Maˬkuˆ 14
14
Yeˬsuˇ-ahˇ sehꞈ-eu gʼaˇ duˬ bawˬ kʼoeˬ-euˬ
(Maꞈtehˬ 26.1-5; Luˇkaꞈ 22.1-2; Yoˇhaˬ 11.45-53)
1Baˬ saˬ kaˬ Bawˬ-iˬ hawˇ-eu Dehˬ tseˬ maˬ dawˆ-euˬ Kaˬ muˇ dzaˬ-eu Bawˬ-iˬ gʼeh-eu aˇ yamˬ keuˆ le-eu nyiˬ nah dzeˇ-eu tehꞈ meh. Piˇ ma aˬ yuiꞈ deuˬ hawˇ-eu Zahˇ dawˬ kʼoꞈ dawˬ mehˬ-eu saˬ laˬ deuˬ-aˬ, Yeˬsuˇ-ahˇ ciˬ cuˇ ni nyehꞈ kʼoeˬ-awˇ sehꞈ-eu gʼaˇ duˬ nawˬ jawˬ luꞈ-eu meh. 2“Bawˬ-iˬ gʼeh luꞈ ngeh aˬ dui maꞈ aˬ yawꞈ-ahˇ maˬ nyehꞈ nya nga siˬ. Kʼoeˇ loꞈ-ehˇ jahˇ naˇ, miˇ kʼahˬ zaˬ luiˬ gʼa laˇ gaˇ ya yahˇ nga” lehˇ, aˬ yawꞈ maꞈ ehˇ-eu meh.
Beˬtaˬniˇ pu laꞈ kʼoeˇ Yeˬsuˇ-ahˇ tsiˇ yaw saw jeˬ shehˆ daˆ nehˬ-euˬ
(Maꞈtehˬ 26.6-13; Yoˇhaˬ 12.1-8)
3Beˬtaˬniˇ pu-ahˇ jawˇ-eu Siˇmoˬ lehˇ myahˇ-euˬ coiˬ doi tiˬ gʼaˬ-euˬ nymˇ-ahˇ Yeˬsuˇ jawˇ luꞈ-eu meh. Aˬ yawꞈ hawˬ dzaˬ luꞈ ngeh, zaˬ miˬ zaˬ tiˬ gʼaˬ aˇ poeˬ kʼaˆ dui dui-eu tsiˇ yaw saw jeˬ shehˆ ahˇ taˬ-euˬ lo pyuˇ maˇ tsaꞈ ciˬ laꞈ-awˇ, maˇ tsaꞈ deh paˆ-awˇ, Yeˬsuˇ-euˬ uˬ duˬ-ahˇ tsiˇ yaw saw jeˬ shehˆ daˆ nehˬ-euˬ meh. 4Kʼoeˇ gaˇ jawˇ-eu tsawˇ haˬ tiˬ paˆ na deuˬ maˬ jawˇ tehˬ coeˇ-ehˇ ehˇ-eu, “Aˬ jeˬ gʼeh-eu lehˇ tsiˇ yaw saw teu, gaˇ dahˇ maˬ tsoeˬ gaˇ zmˬ dzeh niˇ gʼa-eu nga. 5Ahˬ law nmˇ-aˬ, kʼaˇ teˬ-eu pyuˇ mehˇ byaˆ smˬ yaˇ byaˆ za tehꞈ-a tawˇ. Pyuˇ kʼoeˇ yuˇ-awˇ shaˬ zaˬ zahˬ zaˬ-ahˇ biˇ nehˬ law nmˇ-aˬ, aˇ naˆ ni gaˇ dahˇ tsoeˬ nmˇ” lehˇ, aˬ yawꞈ maꞈ yaw kaˬ ja ja-ehˇ zaˬ miˬ zaˬ kʼoeˇ gʼaˬ-ahˇ yaw kʼaˆ-ehˇ ehˇ doeˇ-eu meh.
6Yeˬsuˇ ehˇ-eu, “Zaˬ miˬ zaˬ heu gʼaˬ-ahˇ tiˬ jeˬ-iˬ taˬ paˇ ehˇ. Aˬ jeˬ miˇ neh naw maꞈ aˬ yawꞈ-ahˇ ehˇ doeˇ te. Aˬ yawꞈ-aˬ, ngaˬ-euˬ gʼaˇ duˬ muiˬ dui dui-eu jeˬ mˇ-euˬ meh. 7Shaˬ zaˬ zahˬ zaˬ deuˬ naw maꞈ nehˬ-ehˇ aˬ myah luꞈ jawˇ-awˇ, naw maꞈ kʼaˇ caw ba nehˬ mawꞈ ngeh caw ba nehˬ nya tehꞈ-a. Ehˇ kʼawꞈ, ngaˇ-aˬ, naw maꞈ nehˬ-ehˇ aˬ myah luꞈ jawˇ-eu maˬ ngeuˇ. 8Zaˬ miˬ zaˬ heu gʼaˬ aˬ yawꞈ kʼaˇ gʼeh nya-eu loꞈ-ehˇ mˇ-euˬ meh. Ngaˬ-ahˇ baꞈ pahˬ-eu aˇ yamˬ maˬ keuˆ laˇ mi naˆ-ehˇ, ngaˬ-euˬ gʼawˇ mawˇ-ahˇ tsiˇ yaw saw jeˬ shehˆ daˆ-awˇ, baꞈ pahˬ-eu gʼaˇ duˬ laˆ saˆ nehˬ laꞈ-euˬ meh. 9Miˇ tsaˬ tahˬ kʼawˇ heu doe ni, Laˬ kʼaˬ cehˇ-eu Guiˬ lahˬ dawˬ heu kʼaˇ mehˬ keuˆ gaˇ, zaˬ miˬ zaˬ heu gʼaˬ neh mˇ-euˬ gaˇ kawˆ heu ja-awˇ, aˬ yawꞈ-ahˇ noeˬ keuˆ tehꞈ-a lehˇ, naw maꞈ-ahˇngaˇ maˇ jawˆ ni ehˇ-eu ma.”
Yuˇdaˆ neh Yeˬsuˇ-ahˇ ahˬ dzaˬ-euˬ
(Maꞈtehˬ 26.14-16; Luˇkaꞈ 22.3-6)
10Kʼoeˇ naˇ, zaˬ lahˇ tseˇ nyiꞈ gʼaˬ laꞈ kʼoeˇ ahˇ-eu Yuˇdaˆ Iˇsaˬgaˬliˬoˆ lehˇ kuˇ-eu gʼaˬ, Yeˬsuˇ-ahˇ ahˬ dzaˬ-eu gʼaˇ duˬ, piˇ ma aˬ yuiꞈ deuˬ jawˇ gaˇ le-euˬ meh. 11Aˬ yawꞈ ehˇ gaˇ piˇ ma aˬ yuiꞈ deuˬ laˬ kʼaˬ cehˇ dui dui-awˇ, aˬ yawꞈ-ahˇ pyuˇ biꞈ-eu gʼaˇ duˬ saˇ jaˇ dzaˬ-euˬ meh. Kʼoeˇ naˇ, Yeˬsuˇ-ahˇ aˬ yawꞈ maꞈ-euˬ aˬ laꞈ laꞈ kʼoeˇ a nehˬ-eu gʼaˇ duˬ aˬ myah yehꞈ laˇ nga lehˇ, Yuˇdaˆ jawˬ luꞈ-eu meh.
Yeˬsuˇ zaˬ lahˇ deuˬ nehˬ-ehˇ Baˬsaˬkaˬ Bawˬ-iˬ dzaˬ-euˬ
(Maꞈtehˬ 26.17-25; Luˇkaꞈ 22.7-14,21-23; Yoˇhaˬ 13.21-30)
12Dehˬ tseˬ maˬ ahˇ-eu Kaˬ muˇ dzaˬ-eu Bawˬ-iˬ gʼeh dahˬ beh ngeh nah pyeuꞈ-eu, Baˬsaˬkaˬ dzaˬ byawˇ gʼaˇ duˬ yawˇ sehꞈ-eu aˇ nah kʼoeˇ nah-ahˇ, zaˬ lahˇ deuˬ Yeˬsuˇ-ahˇ naˇ haˬ-eu, “Nawˇ nga maꞈ-ahˇ Baˬsaˬkaˬ dzaˬ byawˇ aˬ gaˇ bi lehˬ hmˬ mawꞈ-eu nya.”
13Kʼoeˇ ngeh, zaˬ lahˇ nyiˬ gʼaˬ-ahˇ Yeˬsuˇ heu loꞈ-ehˇ mehˬ nehˬ-awˇ kʼehˇ gʼeh-euˬ meh. “Naw nyaꞈ meuˬ-ahˇ iˇ-awˬ. Iˇ cuꞈ mui deuˇ oeˬ lahˬ baꞈ luꞈ-eu tsawˇ haˬ tiˬ gʼaˬ ya tahˬ puꞈ tehꞈ-a. Aˬ yawꞈ-euˬ mehˬ nah naw nyaꞈ caw teh gʼeh-awˬ. 14Aˬ yawꞈ aˬ geu nymˇ-ahˇ uˇ-iˇ-eu maˬ kaˬ, nymˇ sahˇ gʼaˬ-ahˇ ‘Saˬ laˬ nyaˇ-eu aˬ yawꞈ hawˇ-eu aˬ yawꞈ-euˬ zaˬ lahˇ deuˬ Baˬsaˬkaˬ dzaˬ byawˇ dzaˬ-eu gʼaˇ duˬ aˇ lawˆ aˬ geu gaˇ jaˆ ta jeˇ’ lehˇ naˇ haˬ-awˬ. 15Kʼoeˇ ngeh, nymˇ laꞈ taˆ tiˆ-ahˇ laˆ saˆ taˬ-euˬ aˇ lawˆ lawˆ ma tiˬ lawˆ, naw nyaꞈ-ahˇ aˬ yawꞈ mehˬ nehˬ laꞈ tehꞈ-a. Aˬ dui maꞈ gʼaˇ duˬ yawˬ jeˬ na luꞈ kʼoeˇ gaˇ lehˬ hmˬ taˬ-awˬ.”
16Zaˬ lahˇ kʼoeˇ nyi gʼaˬ doˆ-iˇ-awˇ meuˬ-ahˇ iˇ ngeh, yawˬ jeˬ na luꞈ Yeˬsuˇ neh ehˇ nehˬ-euˬ loꞈ-ehˇ jaˆ gaˇ ya mawˇ-awˇ, Baˬsaˬkaˬ dzaˬ byawˇ lehˬ hmˬ laˆ dawˆ-euˬ meh.
17Uˬ ciꞈ ciꞈ le ngeh, Yeˬsuˇ zaˬ lahˇ tseˇ nyiꞈ gʼaˬ sheuˬ-awˇ oe-euˬ meh. 18Aˬ yawꞈ maꞈ hawˬ jeh-ahˇ jawˬ leˇ-awˇ dzaˬ luꞈ ngeh, Yeˬsuˇ ehˇ-eu, “Naw maꞈ laꞈ kʼoeˇ tiˬ gʼaˬ ngaˬ-ahˇ ahˬ dzaˬ tehꞈ-a. Ngaˬ nehˬ-ehˇ tiˬ gaˇ dzaˬ luꞈ-eu gʼaˬ ngaˬ-ahˇ ahˬ dzaˬ tehꞈ-a lehˇ, ngaˇ maˇ maˇ ni ehˇ-eu ma.”
19Zaˬ lahˇ deuˬ dawˬ kʼoeˇ dawˬ-ahˇ nui ma maˬ saˇ-ehˇ, “Ngaˬ-ahˇ ehˇ te loˇ” lehˇ, tiˬ gʼaˬ saˇ-iˬ tiˬ gʼaˬ aˬ yawꞈ-ahˇ naˇ haˬ-eu meh.
20Yeˬsuˇ ehˇ-eu, “Naw maꞈ tseˇ nyiꞈ gʼaˬ laꞈ kʼoeˇ tiˬ gʼaˬ meh. Ngaˬ nehˬ-ehˇ gʼawˬ nyoeˇ kʼmˬ maˬ taꞈ-eu gʼaˬ meh. 21Tsawˇhaˬ-euˬ Zaˬmaˇ-aˬ, Jaˇliꞈ laꞈ kʼoeˇ ehˇ taˬ-euˬ loꞈ-ehˇ ya shiˇ tehꞈ-a. Ehˇ kʼawꞈ, Tsawˇhaˬ-euˬ Zaˬmaˇ-ahˇ ahˬ dzaˬ-eu kʼoeˇ gʼaˬ ya noeˬ shaˬ dui dui tehꞈ-a. Aˬ yawꞈ maˬ dehꞈ le-euˬ law nmˇ-aˬ, aˬ yawꞈ gʼaˇ duˬ muiˬ dzehˬ tehꞈ-a.”
Sahˬpaˬ Yeˬsuˇ-euˬ ciꞈ hawˬ dzaˬ byawˇ
(Maꞈtehˬ 26.26-30; Luˇkaꞈ 22.14-20; 1 Gawˇliˬtu 11.23-25)
22Aˬ yawꞈ maꞈ ciꞈ hawˬ dzaˬ luꞈ ngeh, Yeˬsuˇ kaˬ muˇ yuˇ-awˇ, Miˬyehˇ-euˬ guiˬ lahˬ-ahˇ ja ceuˬ-euˬ meh. Kʼoeˇ naˇ, kaˬ muˇ kʼoeˇ ngawˬ pyehˬ-awˇ, zaˬ lahˇ deuˬ-ahˇ biˇ nehˬ-awˇ ehˇ-eu, “Yuˇ dzaˬ-awˬ. Heu-aˬ, ngaˬ-euˬ gʼawˇ mawˇ ma.”
23Kʼoeˇ naˇ, aˬ yawꞈ kʼmˬ maˬ ciˬ-awˇ, Miˬyehˇ-euˬ guiˬ lahˬ-ahˇ ja ceuˬ-euˬ meh. Kʼmˬ maˬ kʼoeˇ aˬ yawꞈ maꞈ-ahˇ ciˬ nehˬ-awˇ, aˬ yawꞈ maꞈ dawˇ-euˬ meh. 24Yeˬsuˇ ehˇ-eu, “Heu-aˬ, tsawˇ haˬ gʼawˬ mya ni gʼaˇ duˬ yoeˇ le-euˬ, Miˬyehˇ-euˬ dawˬ ma saˇ jaˇ-ahˇ taꞈ-eu ngaˬ-euˬ shiˬ ma. 25Miˬyehˇ Miˇkʼahˬ laꞈ kʼoeˇ aˬ gaꞈ dzaˇ uiˇ yaw shuiꞈ-ahˇ ngaˇ ya dawˇ-eu aˇ nah maˬ keuˆ laˇ kʼoeˇ keuˆ ni, aˬ gaꞈ dzaˇ uiˇ heu ngaˇ maˬ paˇ dawˇ ma lehˇ, naw maꞈ-ahˇ ngaˇ ehˇ-eu ma.”
26Kʼoeˇ naˇ, ja ceuˬ-eu caˇ dawˬ tiˬ bymˇ aˬ yawꞈ maꞈ caˇ-awˇ, Saˬloˬ gawˬ jawˬ-ahˇ le-euˬ meh.
Yeˬsuˇ-ahˇ maˬ siˬlehˇ Beˬtuˆluˆ pyehˇ tehꞈ-a
(Maꞈtehˬ 26.31-35; Luˇkaꞈ 22.31-34; Yoˇhaˬ 13.36-38)
27Kʼoeˇ naˇ, aˬ yawꞈ maꞈ-ahˇ Yeˬsuˇ heu loꞈ-ehˇ ehˇ nehˬ-euˬ meh. “Naw maꞈ dawˬ tawˆ luꞈ ngaˬ-ahˇ byehˇ dzeh-awˇ cehˆ tehꞈ-a. Aˬ jeˬ miˇ neh ehˇ naˇ, ‘Yawˇ bo-eu yaw sahˇ-ahˇ Miˬyehˇ sehꞈ-awˇ, yawˇ yawˇ maꞈ cehˆ byaˆ jiˇ tehꞈ-a’ lehˇ, Jaˇliꞈ laꞈ kʼoeˇ ehˇ taˬ-euˬ meh. 28Ehˇ kʼawꞈ, Miˬyehˇ ngaˬ-ahˇ paˇ bi gʼoꞈ dehꞈ laˇ gʼaˬ ngeh, naw maꞈ-euˬ mehˬ hu Gaˬliˬlehˇ miˇ kʼahˬ-ahˇ ngaˇ iˇ tawˬ ma.”
29Beˬtuˆluˆ ehˇ-eu, “Aˬ cawˬ nawˬ-ahˇ byehˇ dzeh-awˇ cehˆ jiˇ kʼawꞈ, ngaˇ nawˬ-ahˇ maˬ byehˇ dzeh.”
30Yeˬsuˇ Beˬtuˆluˆ-ahˇ ehˇ nehˬ-eu, “Nymˇ ciꞈ ya poeˇ nyiˬ tahˬ maˬ doeˇ laˇ mi naˆ-ehˇ, nawˇ ngaˬ-ahˇ maˬ siˬ lehˇ smˬ poˆ keuˆ ni pyehˇ tehꞈ-a lehˇ, ngaˇ nawˬ-ahˇ maˇ jawˆ ni ehˇ-eu ma.”
31Beˬtuˆluˆ ui cuiˆ teˇ kʼaˆ jeˬ-ehˇ ehˇ-eu, “Ngaˇ nawˬ- nehˬ-ehˇ ya shiˇ paˬ-ehˇ tsaˬ laˇ kʼawꞈ, nawˬ-ahˇ ngaˇ maˬ siˬ lehˇ maˬ ehˇ.”
Kʼoeˇ ngeh, zaˬ lahˇ dawˬ tawˆ luꞈ kʼawꞈ, kʼoeˇ loꞈ-ehˇ ehˇ-eu meh.
Geˬseˬmaˬniˇ yaˇ kmˇ laꞈ kʼoeˇ Yeˬsuˇ guiˬ lahˬ shaˇ-euˬ
(Maꞈtehˬ 26.36-46; Luˇkaꞈ 22.39-46)
32Geˬseˬmaˬniˇ lehˇ kuˇ-eu jawˇ duˬ-ahˇ aˬ yawꞈ maꞈ oe keuˆ-euˬ meh. Zaˬ lahˇ deuˬ-ahˇ Yeˬsuˇ ehˇ nehˬ-eu, “Heu gaˇ nuiˇ-awˇ ngaˇ guiˬ lahˬ shaˇ gaˇ dawˬ tawˬ-awˬ.” 33Beˬtuˆluˆ, Yaˬkoˆ, Yoˇhaˬ, aˬ ha smˇ gʼaˬ-ahˇ aˬ yawꞈ sheuˬ gʼeh-euˬ meh. Aˬ yawꞈ noeˬ shaˬ dui dui-awˇ, nui ma laꞈ kʼoeˇ shaˬ zahˬ mˇ dui dui luꞈ-eu meh. 34Aˬ ha smˇ gʼaˬ-ahˇ aˬ yawꞈ ehˇ nehˬ-eu, “Ngaˬ-euˬ nui ma laꞈ kʼoeˇ shaˬ zahˬ mˇ-eu shiˇ taw tehˬ ni miˇ-a. Heu gaˇ jawˇ-awˇ loꞈ tawˬ-awˬ.”
35Aˬ yawꞈ mehˬ hu paw heu myaˆ toꞈ iˇ jiˆ-awˇ, miˇ tsa awˆ byaˆ-awˇ, shaˬ zahˬ naꞈ dui dui-eu aˇ yamˬ kʼoeˇ aˬ yawꞈ-ahˇ bi dzeuˇ-iˇ nya naˇ bi dzeuˇ-iˇ laꞈ-eu gʼaˇ duˬ guiˬ lahˬ shaˇ-euˬ meh. 36“Aˬda-oˇ. Ngaˬ Da-oˇ. Nawˇ maˬ mˇ nya-eu tiˬ jeˬ-iˬ maˬ jaˆ-a. Shaˬ zahˬ naꞈ dui dui-eu kʼmˬ maˬ heu kʼmˬ-ahˇ bi dzeuˇ-iˇ laꞈ. Ehˇ kʼawꞈ, ngaˬ-euˬ nui noeˬ taˬ bi pyeuꞈ laꞈ. Nawˬ-euˬ nui noeˬ bi pyeuꞈ-awˬ.”
37Kʼoeˇ naˇ, zaˬ lahˇ kʼoeˇ smˇ gʼaˬ jawˇ gaˇ aˬ yawꞈ gʼoꞈ le ngeh, yuꞈ kʼaˆ jiˇ taˬ-euˬ gaˇ ya mawˇ-euˬ meh. Beˬtuˆluˆ-ahˇ aˬ yawꞈ ehˇ nehˬ-eu, “Siˇmoˬ-oˇ. Nawˇ yuꞈ kʼaˆ teˬ loˇ. Naˬ liˬ tiˬ laꞈ tehꞈ-ehˇ kʼawꞈ maˬ yuꞈ ni maˬ dawˬ keuˆ coeˇ nya loˇ.” 38Kʼoeˇ naˇ, aˬ yawꞈ maꞈ-ahˇ aˬ yawꞈ ehˇ nehˬ-eu, “Muˇ juˇ juˇ-eu mehˬ nah naw maꞈ maˬ ya caw teh-iˇ ni, guiˬ lahˬ shaˇ-awˇ yaw beuˇ beuˇ-ehˇ jawˇ-awˬ. Nui ma keuˆ kʼawꞈ, gʼawˇ mawˇ gʼaˬ baˬ meh.”
39Aˬ yawꞈ tiˬ poˆ paˇ iˇ-awˇ, yaw beh poˆ kʼaˇ shaˇ-euˬ loꞈ-ehˇ guiˬ lahˬ paˇ shaˇ-euˬ meh. 40Zaˬ lahˇ deuˬ jawˇ gaˇ aˬ yawꞈ paˇ gʼoꞈ le ngeh, yuꞈ yoeˇ dui dui-eu miˇ neh yuꞈ kʼaˆ jiˇ taˬ-euˬ gaˇ ya mawˇ-euˬ meh. Aˬ yawꞈ maꞈ aˬ yawꞈ-ahˇ ehˇ kʼoꞈ nehˬ tsaˬ maˬ siˬ-a.
41Aˬ yawꞈ smˬ poˆ tiˬ poˆ paˇ gʼoꞈ le ngeh, aˬ yawꞈ maꞈ-ahˇ heu loꞈ-ehˇ ehˇ nehˬ-euˬ meh. “Naw maꞈ nymˬ-mˇ keuˆ ni yuꞈ kʼaˆ-awˇ gʼaˬ naˬ naˬ luꞈ te siˬ loˇ. Gʼaˬ-aˇ. Aˇ yamˬ keuˆ laˇ-euˬ ngaˇ. Haw-awˬ. Tsawˇhaˬ-euˬ Zaˬmaˇ-ahˇ iˬ baˇ zaˬ deuˬ-euˬ aˬ laꞈ laꞈ kʼoeˇ a nehˬ shaw-iˬ meh. 42Tuˇ-awˬ. Iˇ kaˇ-euˇ. Haw sheˇ. Ngaˬ-ahˇ ahˬ dzaˬ-eu lehˇ gʼeh-eu gʼaˬ heu gaˇ oe keuˆ taˬ-euˬ ngaˇ.”
Yeˬsuˇ-ahˇ nyehꞈ-euˬ
(Maꞈtehˬ 26.47-56; Luˇkaꞈ 22.47-53; Yoˇhaˬ 18.3-12)
43Yeˬsuˇ dawˬ ngehˬ gʼaˬ-eu maˬ dah ni, zaˬ lahˇ tseˇ nyiꞈ gʼaˬ laꞈ kʼoeˇ ahˇ-eu Yuˇdaˆ lehˇ myahˇ-euˬ gʼaˬ ja pyuˬ ni oe keuˆ-euˬ meh. Mi cehˇ hawˇ-eu daˇ kawˬ baꞈ luꞈ-eu tsawˇ haˬ aˇ maꞈ maꞈ ma tiˬ maꞈ aˬ yawꞈ nehˬ-ehˇ oe-euˬ meh. Piˇ ma aˬ yuiꞈ deuˬ, Zahˇ dawˬ kʼoꞈ dawˬ mehˬ-eu saˬ laˬ deuˬ hawˇ-eu, tsawˇ mawˬ tsawˇ kʼaˆ deuˬ neh aˬ yawꞈ maꞈ-ahˇ kʼehˇ gʼeh leꞈ-euˬ meh. 44Yeˬsuˇ-ahˇ ahˬ dzaˬ-euˬ kʼoeˇ gʼaˬ tsawˇ haˬ kʼoeˇ maꞈ-ahˇ heu loꞈ-ehˇ ehˇ nehˬ taˬ-euˬ meh. “Ngaˇ mehˬ cuˇ cuˇ nehˬ-eu gʼaˬ-aˬ, naw maꞈ poˆ luꞈ-eu kʼoeˇ gʼaˬ meh de. Aˬ yawꞈ-ahˇ nyehꞈ-awˇ, yaw muiˬ paˬ-ehˇ bi loꞈ-awˇ tsahˇ gʼeh-awˬ.”
45Yuˇdaˆ oe keuˆ-euˬ nehˬ-ehˇ, Yeˬsuˇ jawˇ gaˇ iˇ-awˇ, “Saˬ laˬ-oˇ” lehˇ ehˇ-awˇ mehˬ cuˇ cuˇ nehˬ-euˬ meh. 46Kʼoeˇ ngeh, aˬ yawꞈ maꞈ Yeˬsuˇ-ahˇ nyehꞈ-awˇ, ziꞈ dah ni dawꞈ tehˬ taˬ-euˬ meh. 47Ehˇ kʼawꞈ, kʼoeˇ gaˇ yawꞈ luꞈ-eu tsawˇ haˬ tiˬ gʼaˬ mi cehˇ gʼawˇ doˆ-awˇ, Piˇ ma Yaw huiˬ gʼaˬ-euˬ zaˬ kʼaˆ-ahˇ coeˇ-awˇ, naˬ paꞈ coeˇ tsehˆ dzeh-euˬ meh. 48Kʼoeˇ ngeh, aˬ yawꞈ maꞈ-ahˇ Yeˬsuˇ heu loꞈ-ehˇ ehˇ nehˬ-euˬ meh. “Smˇ kʼoeˬ tahˇ joe-ahˇ nyehꞈ-eu loꞈ-ehˇ, mi cehˇ hawˇ-eu daˇ kawˬ baꞈ-awˇ ngaˬ-ahˇ ya nyehꞈ le ta loˇ. 49Aˬ yawꞈ nah yawꞈ Uˬ duˬ tahˬ nymˇ nymˇ ma-ahˇ mehˬ-eu tsoˆ-eu laꞈ kʼoeˇ, naw maꞈ nehˬ-ehˇ ngaˇ jawˇ luꞈ kʼawꞈ, naw maꞈ ngaˬ-ahˇ maˬ nyehꞈ le-a. Ehˇ kʼawꞈ, Jaˇliꞈ laꞈ kʼoeˇ ehˇ taˬ-euˬ jeˬ ya bi byah laˇ tehꞈ-a.”
50Kʼoeˇ ngeh, zaˬ lahˇ dawˬ tawˆ luꞈ aˬ yawꞈ-ahˇ byehˇ dzeh yaꞈ-awˇ cehˆ jiˇ-euˬ meh.
51Zaˬ guˬ tiˬ gʼaˬ shawˇ jehˆ ni gʼeh-eu saˬ paˇ neh zaꞈ taˬ-euˬ aˇ bui tiˬ kahˇ tsahˇ lahˇ-awˇ, Yeˬsuˇ mehˬ nah caw teh luꞈ-eu meh. 52Aˬ yawꞈ maꞈ aˬ yawꞈ-ahˇ nyehꞈ-eu lehˇ gʼeh-euˬ meh. Ehˇ kʼawꞈ, aˬ yawꞈ aˇ bui kʼoeˇ kahˇ teuˆ lehˆ yaꞈ-awˇ, neˇ myawˆ ni cehˆ dzeuˇ-euˬ meh.
Yeˬsuˇ-ahˇ Baꞈdzah mehˬ shi nyehꞈ gʼeh-euˬ
(Maꞈtehˬ 26.57-68; Luˇkaꞈ 22.54,55,63-71; Yoˇhaˬ 18.13,14,19-24)
53Kʼoeˇ naˇ, piˇ ma aˬ yuiꞈ deuˬ, tsawˇ mawˬ tsawˇ kʼaˆ deuˬ hawˇ-eu, Zahˇ dawˬ kʼoꞈ dawˬ mehˬ-eu saˬ laˬ deuˬ dawˬ tawˆ luꞈ uiˬ leˇ jiˇ-awˇ jawˇ-eu, Piˇ ma Yaw huiˬ gʼaˬ-euˬ nymˇ-ahˇ, Yeˬsuˇ-ahˇ sheuˬ gʼeh-euˬ meh. 54Beˬtuˆluˆ-aˬ, naˇ kʼah paw ui cuiˆ gaˇ mahˇ kaˬ gaˇ cah-awˇ, Piˇ ma Yaw huiˬ gʼaˬ-euˬ nymˇ-ahˇ gawˬ lahˇ taˬ-euˬ laꞈ kʼoeˇ paw keuˆ ni caw teh keuˆ gʼeh-euˬ meh. Kʼoeˇ gaˇ loꞈ-eu yehˇ deuˬ nehˬ-ehˇ aˬ yawꞈ ga dzuˇ-iˇ-awˇ, miˬ dzaˬ lmˇ lmˇ-ehˇ jawˇ-euˬ meh. 55Piˇ ma aˬ yuiꞈ deuˬ hawˇ-eu Baꞈ dzah#14.55 ‘Baꞈ dzah’ lehˇ ehˇ-eu dawˬ tsuiꞈ, Maꞈtehˬ 26.59-ahˇ haw-awˬ. aˇ muˇ muˇ lah-ehˇ ga uiˬ-awˇ, Yeˬsuˇ-ahˇ yaw lehˬ poˆ doˆ-awˇ sehꞈ-eu lehˇ leh jeh kʼawꞈ, yaw lehˬ tiˬ jeˬ-iˬ maˬ poˆ doˆ nya-a. 56Tsawˇ haˬ gʼawˬ mya gʼaˬ Yeˬsuˇ gaˇ kawˆ jaˬ myawꞈ myawꞈ-eu laꞈ kʼoeˇ saˇ kiˇ kamˬ kʼawꞈ, tiˬ gʼaˬ ehˇ-euˬ tiˬ jeˬ beu beu-ehˇ, yaw duˬ maˬ laˆ baw nya-a.
57Kʼoeˇ ngeh, tsawˇ haˬ tiˬ deuˬ tuˇ laˇ-awˇ, Yeˬsuˇ-euˬ gaˇ kawˆ jaˬ myawꞈ myawꞈ-awˇ heu loꞈ-ehˇ ehˇ-eu meh. 58“‘Tsawˇ haˬ zaˬ neh tsoˆ-euˬ Uˬ duˬ tahˬ nymˇ nymˇ ma heu nymˇ-ahˇ ngaˇ deh pyaˆ dzeh jiˇ-awˇ, smˬ nah laꞈ kʼoeˇ tsawˇ haˬ zaˬ neh maˬ tsoˆ-euˬ Uˬ duˬ tahˬ nymˇ nymˇ ma ngaˇ paˇ tsoˆ kʼoꞈ ma’ lehˇ, tsawˇ haˬ teu gʼaˬ ehˇ-eu nga maꞈ gaˬ duˬ taˬ-euˬ ma.” 59Tsawˇ haˬ kʼoeˇ deuˬ kʼawꞈ, aˬ yawꞈ maꞈ ehˇ-eu gaˇ kawˆ kʼoeˇ tiˬ gʼaˬ tiˇ gʼaˬ duˇ leˇ ni maˬ ehˇ tsaˬ nya-a.
60Kʼoeˇ ngeh, aˬ yawꞈ maꞈ dawˬ tawˆ luꞈ mehˬ shi Piˇ ma Yaw huiˬ gʼaˬ tuˇ laˇ-awˇ, Yeˬsuˇ-ahˇ ehˇ-eu, “Tsawˇ haˬ heu deuˬ nawˬ-euˬ yaw lehˬ dzawˇ gaˇ nawˇ ehˇ kʼoꞈ nehˬ-eu dawˬ maˬ jaˆ loˇ.”
61Ehˇ kʼawꞈ, Yeˬsuˇ dawˬ maˬ tmˇ-ehˇ ciˬ cuˇ ni jawˇ-euˬ meh. Piˇ ma Yaw huiˬ gʼaˬ Yeˬsuˇ-ahˇ tiˬ poˆ paˇ naˇ haˬ-eu, “Guiˬ lahˬ huiˬ-eu Miˬyehˇ-euˬ Zaˬmaˇ pyeuꞈ-eu Ka li lehˇ ehˇ-eu kʼoeˇ gʼaˬ nawˇ ma loˇ.”
62Yeˬsuˇ ehˇ-eu, “Ngeuˇ ma. Tsawˇhaˬ-euˬ Zaˬmaˇ-aˬ, Baoˬ huiˬ-eu Miˬyehˇ-euˬ aˇ maˇ paw nuiˇ luꞈ gaˇ maˬ ehˇ, mˬ dmˇ dziˬ-awˇ zaꞈ ka le gaˇ maˬ ehˇ, naw maꞈ yawˬ gʼaˬ na luꞈ ya mawˇ tehꞈ-a.”
63Kʼoeˇ ngeh poˆ jawˇ, Piˇ ma Yaw huiˬ gʼaˬ yawˬ ha-euˬ pehˇ kʼahˬ pehˇ mahˇ gʼeu paˆ-awˇ ehˇ-eu, “Aˬ dui saˇ kiˇ yawˬ-awˇ yawˬ maˬ paˇ loˬ meh. 64Aˬ yawꞈ Miˬyehˇ-ahˇ yehˬ bawˬ sehˇ lu-ehˇ ehˇ-eu naw maꞈ gaˬ jiˇ-euˬ meh. Naw maꞈ aˬ joˆ-ehˇ noeˬ-eu nya.”
Kʼoeˇ ngeh, aˬ yawꞈ bahˬ-eu miˇ neh, aˬ yawꞈ-ahˇ sehꞈ-eu gʼaˇ duˬ dawˬ tawˆ luꞈ nui ma tsaˬ-euˬ meh.
65Tiˬ paˆ na deuˬ Yeˬsuˇ-ahˇ duˬ kʼaˬ kʼa daˆ-awˇ, myaˆ nuiˆ kaꞈ kaˬ nehˬ-awˇ diˬ diˬ-ehˇ, “Nawˬ-ahˇ diˬ-euˬ aˬ suˇ gʼaˬ nga lehˇ ja maw maw haw sheˇ” lehˇ ehˇ nehˬ-euˬ meh. Kʼoeˇ naˇ, aˬ yawꞈ-ahˇ loꞈ-eu yehˇ deuˬ aˬ yawꞈ-ahˇ tsahˇ-awˇ, baˬ ba-ahˇ tehˆ nehˬ-euˬ meh.
Yeˬsuˇ-ahˇ maˬ siˬ lehˇ Beˬtuˆluˆ pyehˇ-euˬ
(Maꞈtehˬ 26.69-75; Luˇkaꞈ 22.56-62; Yoˇhaˬ 18.15-18,25-27)
66Piˇ ma Yaw huiˬ gʼaˬ-euˬ zaˬ miˬ zaˬ zaˬ kʼaˆ tiˬ gʼaˬ oe ngeh keuˆ ni, nymˇ-ahˇ gawˬ lahˇ taˬ-euˬ laꞈ kʼoeˇ Beˬtuˆluˆ jawˇ luꞈ-eu meh. 67Beˬtuˆluˆ miˬ dzaˬ lmˇ luꞈ gaˇ aˬ yawꞈ ya mawˇ ngeh, yaw muiˬ paˬ-ehˇ haw duˬ-awˇ ehˇ-eu, “Nawˇ jiˇ Naˬzaˬlehˇ tsawˇ haˬ Yeˬsuˇ nehˬ-ehˇ jawˇ-euˬ tsawˇ haˬ meh.”
68Ehˇ kʼawꞈ, aˬ yawꞈ tsawˇ pyehˇ pyehˇ-awˇ ehˇ-eu, “Ngaˇ maˬ siˬ. Nawˇ ehˇ-eu teu ngaˇ tiˬ pawꞈ-iˬ maˬ siˬ nya nya.” Kʼoeˇ loꞈ-ehˇ ehˇ gʼaˬ-awˇ, lahˇ kʼehˬ paw iˇ-euˬ meh. Kʼoeˇ ngeh, ya poeˇ tiˬ tahˬ doeˇ doˆ laˇ-euˬ meh.#14.68 Jaˇliꞈ tiˬ paˆ na deuˬ laꞈ kʼoeˇ, ‘Kʼoeˇ ngeh, ya poeˇ tiˬ tahˬ doeˇ doˆ laˇ-euˬ meh’ lehˇ ehˇ-eu heu deuˆ maˬ ahˇ-a.
69Zaˬ miˬ zaˬ kʼoeˇ gʼaˬ aˬ yawꞈ-ahˇ paˇ mawˇ-awˇ, kʼoeˇ gaˇ yawꞈ luꞈ-eu tsawˬ haˬ deuˬ-ahˇ ehˇ nehˬ-eu, “Teu gʼaˬ jiˇ, aˬ yawꞈ maꞈ-euˬ aˇ muˇ laꞈ kʼoeˇ ahˇ-eu tsawˇ haˬ meh.” 70Ehˇ kʼawꞈ, aˬ yawꞈ maˬ ngeuˇ lehˇ Beˬtuˆluˆ tsawˇ pyehˇ paˇ pyehˇ-euˬ meh.
Tiˬ kʼehˬ paˇ kaˇ-iˇ ngeh, dawˬ peh yawꞈ luꞈ-eu tsawˇ haˬ kʼoeˇ deuˬ Beˬtuˆluˆ-ahˇ ehˇ nehˬ-eu, “Nawˇ gʼeh Gaˬliˬlehˇ miˇ kʼahˬ-ahˇ jawˇ-eu miˇ neh, aˬ yawꞈ maꞈ-euˬ aˇ muˇ-ahˇ ahˇ-eu yaw duˬ baw ngaˇ.”
71Beˬtuˆluˆ ehˇ-eu, “Ngaˇ jaˬ myawꞈ maˬ myawꞈ lehˇ kamˬ peuˬ ma. Ngaˇ jaˬ myawꞈ myawꞈ lawˬ naˇ, Miˬyehˇ ngaˬ-ahˇ kʼehˬ luꞈ-uˇ. Naw maꞈ ehˇ-eu tsawˇ haˬ kʼoeˇ gʼaˬ-ahˇ ngaˇ maˇ maˇ ni maˬ siˬ nya nya.”
72Kʼoeˇ loꞈ-ehˇ ehˇ gʼaˬ-eu maˬ dah ni, ya poeˇ nyiˬ tahˬ tiˬ tahˬ doeˇ doˆ laˇ-euˬ meh. Kʼoeˇ ngeh, “Ya poeˇ nyiˬ tahˬ maˬ doeˇ laˇ mi naˆ-ehˇ, nawˇ ngaˬ-ahˇ maˬ siˬ lehˇ smˬ poˆ keuˆ ni pyehˇ tehꞈ-a” lehˇ, Yeˬsuˇ neh aˬ yawꞈ-ahˇ ehˇ nehˬ-euˬ dawˬ kʼoeˇ dawˬ-ahˇ noeˬ doˆ leˇ-awˇ, nui ma-ahˇ maˬ nyehꞈ tehˬ gʼaˬ coeˇ-ehˇ ngoeˇ-euˬ meh.
Currently Selected:
Maˬkuˆ 14: AHK
Highlight
Share
Copy
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
