Loˇmaˆ sahˬ boꞈ 13

Miˇ kʼahˬ sahˬ paˬ sahˬ ma deuˬ-euˬ ehˇ dawˬ naˇ haˬ-eu

1Tsawˇ haˬ yawˬ gʼaˬ na luꞈ miˇ kʼahˬ sahˬ paˬ uˆ lahˇ-eu uˬ moˆ ya jawˇ meh. Aˬ jeˬ miˇ neh ehˇ naˇ, Miˬyehˇ neh maˬ biꞈ-euˬ gaˇ, uˆ lahˇ-eu baoˬ maˬ jaˆ nya-a. Sahˬ paˬ sahˬ ma deuˬ-aˬ, Miˬyehˇ neh baoˬ biꞈ-awˇ bi uˆ lahˇ-euˬ deuˬ pyeuꞈ-eu meh. 2Uˆ lahˇ luꞈ-eu sahˬ paˬ sahˬ ma deuˬ-ahˇ kʼaˇ puiˬ-eu tsawˇ haˬ-aˬ, Miˬyehˇ neh mˇ taˬ-euˬ jeˬ-ahˇ puiˬ gaˇ duˇ-eu meh. Kʼoeˇ loꞈ-ehˇ kʼaˇ puiˬ-eu tsawˇ haˬ aˬ geu gʼaˬ maˬ kaˬ, yawˬ haˇ yawˬ ha yaˇ kʼaˬ daˇ gaˇ duˇ-eu meh. 3Yaw muiˬ jeˬ mˇ-eu tsawˇ haˬ deuˬ-aˬ, uˆ lahˇ luꞈ-eu sahˬ paˬ sahˬ ma-ahˇ maˬ ya guˆ-a. Maˬ muiˬ-eu jeˬ mˇ-eu tsawˇ haˬ deuˬ tehꞈ-ehˇ ya guˆ-eu meh. Sahˬ paˬ sahˬ ma-ahˇ guˆ kʼaˇ maˬ za ni dehꞈ mawꞈ-eu nya loˇ. Yaw muiˬ jeˬ mˇ-awˬ. Sahˬ paˬ sahˬ ma ja ceuˬ nehˬ laꞈ tehꞈ-a. 4Aˬ jeˬ miˇ neh ehˇ naˇ, sahˬ paˬ sahˬ ma-aˬ, nawˬ-euˬ gʼaˇ duˬ muiˬ ni Miˬyehˇ neh kʼehˇ taˬ-euˬ tsawˇ haˬ pyeuꞈ-eu meh. Ehˇ kʼawꞈ, nawˇ maˬ muiˬ-eu jeˬ mˇ naˇ, sahˬ paˬ sahˬ ma-ahˇ guˆ-awˬ. Aˬ yawꞈ nawˬ-ahˇ kʼehˬ-eu yaw duˬ baw meh. Aˬ jeˬ miˇ neh ehˇ naˇ, maˬ muiˬ-eu jeˬ mˇ-eu tsawˇ haˬ deuˬ kʼoeˇ taˆ Miˬyehˇ-euˬ kʼehˬ-eu kʼaˆ-eu jeˬ bi keuˆ le-eu gʼaˇ duˬ, Miˬyehˇ neh aˬ yawꞈ-ahˇ kʼehˇ taˬ-euˬ meh. 5Kʼoeˇ miˇ neh, Miˬyehˇ-euˬ kʼehˬ-eu kʼaˆ-eu jeˬ-ahˇ guˆ-eu baˬ da neh tehꞈ-ehˇ maˬ ngeuˇ ni, kʼoeˇ loꞈ-ehˇ dehꞈ-eu jawˇ-eu tsaˬ meh lehˇ naw maꞈ-euˬ nui ma siˬ nya-eu laꞈ kʼoeˇ sahˬ paˬ sahˬ ma deuˬ uˆ lahˇ-eu uˬ moˆ yaw muiˬ paˬ-ehˇ jawˇ-awˬ.

6Kʼoeˇ baˬ da neh, naw maꞈ kawˬ ya doˆ nehˬ-eu meh. Aˬ jeˬ miˇ neh ehˇ naˇ, aˬ yawꞈ maꞈ yawˬ ha-euˬ gaˇ mˇ-eu kʼoeˇ-aˬ, Miˬyehˇ-euˬ gʼaˇ duˬ mˇ luꞈ-eu jeˬ pyeuꞈ-eu meh. 7Toˆ-ehˇ ngeuˇ naˇ, aˬ yawꞈ maꞈ-ahˇ kʼaˇ biꞈ paˬ-ehˇ gʼeh-eu jeˬ biꞈ-awˬ. Kawˬ kʼaˇ doˆ nehˬ paˬ-ehˇ gʼeh-eu jeˬ dawˬ tawˆ luꞈ doˆ nehˬ-awˇ, aˬ yawꞈ maꞈ dawˬ tawˆ luꞈ-ahˇ yaw zeu baw-eu laꞈ kʼoeˇ taˬ huiˬ taˬ mahˇ nehˬ-awˬ.

Tiˬ gʼaˬ tiˇ gʼaˬ mˇ nehˬ paˬ-ehˇ gʼeh-eu jeˬ

8Tiˬ gʼaˬ tiˇ gʼaˬ gʼoeˇ-eu gaˬ-eu dziˇ dzoˆ maˬ ngeuˇ naˇ, nui jeˬ dziˇ dzoˆ taˬ bi daˆ. Kʼoeˇ loꞈ-ehˇ mˇ naˇ, Zahˇ dawˬ kʼoꞈ dawˬ-ahˇ naˇ haˬ geuꞈ gaˇ duˇ-eu meh. 9“Aˬ cawˬ-euˬ miˬ zaˬ yo zaˬ-ahˇ taˬ bahˬ taˬ muˆ. Tsawˇ haˬ taˬ sehꞈ. Smˇ kʼoeˬ taˬ kʼoeˬ. Aˬ cawˬ-euˬ myawˬ-ahˇ mehˇ juiˇ taˬ juiˇ” lehˇ ehˇ taˬ-euˬ zahˇ dawˬ kʼoꞈ dawˬ heu deuˬ uˬ taꞈ, zahˇ dawˬ kʼoꞈ dawˬ nui deuˬ dawˬ tawˆ luꞈ, “Yawˬ haˇ yawˬ ha gaˬ-eu loꞈ-ehˇ, yawˬ ha dawˬ peh jawˇ-eu tsawˇ haˬ-ahˇ gaˬ-awˬ” lehˇ ehˇ-eu dawˬ heu dawˬ laꞈ kʼoeˇ ahˇ jiˇ-eu meh. 10Nawˇ tsawˇ haˬ tiˬ gʼaˬ na-ahˇ gaˬ shaw naˇ, aˬ yawꞈ-ahˇ coeˬ leˇ ciˆ leˇ-eu jeˬ maˬ mˇ-aˇ. Kʼoeˇ miˇ neh, gʼoeˇ-eu gaˬ-eu jeˬ-aˬ, Zahˇ dawˬ kʼoꞈ dawˬ-ahˇ mˇ byah-eu meh.

11Naw maꞈ kʼoeˇ loꞈ-ehˇ ya mˇ meh. Aˬ jeˬ miˇ neh ehˇ naˇ, yuꞈ kʼaˆ taˬ-euˬ noeˬ laˇ-eu aˇ yamˬ tsaˬ laˇ-euˬ meh lehˇ naw maꞈ siˬ nya meh. Miˬyehˇ aˬ dui-ahˇ ka kʼoꞈ-eu aˇ yamˬ-aˬ, aˬ dui jah dahˬ beh ngeh naˆ maˬ tseˇ nymˬ-mˇ peh dzehˬ laˇ-euˬ meh. 12Uˬ ciꞈ buˬ-iˇ-awˇ nah gʼahˇ keuˆ le-eu dawˬ peh peh laˇ-euˬ meh. Yaw zahˇ-ahˇ taꞈ-eu gaˇ deuˬ aˬ dui maˬ mˇ ni naˬ leˇ-awˇ, yaw bya laꞈ kʼoeˇ deuˆ ceh ceh-eu keu ka deuˬ-ahˇ dm kaˇ-euˇ. 13Nah gʼahˇ yaw bya-ahˇ dehꞈ-eu tsawˇ haˬ deuˬ loꞈ-ehˇ, yaw muiˬ muiˬ-ehˇ dehꞈ gʼeh kaˇ-euˇ. Dzaˬ yehꞈ dawˇ yehꞈ dzaˬ boˆ dawˇ boˆ-eu jeˬ, aˬ cawˬ-euˬ miˬ zaˬ yo zaˬ-ahˇ bahˬ-eu jeˬ, kʼaˬ miˬ sheu-eu jeˬ, iˬ dehˬ iˬ ceh hawˇ-eu myaˆ naˆ-eu jeˬ, heu deuˬ-ahˇ byehˇ dzeh yaꞈ-awˇ dehꞈ daˆ jawˇ daˆ gʼeh kaˇ-euˇ. 14Aˬ dui-euˬ guiˇ deuˆ-eu keu ka pyeuꞈ-eu Yeˬsuˇ Ka li-ahˇ dm-awˇ, shiˬ shaˬ jiˇ-euˬ nui loˆ maˬ paˇ poˆ ni, shiˬ shaˬ jiˇ nui kʼahˇ jaˆ-eu jeˬ-ahˇ byehˇ dzeh yaꞈ jiˇ kaˇ-euˇ.

Currently Selected:

Loˇmaˆ sahˬ boꞈ 13: AHK

Highlight

Copy