Maˬkuˆ 16

Yeˬsuˇ gʼoꞈ dehꞈ laˇ-euˬ

(Maꞈtehˬ 28.1-8; Luˇkaꞈ 24.1-12; Yoˇhaˬ 20.1-10)

1Jawˇ nah#16.1 Heu-aˬ, Yuˇdaˆ tsawˇ haˬ-euˬ Jawˇ nah-ahˇ ehˇ-eu meh. Maˬkuˆ 12.1-ahˇ haw-awˬ. Iˬ nah aˬ dui-euˬ koꞈ nah-ahˇ tsaˬ-eu meh. dzeuˇ ngeh, Maˬliˇ Maˬgaˬdaˬlaˇ, Yaˬkoˆ-euˬ aˬ ma Maˬliˇ hawˇ-eu, Saˬloˬmeˬ aˬ ha smˇ gʼaˬ, Yeˬsuˇ-euˬ gʼawˇ mawˇ-ahˇ shehˆ daˆ nehˬ-iˇ-eu gʼaˇ duˬ, tsiˇ yaw saw gʼawˬ mya jeˬ zeuˇ-euˬ meh. 2Tiˬ jaw laꞈ kʼoeˇ aˇ dahˬ beh ngeh nah#16.2 ‘Tiˬ jaw laꞈ kʼoeˇ aˇ dahˬ beh-eu nah’-aˬ, Ka li zaˬ deuˬ-euˬ Jawˇ nah-ahˇ tsaˬ-eu meh. ngeh nah uˬ shawˬ yaw naꞈ-ehˇ, nahˇ ma maˬ doˆ laˇ mi naˆ-ehˇ lmˬ bymˇ-ahˇ aˬ yawꞈ maꞈ iˇ luꞈ-eu meh. 3“Lmˬ bymˇ-euˬ mehˬ kʼehˬ-ahˇ tsoeˬ-eu kʼaˬ lo kʼoeˇ siˬ aˬ dui maꞈ-ahˇ aˬ suˇ gʼaˬ ngawˬ dzeh nehˬ laꞈ nmˇ” lehˇ ja ja-ehˇ iˇ-euˬ meh. 4Ehˇ kʼawꞈ, aˬ yawꞈ maꞈ haw gʼeh leꞈ ngeh, huiˬ dui dui-eu kʼaˬ lo kʼoeˇ siˬ ngawˬ dzeh taˬ-euˬ gaˇ ya mawˇ-euˬ meh. 5Kʼoeˇ naˇ, aˬ yawꞈ maꞈ lmˬ bymˇ laꞈ kʼoeˇ uˇ leˇ ngeh, mehˬ tsoeˬ pyuˇ deuˬ ni dm taˬ-euˬ kʼaˬ dzeˇ zaˬ zaˬ guˬ tiˬ gʼaˬ aˇ maˇ paw pyawˬ-ahˇ nuiˇ luꞈ gaˇ ya mawˇ-awˇ, tsawˬ guˆ-iˇ-euˬ meh.

6Zaˬ guˬ kʼoeˇ gʼaˬ aˬ yawꞈ maꞈ-ahˇ ehˇ-eu, “Taˬ guˆ. Laꞈ yaꞈ kʼoeˇ taˆ bi taꞈ sehꞈ-euˬ Naˬzaˬlehˇ tsawˇ haˬ Yeˬsuˇ-ahˇ naw maꞈ haw le-euˬ meh lehˇ ngaˇ siˬ nya ma. Aˬ yawꞈ heu gaˇ maˬ paˇ jawˇ meh. Miˬyehˇ neh aˬ yawꞈ-ahˇ bi gʼoꞈ dehꞈ laˇ gʼaˬ-euˬ meh. Haw sheˇ. Aˬ yawꞈ-ahˇ heu gaˇ baꞈ taˬ-awˇ bi jaˆ-euˬ meh tawˇ. 7Aˬ yawꞈ-euˬ zaˬ lahˇ deuˬ hawˇ-eu Beˬtuˆluˆ jawˇ gaˇ iˇ-awˇ, ‘Aˬ yawꞈ naw maꞈ-euˬ mehˬ hu Gaˬliˬlehˇ miˇ kʼahˬ-ahˇ iˇ dzeuˇ-euˬ meh. Aˬ yawꞈ naw maꞈ-ahˇ ehˇ taˬ-euˬ loꞈ-ehˇ, aˬ yawꞈ-ahˇ kʼoeˇ gaˇ ya mawˇ tehꞈ-a’ lehˇ ehˇ nehˬ-iˇ-awˬ.”

8Kʼoeˇ ngeh, aˬ yawꞈ maꞈ lmˬ bymˇ laꞈ nyiˇ doˆ-iˇ-awˇ, cehˆ coeˬ coeˬ kʼoꞈ gʼeh-euˬ meh. Aˬ yawꞈ maꞈ zahˬ dui dui leˇ-awˇ yaw dzuˬ dzuˬ-eu meh. Aˬ yawꞈ maꞈ guˆ-eu miˇ neh, tiˬ gʼaˬ-ahˇ-iˬ tiˬ jeˬ-iˬ maˬ ehˇ ni, ciˬ cuˇ ni jawˇ-euˬ meh.

Aˇ HU BA-EUˬ JAˇLIꞈ DEUˬ LAꞈ KʼOEˇ Aˇ SAˬ SAˬ-EUˬ DEUˆ

Maˬliˇ Maˬgaˬdaˬlaˇ-ahˇ Yeˬsuˇ gʼawˇ mawˇ bi mawˇ le-euˬ

(Maꞈtehˬ 28.9-10; Yoˇhaˬ 20.11-18)

9(Tiˬ jaw laꞈ kʼoeˇ aˇ dahˬ beh-eu nah uˬ shawˬ yaw naꞈ-ehˇ, Yeˬsuˇ shiˇ-euˬ paˇ gʼoꞈ dehꞈ laˇ ngeh, aˬ yawꞈ neh nehꞈ shiꞈ mawˇ teh doˆ nehˬ-euˬ gʼaˬ pyeuꞈ-eu Maˬliˇ Maˬgaˬdaˬlaˇ jawˇ gaˇ jeˬ huˬ doˆ le-euˬ meh. 10Yeˬsuˇ nehˬ-ehˇ jawˇ-euˬ tsawˇ haˬ deuˬ tsawˇ ngoeˇ ngoeˇ ngoeˇ-ehˇ jawˇ gaˇ, gaˇ kawˆ kʼoeˇ Maˬliˇ ehˇ gaˬ nehˬ-iˇ-euˬ meh. 11Yeˬsuˇ yaw dehꞈ-ehˇ jawˇ gaˇ aˬ yawꞈ ya mawˇ-euˬ gaˇ kawˆ, aˬ yawꞈ maˬ-ahˇ dzawˇ nehˬ ngeh, aˬ yawꞈ maˬ maˬ jah-a.

Zaˬ lahˇ nyiˬ gʼaˬ-ahˇ Yeˬsuˇ gʼawˇ mawˇ bi mawˇ le-euˬ

(Luˇkaꞈ 24.13-35)

12Aˬ yawꞈ maꞈ laꞈ kʼoeˇ nyiˬ gʼaˬ, meuˬ-ahˇ neh pu paw iˇ luꞈ ngeh, Yeˬsuˇ aˬ yawꞈ-euˬ gʼawˇ mawˇ bi beu gaˇ laˇ-euˬ laꞈ kʼoeˇ, aˬ yawꞈ nyaꞈ jawˇ gaˇ doˆ le-euˬ meh. 13Aˬ yawꞈ nyaꞈ gʼoꞈ leˇ-awˇ, nui deuˬ-ahˇ dzawˇ mehˬ-euˬ meh. Ehˇ kʼawꞈ, aˬ yawꞈ maꞈ maˬ jah-a.

Zaˬ lahˇ tseˇ tiꞈ gʼaˬ-ahˇ Yeˬsuˇ gʼawˇ mawˇ bi mawˇ le-euˬ

(Maꞈtehˬ 28.16-20; Luˇkaꞈ 24.36-49; Yoˇhaˬ 20.19-23; Gʼaˬkʼehˇ 1.6-8)

14Aˇ saˬ saˬ-eu poˆ, zaˬ lahˇ tseˇ tiꞈ gʼaˬ hawˬ dzaˬ dzaˬ luꞈ gaˇ Yeˬsuˇ gʼawˇ mawˇ bi mawˇ le-euˬ meh. Aˬ yawꞈ maꞈ maˬ jah ni nui ma gʼahˇ gaˇ aˬ yawꞈ dehˬ-euˬ meh. Aˬ jeˬ miˇ neh ehˇ naˇ, aˬ yawꞈ gʼoꞈ dehꞈ laˇ-awˇ jawˇ gaˇ ya mawˇ-euˬ deuˬ neh dzawˇ nehˬ-euˬ dawˬ-ahˇ aˬ yawꞈ maꞈ maˬ jah-a. 15Aˬ yawꞈ maꞈ-ahˇ aˬ yawꞈ ehˇ nehˬ-eu, “Miˇ tsaˬ tahˬ kʼawˇ heu doe ni iˇ-awˇ, tsawˇ jeuˬ dawˬ tawˆ luꞈ-ahˇ Laˬ kʼaˬ cehˇ-eu Guiˬ lahˬ dawˬ mehˬ-iˇ-awˬ. 16Jah-awˇ iˇ cuꞈ kʼaˇ shawˇ-eu tsawˇ haˬ deuˬ ka kʼoꞈ-eu jeˬ za tehꞈ-a. Maˬ jah-eu tsawˇ haˬ deuˬ-aˬ, yaˇ kʼaˬ daˇ nehˬ gaˇ ya daˬ tehꞈ-a. 17Jah-eu tsawˇ haˬ deuˬ-aˬ, zahˬ leˇ paˬ-ehˇ gʼeh-eu jeˬ mˇ nya-eu baoˬ za tehꞈ-a. Ngaˬ-euˬ tsawˇ myahˇ uˬ moˆ awˬ yawꞈ maꞈ nehꞈ teh doˆ tehꞈ-a. Maˬ gaˬ haw-euˬ dawˬ gʼawˬ mya jeˬ aˬ yawꞈ maꞈ ngehˬ nya tehꞈ-a. 18Aˬ yawꞈ maꞈ aˇ lawˇ-ahˇ nyehꞈ-eu maˬ kaˬ, dzaˇ doꞈ dzaˬ-eu maˬ kaˬ, tiˬ jeˬ-iˬ maˬ gʼeh-aˇ. Aˬ yawꞈ maꞈ naˇ-eu tsawˇ haˬ deuˬ kʼoeˇ taˆ aˬ laꞈ baꞈ daˆ nehˬ ngeh, naˇ-eu taˬ leˇ tehꞈ-a.”

Yeˬsuˇ-ahˇ mˬ kʼoeˇ taˆ ciˬ kʼoꞈ daˆ leꞈ-euˬ

(Luˇkaꞈ 24.50-53; Gʼaˬkʼehˇ 1.9-11)

19Sahˬpaˬ Yeˬsuˇ aˬ yawꞈ maꞈ-ahˇ dawˬ ngehˬ cawˬ gʼaˬ ngeh, aˬ yawꞈ-ahˇ mˬ kʼoeˇ taˆ sheuˬ kʼoꞈ daˆ leꞈ-awˇ, Miˬyehˇ-euˬ aˇ maˇ paw nuiˇ-euˬ meh. 20Zaˬ lahˇ deuˬ yawˬ paw na luꞈ iˇ-awˇ, dawˬ mehˬ mehˬ-iˇ-euˬ meh. Sahˬpaˬ Yeˬsuˇ aˬ yawꞈ maꞈ nehˬ-ehˇ gaˇ mˇ-awˇ, aˬ yawꞈ maꞈ dawˬ mehˬ mehˬ-euˬ aˬ diˇ aˬ maˇ tsaˬ-eu gaˇ kawˆ, zahˬ leˇ paˬ-ehˇ gʼeh-eu jeˬ mˇ mehˬ-awˇ bi siˬ bi mawˇ duˬ-euˬ meh.) #16.20 Jaˇliꞈ tiˬ paˆ na deuˬ laꞈ kʼoeˇ, 16.9-20 heu deuˆ maˬ ahˇ-a.

Aˇ HU BA-EUˬ JAˇLIꞈ LAꞈ KʼOEˇ Aˇ SAˬ SAˬ TAˬ-EUˬ TIˬ JEˬ

9(Zaˬ miˬ zaˬ kʼoeˇ smˇ gʼaˬ Beˬtuˆluˆ hawˇ-eu aˬ yawꞈ-euˬ cawˬ deuˬ jawˇ gaˇ iˇ-awˇ, aˬ yawꞈ maꞈ-ahˇ kʼaˇ ehˇ nehˬ-euˬ jeˬ dawˬ tawˆ luꞈ, yaw nymˇ nymˇ-ehˇ dzawˇ poˆ nehˬ-euˬ meh. 10Kʼoeˇ naˇ, mˬ maˬ maˬ byaˆ zaˇ ziˇ ka kʼoꞈ-eu jeˬ-ahˇ taꞈ-eu dehꞈ luꞈ-eu muiˬ-eu shawˇ-eu dawˬ kawˬ kʼoeˇ, nahˇ ma doˆ kʼehˬ ga kʼehˬ doe ni bi gaˬ keuˆ-iˇ-eu gʼaˇ duˬ, zaˬ lahˇ deuˬ-ahˇ Yeˬsuˇ kʼehˇ gʼeh-euˬ meh. .)#16.10 Jaˇliꞈ tiˬ paˆ na deuˬ laꞈ kʼoeˇ 16.9-20 heu deuˆ uˬ taꞈ, 16.9-10 heu deuˆ kʼawꞈ paˇ ahˇ-eu meh.

Currently Selected:

Maˬkuˆ 16: AHK

Highlight

Copy