Maꞈtehˬ 27
27
Yeˬsuˇ-ahˇ Piˇlaˆ jawˇ gaˇ sheuˬ gʼeh-euˬ
(Maˬkuˆ 15.1; Luˇkaꞈ 23.1-2; Yoˇhaˬ 18.28-32)
1Uˬ bya bya laˇ ngeh, piˇ ma aˬ yuiꞈ deuˬ hawˇ-eu aˬ yuiꞈ aˬ tsu deuˬ dawˬ tawˆ luꞈ, Yeˬsuˇ-ahˇ bi sehꞈ-eu gʼaˇ duˬ bawˬ dzaˬ-euˬ meh. 2Aˬ yawꞈ maꞈ aˬ yawꞈ-ahˇ shmˇ caˆ paꞈ-awˇ tsahˇ doˆ gʼeh-awˇ, Loˇmaˆ tsawˇ haˬ sahˬ paˬ Piˇlaˆ#27.2 Sahˬ paˬ Piˇlaˆ-aˬ, Yuˇdaˆ miˇ kʼahˬ hawˇ-eu Saˬmaˬliˆ miˇ kʼahˬ-ahˇ bi uˆ lahˇ-eu gʼaˇ duˬ, Loˇmaˆ sahˬ paˬ Gehˇsaˬ neh kʼehˇ taˬ-euˬ sahˬ paˬ pyeuꞈ-eu meh. jawˇ gaˇ tsahˇ gʼeh-euˬ meh.
Yuˇdaˆ shiˇ-euˬ
(Gʼaˬkʼehˇ 1.18,19)
3Yeˬsuˇ-ahˇ ahˬ dzaˬ-euˬ Yuˇdaˆ kʼoeˇ gʼaˬ, Yeˬsuˇ-ahˇ sehꞈ-eu gʼaˇ duˬ aˬ cawˬ yaˇ kʼaˬ daˇ tsehˆ gʼaˬ-euˬ gaˇ kawˆ ya siˬ ngeh, yawˬ ha neh mˇ lehˬ-euˬ gaˇ kawˆ noeˬ shaˬ dui dui-awˇ, piˇ ma aˬ yuiꞈ deuˬ hawˇ-eu aˬ yuiꞈ aˬ tsu deuˬ jawˇ gaˇ pyuˇ maˇ byaˆ kʼoeˇ smˬ tseˇ byaˆ biꞈ kʼoꞈ ha-iˇ-euˬ meh. 4Aˬ yawꞈ ehˇ-eu, “Iˬ baˇ maˬ ahˇ-eu tsawˇ haˬ-ahˇ bi sehꞈ-eu lehˇ ahˬ dzaˬ-euˬ ngaˬ-euˬ yaw lehˬ heu, iˬ baˇ huiˬ dui dui nya.” Aˬ yawꞈ maꞈ ehˇ-eu, “Gaˇ kawˆ teu nga maꞈ-ahˇ tiˬ jeˬ-iˬ maˬ taꞈ. Nawˬ-euˬ gaˇ kawˆ nawˇ tehꞈ meh.”
5Yuˇdaˆ-aˬ, pyuˇ maˇ byaˆ kʼoeˇ deuˬ Uˬ duˬ tahˬ nymˇ nymˇ ma laꞈ kʼoeˇ biˬ ahˇ yaꞈ-awˇ doˆ-iˇ-euˬ meh. Kʼoeˇ naˇ, yawˬ haˇ yawˬ ya paꞈ gʼeu sehꞈ-iˇ-euˬ meh.
6Piˇ ma aˬ yuiꞈ deuˬ pyuˇ kʼoeˇ deuˬ gʼoˆ kʼoꞈ-awˇ ehˇ-eu, “Pyuˇ heu deuˬ-aˬ, shiˬ-euˬ aˇ poeˬ biꞈ-euˬ pyuˇ pyeuꞈ-eu miˇ neh, Uˬ duˬ tahˬ nymˇ nymˇ ma-euˬ pyuˇ nehˬ-ehˇ maˬ dawˆ ahˇ taˬ kʼmˬ-a.” 7Kʼoeˇ naˇ, daˬ yah deuˬ shiˇ ngeh duˬ pahˬ-eu lmˬ bymˇ geuꞈ-eu gʼaˇ duˬ, pyuˇ kʼoeˇ neh Oeˬ lahˬ tehˆ-eu tsawˇ haˬ-euˬ Miˇ tsaˬ lehˇ kuˇ-eu miˇ tsaˬ tiˬ tsahˇ zeuˇ-euˬ meh. 8Kʼoeˇ miˇ neh, jawˇ duˬ kʼoeˇ tsahˇ-ahˇ iˬ nah keuˆ ni “Shiˬ-euˬ Miˇ tsaˬ” lehˇ kuˇ-eu meh.
9Miˬyehˇ gʼaˇ duˬ ngehˬ dah-eu Yeˬlaˬmiˇ neh ehˇ taˬ-euˬ dawˬ, kʼoeˇ gaˇ byah laˇ-euˬ meh. “Iˇsaˬleˬlaˆ tsawˇ haˬ deuˬ neh aˬ yawꞈ-euˬ aˇ poeˬ daˇ tsehˆ-euˬ loꞈ-ehˇ, aˬ yawꞈ maꞈ pyuˇ mehˇ byaˆ smˬ tseˇ byaˆ yuˇ-euˬ meh. 10SahˬpaˬMiˬyehˇ neh ngaˬ-ahˇ dawˬ biꞈ taˬ-euˬ loꞈ-ehˇ, pyuˇ kʼoeˇ neh oeˬ lahˬ tehˆ-eu tsawˇ haˬ-euˬ miˇ tsaˬ zeuˇ-euˬ meh” lehˇ ehˇ taˬ-euˬ jaˆ-eu meh.
Sahˬ paˬ Piˇlaˆ Yeˬsuˇ-ahˇ pyehˆ tseˇ-euˬ
(Maˬkuˆ 15.2-5; Luˇkaꞈ 23.3-5; Yoˇhaˬ 18.33-38)
11Loˇmaˆ sahˬ paˬ mehˬ shi Yeˬsuˇ-ahˇ bi yawꞈ-euˬ meh. Loˇmaˆ sahˬ paˬ kʼoeˇ gʼaˬ Yeˬsuˇ-ahˇ naˬ haˬ-eu, “Nawˇ Yuˇdaˆ tsawˇ haˬ-euˬ sahˬ paˬ ma loˇ.”
Yeˬsuˇ ehˇ-eu, “Nawˇ ehˇ ngaˇ tawˇ.” 12Ehˇ kʼawꞈ, piˇ ma aˬ yuiꞈ deuˬ hawˇ-eu aˬ yuiꞈ aˬ tsu deuˬ aˬ yawꞈ-ahˇ yaw lehˬ poˆ-awˇ ehˇ laˇ gaˇ, aˬ yawꞈ dawˬ maˬ tmˇ ni ciˬ cuˇ ni jawˇ-euˬ meh.
13“Aˬ yawꞈ maꞈ nawˬ-ahˇ teu naˆ naˆ-ehˇ ehˇ luꞈ-eu nawˇ maˬ gaˬ te loˇ” lehˇ, sahˬ paˬ Piˇlaˆ aˬ yawꞈ-ahˇ naˇ haˬ-euˬ meh.
14Ehˇ kʼawꞈ, Yeˬsuˇ dawˬ tiˬ dawˬ-iˬ maˬ tmˇ gaˇ sahˬ paˬ kʼoeˇ gʼaˬ zahˬ dui dui leˇ-euˬ meh.
Yeˬsuˇ-ahˇ sehꞈ-eu gʼaˇ duˬ daˇ tsehˆ-euˬ
(Maˬkuˆ 15.6-15; Luˇkaꞈ 23.13-25; Yoˇhaˬ 18.39—19.16)
15Baˬsaˬkaˬ Bawˬ-iˬ kʼaˇ gʼeh ngeh, tawˬ-ahˇ uˇ-eu tsawˇ haˬ deuˬ laꞈ kʼoeˇ, tsawˇ haˬ aˇ maꞈ neh bi pyehˬ doˆ mawꞈ-eu tsawˇ haˬ tiˬ gʼaˬ-ahˇ, Loˇmaˆ sahˬ paˬ pyehˬ doˆ nehˬ-eu meh. 16Kʼoeˇ ngeh, Yeˬsuˇ Baˬlaˬbaˇ lehˇ myahˇ-euˬ yaw haiˬ mˇ-eu tsawˇ myahˇ doˆ dui dui-eu tsawˇ haˬ tiˬ gʼaˬ tawˬ-ahˇ uˇ-eu meh. 17Tsawˇ haˬ aˇ maꞈ maꞈ ma uiˬ laˇ-awˇ jawˇ ngeh, sahˬ paˬ Piˇlaˆ ehˇ-eu, “Naw maꞈ ngaˬ-ahˇ tsawˇ haˬ aˬ geu gʼaˬ bi pyehˬ nehˬ mawꞈ-eu nya. Yeˬsuˇ Baˬlaˬbaˇ lehˇ kuˇ-eu kʼoeˇ gʼaˬ loˇ. Maˬ ngeuˇ naˇ, Ka li lehˇ kuˇ-eu Yeˬsuˇ kʼoeˇ gʼaˬ loˇ.” 18Yuˇdaˆ tsawˇ haˬ aˬ yuiꞈ aˬ tsu deuˬ Yeˬsuˇ-ahˇ myaˆ naˆ-eu miˇ neh, aˬ yawꞈ jawˇ gaˇ nyehꞈ ha laˇ-euˬ gaˇ kawˆ sahˬ paˬ Piˇlaˆ siˬ duˬ taˬ-euˬ meh.
19Yaˇ kʼaˬ daˇ-eu nuiˇ mahˬ kʼoeˇ taˆ sahˬ paˬ Piˇlaˆ nuiˇ luꞈ ngeh, aˬ yawꞈ-euˬ nymˇ dahˬ heu loꞈ-ehˇ dawˬ tsaꞈ tsaꞈ ahˇ leꞈ-euˬ meh. “Iˬ baˇ maˬ ahˇ-eu tsawˇ haˬ kʼoeˇ gʼaˬ-ahˇ tiˬ jeˬ-iˬ taˬ jahˇ. Miˇ ciꞈ ngaˇ yuꞈ maˆ maˆ-eu laꞈ kʼoeˇ, aˬ yawꞈ baˬ da neh shaˬ zahˬ mˇ dui dui-euˬ ma.”
20Baˬlaˬbaˇ-ahˇ pyehˬ-awˇ Yeˬsuˇ-ahˇ sehꞈ ni sahˬ paˬ Piˇlaˆ-ahˇ shaˇ-eu gʼaˇ duˬ, piˇ ma aˬ yuiꞈ deuˬ hawˇ-eu aˬ yuiꞈ aˬ tsu deuˬ neh tsawˇ haˬ aˇ maꞈ-ahˇ mehˬ gahˇ taˬ-euˬ meh. 21Tsawˇ haˬ aˇ maꞈ-ahˇ sahˬ paˬ Piˇlaˆ ehˇ nehˬ-eu, “Tsawˇ haˬ heu nyiˬ gʼaˬ laꞈ kʼoeˇ, aˬ geu gʼaˬ-ahˇ bi pyehˬ mawꞈ-eu nya.”
Aˬ yawꞈ maꞈ ehˇ-eu, “Baˬlaˬbaˇ-ahˇ pyehˬ-awˬ.”
22Sahˬ paˬ Piˇlaˆ ehˇ-eu, “Toˆ-ehˇ jeˬ maˇ-iˬ, Ka li lehˇ kuˇ-eu Yeˬsuˇ-ahˇ ngaˇ aˬ joˆ-ehˇ jahˇ nmˇ.”
Aˬ yawꞈ maꞈ dawˬ tawˆ luꞈ ehˇ-eu, “Laꞈ yaꞈ kʼoeˇ taˆ taꞈ sehꞈ-awˬ.”
23Sahˬ paˬ Piˇlaˆ ehˇ-eu, “Aˬ jeˬ miˇ neh aˬ yawꞈ-ahˇ sehꞈ mawꞈ-eu nya. Aˬ yawꞈ mˇ lehˬ taˬ-euˬ aˬ jeˬ jaˆ ta.”
Aˬ yawꞈ maꞈ yaw kʼaˆ-ehˇ guˇ-awˇ ehˇ-eu, “Aˬ yawꞈ-ahˇ laꞈ yaꞈ kʼoeˇ taˆ taꞈ sehꞈ-awˬ.”
24Aˬ yawꞈ neh ehˇ-euˬ dawˬ-ahˇ aˬ yawꞈ maꞈ maˬ naˇ haˬ geuꞈ-eu uꞈ taꞈ, miˇ kʼahˬ zaˬ deuˬ luiˬ gʼa laˇ-awˇ suˬ saˬ laˇ-eu gaˇ ma dahˇ gaˇ sahˬ paˬ Piˇlaˆ haw mawˇ ngeh, iˇ cuꞈ ciˬ-awˇ tsawˇ haˬ aˇ maꞈ maꞈ ma mehˬ shi aˬ laꞈ dzuiˬ dzeh-awˇ ehˇ-eu, “Tsawˇ haˬ heu gʼaˬ ya shiˇ-eu gaˇ kawˆ heu ngaˬ-ahˇ tiˬ jeˬ-iˬ maˬ taꞈ. Naw maꞈ neh mˇ-euˬ gaˇ meh.”
25Kʼoeˇ ngeh, tsawˇ haˬ dawˬ tawˆ luꞈ ehˇ-eu, “Tsawˇ haˬ teu gʼaˬ-ahˇ sehꞈ-eu iˬ baˇ kʼoeˇ, nga maꞈ kʼoeˇ taˆ hawˇ-eu nga maꞈ-euˬ zaˬ deuˬ kʼoeˇ taˆ keuˆ le luꞈ-uˇ.”
26Kʼoeˇ naˇ, aˬ yawꞈ maꞈ gʼaˇ duˬ, sahˬ paˬ Piˇlaˆ neh Baˬlaˬbaˇ-ahˇ pyehˬ doˆ nehˬ-euˬ meh. Kʼoeˇ naˇ, Yeˬsuˇ-ahˇ yahˬ caˆ neh bi juiꞈ gʼaˬ ngeh, laꞈ yaꞈ kʼoeˇ taˆ bi taꞈ sehꞈ-eu gʼaˇ duˬ, aˬ yawꞈ maꞈ-euˬ aˬ laꞈ laꞈ kʼoeˇ a nehˬ-euˬ meh.
Yehˇ deuˬ Yeˬsuˇ-ahˇ naˬ gʼa-euˬ
(Maˬkuˆ 15.16-20; Yoˇhaˬ 19.2-3)
27Kʼoeˇ naˇ, sahˬ paˬ Piˇlaˆ-euˬ yehˇ deuˬ neh Yeˬsuˇ-ahˇ sahˬ paˬ-euˬ hawˇ nymˇ laꞈ kʼoeˇ sheuˬ gʼeh-awˇ, yehˇ tiˬ maꞈ maꞈ lah ni, aˬ yawꞈ-euˬ tiˬ jawˬ uiˬ le-euˬ meh. 28Aˬ yawꞈ maꞈ aˬ yawꞈ-euˬ mehˬ tsoeˬ lehˆ doˆ-awˇ, neˇ tseuˆ ni gʼeh-eu pehˇ kʼahˬ pehˇ mahˇ sheu dm nehˬ-euˬ meh. 29Aˬ yawꞈ maꞈ aˬ gah ciˇ ni neh sahˬ paˬ kʼoˆ-eu shuiˇ uˬ kʼoˆ loꞈ-ehˇ jahˇ-awˇ, Yeˬsuˇ-ahˇ bi kʼoˆ-euˬ meh. Aˬ yawꞈ-euˬ aˇ maˇ laꞈ-ahˇ aˇ toꞈ tiˬ kahˬ bi yuˇ-euˬ meh. Kʼoeˇ naˇ, aˬ yawꞈ-euˬ mehˬ shi pawˬ tsuiꞈ pawˬ dmˬ dmˬ-awˇ, “Yuˇdaˆ sahˬ paˬ ziˇ baw ziˇ za luꞈ-uˇ” lehˇ naˬ gʼa-eu meh. 30Aˬ yawꞈ maꞈ aˬ yawꞈ-ahˇ duˬ kʼaˬ kʼa daˆ-awˇ, aˇ toꞈ aˇ kahˬ kʼoeˇ kahˬ neh uˬ duˬ-ahˇ diˬ-euˬ meh. 31Aˬ yawꞈ maꞈ aˬ yawꞈ-ahˇ niˇ gʼa dehˆ gʼaˬ ngeh, pehˇ kʼahˬ pehˇ mahˇ nyehꞈ lehˆ-awˇ, aˬ yawꞈ-ahˇ laꞈ yaꞈ kʼoeˇ taˆ taꞈ sehꞈ-eu gʼaˇ duˬ sheuˬ doˆ gʼeh-euˬ meh.
Yeˬsuˇ-ahˇ laꞈ yaꞈ kʼoeˇ taˆ taꞈ sehꞈ-euˬ
(Maˬkuˆ 15.21-30; Luˇkaꞈ 23.26-43; Yoˇhaˬ 19.17-27)
32Aˬ yawꞈ maꞈ doˆ-iˇ luꞈ ngeh, Kuˇleˬniˬ meuˬ-ahˇ jawˇ-eu Siˇmoˬ lehˇ myahˇ-euˬ tsawˇ haˬ tiˬ gʼaˬ-ahˇ aˬ yawꞈ maꞈ ya mawˇ-awˇ, yehˇ kʼoeˇ deuˬ neh aˬ yawꞈ-ahˇ nyehꞈ tehˬ-awˇ, Yeˬsuˇ-euˬ laꞈ yaꞈ bi baꞈ-euˬ meh. 33Gawˇlaˆgawˇtaˆ lehˇ ehˇ-eu jawˇ duˬ-ahˇ aˬ yawꞈ maꞈ le keuˆ-euˬ meh. Gawˇlaˆgawˇtaˆ lehˇ ehˇ-eu dawˬ tsuiꞈ-aˬ, “Uˬ duˬ kʼmˬ lehˇ kuˇ-eu jawˇ duˬ” lehˇ ehˇ mawꞈ-eu meh. 34Kʼoeˇ gaˇ le keuˆ ngeh, aˬ yawꞈ maꞈ aˬ yawꞈ-ahˇ yaw kʼaˬ jeˬ keuˬ taˬ-euˬ aˬ gaꞈ dzaˇ uiˇ ciˬ nehˬ-awˇ bi dawˇ-euˬ meh. Ehˇ kʼawꞈ, aˬ yawꞈ ui cuiˆ myeuꞈ haw-awˇ, maˬ dawˇ ni byehˇ-euˬ meh.
35Aˬ yawꞈ maꞈ aˬ yawꞈ-ahˇ laꞈ yaꞈ kʼoeˇ taˆ taꞈ tehˬ-awˇ, aˬ yawꞈ-euˬ mehˬ tsoeˬ deuˬ-ahˇ, aˬ yawꞈ maꞈ yaw kaˬ shehˆ tsaˬ tsaˬ-awˇ biˇ geuꞈ-euˬ meh. 36Kʼoeˇ naˇ, aˬ yawꞈ maꞈ kʼoeˇ gaˇ nuiˇ-awˇ, aˬ yawꞈ-ahˇ loꞈ-euˬ meh. 37“Tsawˇ haˬ heu gʼaˬ Yuˇdaˆ tsawˇ haˬ-euˬ sahˬ paˬ pyeuꞈ-eu Yeˬsuˇ meh” lehˇ boꞈ taˬ-euˬ, aˬ yawꞈ-ahˇ yaw lehˬ no-euˬ dawˬ kʼoeˇ dawˬ, aˬ yawꞈ-euˬ uˬ duˬ kʼoeˇ taˆ paw dzeˇ taꞈ myahˬ taˬ-euˬ meh. 38Kʼoeˇ naˇ, tahˇ joe nyiˬ gʼaˬ-ahˇ, aˬ yawꞈ nehˬ-ehˇ tiˬ kawˆ loꞈ-ehˇ, aˬ yawꞈ-euˬ aˇ maˇ paw tiˬ gʼaˬ, aˇ caˇ paw tiˬ gʼaˬ lehˇ, laꞈ yaꞈ kʼoeˇ taˆ taꞈ tehˬ taˬ-euˬ meh.
39Iˇ tsehˆ laˇ tsehˆ-eu deuˬ uˬ duˬ juiꞈ-awˇ, Yeˬsuˇ-ahˇ yehˬ bawˬ sehˇ lu-ehˇ ehˇ-eu meh. 40Aˬ yawꞈ maꞈ ehˇ-eu, “Uˬ duˬ tahˬ nymˇ nymˇ ma-ahˇ deh pyaˆ deh shaˆ jiˇ-awˇ, smˬ nah laꞈ kʼoeˇ tsoˆ kʼoꞈ nya-eu gʼaˬ-oˇ, yawˬ haˇ yawˬ ha ka kʼoꞈ-awˬ tawˇ. Nawˇ Miˬyehˇ-euˬ Zaˬmaˇ ngeuˇ-eu jeˬ maˇ-iˬ, laꞈ yaꞈ kʼoeˇ taˆ neh zaꞈ ka le-awˬ tawˇ.”
41Piˇ ma aˬ yuiꞈ deuˬ, Zahˇ dawˬ kʼoꞈ dawˬ mehˬ-eu saˬ laˬ deuˬ hawˇ-eu, aˬ yuiꞈ aˬ tsu deuˬ kʼawꞈ, aˬ yawꞈ-ahˇ heu loꞈ-ehˇ naˬ gʼa-eu meh. 42“Aˬ yawꞈ aˬ cawˬ-ahˇ ka kʼoꞈ nya-euˬ kʼawꞈ, yawˬ haˇ yawˬ ha maˬ ka kʼoꞈ nya law hawˇ ngaˬ laˬ. Aˬ yawꞈ Iˇsaˬleˬlaˆ tsawˇjeuˬ-euˬ sahˬ paˬ maˬ ngeuˇ-a loˇ. Nymˬ-mˇ aˬ yawꞈ laꞈ yaꞈ kʼoeˇ taˆ neh zaꞈ ka le nya law nmˇ-aˬ, aˬ dui maꞈ aˬ yawꞈ-ahˇ jah tehꞈ-a tawˇ. 43Aˬ yawꞈ Miˬyehˇ-ahˇ jah-awˇ, Miˬyehˇ-euˬ Zaˬmaˇ ma lehˇ yawˬ haˇ yawˬ ha ehˇ-eu meh. Miˬyehˇ aˬ yawꞈ-ahˇ ka kʼoꞈ nehˬ mawꞈ ngaˇ-a loˇ lehˇ haw kaˇ-euˇ.”
44Aˬ yawꞈ nehˬ-ehˇ tiˬ kawˆ loꞈ-ehˇ laꞈ yaꞈ kʼoeˇ taˆ bi taꞈ tehˬ taˬ-euˬ tahˇ joe kʼoeˇ nyiˬ gʼaˬ kʼawꞈ, aˬ yawꞈ-ahˇ kʼoeˇ loꞈ-ehˇ yehˬ bawˬ sehˇ lu-ehˇ ehˇ-eu meh.
Yeˬsuˇ saꞈ tsehˆ leˇ-euˬ
(Maˬkuˆ 15.33-41; Luˇkaꞈ 23.44-49; Yoˇhaˬ 19.28-30)
45Nah loˆ ceh laˇ ngeh, miˇ kʼahˬ kʼoeˇ kʼahˬ kʼahˬ lah-ehˇ zahˇ tsui ni pyeuꞈ-iˇ-awˇ, yaw zahˇ kʼoeˇ naˬ liˬ smˇ laꞈ byah ni jaˆ-euˬ meh. 46Uˬ ciꞈ uˬ taw naˬ liˬ smˇ laꞈ byah laˇ ngeh, Yeˬsuˇ yaw kʼaˆ-ehˇ guˇ-awˇ, “Eˇliˇ, Eˇliˇ, laˬ maˬ saˬ baˬ taˬ niˬ” lehˇ ehˇ-eu meh. Dawˬ tsuiꞈ-aˬ, “Ngaˬ-euˬ Miˬyehˇ-oˇ, ngaˬ-euˬ Miˬyehˇ-oˇ, aˬ jeˬ miˇ neh ngaˬ-ahˇ byehˇ dzeh nehˬ laꞈ te” lehˇ ehˇ mawꞈ-eu meh.
47Kʼoeˇ gaˇ yawꞈ luꞈ-eu tsawˇ haˬ tiˬ paˆ na deuˬ aˬ yawꞈ guˇ gaˇ ya gaˬ ngeh, “Eˇliˇyaˆ-ahˇ kuˇ-eu nya” lehˇ ehˇ-eu meh. 48Aˬ yawꞈ maꞈ tiˬ gʼaˬ coeˬ daˆ gʼeh-awˇ, behˇ baˆ laꞈ daˬ-ahˇ duˇ-eu laˆ shaˆ iˇ jaˬ caˆ luˆ tiˬ luˆ yuˇ-awˇ, aˬ gaꞈ dzaˇ uiˇ uiˇ cehˇ-ahˇ laˆ duiˆ-awˇ, aˇ toꞈ aˇ kahˬ mehˬ dzaˬ-ahˇ gʼoˆ tehˬ-awˇ, Yeˬsuˇ-ahˇ cawˬ miˇ nehˬ-awˇ bi cuˆ dawˇ-eu lehˇ gʼeh-eu meh.
49Ehˇ kʼawꞈ, “Taˬ tehˬ lawˬ siˬ. Eˇliˇyaˆ aˬ yawꞈ-ahˇ ka kʼoꞈ le ngaˇ-a loˇ lehˇ tiˬ kʼehˬ haw kaˇ-euˇ” lehˇ, aˬ cawˬ aˬ yawꞈ-ahˇ ehˇ nehˬ-euˬ meh.
50Yeˬsuˇ tiˬ teˇ paˇ guˇ doˆ laˇ-awˇ, saꞈ tsehˆ leˇ-euˬ meh.
51Kʼoeˇ ngeh, Uˬ duˬ tahˬ nymˇ nymˇ ma laꞈ kʼoeˇ taw taˬ-euˬ saˬ paˇ lawˆ kaˬ kʼoeˇ, uˬ duˬ-ahˇ neh dawˬ dahˬ-ahˇ doˆ ni, nyiˬ paˆ paˆ-iˇ-euˬ meh. Miˇ tsaˬ tahˬ kʼawˇ luˆ laˇ nyeh laˇ-awˇ, lo guˇ deuˬ tsawˬ paˆ-iˇ-euˬ meh. 52Lmˬ bymˇ deuˬ pah laˇ-awˇ, shiˇ dzeuˇ-euˬ Miˬyehˇ-euˬ tsawˇ haˬ gʼawˬ mya gʼaˬ paˇ gʼoꞈ dehꞈ laˇ-euˬ meh. 53Aˬ yawꞈ maꞈ lmˬ bymˇ laꞈ kʼoeˇ neh doˆ laˇ-awˇ, Yeˬsuˇ shiˇ-euˬ paˇ gʼoꞈ dehꞈ laˇ gʼaˬ ngeh, aˬ yawꞈ maꞈ Muiˬ-eu shawˇ-eu Meuˬ-ahˇ uˇ laˇ gaˇ, aˬ cawˬ gʼawˬ mya ni mawˇ-euˬ meh.
54Yeˬsuˇ-ahˇ loꞈ luꞈ-eu yehˇ kʼoeˇ deuˬ hawˇ-eu yehˇ kʼoeˇ deuˬ-ahˇ uˆ lahˇ-eu yaw huiˬ gʼaˬ, miˇ luˆ luˆ-eu hawˇ-eu kʼaˇ pyeuꞈ laˇ-euˬ yawˬ jeˬ na luꞈ-ahˇ ya mawˇ ngeh, guˆ dui dui laˇ-awˇ, “Tsawˇ haˬ heu gʼaˬ maˇ maˇ ni Miˬyehˇ-euˬ Zaˬmaˇ ngaˇ” lehˇ ehˇ-eu meh.
55Gaˬliˬlehˇ miˇ kʼahˬ-ahˇ neh Yeˬsuˇ mehˬ nah caw teh laꞈ-awˇ, Yeˬsuˇ-ahˇ caw ba luꞈ-eu zaˬ miˬ zaˬ gʼawˬ mya gʼaˬ, ui cuiˆ gaˇ mahˇ kaˬ gaˇ jawˇ-awˇ haw luꞈ-eu meh. 56Maˬliˇ Maˬgaˬdaˬlaˇ maˬ ehˇ, Yaˬkoˆ hawˇ-eu Yoˇsehˆ aˬ nyaꞈ nmˇ-euˬ aˬ ma Maˬliˇ maˬ ehˇ, Zeˬbeˬdehˇ-euˬ miˬ zaˬ maˬ ehˇ, kʼoeˇ deuˬ nehˬ-ehˇ jawˇ-awˇ haw luꞈ-eu meh.
Yeˬsuˇ-ahˇ baꞈ pahˬ-euˬ
(Maˬkuˆ 15.42-47; Luˇkaꞈ 23.50-56; Yoˇhaˬ 19.38-42)
57Uˬ ciꞈ ciꞈ le ngeh, Aˬliˇmaꞈtehˬ meuˬ-ahˇ jawˇ-eu smˇ muiˬ muiˬ-eu tsawˇ haˬ tiˬ gʼaˬ oe keuˆ-euˬ meh. Aˬ yawꞈ-aˬ, Yoˇsehˆ lehˇ myahˇ-euˬ Yeˬsuˇ-euˬ zaˬ lahˇ meh. 58Sahˬ paˬ Piˇlaˆ jawˇ gaˇ aˬ yawꞈ le uˇ-awˇ, Yeˬsuˇ-euˬ gʼawˇ mawˇ shaˇ leˇ-euˬ meh. Kʼoeˇ ngeh, Yeˬsuˇ-euˬ gʼawˇ mawˇ aˬ yawꞈ-ahˇ a nehˬ-eu gʼaˇ duˬ, sahˬ paˬ Piˇlaˆ dawˬ biꞈ-euˬ meh. 59Yeˬsuˇ-euˬ gʼawˇ mawˇ-ahˇ Yoˇsehˆ baꞈ gʼeh-awˇ, shawˇ jehˆ ni gʼeh-eu saˬ paˇ paˇ pyuˇ neh mawˇ tawˆ tawˆ nehˬ-euˬ meh. 60Kʼoeˇ naˇ, shuiꞈ teˇ poˬ ni gʼeh-eu aˬ yawꞈ-euˬ lmˬ bymˇ lo kʼahˬ-ahˇ baꞈ ahˇ-awˇ, lmˬ bymˇ mehˬ kʼehˬ-ahˇ kʼaˬ lo lo ma ngawˬ tsoeˬ yaꞈ-awˇ gʼoꞈ leˇ-euˬ meh. Lmˬ bymˇ kʼoeˇ-aˬ, aˬ yawꞈ neh lo guˇ-ahˇ taꞈ byoe-awˇ jahˇ taˬ-euˬ meh. 61Maˬliˇ Maˬgaˬdaˬlaˇ hawˇ-eu, Maˬliˇ lehˇ myahˇ-euˬ zaˬ miˬ zaˬ yawˬ gʼaˬ yawˬ, lmˬ bymˇ paw mehˬ shiˬ ciˬ pyawˇ-awˇ nuiˇ luꞈ-eu meh.
Lmˬbymˇ-ahˇ loꞈ-euˬ
62Yawˬ nah yawˬ-aˬ, Jawˇ nah meh. Kʼoeˇ ngeh nah, piˇ ma aˬ yuiꞈ deuˬ hawˇ-eu Paˬliˬsehˇ deuˬ, sahˬ paˬ Piˇlaˆ jawˇ gaˇ le-euˬ meh. 63Aˬ yawꞈ maꞈ sahˬ paˬ Piˇlaˆ-ahˇ ehˇ nehˬ-eu, “Sahˬ paˬ-oˇ, jaꞈ myawꞈ aˬ da kʼoeˇ gʼaˬ maˬ shiˇ mi naˆ-ehˇ, smˬ nah byah laˇ naˇ Miˬyehˇ aˬ yawꞈ-ahˇ paˇ bi gʼoꞈ dehꞈ laˇ meh lehˇ aˬ yawꞈ ehˇ-eu nga maꞈ ya gaˬ taˬ-euˬ ma. 64Aˬ yawꞈ-euˬ zaˬ lahˇ deuˬ aˬ yawꞈ-euˬ gʼawˇ mawˇ kʼoeˬ doˆ laˬ-iˇ-awˇ, Miˬyehˇ neh aˬ yawꞈ-ahˇ paˇ bi gʼoꞈ dehꞈ laˇ gʼaˬ-euˬ meh lehˇ aˬ cawˬ-ahˇ maˬ ya bi ehˇ ni, smˬ nah keuˆ ni aˬ yawꞈ-euˬ lmˬ bymˇ-ahˇ yaw muiˬ paˬ-ehˇ bi loꞈ piˇ-eu gʼaˇ duˬ dawˬ biꞈ-awˬ. Aˇ saˬ saˬ-eu heu poˆ kʼoeˇ loꞈ-ehˇ paˇ myawꞈ naˇ, yaw beh poˆ myawꞈ-euˬ naˆ maˬ tseˇ doeˇ dui dui tehꞈ-a.”
65Sahˬ paˬ Piˇlaˆ ehˇ-eu, “Naw maꞈ loꞈ piˇ-eu yehˇ jawˇ-eu maˬ ngeuˇ loˇ. Gʼoꞈ-iˇ-awˇ, kʼaˇ gʼeh nya-eu loꞈ-ehˇ bi loꞈ piˇ-awˬ.”
66Kʼoeˇ naˇ, aˬ yawꞈ maꞈ gʼoꞈ-iˇ-awˇ, lmˬ bymˇ-ahˇ ngawˬ tsoeˬ taˬ-euˬ kʼaˬ lo lo ma-ahˇ jmˬ diˬ-awˇ, yaw muiˬ-ehˇ bi loꞈ piˇ-euˬ meh.
Currently Selected:
Maꞈtehˬ 27: AHK
Highlight
Share
Copy
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
