Loˇmaˆ sahˬ boꞈ 6

Yeˬsuˇ Ka li laꞈ kʼoeˇ dehꞈ-eu

1Aˬ dui aˬ joˆ-ehˇ ehˇ nmˇ. Miˬyehˇ-euˬ guiˬ lahˬ bi huiˬ bi myaˬ laˇ-eu gʼaˇ duˬ, iˬ baˇ laꞈ kʼoeˇ aˬ dui dehꞈ daˆ gʼeh-eu loˇ. 2Kʼoeˇ loꞈ-ehˇ maˬ ngeuˇ-a. Iˬ baˇ mˇ-eu jeˬ-ahˇ taꞈ leˇ-awˇ, aˬ dui shiˇ dzeuˇ gʼaˬ-euˬ gaˇ duˇ-eu-aˬ, iˬ baˇ laꞈ kʼoeˇ aˬ duiˬ aˬ joˆ-ehˇ paˇ dehꞈ daˆ gʼeh leꞈ nya nmˇ. 3Aˬ dui Yeˬsu-ahˇ taꞈ nya ni iˇ cuꞈ shawˇ-euˬ kʼoeˇ-aˬ, aˬ yawꞈ nehˬ-ehˇ tiˬ kawˆ loꞈ-ehˇ shiˇ-eu gʼaˇ duˬ shawˇ-eu jeˬ pyeuꞈ-eu meh lehˇ naw maꞈ siˬ duˬ luꞈ meh. 4Aˬ dui iˇ cuꞈ shawˇ-euˬ baˬ da neh aˬ yawꞈ nehˬ-ehˇ tiˬ kawˆ loꞈ-ehˇ bi baꞈ pahˬ-awˇ, a yawꞈ shiˇ-euˬ gaˇ taꞈ-eu ma. Kʼoeˇ-aˬ, Aˬda Miˬyehˇ-euˬ yaw shehꞈ kʼahˬ sehˇ huiˬ-eu baoˬ neh Ka li-ahˇ bi gʼoꞈ dehꞈ laˇ-euˬ loꞈ-ehˇ, aˬ dui kʼawꞈ yaw shuiꞈ dehꞈ paˇ nya-eu gʼaˇ duˬ pyeuꞈ-eu ma.

5Aˬ yawꞈ loꞈ-ehˇ shiˇ-euˬ laꞈ kʼoeˇ aˬ dui aˬ yawꞈ-ahˇ taꞈ leˇ gʼaˬ-euˬ-aˬ, aˬ yawꞈ loꞈ-ehˇ paˇ gʼoꞈ dehꞈ laˇ-eu laꞈ kʼoeˇ aˬ dui aˬ yawꞈ-ahˇ paˇ ya taꞈ leˇ tehꞈ-a. 6Aˬ dui-euˬ iˬ baˇ mˇ-eu nui ma yaw oeˇ siˬ-euˬ baoˬ-ahˇ laˆ cawˆ-awˇ, iˬ baˇ-euˬ zaˬ kʼaˆ maˬ paˇ ya geuꞈ-eu gʼaˇ duˬ aˬ dui yaw dehꞈ dehꞈ-eu yaw oeˇ hmˬ Ka li nehˬ-ehˇ laꞈ yaꞈ kʼoeˇ taˆ kamˇ shiˇ gʼaˬ-euˬ ma lehˇ aˬ dui siˬ nya ma. 7Aˬ jeˬ miˇ neh ehˇ naˇ, tsawˇ haˬ tiˬ gʼaˬ shiˇ ngeh, iˬ baˇ-euˬ baoˬ-ahˇ buˬ-iˇ law-iˇ-eu meh. 8Aˬ dui Ka li nehˬ-ehˇ shiˇ-euˬ miˇ neh, aˬ yawꞈ nehˬ-ehˇ ya dehꞈ ma lehˇ aˬ dui jah-eu ma. 9Aˬ jeˬ miˇ neh ehˇ naˇ, Ka li-ahˇ shiˇ-euˬ gaˇ paˇ bi gʼoꞈ dehꞈ laˇ gʼaˬ-euˬ-aˬ, tiˬ jawˇ-iˬ maˬ paˇ shiˇ-ehˇ, shiˇ-eu jeˬ aˬ yawꞈ-ahˇ maˬ paˇ uˆ lahˇ nya meh lehˇ aˬ dui siˬ nya ma. 10Aˬ yawꞈ shiˇ-euˬ miˇ neh, iˬ baˇ-euˬ baoˬ aˬ yawꞈ-ahˇ maˬ paˇ gʼaˬ leˇ meh. Nymˬ-mˇ aˬ yawꞈ dehꞈ luꞈ-eu-aˬ, Miˬyehˇ-euˬ gʼaˇ duˬ meh. 11Kʼoeˇ loꞈ-ehˇ duˇ ni, naw maꞈ kʼawꞈ iˬ baˇ-ahˇ kʼaˇ taꞈ-eu yawˬ jeˬ na luꞈ laꞈ kʼoeˇ shiˇ gʼaˬ-awˇ, Yeˬsuˇ Ka li baˬ da neh Miˬyehˇ-euˬ gʼaˇ duˬ dehꞈ luꞈ-eu ma lehˇ yawˬ haˇ yawˬ ha noeˬ-awˬ.

12Naw maꞈ-euˬ shiˬ shaˬ jiˇ nui kʼahˇ mehˬ nah maˬ ya caw teh ni, shiˇ nya-eu naw maꞈ-euˬ shiˬ shaˬ jiˇ gʼawˇ mawˇ-ahˇ iˬ baˇ neh taˬ paˇ bi uˆ lahˇ. 13Maˬ muiˬ-eu jeˬ mˇ gaˇ zmˬ-eu keu ka bi pyeuꞈ-eu gʼaˇ duˬ naw maꞈ-euˬ gʼawˇ mawˇ tiˬ pyehˬ tehꞈ-ehˇ kʼawꞈ iˬ baˇ-euˬ baoˬ-ahˇ maˬ a nehˬ ni, shiˇ-euˬ gaˇ paˇ gʼoꞈ dehꞈ laˇ-euˬ tsawˇ haˬ loꞈ-ehˇ naw maꞈ-euˬ nui ma gʼawˇ mawˇ dawˬ tawˆ luꞈ Miˬyehˇ-ahˇ a nehˬ jiˇ-awˇ, yaw tsaˬ yaw dawˇ jeˬ gʼaˇ duˬ zmˬ-eu keu ka bi pyeuꞈ-awˬ. 14Iˬ baˇ neh naw maꞈ-ahˇ taˬ paˇ bi uˆ lahˇ. Aˬ jeˬ miˇ neh ehˇ naˇ, zahˇ dawˬ kʼoꞈ dawˬ uˬ moˆ naw maꞈ maˬ paˇ jawˇ-ehˇ, Miˬyehˇ-euˬ guiˬ lahˬ yaw dzahˇ uˬ moˆ jawˇ luꞈ-eu meh.

Yaw tsaˬ yaw dawˇ jeˬ-euˬ zaˬ kʼaˆ

15Toˆ-ehˇ ngeuˇ naˇ, aˬ joˆ-ehˇ jahˇ nmˇ. Aˬ dui zahˇ dawˬ kʼoꞈ dawˬ uˬ moˆ maˬ jawˇ-ehˇ Miˬyehˇ-euˬ guiˬ lahˬ yaw dzahˇ uˬ moˆ jawˇ luꞈ-eu miˇ neh iˬ baˇ mˇ-eu la. Maˬ ngeuˇ-a. 16Tsawˇ haˬ tiˬ gʼaˬ na-euˬ myawˬ kʼehˇ gʼoˆ nehˬ-eu gʼaˇ duˬ zaˬ kʼaˆ geuꞈ-eu lehˇ yawˬ ha-euˬ gʼawˇ mawˇ a nehˬ gʼaˬ shaw naˇ, yawˬ ha myawˬ kʼehˇ gʼoˆ nehˬ-eu baw leˬ kʼoeˇ gʼaˬ-euˬ zaˬ kʼaˆ pyeuꞈ tsehˆ tsehˆ-euˬ meh lehˇ naw maꞈ siˬ duˬ luꞈ meh. Iˬ baˇ-euˬ ehˇ dawˬ naˇ haˬ naˇ, shiˇ gaˇ ya keuˆ tehꞈ-a. Miˬyehˇ-euˬ ehˇ dawˬ naˇ haˬ naˇ, aˬ yawꞈ-ahˇ tsaˬ leˇ tsahˇ leˇ gaˇ ya keuˆ tehꞈ-a. 17Ehˇ kʼawꞈ, Miˬyehˇ-euˬ guiˬ lahˬ yaw dzahˇ-ahˇ ja ceuˬ-eu tsaˬ meh. Aˬ jeˬ miˇ neh ehˇ naˇ, dzeuˇ laˇ ngeh naw maꞈ iˬ baˇ-euˬ zaˬ kʼaˆ pyeuꞈ-euˬ kʼawꞈ, naw maꞈ-ahˇ mehˬ nehˬ tsoˆ nehˬ-euˬ laꞈ kʼoeˇ ya mawˇ taˬ-euˬ yaw tsaˬ yaw dawˇ jeˬ-ahˇ nui ma laꞈ kʼoeˇ keuˆ ni naw maꞈ naˇ haˬ geuꞈ-euˬ meh. 18Naw maꞈ-ahˇ iˬ baˇ laꞈ kʼoeˇ bi buˬ bi law-iˇ-awˇ, yaw tsaˬ yaw dawˇ jeˬ-euˬ zaˬ kʼaˆ bi pyeuꞈ laˇ-euˬ meh. 19Naw maꞈ gʼoˆ siˬ gʼoˆ shaw nya-eu paw dzeˇ gʼaˬ baˬ-eu miˇ neh, yawˬ nah na luꞈ ngehˬ luꞈ-eu dawˬ deuˬ-ahˇ zmˬ-awˇ ngaˇ ehˇ-eu ma. Dzeuˇ laˇ ngeh, maˬ tsaˬ maˬ dawˇ-eu laꞈ kʼoeˇ kʼaˬ miˬ sheu-eu jeˬ hawˇ-eu maˬ muiˬ maˬ jaˬ-eu jeˬ-euˬ zaˬ kʼaˆ geuꞈ-eu laꞈ kʼoeˇ, maˬ tsaˬ maˬ dawˇ-eu jeˬ-ahˇ mˇ-eu gʼaˇ duˬ naw maꞈ-euˬ nui ma gʼawˇ mawˇ dawˬ tawˆ luꞈ a nehˬ-euˬ meh. Kʼoeˇ loꞈ-ehˇ duˇ ni, nymˬ-mˇ poˆ jawˇ-aˬ, yaw tsaˬ yaw dawˇ jeˬ-euˬ zaˬ kʼaˆ geuꞈ-eu laꞈ kʼoeˇ yaw muiˬ yaw shawˇ jeˬ-ahˇ mˇ-eu gʼaˇ duˬ, nui ma gʼawˇ mawˇ dawˬ tawˆ luꞈ a nehˬ-awˬ.

20Naw maꞈ iˬ baˇ-euˬ zaˬ kʼaˆ geuꞈ luꞈ ngeh, yaw tsaˬ yaw dawˇ jeˬ-euˬ uˬ moˆ maˬ jawˇ-aˬ. 21Nymˬ-mˇ naw maꞈ nui daˆ daˆ luꞈ-eu gaˇ kʼoeˇ deuˬ-ahˇ naw maꞈ mˇ-euˬ miˇ neh aˬ jeˬ za ta. Shiˇ-eu jeˬ-ahˇ za-eu tehꞈ meh. 22Ehˇ kʼawꞈ, nymˬ-mˇ naw maꞈ-ahˇ iˬ baˇ laꞈ kʼoeˇ bi buˬ-iˇ-awˇ, Miˬyehˇ-euˬ zaˬ kʼaˆ bi pyeuꞈ laˇ-euˬ meh. Heu poˆ jawˇ naw maꞈ aˬ jeˬ za ta. Naw maꞈ-euˬ nui ma gʼawˇ mawˇ dawˬ tawˆ luꞈ aˬ yawꞈ-ahˇ a nehˬ gʼaˬ-euˬ miˇ neh mˬ maˬ maˬ byaˆ zaˇ ziˇ dehꞈ-eu jeˬ-ahˇ za-eu meh. 23Aˬ jeˬ miˇ neh ehˇ naˇ, iˬ baˇ-euˬ aˇ poeˬ-aˬ, shiˇ-eu jeˬ pyeuꞈ-eu meh. Ehˇ kʼawꞈ, Miˬyehˇ neh yawꞈ ngehꞈ-ehˇ biꞈ nehˬ laꞈ-euˬ laꞈ sawˬ-aˬ, aˬ dui-euˬ Sahˬpaˬ Yeˬsuˇ Ka li laꞈ kʼoeˇ mˬ maˬ maˬ byaˆ zaˇ ziˇ dehꞈ-eu jeˬ pyeuꞈ-eu meh.

Currently Selected:

Loˇmaˆ sahˬ boꞈ 6: AHK

Highlight

Copy