Pah meuˬ-eu 15

1Kʼoeˇ naˇ, zahˬ leˇ paˬ-ehˇ gʼeh-eu huiˬ dui dui-eu bi siˬ bi mawˇ-eu jeˬ mˬ-ahˇ ya mawˇ-euˬ ma. Kʼoeˇ-aˬ, mˬ taˆ gʼaˬ kʼehˇ shiꞈ gʼaˬ hawˇ-eu aˇ saˬ saˬ-eu kʼehˬ-eu kʼaˆ-eu shiꞈ jeˬ meh. Aˬ jeˬ miˇ neh ehˇ naˇ, kʼoeˇ-aˬ, Miˬyehˇ nui ma pehˇ-eu jeˬ bi siˬ bi mawˇ-eu aˇ saˬ saˬ-eu poˆ pyeuꞈ-eu meh.

2Kʼoeˇ naˇ, miˬ dzaˬ nehˬ-ehˇ laˆ keuˬ taˬ-euˬ pyawˬ haw lah-ahˇ duˇ-eu jeˬ-ahˇ ngaˇ ya mawˇ-euˬ ma. Jeˬ zaˬ yaw haiˬ kʼoeˇ mawˇ hawˇ-eu aˬ yawꞈ-euˬ tahˬ pahˬ aˬ ma mawˇ kawˇ-ahˇ maˬ ehˇ, tsawˇ myahˇ naˬ baꞈ neh myahˇ taˬ-euˬ gʼaˬ-ahˇ guiˇ deuˆ gʼaˬ-euˬ deuˬ-ahˇ maˬ ehˇ, ngaˇ ya mawˇ-euˬ ma. Aˬ yawꞈ maꞈ-aˬ, Miˬyehˇ neh biꞈ-euˬ deuˇ-mˬ yuˇ-awˇ, pyawˬ haw lah dawˬ peh yawꞈ luꞈ-eu meh. 3Miˬyehˇ-euˬ zaˬ kʼaˆ pyeuꞈ-eu Moˇseˬ-euˬ caˇ dawˬ hawˇ-eu Yawˇzaˬ-euˬ caˇ dawˬ aˬ yawꞈ maꞈ caˇ luꞈ-eu meh.

“Baoˬ huiˬ-eu Sahˬpaˬ Miˬyehˇ-oˇ,

nawˬ neh mˇ-euˬ shaˇ-euˬ gaˇ deuˬ,

aˇ naˆ ni zahˬ leˇ duˬ jaˆ nga.

Tsawˇ jeuˬ dawˬ tawˆ-euˬ Sahˬpaˬ-oˇ,

nawˬ-euˬ gaˇ ma tsaˬ meh dawˇ meh.

4Sahˬpaˬ Miˬyehˇ-oˇ,

nawˬ-euˬ mehˬ shi yawꞈ-awˇ,

maˬ zahˬ leˇ-eu aˬ suˇ jawˇ ta.

Nawˇ huiˬdui mahˇdui dui meh lehˇ,

maˬ ja ceuˬ-eu aˬ suˇ jawˇ ta.

Nawˇ tehꞈ-ehˇ muiˬ-eu shawˇ-eu meh.

Nawˬ neh mˇ-euˬ yaw tsaˬ yaw dawˇ,

tsawˇ haˬ zaˬ mawˇ jiˇ-euˬ miˇ neh,

Miˇ kʼahˬ tsawˇ jeuˬ dawˬ tawˆ laˇ-awˇ,

nawˬ-ahˇ uˬ duˬ tahˬ laˇ tehꞈ-a.”

5Kʼoeˇ naˇ, mˬ kʼoeˇ taˆ jaˆ-eu uˬ duˬ tahˬ nymˇ nymˇ ma pah taˬ-awˇ, laꞈ kʼoeˇ paw Miˬyehˇ jawˇ-eu Sehˬ gʼawˆ jaˆ gaˇ ngaˇ ya mawˇ-euˬ ma. 6Kʼehˬ-eu kʼaˆ-eu shiꞈ jeˬ ahˇ-eu mˬ taˆ gʼaˬ kʼehˇ shiꞈ gʼaˬ, uˬ duˬ tahˬ nymˇ nymˇ ma laꞈ kʼoeˇ neh doˆ le-euˬ meh. Aˬ yawꞈ maꞈ-aˬ, yaw shehꞈ bya-eu shawˇ jehˆ ni gʼeh-eu saˬ paˇ paˇ pyuˇ dm-awˇ, kʼahˬ-ahˇ shuiˇ joꞈ paꞈ paꞈ luꞈ-eu meh. 7Dehꞈ luꞈ-eu jeˬ zaˬ kʼoeˇ shiꞈ mawˇ laꞈ kʼoeˇ tiˬ mawˇ-aˬ, mˬ taˆ gʼaˬ kʼehˇ kʼoeˇ shiꞈ gʼaˬ-ahˇ, mˬ maˬ maˬ byaˆ zaˇ ziˇ dehꞈ-eu Miˬyehˇ-euˬ nui ma pehˇ-eu jeˬ tiˬ byah ni dahˬ-eu shuiˇ naˬ bo shiꞈ bo ciˬ nehˬ-euˬ meh. 8Uˬ duˬ tahˬ nymˇ nymˇ ma laꞈ kʼoeˇ Miˬyehˇ-euˬ baoˬ yaw shehꞈ kʼahˬ sehˇ uˬ kʼoeˬ byah-awˇ, mˬ taˆ gʼaˬ kʼehˇ kʼoeˇ shiꞈ gʼaˬ neh hehˇ leꞈ-euˬ kʼehˬ-eu kʼaˆ-eu kʼoeˇ shiꞈ jeˬ aˇ saˬ maˬ saˬ gʼaˬ kʼoeˇ keuˆ ni, uˬ duˬ tahˬ nymˇ nymˇ ma laꞈ kʼoeˇ tiˬ gʼaˬ-iˬ maˬ uˇ leˇ nya-a.

Currently Selected:

Pah meuˬ-eu 15: AHK

Highlight

Copy