Maˬkuˆ 13

Uˬ duˬ tahˬ nymˇ nymˇ ma cawˆ-iˇ meh lehˇ Yeˬsuˇ ehˇ-eu

(Maꞈtehˬ 24.1,2; Luˇkaꞈ 21.5-6)

1Yeˬsuˇ Uˬ duˬ tahˬ nymˇ nymˇ ma laꞈ kʼoeˇ neh doˆ le luꞈ ngeh, aˬ yawꞈ-euˬ zaˬ lahˇ tiˬ gʼaˬ aˬ yawꞈ-ahˇ ehˇ-eu, “Saˬ laˬ-oˇ, haw sheˇ. Kʼaˬ lo heu deuˬ hawˇ-eu nymˇ heu deuˬ aˇ naˆ ni zahˬ leˇ paˬ-ehˇ gʼeh-eu nga.”

2Yeˬsuˇ ehˇ-eu, “Huiˬ dui muiˬ dui dui-eu nymˇ heu deuˬ-ahˇ nawˇ ya mawˇ luꞈ nga laˬ. Nymˇ kʼaˇ gawˬ taˬ-euˬ kʼaˬ lo heu deuˬ tiˬ siˬ-iˬ ma jaˆ ni byaˆ-iˇ jiˇ gaˇ keuˆ tehꞈ-a.”

Shaˬ zahˬ hawˇ-eu kʼehˬ-eu kʼaˆ-eu jeˬ

(Maꞈtehˬ 24.3-14; Luˇkaꞈ 21.7-19)

3Uˬ duˬ tahˬ nymˇ nymˇ ma-euˬ nui baˬ paw jaˆ-eu Saˬloˬ gawˬ jawˬ-ahˇ Yeˬsuˇ nuiˇ luꞈ ngeh, Beˬtuˆluˆ, Yaˬkoˆ, Yoˇhaˬ, Aˬdehˬleh aˬ ha maꞈ tehꞈ-ehˇ ciˬ cuˇ ni laˇ-awˇ naˇ haˬ-eu, 4“Kʼoeˇ loꞈ-ehˇ aˬ myah pyeuꞈ laˇ ta lehˇ ehˇ nehˬ laꞈ sheˇ. Kʼoeˇ deuˬ dawˬ tawˆ luꞈ pyeuꞈ laˇ-eu aˇ yamˬ keuˆ le-euˬ nga lehˇ, nga maꞈ aˬ jeˬ-ahˇ haw-awˇ ya siˬ nmˇ.”

5Aˬ yawꞈ maꞈ-ahˇ Yeˬsuˇ ehˇ nehˬ-eu, “Tsawˇ haˬ tiˬ gʼaˬ-iˬ naw maꞈ-ahˇ gaˇ ma maˬ bi sheuˬ bahˬ ni yaw gahˇ gahˇ-ehˇ dehꞈ-awˬ. 6Ngaˬ-euˬ gʼaˇ duˬ ngehˬ dah le-euˬ ma lehˇ ehˇ-eu tsawˇ haˬ gʼawˬ mya gʼaˬ doˆ le-awˇ, ‘Ngaˇ a yawꞈ ma’ lehˇ ehˇ-eu laꞈ kʼoeˇ, tsawˇ haˬ gʼawˬ mya ni-ahˇ gaˇ ma sheuˬ bahˬ tehꞈ-a. 7Dawˬ peh guiˇ deuˆ luꞈ-eu teˇ saˇ hawˇ-eu, gaˇ mahˇ kaˬ gaˇ guiˇ deuˆ luꞈ-eu gaˇ kawˆ naw maꞈ ya gaˬ ngeh, taˬ tsawˬ guˆ-iˇ. Kʼoeˇ loꞈ-ehˇ gʼeh-eu jeˬ yaw beh keu le tehꞈ-a. Ehˇ kʼawꞈ, aˇ saˬ saˬ-eu aˇ yamˬ keuˆ le-euˬ maˬ ngeuˇ-a siˬ. 8Miˇ kʼahˬ tiˬ kʼahˬ tiˇ kʼahˬ guiˇ deuˆ-awˇ, tsawˇ jeuˬ tiˬ jeuˬ tiˇ jeuˬ ceh tehꞈ-a. Yawˬ gaˇ na luꞈ miˇ luˆ luˆ-awˇ, mehꞈ-eu shuꞈ-eu jeˬ keuˆ le tehꞈ-a. Heu deuˬ dawˬ tawˆ luꞈ, zaˬ baw-eu lehˇ gʼeh ngeh uˬ maˆ naˇ dahˬ beh laˇ-euˬ loꞈ-ehˇ tehꞈ-a siˬ.

9“Naw maꞈ yaw gahˇ gahˇ-ehˇ ya dehꞈ meh. Naw maꞈ-ahˇ aˬ cawˬ paꞈ-awˇ, yaˇ kʼaˬ daˇ-eu saˇ naˇ-ahˇ tsahˇ gʼeh tehꞈ-a. Uˬ duˬ tahˬ nymˇ laꞈ kʼoeˇ naw maꞈ-ahˇ aˬ cawˬ diˬ tehꞈ-a. Naw maꞈ ngaˬ-ahˇ jah-eu jeˬ baˬ da neh, sahˬ paˬ sahˬ ma deuˬ mehˬ shi naw maꞈ ya yawꞈ leˇ-awˇ, saˇ kiˇ ya kamˬ tehꞈ-a. 10Ehˇ kʼawꞈ, aˇ saˬ saˬ-eu aˇ nah aˇ yamˬ maˬ keuˆ le mi naˆ-ehˇ, tsawˇ haˬ dawˬ tawˆ luꞈ-ahˇ laˬ kʼaˬ cehˇ-eu guiˬ lahˬ dawˬ ya mehˬ doe tehꞈ-a. 11Naw maꞈ-ahˇ aˬ cawˬ paꞈ-awˇ yaˇ kʼaˬ daˇ-eu saˇ naˇ-ahˇ tsahˇ gʼeh ngeh, aˬ joˆ-ehˇ ya ngehˬ ya tmˇ-eu gaˇ kawˆ aˇ yamˬ maˬ keuˆ laˇ mi naˆ-ehˇ kʼahˬ taˬ lahˇ. Aˇ yamˬ keuˆ laˇ ngeh, naw maꞈ-ahˇ kʼaˇ bi ngehˬ-euˬ jeˬ ngehˬ-awˬ. Aˬ jeˬ miˇ neh ehˇ naˇ, naw maꞈ ya ngehˬ-eu dawˬ kʼoeˇ-aˬ, naw maꞈ-euˬ dawˬ maˬ ngeuˇ-a. Muiˬ-eu shawˇ-eu Yaw sahˇ Miˬyehˇ-euˬ dawˬ meh. 12Mehˇ nmˇ yaw kaˬ tiˬ gʼaˬ tiˇ gʼaˬ sehꞈ-eu gʼaˇ duˬ aˬ cawˬ-euˬ aˬ laꞈ laꞈ kʼoeˇ a nehˬ tehꞈ-a. Aˬ da deuˬ kʼawꞈ zaˬ deuˬ-ahˇ kʼoeˇ loꞈ-ehˇ jahˇ nehˬ tehꞈ-a. Zaˬ deuˬ aˬ da aˬ ma-ahˇ puiˬ-awˇ sehꞈ tehꞈ-a. 13Naw maꞈ ngaˬ-ahˇ jah-eu baˬ da neh, tsawˇ haˬ yawˬ gʼaˬ na luꞈ naw maꞈ-ahˇ bye tehꞈ-a. Ehˇ kʼawꞈ, aˇ saˬ saˬ ngeh keuˆ ni ziꞈ-eu tsawˇ haˬ ka kʼoꞈ-eu jeˬ za tehꞈ-a.

Guˆ dui dui laˇ paˬ-ehˇ gʼeh-eu yaw jawꞈ jeˬ

(Maꞈtehˬ 24.15-28; Luˇkaꞈ 21.20-24)

14“‘Guˆ dui dui laˇ paˬ-ehˇ gʼeh-eu yaw jawꞈ jeˬ’ kʼoeˇ, maˬ bi jaˆ kʼmˬ-eu jawˇ duˬ-ahˇ jaˆ laˇ taˬ-euˬ gaˇ naw maꞈ ya mawˇ tehꞈ-a.” (Jaˇliꞈ gui-eu deuˬ dawˬ heu dawˬ-euˬ dawˬ tsuiꞈ gʼoˆ shaw-awˬ.)#13.14 Heu-aˬ, Maꞈtehˬ aˬ yawꞈ neh boꞈ-euˬ sahˬ boꞈ heu-ahˇ gui dahˬ beh-eu aˇ hu tsawˇ haˬ deuˬ-ahˇ ehˇ nehˬ-euˬ dawˬ meh. Aˬ yawꞈ maꞈ-euˬ ziˇ-ahˇ pyeuꞈ dzeuˇ yaꞈ-euˬ gaˇ kawˆ deuˬ-ahˇ bi noeˬ mawˇ-eu gʼaˇ duˬ ehˇ-euˬ jeˬ pyeuꞈ-eu meh. “Kʼoeˇ ngeh, Yuˇdaˆ miˇ kʼahˬ-ahˇ jawˇ-eu tsawˇ haˬ deuˬ gawˬ jawˬ paw ya cehˆ daˆ meh. 15Nymˇ mˬ kʼoeˇ taˆ jawˇ luꞈ-eu tsawˇ haˬ, nymˇ laꞈ kʼoeˇ zaꞈ uˇ-iˇ-awˇ myawˬ yuˇ doˆ laˬ-iˇ-eu maˬ dah-aˇ. 16Yaˇ ngeh jawˇ-eu tsawˇ haˬ iˇ kahˇ-ahˇ mehˬ tsoeˬ cehˆ laˬ-iˇ-eu maˬ dah-aˇ. 17Aˇ nah aˇ yamˬ kʼoeˇ keuˆ le ngeh, aˬ nyiˇ pi luꞈ-eu zaˬ miˬ zaˬ deuˬ hawˇ-eu, zaˬ nahˬ aˬ ma deuˬ shaˬ zahˬ naꞈ dui dui tehꞈ-a. 18Kʼoeˇ loꞈ-ehˇ gʼeh-eu jeˬ bi keuˆ le-eu aˇ yamˬ kʼoeˇ, tsahˬ gaˆ yamˬ-ahˇ maˬ bi tsaˬ laˇ ni, Miˬyehˇ-ahˇ guiˬ lahˬ shaˇ-awˬ. 19Aˬ jeˬ miˇ neh ehˇ naˇ, kʼoeˇ ngeh poˆ keuˆ le-eu guˆ-eu gaˆ-eu jeˬ kʼoeˇ-aˬ, Miˬyehˇ mˬ beh miˇ beh beh ngeh neh kʼaˇ keuˆ le dzeuˇ yaꞈ-euˬ jeˬ hawˇ-eu, aˬ kaˇ kʼaˇ keuˆ le-eu jeˬ dawˬ tawˆ luꞈ naˆ maˬ tseˇ, guˆ dui dui laˇ paˬ-ehˇ gʼeh-eu meh. 20Ehˇ kʼawꞈ, aˇ nah aˇ yamˬ kʼoeˇ Sahˬpaˬ Miˬyehˇ neh laˆ nymˇ taˬ-euˬ meh. Aˬ yawꞈ kʼoeˇ loꞈ-ehˇ maˬ laˆ nymˇ law nmˇ-aˬ, tsawˇ haˬ tiˬ gʼaˬ-iˬ maˬ dzeuˇ-iˇ nya-aˇ. Aˬ yawꞈ neh tseˇ doˆ-euˬ tsawˇ haˬ deuˬ gʼaˇ duˬ shaˇ noeˬ-awˇ, aˇ nah aˇ yamˬ kʼoeˇ nymˇ le ni aˬ yawꞈ jahˇ-euˬ meh.

21“‘Haw-awˬ. Ka li heu gaˇ jawˇ ngaˇ. Kʼoeˇ gaˇ jawˇ ngaˇ’ lehˇ, tsawˇ haˬ tiˬ gʼaˬ na ehˇ laˇ gaˇ naw maꞈ taˬ jah. 22Ka li jaˬ myawꞈ deuˬ hawˇ-eu, Miˬyehˇ gʼaˇ duˬ ngehˬ dah-eu jaˬ myawꞈ deuˬ oe doˆ tehꞈ-a. Aˬ yawꞈ maꞈ zahˬ leˇ paˬ-ehˇ gʼeh-eu jeˬ hawˇ-eu, kʼaˆ jehˬ-ehˇ gʼeh-eu jeˬ jahˇ mehˬ-eu laꞈ kʼoeˇ, gʼeh nya naˇ, Miˬyehˇ neh tseˇ doˆ-euˬ tsawˇ haˬ deuˬ-ahˇ kʼawꞈ, mehˇ shuiˇ shuiˇ tawˆ-awˇ gaˇ ma sheuˬ bahˬ gʼeh tehꞈ-a. 23Yaw gahˇ gahˇ-ehˇ dehꞈ-awˬ. Aˇ yamˬ maˬ keuˆ le mi naˆ-ehˇ yawˬ jeˬ na luꞈ naw maꞈ-ahˇ ngaˇ ehˇ nehˬ taˬ-eu ma.

Tsawˇhaˬ-euˬ Zaˬmaˇ zaꞈ ka le-eu gaˇ kawˆ

(Maꞈtehˬ 24.29-31; Luˇkaꞈ 21.25-28)

24Guˆ-eu gaˆ-eu aˇ nah aˇ yamˬ kʼoeˇ dzeuˇ-iˇ ngeh jawˇ, nahˇ ma zahˇ tsui ni pyeuꞈ-iˇ-awˇ, ba la yaw shehꞈ maˬ paˇ bya-ehˇ, 25aˬ guiˇ deuˬ mˬ kʼoeˇ taˆ neh ga ka le-awˇ, mˬ kʼoeˇ taˆ-euˬ baoˬ dawˬ tawˆ luꞈ nyeh laˇ yaˇ laˇ jiˇ tehꞈ-a. 26Kʼoeˇ naˇ, Tsawˇhaˬ-euˬ Zaˬ maˇ mˬ dmˇ dziˬ-awˇ, baoˬ yaw shehꞈ kʼahˬ sehˇ tiˬ byah ni oe gaˇ ya mawˇ tehꞈ-a. 27Aˬ yawꞈ-euˬ mˬ taˆ gʼaˬ kʼehˇ deuˬ-ahˇ miˇ ma oeˬ coeˇ oeˬ pyawˬ-ahˇ aˬ yawꞈ pyehˬ gʼeh-awˇ, mˬ dzeˇ miˇ dzeˇ kʼoeˇ dzeˇ heu dzeˇ doˆ ni jawˇ luꞈ-eu, Miˬyehˇ neh tseˇ doˆ-euˬ tsawˇ haˬ deuˬ bi sheuˬ uiˬ laꞈ tehꞈ-a.

Siˬ guˬ aˇ bawˇ-ahˇ haw-awˇ yamˬ law toꞈ-awˬ

(Maꞈtehˬ 24.32-35; Luˇkaꞈ 21.29-33)

28siˬ guˬ aˇ bawˇ-ahˇ haw-awˇ yamˬ law toꞈ-awˬ. Laꞈ myaˆ myaˆ laˇ-awˇ, baw nmˬ nmˬ laˇ naˇ, jawˇ la doˆ le meh lehˇ naw maꞈ siˬ nya meh. 29Kʼoeˇ loꞈ-ehˇ duˇ ni, gaˇ kawˆ kʼoeˇ deuˬ pyeuꞈ laˇ luꞈ gaˇ naw maꞈ ya mawˇ ngeh, miˇ tsaˬ heu aˇ saˬ saˬ-eu aˇ yamˬ keuˆ le luꞈ-eu naw maꞈ siˬ nya-awˬ. 30Nymˬ-mˇ dehꞈ luꞈ-eu tsawˇ haˬ heu deuˬ maˬ shiˇ jiˇ mi naˆ-ehˇ, kʼoeˇ deuˬ dawˬ tawˆ luꞈ pyeuꞈ laˇ tehꞈ-a lehˇ, naw maꞈ-ahˇ ngaˇ maˇ jawˆ ni ehˇ-eu ma. 31Mˬ hawˇ-eu miˇ maˬ jaˆ coeˇ-ehˇ byoˆ-iˇ tehꞈ-a. Ehˇ kʼawꞈ, ngaˬ-euˬ dawˬ tiˬ jawˇ-iˬ maˬ byoˆ-iˇ-aˇ.

Tsawˇhaˬ-euˬ Zaˬmaˇ zaꞈ le-eu aˇ yamˬ tiˬ gʼaˬ-iˬ maˬ siˬ nya-a

(Maꞈtehˬ 24.36-44)

32“Aˇ nah aˇ yamˬ kʼoeˇ aˬ geu ngeh keuˆ le-eu tsawˇ haˬ tiˬ gʼaˬ-iˬ maˬ siˬ nya-a. Mˬ taˆ gʼaˬ kʼehˇ deuˬ maˬ ehˇ, Zaˬ maˇ maˬ ehˇ, maˬ siˬ nya-a. Aˬda Miˬyehˇ tiˬ gʼaˬ tehꞈ-ehˇ siˬ nya-eu meh. 33Aˇ yamˬ kʼoeˇ aˬ geu ngeh keuˆ le-eu naw maꞈ maˬ siˬ nya-eu miˇ neh, yaw gahˇ gahˇ-ehˇ dehꞈ-awˇ, yaw beuˇ beuˇ-ehˇ jawˇ-awˬ. 34Gaˇ kawˆ kʼoeˇ-aˬ, tsawˇ haˬ tiˬ gʼaˬ aˬ yawꞈ-euˬ zaˬ kʼaˆ deuˬ-ahˇ gaˇ biˇ nehˬ yaꞈ-awˇ gaˇ ma doˆ-iˇ gaˇ duˇ tehꞈ-a. Zaˬ kʼaˆ aˬ yawꞈ gʼaˬ yawꞈ-ahˇ gaˇ biꞈ yaꞈ-awˇ, laˇ gʼoˆ-ahˇ loꞈ-eu gʼaˬ-ahˇ yaw beuˇ beuˇ-ehˇ loꞈ-eu gʼaˇ duˬ mehˬ nehˬ yaꞈ-awˇ doˆ-iˇ-euˬ meh. 35Nymˇ sahˇ gʼaˬ gʼoꞈ laˇ-eu aˇ yamˬ naw maꞈ maˬ siˬ nya-eu miˇ neh, noeˬ gahˇ-awˇ jawˇ-awˬ. Uˬ ciꞈ uˬ taw paw maˬ siˬ. Sehˇ gʼahˇ ceh laˇ ngeh maˬ siˬ. 36Naw maꞈ maˬ noeˬ gahˇ naˇ, aˬ yawꞈ ja pyuˬ ni gʼoꞈ keuˆ le ngeh, naw maꞈ yuꞈ kʼaˆ luꞈ gaˇ zaˬ leˇ tehꞈ-a. 37Ngaˇ naw maꞈ-ahˇ ehˇ-eu heu, tsawˇ haˬ dawˬ tawˆ luꞈ-ahˇ ehˇ-eu ma. Yaw beuˇ beuˇ-ehˇ jawˇ-awˬ.”

Currently Selected:

Maˬkuˆ 13: AHK

Highlight

Copy