Loˇmaˆ sahˬ boꞈ 12

Miˬyehˇ-euˬ gaˇ mˇ-eu gʼaˇ duˬ yaw dehꞈ dehꞈ-eu

1Kʼoeˇ miˇ neh aˬ yuiꞈ aˬ nyiˇ Ka li zaˬ deuˬ-oˇ, Miˬyehˇ-euˬ huiˬ dui myaˬ dui dui-eu gʼawˬ shaˬ gaˬ-eu jeˬ baˬ da neh naw maꞈ-ahˇ ngaˇ heu loꞈ-ehˇ shaˇ-eu ma. Dehꞈ luꞈ-eu lawˇ-eu jeˬ loꞈ-ehˇ, naw maꞈ-euˬ gʼawˇ mawˇ Miˬyehˇ-ahˇ damˬ nehˬ-awˬ. Aˬ yawꞈ-euˬ gaˇ mˇ-eu gʼaˇ duˬ a nehˬ-awˇ, aˬ yawꞈ nui ma tsaˬ ni dehꞈ-awˬ. Heu-aˬ, naw maꞈ mˇ paˬ-ehˇ gʼeh-eu maˇ maˇ ni gʼeh-eu uˬ duˬ tahˬ-eu jeˬ pyeuꞈ-eu meh. 2Miˇ tsaˬ zaˬ deuˬ dehꞈ-eu loꞈ-ehˇ maˬ dehꞈ ni, naw maꞈ-euˬ nui ma poˆ laˆ laˆ doˆ-awˇ, naw maꞈ-euˬ laꞈ kʼoeˇ paw Miˬyehˇ neh yaw shuiꞈ bi jahˇ paˇ-awˬ. Kʼoeˇ loꞈ-ehˇ jahˇ naˇ, Miˬyehˇ-euˬ nui kʼahˇ-ahˇ naw maꞈ siˬ nya laˇ tehꞈ-a. Muiˬ-eu jeˬ, aˬ yawꞈ nui ma tsaˬ-eu jeˬ hawˇ-eu, byah dui dui-eu jeˬ-ahˇ naw maꞈ siˬ nya laˇ tehꞈ-a.

3Miˬyehˇ neh ngaˬ-ahˇ gʼawˬ shaˬ gaˬ-eu laꞈ kʼoeˇ biꞈ laꞈ-euˬ laꞈ sawˬ baˬ da neh, naw maꞈ yawˬ gʼaˬ na luꞈ-ahˇ ngaˇ heu loꞈ-ehˇ ehˇ-eu ma. Naw maꞈ yawˬ haˇ yawˬ ha aˇ dzehˬ dzeuˇ ni taˬ noeˬ huiˬ. Tsaˬ tsaˬ ni tehꞈ-ehˇ noeˬ-awˬ. Miˬyehˇ neh biꞈ laꞈ-euˬ jah-eu jeˬ aˇ myaˆ ni ahˇ-eu nya lehˇ shaˇ sawˇ-awˇ, yawˬ haˇ yawˬ ha siˬ nya-awˬ. 4Aˬ dui-euˬ gʼawˇ mawˇ-ahˇ aˇ sehˇ gʼawˬ mya ni tsoꞈ-eu meh. Aˇ sehˇ kʼoeˇ deuˬ yawˬ ha yawˬ gaˇ tawˬ luꞈ-eu meh. 5Kʼoeˇ gaˇ duˇ ni, aˬ dui-aˬ, maˬ duˇ leˇ-eu tsawˇ haˬ gʼawˬ mya jeˬ pyeuꞈ-eu kʼawꞈ, Ka li nehˬ-ehˇ taꞈ luꞈ-eu gʼawˇ mawˇ tiˬ mawˇ tehꞈ-ehˇ pyeuꞈ-awˇ, gʼawˇ mawˇ tiˬ mawˇ-ahˇ tehꞈ-ehˇ maˬ duˇ leˇ-eu aˇ sehˇ gʼawˬ mya jeˬ tsoꞈ tawꞈ taˬ-euˬ loꞈ-ehˇ, aˬ dui tiˬ gʼaˬ tiˇ gʼaˬ tsoꞈ tawꞈ taˬ-euˬ ma. 6Miˬyehˇ neh biꞈ laꞈ-euˬ guiˬ lahˬ maˬ duˇ leˇ-eu loꞈ-ehˇ, aˬ dui za taˬ-euˬ maˬ duˇ leˇ-eu laꞈ sawˬ deuˬ-ahˇ, kʼaˇ za taˬ-euˬ loꞈ-ehˇ aˬ dui zmˬ kaˇ-euˇ. Aˬ cawˬ-ahˇ Miˬyehˇ dawˬ kawˬ mehˬ-eu gʼaˇ duˬ laꞈ sawˬ za-euˬ ngeuˇ naˇ, aˬ dui jah gʼaˬ kʼaˇ kʼaˆ-eu naˆ ni mˇ-eu tsaˬ meh. 7Jah-eu aˇ muˇ-euˬ gaˇ mˇ-eu gʼaˇ duˬ laꞈ sawˬ za-euˬ ngeuˇ naˇ, mˇ-eu tsaˬ meh. Mehˬ-eu tsoˆ-eu gʼaˇ duˬ laꞈ sawˬ za-euˬ ngeuˇ naˇ, mehˬ-eu tsaˬ meh. 8Aˬ cawˬ-ahˇ gʼaˬ biꞈ-eu gʼaˇ duˬ laꞈ sawˬ za-euˬ ngeuˇ naˇ, gʼaˬ biꞈ-eu tsaˬ meh. Aˬ cawˬ-ahˇ biꞈ nehˬ damˬ nehˬ-eu laꞈ sawˬ za-euˬ ngeuˇ naˇ, nui ma keuˆ-eu laꞈ kʼoeˇ biꞈ nehˬ-eu tsaˬ meh. Aˬ cawˬ kʼoeˇ taˆ aˬ yuiꞈ aˬ tsu geuꞈ-awˇ uˆ lahˇ-eu laꞈ sawˬ za-euˬ ngeuˇ naˇ, leh jeh dui dui-awˇ mˇ-eu tsaˬ meh. Aˬ cawˬ-ahˇ gʼawˬ shaˬ gaˬ nehˬ-eu laꞈ sawˬ za-euˬ ngeuˇ naˇ, laˬ kʼaˬ tiˬ cehˇ gaˬ nehˬ-eu tsaˬ meh.

9Gʼoeˇ-eu gaˬ-eu jeˬ-aˬ, maˇ maˇ ni gaˬ-eu jeˬ ya bi pyeuꞈ meh. Maˬ muiˬ maˬ jaˬ-eu jeˬ-ahˇ muiˇ-awˇ, muiˬ-eu jaˬ-eu jeˬ-ahˇ ziꞈ dah ni tuˆ tehˬ taˬ-awˬ. 10Ka li laꞈ kʼoeˇ aˬ yuiꞈ aˬ nyiˇ loꞈ-ehˇ tiˬ gʼaˬ tiˇ gʼaˬ gaˬ-awˇ, tiˬ gʼaˬ tiˇ gʼaˬ yaw zeu baw-eu nui ma ahˇ-awˬ. 11Yaw doeˇ maˬ doeˇ ni mˇ dui dui-awˬ. Nui ma keuˆ dui dui-eu laꞈ kʼoeˇ Miˬyehˇ gaˇ mˇ-awˬ. 12Noeˬ tmˬ-eu laꞈ kʼoeˇ laˬ kʼaˬ cehˇ-awˬ. Shaˬ-eu zahˬ-eu jeˬ laꞈ kʼoeˇ nui ma gʼawˬ mahˇ ni taˬ-awˬ. Aˬ myah luꞈ guiˬ lahˬ shaˇ-awˬ. 13Nawˇ kʼaˇ jaˆ-eu jeˬ nawˬ-euˬ cawˬ Ka li zaˬ deuˬ-ahˇ caw ba nehˬ-awˇ, daˬ yah-ahˇ yaw muiˬ-ehˇ ha-awˬ.

14Nawˬ-ahˇ kʼehˬ laˇ kʼaˆ laˇ-eu tsawˇ haˬ deuˬ-ahˇ Miˬyehˇ guiˬ lahˬ biꞈ nehˬ ni shaˇ-awˬ. Yaˬ kʼehˇ maˬ yaˬ nehˬ ni guiˬ lahˬ biꞈ nehˬ-eu gʼaˇ duˬ shaˇ-awˬ. 15Laˬ kʼaˬ cehˇ-eu tsawˇ haˬ deuˬ nehˬ-ehˇ laˬ kʼaˬ caw cehˇ-awˇ, ngoeˇ-eu tsawˇ haˬ deuˬ nehˬ-ehˇ caw ngoeˇ-awˬ. 16Tsawˇ haˬ yawˬ gʼaˬ na luꞈ kʼoeˇ taˆ nui ma tiˬ kawˆ loꞈ-ehˇ taˬ-awˬ. Huiˬ mawꞈ mahˇ mawꞈ-eu nui ma taˬ bi ahˇ. Tsawˇ teˬ zaˬ deuˬ-ahˇ kʼawꞈ cawˬ cawˬ-awˬ. Yawˬ haˇ yawˬ ha zaˬ siˬ tsawˇ gahˇ ahˇ ma lehˇ taˬ noeˬ.

17Aˬ cawˬ yaw doeˇ jahˇ laˇ ngeh, yaw doeˇ taˬ jahˇ kʼoꞈ nehˬ. Tsawˇ haˬ yawˬ gʼaˬ na luꞈ neh yaw muiˬ meh lehˇ noeˬ-euˬ jeˬ-ahˇ mˇ-awˬ. 18Tsawˇ haˬ yawˬ gʼaˬ na luꞈ nehˬ-ehˇ tsaˬ leˇ ni, yawˬ ha kʼaˇ gʼeh nya-eu loꞈ-ehˇ leh jeh-awˇ dehꞈ-awˬ. 19Aˬ yuiꞈ aˬ nyiˇ Ka li zaˬ deuˬ-oˇ, aˬ cawˬ-ahˇ laꞈ poˆ tiˬ jawˇ-iˬ taˬ poˆ. Miˬyehˇ yaˇ kʼaˬ daˇ luꞈ-uˇ. Aˬ jeˬ miˇ neh ehˇ naˇ, Jaˇliꞈ laꞈ kʼoeˇ heu loꞈ-ehˇ ehˇ taˬ-euˬ meh. “Laꞈ poˆ poˆ-eu jeˬ-aˬ, ngaˬ-ahˇ taꞈ-eu jeˬ pyeuꞈ-eu ma. Ngaˇ jahˇ kʼoꞈ nehˬ ma lehˇ Sahˬpaˬ Miˬyehˇ ehˇ-eu meh.” 20Ehˇ kʼawꞈ, Jaˇliꞈ laꞈ kʼoeˇ heu loꞈ-ehˇ paˇ ehˇ taˬ-euˬ meh. “Nawˬ-ahˇ muiˇ-eu tsawˇ haˬ hawˬ mehꞈ naˇ, bi dzaˬ-awˬ. Iˇ cuꞈ meh naˇ, bi dawˇ-awˬ. Kʼoeˇ-aˬ, aˬ yawꞈ ya shaꞈ dawˇ dui dui-awˇ noeˬ poˆ leˇ ni jahˇ nehˬ gaˇ duˇ-eu meh.” 21Yaw haiˬ jeˬ neh naw maꞈ-ahˇ taˬ bi gʼaˬ leˇ. Ehˇ kʼawꞈ, yaw muiˬ jeˬ mˇ-awˇ yaw haiˬ jeˬ-ahˇ bi gʼaˬ leˇ-awˬ.

Currently Selected:

Loˇmaˆ sahˬ boꞈ 12: AHK

Highlight

Copy