Pah meuˬ-eu 14

Yawˇzaˬ hawˇ-eu aˬ yawꞈ-euˬ tsawˇ haˬ deuˬ

1Kʼoeˇ naˇ, ngaˇ haw gʼeh leꞈ ngeh, Ziˇoˬ gawˬ jawˬ kʼoeˇ taˆ Yawˇzaˬ yawꞈ luꞈ gaˇ ya mawˇ-euˬ ma. Naˇ kʼawˇ-ahˇ aˬ yawꞈ Aˬda-euˬ tsawˇ myahˇ hawˇ-eu aˬ yawꞈ-euˬ tsawˇ myahˇ boꞈ taˬ-euˬ tsawˇ haˬ tiˬ seh oeˬ muiˇ oeˬ heˇ gʼaˬ, aˬ yawꞈ nehˬ-ehˇ jawˇ-eu meh. 2Kʼoeˇ naˇ, iˇ cuꞈ tsawˬ ga ga-eu teˇ saˇ hawˇ-eu mˬ jeˬ tsawˬ tehˆ tehˆ-eu teˇ saˇ-ahˇ duˇ-eu teˇ saˇ tiˬ saˇ, mˬ kʼoeˇ taˆ neh gaˬ le-euˬ meh. Teˇ saˇ kʼoeˇ-aˬ, deuˇ-mˬ diˬ-eu tsawˇ haˬ tiˬ deuˬ deuˇ-mˬ diˬ luꞈ-eu teˇ saˇ-ahˇ duˇ-eu meh. 3Tsawˇ haˬ tiˬ seh oeˬ muiˇ oeˬ heˇ gʼaˬ kʼoeˇ-aˬ, dzoeˬ dzaˬ nuiˇ mahˬ, dehꞈ luꞈ-eu jeˬ zaˬ kʼoeˇ oeˬ mawˇ hawˇ-eu, aˬ yuiꞈ aˬ tsu kʼoeˇ deuˬ-euˬ mehˬ shi yawꞈ luꞈ-eu meh. Aˬ yawꞈ maꞈ-aˬ, aˬ cawˬ maˬ caˇ nya-eu caˇdawˬ yaw shuiꞈ tiˬ bymˇ caˇ luꞈ-eu meh. Tsawˇ haˬ zaˬ dawˬ tawˆ luꞈ laꞈ kʼoeˇ, aˬ yawꞈ maꞈ tehꞈ-ehˇ ka kʼoꞈ-eu jeˬ za-euˬ meh. 4Aˬ yawꞈ maꞈ-aˬ, zaˬ miˬ zaˬ nehˬ-ehˇ maˬ yuꞈ taꞈ-eu tsawˇ shawˇ deuˬ meh. Yawˇ zaˬ kʼaˇ iˇ-eu mehˬ nah aˬ yawꞈ maꞈ caw teh-eu meh. Tsawˇ haˬ zaˬ dawˬ tawˆ luꞈ laꞈ kʼoeˇ aˬ yawꞈ maꞈ-ahˇ ka kʼoꞈ-awˇ, Miˬyehˇ hawˇ-eu Yawˇzaˬ-ahˇ damˬ nehˬ beh beh-euˬ deuˬ pyeuꞈ-eu meh. 5Aˬ yawꞈ maꞈ-aˬ, tiˬ jawˇ-iˬ jaˬ myawꞈ maˬ myawꞈ haw-ehˇ, iˬ baˇ taˬ kʼaˇ maˬ za-eu tsawˇ haˬ deuˬ meh.

Mˬ taˆ gʼaˬ kʼehˇ smˇ gʼaˬ

6Kʼoeˇ naˇ, mˬ taˆ gʼaˬ kʼehˇ tiˬ gʼaˬ mˬ-euˬ gʼahˇ ceh zaw gaˇ ngaˇ ya mawˇ-euˬ ma. Aˬ yawꞈ-aˬ, miˇ kʼahˬ tsawˇ jeuˬ tsawˇ ca dawˬ tawˆ luꞈ-ahˇ ja ceuˬ-eu gʼaˇ duˬ mˬ maˬ maˬ byaˆ zaˇ ziˇ Laˬ kʼaˬ cehˇ-eu Guiˬ lahˬ dawˬ pi luꞈ-eu meh. 7Aˬ yawꞈ teˇ saˇ yaw kʼaˆ-ehˇ guˇ-awˇ ehˇ-eu, “Miˬyehˇ-ahˇ taˬ huiˬ taˬ mahˇ-awˇ, aˬ yawꞈ huiˬ dui mahˇ dui dui gaˇ ja ceuˬ-awˬ. Aˬ jeˬ miˇ neh ehˇ naˇ, tsawˇ haˬ zaˬ-ahˇ aˬ yawꞈ yaˇ kʼaˬ daˇ-eu aˇ yamˬ keuˆ le-euˬ meh. Mˬ, miˇ, iˬ ma laˆ shaˆ hawˇ-eu, iˇ cuꞈ lawˇ gawˆ deuˬ-ahˇ beh-euˬ gʼaˬ-ahˇ uˬ duˬ tahˬ-awˬ.”

8Mˬ taˆ gʼaˬ kʼehˇ nyiˬ gʼaˬ tiˬ gʼaˬ, mˬ taˆ gʼaˬ kʼehˇ yaw beh gʼaˬ-euˬ mehˬ nah caw teh-awˇ ehˇ-eu, “Aˬ yawꞈ coˬ dzeh-euˬ meh. Huiˬ dui dui-eu Baˬbuˬloˬ meuˬ coˬ dzeh-euˬ meh. Aˬ yawꞈ-euˬ taˆ dui dui-eu kʼaˬ miˬ sheu-eu aˬ gaꞈ dzaˇ uiˇ kʼoeˇ, tsawˇ jeuˬ dawˬ tawˆ luꞈ-ahˇ aˬ yawꞈ bi dawˇ-euˬ meh.”

9Mˬ taˆ gʼaˬ kʼehˇ smˇ gʼaˬ tiˬ gʼaˬ, yaw beh kʼoeˇ nyiˬ gʼaˬ-euˬ mehˬ nah caw teh-awˇ, teˇ saˇ yaw kʼaˆ-ehˇ guˇ-awˇ heu loꞈ-ehˇ ehˇ-eu meh. “Jeˬ zaˬ yaw haiˬ kʼoeˇ mawˇ hawˇ-eu aˬ yawꞈ-euˬ tahˬ pahˬ aˬ ma mawˇ kawˇ-ahˇ uˬ duˬ tahˬ-awˇ, naˇ kʼawˇ maˬ ngeuˇ naˇ aˬ laꞈ-ahˇ aˬ yawꞈ neh tsaˬ bi tsoˆ taˬ-euˬ tsawˇ haˬ deuˬ-aˬ, 10Miˬyehˇ-euˬ nui ma pehˇ-eu kʼmˬ maˬ laꞈ kʼoeˇ, taˆ dui dui-eu Miˬyehˇ nui ma pehˇ-eu aˬ gaꞈ dzaˇ uiˇ ya dawˇ tehꞈ-a. Kʼoeˇ loꞈ-ehˇ gʼeh-eu tsawˇ haˬ dawˬ tawˆ luꞈ, muiˬ-eu shawˇ-eu mˬ taˆ gʼaˬ kʼehˇ deuˬ hawˇ-eu Yawˇzaˬ-euˬ mehˬ shi, miˬ dzaˬ hawˇ-eu miˬ dzaˇ dzaˇ shuiˇ neh kʼehˬ nehˬ gaˇ ya daˬ tehꞈ-a. 11Aˬ yawꞈ maꞈ-ahˇ kʼehˬ-euˬ miˬ dzaˬ kʼoeˇ, mˬ maˬ maˬ byaˆ zaˇ ziˇ uˬ kʼoeˬ doˆ tehꞈ-a. Jeˬ zaˬ yaw haiˬ kʼoeˇ mawˇ hawˇ-eu aˬ yawꞈ-euˬ tahˬ pahˬ aˬ ma mawˇ kawˇ-ahˇ uˬ duˬ kʼaˇ tahˬ-eu tsawˇ haˬ deuˬ hawˇ-eu, aˬ yawꞈ neh tsaˬ kʼaˇ bi tsoˆ-euˬ tsawˇ haˬ deuˬ-aˬ, uˬ ciꞈ nah gʼahˇ maˬ ehˇ, saꞈ gʼawˇ dah kʼaˇ maˬ za-a.”

12Heu-aˬ, Miˬyehˇ ehˇ dawˬ naˇ haˬ-awˇ, Yeˬsuˇ-ahˇ saˇ jaˇ ziꞈ-eu Miˬyehˇ-euˬ tsawˇ haˬ deuˬ kamˬ coeˇ oˇ coeˇ ni ehˇ-eu dawˬ pyeuꞈ-eu meh.

13Kʼoeˇ naˇ, mˬ kʼoeˇ taˆ heu loꞈ-ehˇ ehˇ-eu teˇ saˇ ngaˇ ya gaˬ-euˬ ma. “Heu loꞈ-ehˇ boꞈ taˬ-awˬ. Nymˬ-mˇ neh dahˬ beh-awˇ, Sahˬpaˬ Miˬyehˇ-euˬ gaˇ laꞈ kʼoeˇ shiˇ-eu tsawˇhaˬ deuˬ guiˬ lahˬ huiˬ-eu meh.”

Yaw sahˇ Miˬyehˇ ehˇ-eu, “Ngeuˇ meh. Aˬ yawꞈ maꞈ gaˇ yaw kʼaˆ-ehˇ mˇ-euˬ baˬ da neh gʼaˬ naˬ ya naˬ tehꞈ-a. Aˬ jeˬ miˇ neh ehˇ naˇ, aˬ yawꞈ maꞈ neh mˇ-euˬ jeˬ aˬ yawꞈ maꞈ-euˬ mehˬ nah caw teh gʼeh leꞈ tehꞈ-a.

Miˇ tsaˬ kʼoeˇ taˆ cehˇ yehˬ-eu

14Kʼoeˇ naˇ, ngaˇ haw gʼeh ngeh, pyuˇ deuˬ ni gʼeh-eu mˬ dmˇ mawˇ-euˬ ma. Tsawˇ haˬ-ahˇ duˇ-eu tiˬ gʼaˬ uˬ duˬ-ahˇ shuiˇ uˬ kʼoˆ kʼoˆ-awˇ, aˬ laꞈ-ahˇ taˆ dui dui-eu yehˬ kʼoꞈ yuˇ-awˇ, mˬ dmˇ kʼoeˇ-euˬ kʼoeˇ taˆ nuiˇ luꞈ-eu meh. 15Kʼoeˇ ngeh, uˬ duˬ tahˬ nymˇ nymˇ ma laꞈ kʼoeˇ neh mˬ taˆ gʼaˬ kʼehˇ tiˬ gʼaˬ doˆ le-awˇ, teˇ saˇ yaw kʼaˆ-ehˇ guˇ-awˇ mˬ dmˇ kʼoeˇ taˆ nuiˇ luꞈ-eu kʼoeˇ gʼaˬ-ahˇ ehˇ nehˬ-eu, “Nawˬ-euˬ yehˬ kʼoꞈ neh cehˇ yehˬ-awˬ. Aˬ jeˬ miˇ neh ehˇ naˇ, miˇ tsaˬ kʼoeˇ taˆ cehˇ myah laˇ-awˇ, cehˇ yehˬ yamˬtsaˬ laˇ-euˬ meh.” 16Kʼoeˇ naˇ, mˬ dmˇ kʼoeˇ taˆ nuiˇ luꞈ-eu kʼoeˇ gʼaˬ aˬ yawꞈ-euˬ yehˬ kʼoꞈ neh miˇ tsaˬ kʼoeˇ taˆ diˬ lahˇ-awˇ cehˇ yehˬ-euˬ meh.

17Kʼoeˇ naˇ, uˬ duˬ tahˬ nymˇ nymˇ ma laꞈ kʼoeˇ neh mˬ taˆ gʼaˬ kʼehˇ tiˬ gʼaˬ paˇ doˆ le gaˇ ngaˇ ya mawˇ-euˬ ma. Aˬ yawꞈ-euˬ aˬ laꞈ-ahˇ kʼawꞈ, taˆ dui dui-eu yehˬ kʼoꞈ tiˬ kahˇ ahˇ-eu meh.

18Kʼoeˇ naˇ, miˬ dzaˬ-ahˇ haw-eu pyaˆ-eu mˬ taˆ gʼaˬ kʼehˇ tiˬ gʼaˬ lawˇ duˬ-ahˇ neh doˆ le-eu meh. Kʼoeˇ ngeh, taˆ dui dui-eu yehˬ kʼoꞈ yuˇ luꞈ-eu mˬ taˆ gʼaˬ kʼehˇ kʼoeˇ gʼaˬ-ahˇ aˬ yawꞈ yaw kʼaˆ-ehˇ guˇ-awˇ ehˇ nehˬ-eu, “Miˇ tsaˬ kʼoeˇ taˆ-euˬ aˬ gaꞈ yaˇ kmˇ-ahˇ nawˬ-euˬ yehˬ kʼoꞈ neh aˬ gaꞈ aˇ puˇ pyehˆ-awˬ. Aˬ jeˬ miˇ neh ehˇ naˇ, aˬ gaꞈ aˇ siˬ awꞈ laˇ-euˬ meh.” 19Kʼoeˇ ngeh, mˬ taˆ gʼaˬ kʼehˇ kʼoeˇ gʼaˬ aˬ yawꞈ-euˬ yehˬ kʼoꞈ neh miˇ tsaˬ kʼoeˇ taˆ diˬ lahˇ-awˇ, aˬ gaꞈ yaˇ kmˇ-ahˇ aˬ gaꞈ aˇ puˇ pyehˆ-awˇ, Miˬyehˇ nui ma pehˇ-eu aˬ gaꞈ dzaˇ uiˇ nawˬ duˬ-ahˇ biˬ ahˇ-euˬ meh. 20Aˬ gaꞈ aˇ siˬ kʼoeˇ deuˬ-aˬ, meuˬ-euˬ laꞈ nyiˇ paw jaˆ-eu aˬ gaꞈ dzaˇ uiˇ nawˬ duˬ-ahˇ bi nawˬ pyehˆ-awˇ, aˬ gaꞈ dzaˇ uiˇ nawˬ duˬ-ahˇ shiˬ yoeˇ doˆ le-euˬ meh. Shiˬ lawˇ gawˆ kʼoeˇ gawˆ-aˬ, mahˬ-euˬ naˇ mehˇ-ahˇ keuˆ ni naꞈ-awˇ, tiˬ yaˇ yehꞈ tseˇ laˇ kaˬ gaˇ keuˆ ni yoeˇ keuˆ-eu meh.

Currently Selected:

Pah meuˬ-eu 14: AHK

Highlight

Copy