-eu tsawˇ haˬ zaˬ ma. 15Ngaˇ mˇ luꞈ-eu jeˬ-ahˇ ngaˇ maˬ siˬ nya nya. Aˬ jeˬ miˇ neh ehˇ naˇ, yawˬ ha mˇ mawꞈ-eu jeˬ-ahˇ maˬ mˇ ni, yawˬ ha maˬ mˇ nahˇ-eu jeˬ-ahˇ mˇ-eu nya. 16Ngaˇ mˇ luꞈ-eu jeˬ-aˬ, ngaˇ maˬ mˇ mawꞈ-eu jeˬ pyeuꞈ-eu miˇ neh, Zahˇ dawˬ kʼoꞈ dawˬ tsaˬ meh lehˇ ngaˇ ehˇ luꞈ gaˇ duˇ-eu meh. 17Kʼoeˇ miˇ neh, kʼoeˇ loꞈ-ehˇ mˇ-euˬ kʼoeˇ-aˬ, ngaˬ neh mˇ-euˬ jeˬ maˬ paˇ ngeuˇ meh. Ngaˬ-euˬ laꞈ kʼoeˇ jawˇ luꞈ-eu iˬ baˇ neh mˇ-euˬ jeˬ pyeuꞈ-eu meh. 18Shiˬ shaˬ jiˇ-euˬ nui noeˬ pi luꞈ-eu ngaˬ-euˬ gʼawˇ mawˇ heu laꞈ kʼoeˇ yaw muiˬ jeˬ maˬ ahˇ nya lehˇ ngaˇ siˬ nya ma. Aˬ jeˬ miˇ neh ehˇ naˇ, yaw muiˬ jeˬ mˇ mawꞈ-eu nui ma ahˇ luꞈ kʼawꞈ, kʼoeˇ loꞈ-ehˇ maˬ mˇ nya nya. 19Yawˬ ha mˇ mawꞈ-eu yaw muiˬ jeˬ-ahˇ maˬ mˇ ni, yawˬ ha maˬ mˇ nahˇ-eu maˬ muiˬ-eu jeˬ-ahˇ tehꞈ-ehˇ mˇ m-ehˇ jawˇ-eu nya. 20Ngaˇ-aˬ, yawˬ ha maˬ mˇ mawꞈ-eu jeˬ-ahˇ mˇ-eu ngeuˇ naˇ, kʼoeˇ loꞈ-ehˇ mˇ-euˬ kʼoeˇ-aˬ, ngaˬ neh mˇ-euˬ jeˬ maˬ paˇ ngeuˇ meh. Ngaˬ-euˬ laꞈ kʼoeˇ jawˇ-eu iˬ baˇ neh mˇ-euˬ jeˬ pyeuꞈ-eu meh.

21Kʼoeˇ miˇ neh, yaw muiˬ jeˬ-ahˇ ngaˇ mˇ mawꞈ ngeh, maˬ muiˬ-eu jeˬ-ahˇ tehꞈ-ehˇ ngaˇ tseˇ geuꞈ ni zahˇ tiˬ zahˇ ngaˬ-euˬ laꞈ kʼoeˇ gaˇ mˇ luꞈ-eu nya lehˇ ngaˇ ya siˬ-euˬ ma. 22Ngaˬ-euˬ gʼawˇ mawˇ laꞈ kʼoeˇ mawˇ-aˬ, Miˬyehˇ-euˬ zahˇ dawˬ kʼoꞈ dawˬ-ahˇ laˬ kʼaˬ cehˇ miˇ-a. 23Ehˇ kʼawꞈ, ngaˬ-euˬ gʼawˇ mawˇ laꞈ kʼoeˇ yawˬ zahˇ yawˬ gaˇ mˇ luꞈ gaˇ ngaˇ mawˇ-euˬ ma. Zahˇ kʼoeˇ zahˇ-aˬ, ngaˇ nui ma tsaˬ-eu zahˇ dawˬ kʼoꞈ dawˬ-ahˇ deuˆ ceh ceh luꞈ-eu meh. Zahˇ kʼoeˇ zahˇ neh ngaˬ-ahˇ paꞈ cuꞈ-awˇ, ngaˬ-euˬ gʼawˇ mawˇ laꞈ kʼoeˇ gaˇ mˇ luꞈ-eu iˬ baˇ-euˬ zahˇ sahˇ kʼoꞈ uˬ moˆ bi jawˇ laꞈ-euˬ meh. 24Ngaˬ-ahˇ shaˬ zahˬ naꞈ dui dui nya. Ngaˬ-ahˇ shiˇ gaˇ sheuˬ gʼeh luꞈ-eu ngaˬ-euˬ gʼawˇ mawˇ heu mawˇ laꞈ kʼoeˇ ngaˬ-ahˇ ka kʼoꞈ nehˬ laꞈ-eu aˬ suˇ gʼaˬ jawˇ ta. Miˬyehˇ jawˇ meh. 25Aˬ dui-euˬ Sahˬpaˬ Yeˬsuˇ Ka li-ahˇ gʼoe-awˇ aˬ dui-ahˇ ka kʼoꞈ nehˬ laꞈ-euˬ Miˬyehˇ-euˬ guiˬ lahˇ-ahˇ ja ceuˬ kaˇ-euˇ.

Ngaˇ heu loꞈ-ehˇ shaˬ luꞈ-eu ma. Ngaˬ-euˬ nui ma tehꞈ-ehˇ Miˬyehˇ-euˬ zahˇ dawˬ kʼoꞈ dawˬ mehˬ nah caw teh nya-awˇ, ngaˬ-euˬ shiˬ shaˬ jiˇ-aˬ, iˬ baˇ-euˬ zahˇ sahˇ kʼoꞈ mehˬ nah caw teh luꞈ-eu ma.

Currently Selected:

Loˇmaˆ sahˬ boꞈ 7: AHK

Highlight

Copy