Luˇkaꞈ 2

Yeˬsuˇ dehꞈ le-euˬ

(Maꞈtehˬ 1.18-25)

1Kʼoeˇ ngeh, Loˇmaˆ miˇ kʼahˬ laꞈ oˆ kʼaˇ jawˇ-eu miˇ kʼahˬ zaˬ dawˬ tawˆ luꞈ tsawˇ myahˇ ya dawˆ meh lehˇ, sahˬ paˬ Gehˇsaˬ Awˇguˇtuˆ dawˬ biꞈ-euˬ meh. 2Kʼoeˇ-aˬ, miˇ kʼahˬ zaˬ tsawˇ myahˇ dawˆ beh beh-euˬ poˆ pyeuꞈ-awˇ, Suˇliˆ miˇ kʼahˬ-ahˇ Guˇleˬniˇ uˆ lahˇ luꞈ ngeh yamˬ-ahˇ tsaˬ-eu meh. 3Tsawˇ haˬ yawˬ gʼaˬ na luꞈ yawˬ ha-euˬ meuˬ-ahˇ gʼoꞈ-iˇ-awˇ tsawˇ myahˇ ya dawˆ-iˇ-eu meh.

4Yoˇsehˆ-aˬ, sahˬ paˬ Daˬbiˇ-euˬ tsuiꞈ-ahˇ taꞈ-eu miˇ neh, Gaˬliˬlehˇ miˇ kʼahˬ Naˬzaˬlehˇ meuˬ-ahˇ neh Sahˬpaˬ Daˬbiˇ dehꞈ le-euˬ meuˬ pyeuꞈ-eu Yuˇdaˆ miˇ kʼahˬ Behˬlehˬhehˬ meuˬ-ahˇ iˇ-euˬ meh. 5Aˬ yawꞈ-ahˇ dahˬ dzaˬ laˇ-eu lehˇ saˇ jaˇ dzaˬ taˬ-euˬ Maˬliˇ nehˬ-ehˇ tiˬ kawˆ loꞈ-ehˇ tsawˇ myahˇ dawˆ leˇ-eu lehˇ le-euˬ meh. Kʼoeˇ ngeh, Maˬliˇ aˬ nyiˇ pi luꞈ-eu meh. 6Aˬ yawꞈ nyaꞈ Behˬlehˬhehˬ meuˬ-ahˇ jawˇ luꞈ ngeh, aˬ yawꞈ zaˬ ciˬ deˇ le-euˬ meh. 7Kʼoeˇ ngeh, aˬ yawꞈ zaˬ ciˬ-awˇ, dehꞈ le beh beh-euˬ aˬ li-ahˇ bui loˬ loˬ-awˇ, mawˇ neˇ kʼawˇ lawˬ laꞈ kʼoeˇ ciˬ yuꞈ taˬ-euˬ meh. Aˬ jeˬ miˇ neh ehˇ naˇ, daˬ yah yaꞈ-eu nymˇ laꞈ kʼoeˇ, aˬ yawꞈ nyaꞈ yaꞈ kʼaˇ maˬ za-a.

yawˇ bo-eu deuˬ jawˇ gaˇ mˬ taˆ gʼaˬ kʼehˇ oe-euˬ

8Miˇ kʼahˬ kʼoeˇ kʼahˬ-ahˇ jawˇ-eu yawˇ bo-eu tsawˇ haˬ tiˬ deuˬ, yaˇ peuˬ-ahˇ yawˇ bo yaꞈ-euˬ meh. 9Mˬ taˆ gʼaˬ kʼehˇ tiˬ gʼaˬ aˬ yawꞈ maꞈ jawˇ gaˇ doˆ le-awˇ, Sahˬpaˬ Miˬyehˇ-euˬ yaw shehꞈ kʼahˬ sehˇ aˬ yawꞈ maꞈ-euˬ tiˬ jawˬ bya le-euˬ miˇ neh, aˬ yawꞈ maꞈ guˆ dui dui-iˇ-euˬ meh. 10Ehˇ kʼawꞈ, mˬ taˆ gʼaˬ kʼehˇ kʼoeˇ gʼaˬ ehˇ-eu, ‘Taˬ guˆ. Aˬ jeˬ miˇ neh ehˇ naˇ, tsawˇ haˬ dawˬ tawˆ luꞈ laˬ kʼaˬ cehˇ dui dui paˬ-ehˇ gʼeh-eu laˬ kʼaˬ cehˇ-eu guiˬ lahˬ dawˬ naw maꞈ-ahˇ ngaˇ tsaꞈ gaˬ le-euˬ ma. 11Iˬ nah, Daˬbiˇ-euˬ meuˬ laꞈ kʼoeˇ, naw maꞈ-ahˇ Ka kʼoꞈ-eu gʼaˬ pyeuꞈ-eu Sahˬpaˬ Ka li dehꞈ le-euˬ meh. 12Aˬ yawꞈ dehꞈ le-euˬ saˇ kiˇ heu loꞈ-ehˇ jaˆ tehꞈ-a. Zaˬ nahˬ-ahˇ bui loˬ loˬ-awˇ, mawˇ neˇ kʼawˇ lawˬ laꞈ kʼoeˇ ciˬ yuꞈ taˬ-euˬ gaˇ naw maꞈ ya mawˇ tehꞈ-a.”

13Jaˬ pyuˬ ni mˬ taˆ gʼaˬ kʼehˇ kʼoeˇ gʼaˬ nehˬ-ehˇ mˬ taˆ gʼaˬ kʼehˇ baˬ maꞈ puˇ jeˬ-ehˇ doˆ le-awˇ, Miˬyehˇ-ahˇ ja ceuˬ-eu caˇ dawˬ heu loꞈ-ehˇ caˇ-eu meh.

14“Mˬ taˆ yaw goˇ jawˇ-eu Miˬyehˇ,

baoˬ yaw shehꞈ kʼahˬ sehˇ huiˬ luꞈ-uˇ.

Miˇ tsaˬ tsawˇ haˬ zaˬ deuˬ laꞈ kʼoeˇ,

aˬ yawꞈ nui kʼahˇ shiˇ-eu deuˬ-ahˇ,

nui saˇ za-eu jeˬ oꞈ luꞈ-uˇ.”

15Mˬ taˆ gʼaˬ kʼehˇ deuˬ mˬ-ahˇ daˆ gʼoꞈ leˇ dzeuˇ ngeh, yawˇ bo-eu deuˬ tiˬ gʼaˬ tiˇ gʼaˬ ehˇ-eu, “Aˬ dui maꞈ Behˬlehˬhehˬ meuˬ-ahˇ le-awˇ, Sahˬpaˬ Miˬyehˇ neh aˬ dui-ahˇ ehˇ nehˬ laꞈ-euˬ jeˬ-ahˇ haw-iˇ kaˇ-euˇ.”

16Kʼoeˇ naˇ, aˬ yawꞈ maꞈ yaw kawˇ-ehˇ iˇ-awˇ, Maˬliˇ hawˇ-eu Yoˇsehˆ aˬ nyaꞈ-ahˇ mawˇ-awˇ, zaˬ nahˬ-ahˇ mawˇ neˇ kʼawˇ lawˬ laꞈ kʼoeˇ ciˬ yuꞈ taˬ-euˬ gaˇ ya mawˇ-euˬ meh. 17Aˬ yawꞈ maꞈ kʼoeˇ gaˇ ya mawˇ ngeh, zaˬ nahˬ kʼoeˇ gʼaˬ gaˇ kawˆ mˬ taˆ gʼaˬ kʼehˇ neh aˬ yawꞈ maꞈ-ahˇ kʼaˇ ehˇ nehˬ-euˬ jeˬ dzawˇ mehˬ nehˬ-euˬ meh. 18Yawˇ bo-eu deuˬ ehˇ gaˇ kʼaˇ ya gaˬ-euˬ tsawˇ haˬ dawˬ tawˆ luꞈ, zahˬ dui dui leˇ-euˬ meh. 19Maˬliˇ-aˬ, gaˇ kawˆ kʼoeˇ deuˬ dawˬ tawˆ luꞈ juiˇ taˬ-awˇ, nui ma laꞈ kʼoeˇ shaˇ noeˬ shaˇ noeˬ-ehˇ jawˇ-euˬ meh. 20Yawˇ bo-eu deuˬ-aˬ, aˬ yawꞈ maꞈ neh kʼaˇ ya gaˬ kʼaˇ ya mawˇ-euˬ jeˬ dawˬ tawˆ luꞈ gʼaˇ duˬ, Miˬyehˇ-ahˇ ja ceuˬ-eu caˇ dawˬ caˇ caˇ-ehˇ gʼoꞈ-iˇ-euˬ meh. Yawˬ jeˬ na luꞈ mˬ taˆ gʼaˬ kʼehˇ neh kʼaˇ ehˇ nehˬ-euˬ loꞈ-ehˇ pyeuꞈ luꞈ gaˇ aˬ yawꞈ maꞈ ya mawˇ duˬ yaꞈ-euˬ meh.

Yeˬsuˇ-ahˇ tsawˇ myahˇ myahˇ nehˬ-euˬ

21Nah jawˇ byah laˇ-awˇ, aˬ li kʼoeˇ li-ahˇ baˆ kʼoˆ mehˬ dzaˬ yehˬ nehˬ yamˬ tsaˬ laˇ ngeh, Yeˬsuˇ lehˇ myahˇ nehˬ-euˬ meh. Tsawˇ myahˇ kʼoeˇ-aˬ, aˬ ma-euˬ uˬ maˆ laꞈ kʼoeˇ maˬ tsehˆ leˇ mi naˆ-ehˇ mˬ taˆ gʼaˬ kʼehˇ neh biꞈ taˬ yaꞈ-euˬ tsawˇ myahˇ meh.

Yeˬsuˇ-ahˇ Uˬ duˬ tahˬ nymˇ nymˇ ma-ahˇ ciˬ sha leˇ-euˬ

22Moˇseˬ-euˬ Zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ jaˆ-eu loꞈ-ehˇ, Yoˇsehˆ hawˇ-eu Maˬliˇ aˬ nyaꞈ dzeˇ zaˬ gʼawˇ mawˇ shawˇ-eu zahˇ jahˇ yamˬ tsaˬ laˇ-euˬ meh. Kʼoeˇ miˇ neh, aˬ li kʼoeˇ li-ahˇ Sahˬpaˬ Miˬyehˇ mehˬ shi ciˬ sha leˇ-eu gʼaˇ duˬ, Yeˬluˇsaˬlehˬ meuˬ-ahˇ sheuˬ gʼeh-euˬ meh. 23Aˬ jeˬ miˇ neh ehˇ naˇ, “Dehꞈ beh beh le-euˬ aˬ li yawˬ gʼaˬ na luꞈ, SahˬpaˬMiˬyehˇ-ahˇ ya a nehˬ meh” lehˇ, Sahˬpaˬ Miˬyehˇ-euˬ Zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ meh. 24Kʼoeˇ uˬ taꞈ, Sahˬpaˬ Miˬyehˇ-euˬ Zahˇ dawˬ kʼoꞈ dawˬ laꞈ kʼoeˇ boꞈ taˬ-euˬ loꞈ-ehˇ, kʼaˬ kʼoeˬ tiˬ gu maˬ ngeuˇ naˇ, yaˇ miˇ kʼaˬ kʼoeˬ zaˬ nyiˬ mawˇ ya lawˇ nehˬ leˇ-eu meh.

25Kʼoeˇ ngeh yamˬ-ahˇ, Suˇmoˬ lehˇ myahˇ-euˬ tsawˇ haˬ tiˬ gʼaˬ Yeˬluˇsaˬlehˬ meuˬ-ahˇ jawˇ-eu meh. Aˬ yawꞈ-aˬ, Miˬyehˇ-ahˇ guˆ-eu nui ma ahˇ-eu tsawˇ haˬ yaw muiˬ tiˬ gʼaˬ pyeuꞈ-awˇ, Iˇsaˬleˬlaˆ tsawˇ jeuˬ ka kʼoꞈ-eu jeˬ za-eu aˇ nah-ahˇ dawˬ luꞈ-eu tiˬ gʼaˬ meh. Muiˬ-eu shawˇ-eu Yaw sahˇ Miˬyehˇ aˬ yawꞈ nehˬ-ehˇ jawˇ-eu meh. 26Sahˬpaˬ Miˬyehˇ neh bi oe ma lehˇ saˇ jaˇ dzaˬ taˬ-euˬ Ka li-ahˇ maˬ ya mawˇ kʼoeˇ keuˆ ni aˬ yawꞈ maˬ ya shiˇ-aˇ lehˇ, Muiˬ-eu shawˇ-eu Yaw sahˇ Miˬyehˇ aˬ yawꞈ-ahˇ pah mehˬ nehˬ-euˬ meh. 27Yaw sahˇ Miˬyehˇ sheuˬ gʼeh-eu mehˬ nah, Uˬ duˬ tahˬ nymˇ nymˇ ma laꞈ kʼoeˇ Suˇmoˬ uˇ leˇ-euˬ meh. Zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ loꞈ-ehˇ zahˇ jahˇ nehˬ-eu gʼaˇ duˬ, zaˬ nahˬ Yeˬsuˇ-ahˇ Uˬ duˬ tahˬ nymˇ nymˇ ma laꞈ kʼoeˇ ciˬ uˇ laꞈ ngeh, 28Suˇmoˬ zaˬ nahˬ-ahˇ ciˬ-awˇ, Miˬyehˇ-ahˇ ja ceuˬ-awˇ heu loꞈ-ehˇ ehˇ-eu meh.

29“Sahˬpaˬ Miˬyehˇ-oˇ, nawˇ ngaˬ-ahˇ,

saˇ jaˇ dzaˬ-euˬ byah laˇ-euˬ nga.

Nawˬ-euˬ zaˬ kʼaˆ pyeuꞈ-eu ngaˬ-ahˇ,

nui saˇ oꞈ-eu jeˬ byah kʼaˇ-awˇ,

dehꞈ ziˇ bi jiˇ nehˬ laꞈ-euˬ meh.

30Nawˬ-euˬ ka kʼoꞈ-eu jeˬ-ahˇ ngaˇ,

myaˆ nuiˆ ya mawˇ duˬ gʼaˬ-euˬ ma.

31Nawˬ-euˬ ka kʼoꞈ-eu jeˬ kʼoeˇ-ahˇ,

tsawˇ jeuˬ dawˬ tawˆ luꞈ-euˬ mehˬ shi,

nawˇ lehˬ hmˬ laˆ saˆ taˬ-euˬ meh.

32Lawˇ ciꞈ zaˬ deuˬ mawˇ nya laˇ ni,

yaw shehꞈ bya nehˬ-eu jeˬ pyeuꞈ-awˇ,

nawˬ neh kuˇ-euˬ tsawˇ jeuˬ pyeuꞈ-eu,

Iˇsaˬleˬlaˆ tsawˇ haˬ deuˬ-ahˇ,

Yaw shehꞈ kʼahˬ sehˇ bi huiˬ-euˬ meh.”

33Zaˬ nahˬ-euˬ gaˇ kawˆ Suˇmoˬ kʼoeˇ loꞈ-ehˇ ehˇ gaˇ, zaˬ nahˬ-euˬ aˬ da aˬ ma zahˬ leˇ-euˬ meh. 34Aˬ yawꞈ maꞈ-ahˇ Suˇmoˬ dawˬ ngehˬ gʼeh nehˬ-awˇ, aˬ ma gʼaˬ pyeuꞈ-eu Maˬliˇ-ahˇ heu loꞈ-ehˇ ehˇ nehˬ-euˬ meh. “Iˇsaˬleˬlaˆ miˇ kʼahˬ laꞈ kʼoeˇ tsawˇ haˬ gʼawˬ mya ni cawˆ-iˇ-awˇ, tsawˇ haˬ gʼawˬ mya ni ka kʼoꞈ-eu jeˬ-ahˇ za ni, zaˬ nahˬ heu gʼaˬ-ahˇ Miˬyehˇ tseˇ doˆ-euˬ meh. Aˬ yawꞈ-aˬ, aˬ cawˬ ja bu ja doeˇ gaˇ ya daˬ-eu Miˬyehˇ neh bi siˬ bi mawˇ le-euˬ jeˬ pyeuꞈ-awˇ, 35aˬ yawꞈ maꞈ-euˬ nui ma laꞈ kʼoeˇ zaꞈ taˬ-euˬ jeˬ-ahˇ awˬ yawꞈ pah dzeh tehꞈ-a. Kʼoeˇ uˬ taꞈ, nui ma-ahˇ mi cehˇ tsawˆ byoe gaˇ duˇ ni, nawˇ shaˬ zahˬ ya mˇ tehꞈ-a.”

36Aˬ shaˬ tsawˇ jeuˬ Paˬnoeˬlaˇ-euˬ aˬ buˇ Aˬnaˬ lehˇ kuˇ-eu, Miˬyehˇ gʼaˇ duˬ ngeh dah-eu zaˬ miˬ zaˬ tiˬ gʼaˬ jawˇ-eu meh. Aˬ yawꞈ-aˬ, mawˬ dui dui laˇ-euˬ meh. Aˬ yawꞈ smˇ miˇ iˇ-awˇ, kʼaˬ dzeˇ zaˬ nehˬ-ehˇ shiꞈ kʼoꞈ tehꞈ-ehˇ ya dehꞈ taꞈ yaꞈ-euˬ meh. 37Kʼoeˇ ngeh neh naˇ, yehꞈ tseˇ kʼoꞈ byah laˇ ngeh keuˆ ni miˬ coeˬ miˬ ma geuꞈ-awˇ jawˇ-eu meh. Aˬ yawꞈ Uˬ duˬ tahˬ nymˇ nymˇ ma-ahˇ tiˬ jawˇ-iˬ maˬ gʼawˬ-iˇ ni, uˬ ciꞈ nah gʼahˇ maˬ ehˇ, maˬ dzaˬ-eu zahˇ jahˇ-awˇ guiˬ lahˬ shaˇ-euˬ meh. 38Aˇ yamˬ kʼoeˇ yamˬ nyiˬ paˆ-ehˇ aˬ yawꞈ laˇ keuˆ-awˇ, Miˬyehˇ-ahˇ ja ceuˬ-awˇ, Yeˬluˇsaˬlehˬ meuˬ-ahˇ Miˬyehˇ bi buˬ-iˇ gaˇ noeˬ tmˬ luꞈ-eu tsawˇ haˬ dawˬ tawˆ luꞈ-ahˇ, zaˬ nahˬ kʼoeˇ gʼaˬ-euˬ gaˇ kawˆ aꞈ yawꞈ ja mehˬ-euˬ meh.

Naˬzaˬlehˇ meuˬ-ahˇ gʼoꞈ-iˇ-euˬ

39SahˬpaˬMiˬyehˇ-euˬ Zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ loꞈ-ehˇ, Yoˇsehˆ hawˇ-eu Maˬliˇ aˬ nyaꞈ dzeˇ zaˬ mˇ byah gʼaˬ ngeh, aˬ yawꞈ pehˬ jawˇ-eu meuˬ pyeuꞈ-eu Gaˬliˬlehˇ miˇ kʼahˬ Naˬzaˬlehˇ meuˬ-ahˇ gʼoꞈ leˇ-euˬ meh. 40Aˬ li kʼoeˇ gʼaˬ huiˬ laˇ-awˇ, nui ma saꞈ laˇ gʼaˬ ahˇ laˇ luꞈ-eu uˬ taꞈ, zaˬ siˬ tsawˇ gahˇ byah-awˇ, Miˬyehˇ-euˬ guiˬ lahˬ aˬ yawꞈ kʼoeˇ taˆ jaˆ-eu meh.

Aˬ li Yeˬsuˇ Uˬ duˬ tahˬ nymˇ nymˇ ma laꞈ kʼoeˇ jawˇ-euˬ

41Yeˬsuˇ-euˬ aˬ ma aˬ da-aˬ, aˬ yawꞈ kʼoꞈ yawꞈ Yeˬluˇsaˬlehˬ meuˬ-ahˇ Baˬsaˬkaˬ Bawˬ-iˬ gʼeh ngeh le-eu meh. 42Yeˬsuˇ tseˇ nyiꞈ kʼoꞈ byah laˇ ngeh kʼoꞈ kʼawꞈ, aˬ ziˇ aˬ law kʼaˇ le-euˬ loꞈ-ehˇ, bawˬ-iˬ gʼeh gaˇ le-euˬ meh. 43Bawˬ-iˬ gʼeh gʼaˬ-awˇ gʼoꞈ le luꞈ ngeh, Yeˬsuˇ Yeˬluˇsaˬlehˬ meuˬ-ahˇ jawˇ yaꞈ-euˬ meh. Gaˇ kawˆ kʼoeˇ awˬ yawꞈ-euˬ aˬ ma aˬ da maˬ siˬ nya-a. 44Aˬ cawˬ nehˬ-ehˇ gʼoꞈ-iˇ luꞈ tehꞈ-a lehˇ noeˬ-awˇ, tiˬ nah gaˇ ma iˇ gʼaˬ miˇ tsa, aˬ yuiꞈ aˬ nyiˇ deuˬ hawˇ-eu cawˬ deuˬ jawˇ gaˇ poˆ haw-euˬ meh. 45Ehˇ kʼawꞈ, aˬ yawꞈ-ahˇ maˬ poˆ mawˇ nya-eu miˇ neh, Yeˬluˇsaˬlehˬ meuˬ-ahˇ gʼoꞈ kʼoꞈ leˇ-awˇ poˆ leˇ-euˬ meh. 46Smˬ nah poˆ keuˆ laꞈ ngeh, Uˬ duˬ tahˬ nymˇ nymˇ ma laꞈ kʼoeˇ poˆ mawˇ leˇ-euˬ meh. Yuˇdaˆ tsawˇ haˬ saˬ laˬ deuˬ nehˬ-ehˇ aˬ yawꞈ nuiˇ-awˇ, aˬ yawꞈ maꞈ neh mehˬ nehˬ tsoˆ nehˬ-euˬ gaˇ naˇ haˬ-awˇ, aˬ yawꞈ maꞈ-ahˇ gʼawˬ mya jeˬ naˇ haˬ poˆ luꞈ-eu meh. 47Aˬ yawꞈ ehˇ gaˇ kʼaˇ ya gaˬ-euˬ tsawˇ haˬ dawˬ tawˆ luꞈ, aˬ yawꞈ-euˬ zaˬ siˬ tsawˇ gahˇ hawˇ-eu aˬ yawꞈ neh ngehˬ kʼoꞈ tmˇ kʼoꞈ-euˬ dawˬ deuˬ-ahˇ zahˬ dui dui leˇ-eu meh. 48Aˬ yawꞈ-euˬ aˬ ma aˬ da aˬ yawꞈ-ahˇ poˆ mawˇ ngeh, zahˬ leˇ-awˇ, aˬ yawꞈ-euˬ aˬ ma ehˇ-eu, “Aˬ li-oˇ, aˬ jeˬ miˇ neh heu loꞈ-ehˇ bi shaˬ laꞈ te. Nawˬ da nga nyaꞈ nawˬ-ahˇ kʼahˬ lahˇ-awˇ poˆ luꞈ-eu shiˇ-iˬ law miˇ-a tawˇ.”

49Aˬ yawꞈ ehˇ-eu, “Naw nyaꞈ aˬ jeˬ miˇ neh ngaˬ-ahˇ poˆ te. Ngaˬ Da-euˬ nymˇ-ahˇ ngaˇ ya jawˇ meh lehˇ naw nyaꞈ maˬ siˬ nya te loˇ.” 50Ehˇ kʼawꞈ, aˬ yawꞈ ehˇ mawꞈ-eu dawˬ tsuiꞈ-ahˇ, aˬ nyaꞈ dzeˇ zaˬ maˬ gʼoˆ shaw nya-a.

51Kʼoeˇ naˇ, aˬ yawꞈ nyaꞈ nehˬ-ehˇ Naˬzaˬlehˇ meuˬ-ahˇ Yeˬsuˇ gʼoꞈ-iˇ-awˇ, ehˇ dawˬ naˇ haˬ naˇ haˬ-ehˇ jawˇ-euˬ meh. Aˬ yawꞈ-euˬ aˬ ma-aˬ, gaˇ kawˆ kʼoeˇ deuˬ dawˬ tawˆ luꞈ, nui ma laꞈ kʼoeˇ juiˇ taˬ-euˬ meh. 52Yeˬsuˇ-aˬ, zaˬ siˬ tsawˇ gahˇ hawˇ-eu gʼawˇ mawˇ huiˬ laˇ-awˇ, Miˬyehˇ maˬ ehˇ, tsawˇ haˬ maˬ ehˇ, aˬ yawꞈ-ahˇ nui ma tsaˬ-eu meh.

Currently Selected:

Luˇkaꞈ 2: AHK

Highlight

Copy