Luˇkaꞈ 1

1Nga maꞈ jawˇ gaˇ pyeuꞈ dzeuˇ yaꞈ-euˬ gaˇ kawˆ deuˬ-ahˇ, tsawˇ haˬ gʼawˬ mya gʼaˬ kʼaˇ gʼeh nya-eu loꞈ-ehˇ sahˬ boꞈ boꞈ doˆ taˬ gʼaˬ-euˬ meh. 2Gaˇ kawˆ kʼoeˇ deuˬ-ahˇ aˇ dahˬ beh ngeh neh ya mawˇ-euˬ deuˬ hawˇ-eu, guiˬ lahˬ dawˬ mehˬ-eu deuˬ neh kʼaˇ dzawˇ mehˬ-euˬ loꞈ-ehˇ aˬ yawꞈ maꞈ boꞈ-euˬ meh. 3Kʼoeˇ miˇ neh, Huiˬ-eu mahˇ-eu Tawˇpiˇlu-oˇ, ngaˇ kʼawꞈ aˇ dahˬ beh ngeh neh gaˇ kawˆ heu deuˬ-ahˇ yaw muiˬ paˬ-ehˇ pyehˆ tseˇ duˬ taˬ-euˬ miˇ neh, kʼaˇ pyeuꞈ dzeuˇ yaꞈ-euˬ jeˬ mehˬ huˬ mehˬ nahˬ tsaˬ ni nawˬ-euˬ gʼaˇ duˬ boꞈ doˆ nehˬ naˇ muiˬ-eu duˇ lehˇ noeˬ-eu ma. 4Nawˬ-ahˇ kʼaˇ mehˬ nehˬ-euˬ yawˬ jeˬ na luꞈ aˬ diˇ ngeuˇ meh lehˇ nawˇ siˬ duˬ jiˇ nya ni, ngaˇ heu loꞈ-ehˇ boꞈ-euˬ ma.

Iˇ cuꞈ shawˇ-eu Yoˇhaˬ dehꞈ le meh lehˇ tsaꞈ gaˬ le-euˬ

5Yuˇdaˆ miˇ kʼahˬ-ahˇ sahˬ paˬ Heˬloˆ uˆ lahˇ ngeh, Aˬbiˇyaˬ aˇ jeuˬ laꞈ kʼoeˇ, Zaˬkaˬliˇ lehˇ myahˇ-euˬ piˇ ma tiˬ gʼaˬ jawˇ-eu meh. Aˬ yawꞈ-euˬ miˬ zaˬ-aˬ, Aˬloˬ-euˬ aˇ jeuˬ pyeuꞈ-awˇ, Eˇliˇsaˬbehˆ lehˇ myahˇ-euˬ meh. 6Nyiˬ dzeˇ zaˬ luꞈ Miˬyehˇ mehˬ shi dawˇ coe ni dehꞈ-awˇ, SahˬpaˬMiˬyehˇ-euˬ zahˇ dawˬ kʼoꞈ dawˬ hawˇ-eu zahˇ sahˇ kʼoꞈ dawˬ tawˆ luꞈ-ahˇ caw teh-eu meh. 7Eˇliˇsaˬbehˆ maˬ baw aˬ ma pyeuꞈ-eu miˇ neh, aˬ nyaꞈ dzeˇ zaˬ zaˬ maˬ jawˇ-ehˇ, nyiˬ gʼaˬ luꞈ mawˬ dui dui le-euˬ meh.

8Tiˬ nah-aˬ, piˇ ma-euˬ gaˇ mˇ-eu gʼaˇ duˬ, Zaˬkaˬliˇ-euˬ aˇ muˇ-ahˇ doˇ laˇ-euˬ miˇ neh, Uˬ duˬ tahˬ nymˇ nymˇ ma laꞈ kʼoeˇ gaˇ mˇ luꞈ-eu meh. 9Piˇ ma deuˬ-euˬ zahˇ sahˇ kʼoꞈ kʼaˇ jaˆ-eu loꞈ-ehˇ shehˆ tsaˬ tsaˬ-awˇ tseˇ ngeh, lawˇ duˬ-ahˇ yaw saw jeˬ doꞈ damˬ-eu gʼaˇ duˬ aˬ yawꞈ-ahˇ doˇ leˇ-euˬ meh. Kʼoeˇ miˇ neh, SahˬpaˬMiˬyehˇ-euˬ Uˬ duˬ tahˬ nymˇ nymˇ ma laꞈ kʼoeˇ aˬ yawꞈ uˇ leˇ-euˬ meh. 10Kʼoeˇ loꞈ-ehˇ yaw saw jeˬ doꞈ damˬ luꞈ ngeh, laꞈ nyiˇ paw jawˇ yaꞈ-euˬ tsawˇ haˬ aˇ maꞈ deuˬ guiˬ lahˬ ya shaˇ-eu meh.

11Kʼoeˇ ngeh, Sahˬpaˬ Miˬyehˇ-euˬ mˬ taˆ gʼaˬ kʼehˇ tiˬ gʼaˬ aˬ yawꞈ mehˬ shi doˆ le-awˇ, yaw saw jeˬ doꞈ damˬ-eu lawˇ duˬ-euˬ aˇ maˇ paw yawꞈ luꞈ-eu meh. 12Mˬ taˆ gʼaˬ kʼehˇ kʼoeˇ gʼaˬ-ahˇ Zaˬkaˬliˇ ya mawˇ ngeh, tsawˬ guˆ-iˇ-euˬ meh. 13Ehˇ kʼawꞈ, mˬ taˆ gʼaˬ kʼehˇ kʼoeˇ gʼaˬ ehˇ-eu, “Zaˬkaˬliˇ-oˇ, taˬ guˆ. Nawˬ-euˬ guiˬ lahˬ shaˇ dawˬ-ahˇ Miˬyehˇ naˇ haˬ nehˬ laꞈ-euˬ meh. Nawˬ-euˬ nymˇ dahˬ Eˇliˇsaˬbehˆ aˬ li tiˬ li ciˬ tehꞈ-a. Aˬ li kʼoeˇ li-ahˇ Yoˇ haˬ lehˇ nawˇ ya myahˇ nehˬ meh.

14Aˬ yawꞈ dehꞈ le-euˬ gaˇ,

nawˇ hawˇ-eu tsawˇ haˬ gʼawˬ mya ni laˬ kʼaˬ cehˇ tehꞈ-a.

15Aˬ jeˬ miˇ neh ehˇ naˇ, Sahˬpaˬ Miˬyehˇ mehˬ shi, aˬ yawꞈ yaw huiˬ yaw mahˇ pyeuꞈ laˇ tehꞈpa.

Aˬ gaꞈ dzaˇ uiˇ hawˇ-eu yehꞈ laˇ-eu dzaˇ uiˇ deuˬ-ahˇ aˬ yawꞈ maˬ ya dawˇ-a.

Aˬ ma-euˬ uˬ maˆ laꞈ kʼoeˇ neh maˬ dehꞈ doˆ le mi naˆ-ehˇ,

Muiˬ-eu shawˇ-eu Yaw sahˇ Miˬyehˇ aˬ yawꞈ laꞈ kʼoeˇ tiˬ byah ni ahˇ tehꞈ-a.

16Iˇsaˬleˬlaˆ tsawˇ haˬ gʼawˬ mya ni-ahˇ, aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ jawˇ paw aˬ yawꞈ sheuˬ pyawˇ kʼoꞈ laꞈ tehꞈ-a.

17Aˬ da hawˇ-eu zaˬ deuˬ tsaˬ leˇ tsahˇ leˇ nya ni maˬ ehˇ,

naˬ lehˬ lehˬ-eu tsawˇ haˬ deuˬ yaw tsaˬ yaw dawˇ tsawˇ haˬ-euˬ nui noeˬ mehˬ nah caw teh laˇ ni maˬ ehˇ,

Sahˬpaˬ Miˬyehˇ-euˬ tsawˇ jeuˬ-ahˇ Sahˬpaˬ Miˬyehˇ gʼaˇ duˬ bi lehˬ hmˬ dah taˬ-eu gʼaˇ duˬ maˬ ehˇ,

Eˇliˇyaˆ-euˬ nui ma hawˇ-eu baoˬ aˬ yawꞈ pi-awˇ, Sahˬpaˬ-euˬ mehˬ hu aˬ yawꞈ iˇ tehꞈ-a.”

18Mˬ taˆ gʼaˬ kʼehˇ kʼoeˇ gʼaˬ-ahˇ Zaˬkaˬliˇ ehˇ nehˬ-eu, “Kʼoeˇ loꞈ-ehˇ pyeuꞈ laˇ-euˬ ngaˇ lehˇ, ngaˇ aˬ joˆ-ehˇ siˬ nya nmˇ. Nga nyaꞈ dzeˇ zaˬ nyiˬ gʼaˬ luꞈ mawˬ dui dui laˇ-euˬ ma.”

19Mˬ taˆ gʼaˬ kʼehˇ kʼoeˇ gʼaˬ ehˇ-eu, “Ngaˇ-aˬ, Miˬyehˇ-euˬ mehˬ shi yawꞈ-awˇ myawˬ kʼehˇ gʼoˆ luꞈ-eu Gaˬbeˬlaˇ ma. Aˬ yawꞈ ngaˬ-ahˇ kʼehˇ gʼeh leꞈ-awˇ, laˬ kʼaˬ cehˇ dui dui laˇ paˬ-ehˇ gʼeh-eu gaˇ kawˆ heu nawˬ-ahˇ bi tsaꞈ gaˬ le-euˬ meh. 20Aˇ yamˬ tsaˬ laˇ ngeh maˇ maˇ ni pyeuꞈ laˇ-eu gaˇ kawˆ heu-ahˇ ngaˇ tsaꞈ gaˬ le-eu kʼawꞈ, nawˇ maˬ jah-eu miˇ neh, ngaˬ neh ehˇ-euˬ loꞈ-ehˇ maˬ pyeuꞈ laˇ kʼoeˇ keuˆ ni, nawˇ dawˬ maˬ ngehˬ nya ni ciˬ cuˇ ya jawˇ tehꞈ-a.”

21Kʼoeˇ ngeh, laꞈ nyiˇ paw Zaˬkaˬliˇ-ahˇ dawˬ luꞈ-eu tsawˇ haˬ deuˬ, Uˬ duˬ tahˬ nymˇ nymˇ ma laꞈ kʼoeˇ aˬ yawꞈ kʼoeˇ myah myah-ehˇ ga-iˇ-euˬ gaˇ zahˬ leˇ-euˬ meh. 22Aˬ yawꞈ gʼoꞈ doˆ le ngeh, aˬ yawꞈ maꞈ-ahˇ dawˬ maˬ ngehˬ cawˬ nya-ehˇ pyeuꞈ-iˇ-euˬ miˇ neh, Uˬ duˬ tahˬ nymˇ nymˇ ma laꞈ kʼoeˇ, yaw sahˇ laꞈ kʼoeˇ pah mehˬ le-euˬ tiˬ jeˬ paˬ-ahˇ aˬ yawꞈ ya mawˇ-euˬ ngaˇ lehˇ aˬ yawꞈ maꞈ siˬ nya-euˬ meh. Aˬ yawꞈ dawˬ maˬ ngehˬ nya-eu miˇ neh, aˬ yawꞈ maꞈ-ahˇ laꞈ dzawˇ dzawˇ nehˬ-euˬ meh. 23Uˬ duˬ tahˬ nymˇ nymˇ ma laꞈ kʼoeˇ aˬ yawꞈ gaˇ ya mˇ-eu aˇ yamˬ dzeuˇ ngeh, iˇ kahˇ-ahˇ gʼoꞈ-iˇ-euˬ meh.

24Aˇ yamˬ ui cuiˆ myahˇ laˇ ngeh, aˬ yawꞈ-euˬ nymˇ dahˬ Eˇliˇsaˬbehˆ aˬ nyiˇ pi leˇ-awˇ, ba la ngaˬ siˬ byah ni laꞈ nyiˇ maˬ doˆ-iˇ ni jawˇ-euˬ meh. 25Aˬ yawꞈ ehˇ-eu, “Nymˬ-mˇ poˆ jawˇ-aˬ, tsawˇ haˬ mehˬ shi ngaˇ daˬ maˬ paˇ ya ga ni, Sahˬpaˬ Miˬyehˇ ngaˬ-ahˇ caw ba nehˬ laꞈ-euˬ meh.”

Yeˬsuˇ dehꞈ le meh lehˇ tsaꞈ gaˬ le-euˬ

26Eˇliˇsaˬbehˆ aˬ nyiˇ pi leˇ-euˬ ba la koꞈ siˬ byah laˇ ngeh, mˬ taˆ gʼaˬ kʼehˇ Gaˬbeˬlaˇ-ahˇ Miˬyehˇ kʼehˇ gʼeh-awˇ, Gaˬliˬlehˇ miˇ kʼahˬ Naˬzaˬlehˇ meuˬ-ahˇ bi iˇ-euˬ meh. 27Sahˬ paˬ Daˬbiˇ-euˬ tsuiꞈ-ahˇ taꞈ-eu Yoˇsehˆ lehˇ myahˇ-euˬ gʼaˬ-ahˇ dahˬ dzaˬ-iˇ-eu lehˇ saˇ jaˇ dzaˬ taˬ-euˬ miˬ shuiꞈ/f 1.7 *ʼMiˬ shuiꞈʼ lehˇ ehˇ-eu-aˬ, kʼaˬ miˬ tiˬ jawˇ-iˬ maˬ sheu haw-euˬ shawˇ jehˆ ni gʼeh-eu miˬ daꞈ-ahˇ ehˇ mawꞈ-eu meh.* tiˬ gʼaˬ-ahˇ, aˬ yawꞈ dawˬ tsaꞈ tsaꞈ le-euˬ meh. Miˬ shuiꞈ kʼoeˇ gʼaˬ-euˬ tsawˇ myahˇ-aˬ, Maˬliˇ meh. 28Mˬ taˆ gʼaˬ kʼehˇ kʼoeˇ gʼaˬ aˬ yawꞈ jawˇ gaˇ oe-awˇ ehˇ-eu, “Nui saˇ oꞈ luꞈ-uˇ. Sahˬpaˬ Miˬyehˇ nawˬ nehˬ-ehˇ jawˇ-awˇ, huiˬ dui dui-eu guiˬ lahˬ biꞈ luꞈ meh.”

29Maˬliˇ-aˬ, mˬ taˆ gʼaˬ kʼehˇ kʼoeˇ gʼaˬ neh ehˇ nehˬ le-euˬ dawˬ kʼoeˇ dawˬ baˬ da neh nui ma suˬ saˬ dui dui-awˇ, aˬ jeˬ-ahˇ ehˇ mawꞈ-eu nga lehˇ shaˇ noeˬ luꞈ-eu meh. 30Mˬ taˆ gʼaˬ kʼehˇ kʼoeˇ gʼaˬ aˬ yawꞈ-ahˇ ehˇ-eu, “Maˬliˇ-oˇ, taˬ guˆ. Miˬyehˇ nawˬ-ahˇ gʼawˬ shaˬ gaˬ luꞈ meh. 31Nawˇ aˬ nyiˇ pi-awˇ, aˬ li tiˬ li ya ciˬ meh. Aˬ yawꞈ-ahˇ nawˇ Yeˬsuˇ lehˇ ya myahˇ nehˬ meh.

32Aˬ yawꞈ huiˬ dui mahˇ dui dui-awˇ, huiˬ-eu mahˇ-eu Miˬyehˇ-euˬ Zaˬmaˇ lehˇ aˬ cawˬ kuˇ tehꞈ-a.

SahˬpaˬMiˬyehˇ pyeuꞈ-eu Miˬyehˇ, aˬ yawꞈ-euˬ aˬ poeˬ Daˬbiˇ-euˬ dzoeˬ dzaˬ nuiˇ mahˬ aˬ yawꞈ-ahˇ biꞈ tehꞈ-a.

33Yaˬkoˆ-euˬ zaˬ deuˬ uˆ deuˬ kʼoeˇ taˆ aˬ yawꞈ sahˬ paˬ geuꞈ-awˇ,

Aˬ yawꞈ uˆ lahˇ-eu miˇ kʼahˬ kʼoeˇ, mˬ maˬ maˬ byaˆ zaˇ ziˇ aˇ saˬ saˬ-eu maˬ baw-a.”

34Mˬ taˆ gʼaˬ kʼehˇ kʼoeˇ gʼaˬ-ahˇ Maˬliˇ ehˇ nehˬ-eu, “Ngaˇ-aˬ, miˬ shuiꞈ tiˬ gʼaˬ ma. Teu loꞈ-ehˇ aˬ joˆ-ehˇ pyeuꞈ laˇ nya nmˇ.”

35Mˬ taˆ gʼaˬ kʼehˇ ehˇ-eu,

“Muiˬ-eu shawˇ-eu Yaw sahˇ Miˬyehˇ nawˬ-euˬ kʼoeˇ taˆ zaꞈ le-awˇ,

Huiˬ dui Mahˇ dui dui-eu Miˬyehˇ-euˬ baoˬ nawˬ-ahˇ joe shmˇ le tehꞈ-a.

Kʼoeˇ miˇ neh, dehꞈ le-euˬ muiˬ-eu shawˇ-eu aˬ li kʼoeˇ gʼaˬ-ahˇ,

Miˬyehˇ-euˬ Zaˬmaˇ lehˇ kuˇ tehꞈ-a.

36Maˬ baw aˬ ma lehˇ sawˇ taˬ-euˬ nawˬ-euˬ nawˬ-euˬ aˇ jeuˬ aˇ ca Eˇliˇsaˬbehˆ-ahˇ haw sheˇ. Teu naˆ ni mawˬ laˇ-euˬ kʼawꞈ, aˬ nyiˇ pi luꞈ-eu ba la koꞈ siˬ byah laˇ-euˬ meh. 37Miˬyehˇ maˬ jahˇ nya-eu tiˬ jeˬ-iˬ maˬ jaˆ-a.”

38Maˬliˇ ehˇ-eu, “Ngaˇ-aˬ, SahˬpaˬMiˬyehˇ-euˬ zaˬ kʼaˆ ma. Nawˬ neh ehˇ-euˬ jeˬ ngaˬ-euˬ kʼoeˇ taˆ pyeuꞈ le luꞈ-uˇ.” Kʼoeˇ naˇ, mˬ taˆ gʼaˬ kʼehˇ kʼoeˇ gʼaˬ doˆ-iˇ-euˬ meh.

Eˇliˇsaˬbehˆ jawˇ gaˇ Maˬliˇ dawˬ deh gʼa leˇ-euˬ

39Kʼoeˇ naˇ, Maˬliˇ lehˬ hmˬ-awˇ, Yuˇdaˆ miˇ kʼahˬ daˇ taˆ paw jaˆ-eu meuˬ tiˬ meuˬ-ahˇ yaw kawˇ-ehˇ le-euˬ meh. 40Zaˬkaˬliˇ-euˬ nymˇ-ahˇ aˬ yawꞈ uˇ leˇ-awˇ, Eˇliˇsaˬbehˆ-ahˇ dawˬ cawˬ puˬ nehˬ-euˬ meh. 41Maˬliˇ dawˬ cawˬ puˬ nehˬ gaˇ Eˇliˇsaˬbehˆ ya gaˬ ngeh, aˬ yawꞈ-euˬ uˬ maˆ laꞈ kʼoeˇ pi luꞈ-eu zaˬ kʼoeˇ gʼaˬ luˆ laˇ-awˇ, Eˇliˇsaˬbehˆ -ahˇ Muiˬ-eu Shawˇ-eu Yaw sahˇ Miˬyehˇ uˇ le-euˬ meh. 42Aˬ yawꞈ yaw kʼaˆ-ehˇ guˇ-awˇ ehˇ-eu, “Nawˇ-aˬ, zaˬ miˬ zaˬ dawˬ tawˆ luꞈ laꞈ kʼoeˇ aˬ cawˬ naˆ maˬ tseˇ guiˬ lahˬ huiˬ-eu gʼaˬ meh. Nawˬ-euˬ uˬ maˆ laꞈ kʼoeˇ pi luꞈ-eu zaˬ kʼawꞈ, guiˬ lahˬ huiˬ dui dui meh. 43Ngaˬ-euˬ Sahˬpaˬ-euˬ aˬ ma ngaˇ jawˇ gaˇ dawˬ deh gʼa laˇ-euˬ heu, ngaˇ aˇ naˆ ni guiˬ lahˬ huiˬ-eu nga. 44Nawˇ dawˬ cawˬ puˬ-eu teˇ saˇ ngaˬ-euˬ naˬ bawˇ-ahˇ gaˬ keuˆ laˇ-euˬ nehˬ-ehˇ, uˬ maˆ laꞈ kʼoeˇ pi luꞈ-eu ngaˬ-euˬ zaˬ laˬ kʼaˬ cehˇ-eu tsawˬ tsawˬ-ehˇ teuˆ-eu miˇ-a. 45Sahˬpaˬ Miˬyehˇ neh kʼaˇ ehˇ nehˬ laꞈ-euˬ jeˬ aˬ diˇ aˬ maˇ pyeuꞈ laˇ tehꞈ-a lehˇ jah-eu zaˬ miˬ zaˬ-aˬ, guiˬ lahˬ huiˬ dui dui meh.”

Maˬliˇ-euˬ ja ceuˬ-eu caˇ dawˬ

46Maˬliˇ ehˇ-eu,

“Ngaˬ-euˬ nui ma saꞈ laˇ laꞈ kʼoeˇ,

SahˬpaˬMiˬyehˇ-ahˇ ja ceuˬ ma.

47Ngaˬ-ahˇ Ka kʼoꞈ-eu gʼaˬ pyeuꞈ-eu,

ngaˬ-euˬ Miˬyehˇ baˬ da baˇ neh,

ngaˬ-euˬ saꞈ laˇ laˬ kʼaˬ cehˇ nya.

48Aˬ jeˬ miˇ neh cehˇ te ehˇ naˇ,

teˬ-eu nyiˇ-eu tsawˇ haˬ pyeuꞈ-eu,

ngaˇ loꞈ-ehˇ gʼeh-eu tsawˇ haˬ-ahˇ,

aˬ yawꞈ noeˬ keuˆ nehˬ laꞈ-euˬ meh.

49Iˬ nah neh naˇ aˬ cawˬ ngaˬ-ahˇ,

laˬ kʼaˬ cehˇ-eu gʼaˬ lehˇ kuˇ meh.

Aˬ jeˬ miˇ neh kuˇ ta ehˇ naˇ,

Baoˬ huiˬ-eu Miˬyehˇ neh ngaˬ-ahˇ,

huiˬ-eu jeˬ mˇ nehˬ laꞈ-euˬ meh.

Aˬ yawꞈ tsawˇ myahˇ muiˬ meh shawˇ meh;

50Aˬ yawꞈ-ahˇ taˬ huiˬ-eu deuˬ-ahˇ,

aˬ yawꞈ-euˬ gʼawˬ shaˬ gaˬ-eu jeˬ,

mˬ maˬ maˬ byaˆ zaˇ ziˇ gmˬ meh.

51Baoˬ huiˬ-eu laꞈ du cawˬ doˆ-awˇ,

nui ma huiˬ-eu deuˬ-euˬ bawˬ toˆ,

dawˬ tawˆ luꞈ byaˆ dzeh nehˬ-eu meh.

52Dzoeˬ dzaˬ sahˬ paˬ yaw gʼeh deuˬ-ahˇ,

nuiˇ mahˬ-ahˇ neh gʼeu ka nehˬ-awˇ,

nui nahˬ nui yu ahˇ-eu deuˬ-ahˇ,

yaw goˇ-ahˇ ciˬ daˆ nehˬ-eu meh.

53Mehꞈ-eu shuꞈ-eu tsawˇ haˬ deuˬ-ahˇ,

dzaˇ kuiˇ dzaˇ myehˇ tiˬ dehˆ biꞈ-awˇ,

smˇ muiˬ smˇ baw aˬ da deuˬ-ahˇ,

yawꞈ ngehꞈ-ehˇ teh dzeh nehˬ-eu meh.

54Poeˬ piˬ deuˬ-ahˇ dzaˬ taˬ yaꞈ-euˬ,

saˇ jaˇ dawˬ-ahˇ aˬ yawꞈ ziꞈ-awˇ,

zaˬ kʼaˆ Iˇsaˬleˬlaˆ jawˇ gaˇ,

oe keuˆ-awˇ caw ba le-euˬ meh.

55Aˬbyaˬhaˬ-euˬ kʼoeˇ taˆ hawˇ-eu,

zaˬ deuˬ uˆ deuˬ dawˬ tawˆ kʼoeˇ taˆ,

aˬ yawꞈ gʼawˬ shaˬ gaˬ nehˬ-eu jeˬ,

mˬ maˬ maˬ byaˆ zaˇ ziˇ ziꞈ meh.”

56Maˬliˇ-aˬ, Eˇliˇsaˬbehˆ nehˬ-ehˇ ba la smˇ siˬ jawˇ-awˇ gʼoꞈ-iˇ-euˬ meh.

Iˇ cuꞈ shawˇ-eu Yoˇhaˬ dehꞈ le-euˬ

57Eˇliˇsaˬbehˆ zaˬ ciˬ deˇ le-awˇ, aˬ li tiˬ li ciˬ-euˬ meh. 58Aˬ yawꞈ-euˬ dawˬ peh jawˇ-eu tsawˇ haˬ deuˬ hawˇ-eu, aˬ yawꞈ-euˬ aˬ yuiꞈ aˬ nyiˇ deuˬ, SahˬpaˬMiˬyehˇ neh aˬ yawꞈ-ahˇ gʼawˬ shaˬ gaˬ dui dui neh-euˬ gaˇ kawˆ ya gaˬ ngeh, aˬ yawꞈ nehˬ-ehˇ laˬ kʼaˬ caw cehˇ-euˬ meh.

59Zaˬ nahˬ ciˬ-euˬ nah jawˇ byah laˇ ngeh, baˆ kʼoˆ mehˬ dzaˬ yehˬ nehˬ-eu lehˇ aˬ yawꞈ maˬ oe-awˇ, aˬ da-euˬ tsuiꞈ-ahˇ taꞈ leˇ ni, aˬ da-euˬ tsawˇ myahˇ biꞈ-awˇ, Zaˬkaˬliˇ lehˇ myahˇ nehˬ-eu lehˇ gʼeh-eu meh. 60Ehˇ kʼawꞈ, aˬ ma gʼaˬ ehˇ-eu, “Teu loꞈ-ehˇ maˬ ya myahˇ-a. Aˬ yawꞈ-ahˇ Yoˇhaˬ lehˇ ya myahˇ nehˬ meh.”

61Aˬ yawꞈ maꞈ aˬ yawꞈ-ahˇ ehˇ-eu, “Naw pehˬ-euˬ aˇ jeuˬ aˇ ca laꞈ kʼoeˇ Yoˇhaˬ lehˇ myahˇ-euˬ tiˬ gʼaˬ-iˬ maˬ jawˇ-a tawˇ.” 62Kʼoeˇ naˇ, aˬ da gʼaˬ-ahˇ aˬ yawꞈ maꞈ laꞈ dzawˇ dzawˇ nehˬ-awˇ, zaˬ kʼoeˇ gʼaˬ-ahˇ aˬ joˆ-ehˇ bi myahˇ nehˬ mawꞈ-eu gaˇ kawˆ naˇ haˬ-euˬ meh.

63Sahˬ boꞈ boˬ-eu teˇ byaꞈ tiˬ byaꞈ Zaˬkaˬliˇ shaˇ-awˇ, “Aˬyawꞈ-euˬ tsawˇ myahˇ Yoˇhaˬ meh” lehˇ boꞈ nehˬ-euˬ meh. Kʼoeˇ ngeh, aˬ yawꞈ maꞈ dawˬ tawˆ luꞈ zahˬ dui dui leˇ-euˬ meh. 64Tiˬ poˆ tehꞈ-ehˇ Zaˬkaˬliˇ-euˬ kʼaˬ meh pah laˇ-awˇ, mehˬ laˇ juˆ laˇ-euˬ miˇ neh, dawˬ ngehˬ doˆ nya laˇ-awˇ, Miˬyehˇ-ahˇ ja ceuˬ-euˬ meh. 65Tahꞈ gʼoꞈ tahˬ jawˇ jawˇ-eu tsawˇ haˬ deuˬ guˆ-iˇ-euˬ meh. Gaˇ kawˆ kʼoeˇ Yuˇdaˆ miˇ kʼahˬ dahˇ taˆ doe ni gaˬ byah jiˇ-euˬ meh. 66Kʼaˇ ya gaˬ-euˬ tsawˇ haˬ yawˬ gʼaˬ na luꞈ, nui ma laꞈ kʼoeˇ shaˇ noeˬ shaˇ noeˬ-ehˇ, “Zaˬ kʼoeˇ gʼaˬ aˬ joˆ-ehˇ gʼeh-eu tsawˇ haˬ pyeuꞈ laˇ-eu lehˇ gʼeh-eu maˬ siˬ miˇ-a” lehˇ ehˇ-eu meh. Aˬ jeˬ miˇ neh ehˇ naˇ, SahˬpaˬMiˬyehˇ-euˬ baoˬ aˬ yawꞈ kʼoeˇ taˆ jaˆ-eu yaw duˬ baw-eu meh.

Zaˬkaˬliˇ neh Miˬyehˇ gʼaˇ duˬ ngehˬ dah-euˬ

67Yoˇhaˬ-euˬ aˬ da Zaˬkaˬliˇ-ahˇ Muiˬ-eu Shawˇ-eu Yaw sahˇ Miˬyehˇ uˇ le-awˇ, Miˬyehˇ gʼaˇ duˬ heu loꞈ-ehˇ ngehˬ dah-eu meh.

68“Aˬ yawꞈ-euˬ tsawˇ haˬ deuˬ shaˬ gaˇ,

ka kʼoꞈ doˆ nehˬ le-euˬ miˇ neh,

Iˇsaˬleˬlaˆ Miˬyehˇ pyeuꞈ-eu,

SahˬpaˬMiˬyehˇ-ahˇ ja ceuˬ ma.

69Yawꞈ-euˬ zaˬ kʼaˆ Daˬbiˇ o neh,

baoˬ huiˬ-eu Ka kʼoꞈ-eu yaw sahˇ,

aˬ dui-ahˇ biꞈ nehˬ leꞈ-euˬ meh.

70-71Aˇ hu tsawˇ muiˬ tsawˇ shawˇ pyeuꞈ-eu,

Miˬyehˇ gʼaˇ duˬ ngehˬ dah nehˬ-eu,

ngehˬ zaˬ tmˇ zaˬ#1.70 Heu gaˇ ‘ngehˬ zaˬ tmˇ zaˬ’ lehˇ ehˇ-eu-aˬ, ‘Miˬyehˇ gʼaˇ duˬ ngehˬ dah-eu tsawˇ haˬ’ lehˇ kuˇ-eu ‘Bawˇlawˇpeh’ deuˬ-ahˇ ehˇ mawꞈ-eu meh. deuˬ-ahˇ gʼoe-awˇ,

aˬ dui-ahˇ bye-awˇ kʼehˬ laꞈ-euˬ,

muiˇ-eu deuˬ dawˬ tawˆ-euˬ laꞈ-ahˇ,

aˬ dui-ahˇ ka kʼoꞈ nehˬ ma lehˇ,

aˬ yawꞈ saˇ jaˇ dzaˬ taˬ-euˬ meh.

72Aˬ dui-euˬ poeˬ piˬ kʼoeˇ deuˬ-ahˇ,

aˬ yawꞈ gʼawˬ shaˬ gaˬ-eu laꞈ kʼoeˇ,

muiˬ-eu shawˇ-eu dawˬ ma saˇ jaˇ,

noeˬ keuˆ ma lehˇ yawꞈ ehˇ-eu meh.

73-75Aˬ dui yaw dehꞈ dehꞈ-eu tiˬ ziˇ,

aˬ yawꞈ mehˬ shi muiˬ-eu shawˇ-eu,

yaw tsaˬ yaw dawˇ tsawˇ haˬ pyeuꞈ-awˇ,

guˆ-eu gaˆ-eu jeˬ maˬ jaˆ ni,

yawꞈ-euˬ gaˇ ya mˇ-eu gʼaˇ duˬ,

muiˇ-eu deuˬ-euˬ aˬ laꞈ laꞈ kʼoeˇ,

aˬ dui-ahˇ ka kʼoꞈ nehˬ ma lehˇ,

Aˬ da yaw dzahˇ Aˬbyaˬhaˬ-ahˇ,

aˬ yawꞈ saˇ jaˇ dzaˬ taˬ-euˬ meh.

76Ngaˬ-euˬ aˬ li pyeuꞈ-eu nawˬ-ahˇ,

Huiˬ dui Mahˇ dui dui-eu gʼaˬ-euˬ

ngehˬ zaˬ tmˇ zaˬ#1.76 ‘Ngehˬ zaˬ tmˇ zaˬ’ lehˇ ehˇ-eu dawˬ tsuiꞈ, 1.70-ahˇ haw-awˬ. lehˇ kuˇ tehꞈ-a.

Sahˬpaˬ iˇ-eu gaˇ ma mehˬ hu,

nawˇ jeˬ huˬ ya iˇ huˬ taˬ-awˇ,

gaˇ ma shaˇ dahˇ nehˬ-eu laꞈ kʼoeˇ,

77iˬ baˇ pyehˬ nehˬ-eu jeˬ baˬ da,

ka kʼoꞈ-eu jeˬ za nya meh lehˇ,

Miˬyehˇ-euˬ tsawˇ haˬ kʼoeˇ deuˬ-ahˇ,

nawˇ ya dzawˇ mehˬ nehˬ-iˇ tehꞈ-a.

78Aˬ dui Miˬyehˇ nui nahˬ ahˇ-awˇ,

gʼawˬ shaˬ gaˬ nya dui dui-eu meh.

Ka kʼoꞈ-eu jeˬ aˬ dui kʼoeˇ taˆ,

uˬ bya bya shawˇ laˇ-eu loꞈ-ehˇ,

79shiˇ-eu naˇ shmˇ yaw zahˇ uˬ moˆ,

kʼaˇ dehꞈ kʼaˇ jawˇ-eu deuˬ kʼoeˇ taˆ,

mˬ taˆ neh bya ka leꞈ tehꞈ-a.

Nui saˇ oꞈ-eu gaˇ ma kʼoeˇ taˆ,

kuiˇ toꞈ paˇ ciˬ kʼoꞈ daˆ nya ni,

aˬ dui ahˇ sheuˬ gʼeh laꞈ tehꞈ-a.”

80Aˬ li kʼoeˇ li huiˬ laˇ-awˇ, nui ma gʼawˇ mawˇ nyiˬ jeˬ luꞈ huiˬ laˇ mahˇ laˇ luꞈ-eu meh. Iˇsaˬleˬlaˆ tsawˇ haˬ deuˬ mehˬ shi aˬ yawꞈ maˬ doˆ laˇ kʼoeˇ keuˆ ni, bawˇ tsahˬ bawˇ dahˇ-ahˇ jawˇ-euˬ meh.

Currently Selected:

Luˇkaꞈ 1: AHK

Highlight

Copy