Maꞈtehˬ 14

Iˇ cuꞈ shawˇ-eu Yoˇhaˬ shiˇ-euˬ

(Maˬkuˆ 6.14-29; Luˇkaꞈ 9.7-9)

1Aˇ yamˬ kʼoeˇ yamˬ-ahˇ, Yeˬsuˇ tsawˇ myahˇ doˆ-eu gaˇ kawˆ, Gaˬliˬlehˇ miˇ kʼahˬ-ahˇ uˆ lahˇ-eu sahˬ paˬ Heˬloˆ ya gaˬ-awˇ, 2aˬ yawꞈ-euˬ gaˇ mˇ-eu yaw huiˬ yaw mahˇ deuˬ-ahˇ ehˇ nehˬ-eu, “Tsawˇ haˬ kʼoeˇ gʼaˬ maˇ maˇ ni Iˇ cuꞈ shawˇ-eu Yoˇhaˬ gʼoꞈ dehꞈ laˇ-euˬ ngaˇ. Kʼoeˇ miˇ neh, zahˬ leˇ paˬ-ehˇ gʼeh-eu jeˬ mˇ nya-eu baoˬ ahˇ-eu ngaˇ.”

3Heˬloˆ-aˬ, Yoˇhaˬ-ahˇ nyehꞈ-eu gʼaˇ duˬ dawˬ biꞈ-awˇ, tawˬ-ahˇ bi dawˆ taˬ-euˬ meh. Aˬ yawꞈ-euˬ mehˇ nmˇ Piˇliˇpuˆ-euˬ miˬ zaˬ Heˬloˇdiˇ baˬ da neh, aˬ yawꞈ kʼoeˇ loꞈ-ehˇ jahˇ-euˬ meh. 4“Nawˇ Heˬloˇdiˇ-ahˇ maˬ sheuˬ kʼmˬ-a” lehˇ, Iˇ cuꞈ shawˇ-eu Yoˇhaˬ neh Heˬloˆ-ahˇ ehˇ nehˬ-euˬ miˇ neh, kʼoeˇ loꞈ-ehˇ jahˇ-euˬ meh. 5Yoˇhaˬ-ahˇ Heˬloˆ sehꞈ mawꞈ-eu meh. Ehˇ kʼawꞈ, Yuˇdaˆ tsawˇ haˬ deuˬ-ahˇ aˬ yawꞈ yahˇ-eu meh. Aˬ jeˬ miˇ neh ehˇ naˇ, Yuˇdaˆ tsawˇ haˬ kʼoeˇ deuˬ Yoˇhaˬ-ahˇ Miˬyehˇ gʼaˇ duˬ ngehˬ dah-eu tsawˇ haˬ lehˇ sawˇ taˬ-euˬ meh.

6Heˬloˆ dehꞈ le-euˬ aˇ nah-ahˇ noeˬ keuˆ-eu bawˬ-iˬ gʼeh luꞈ ngeh, tsawˇ haˬ dawˬ tawˆ luꞈ-euˬ mehˬ shi Heˬloˇdiˇ-euˬ aˬ buˇ gaˇ nyeh nyeh mehˬ gaˇ, Heˬloˆ nui ma tsaˬ dui dui-euˬ meh. 7Kʼoeˇ miˇ neh, “Nawˇ kʼaˇ shaˇ-eu jeˬ biꞈ ma lehˇ ngaˇ saˇ jaˇ dzaˬ-eu ma” lehˇ, aˬ buˇ kʼoeˇ buˇ-ahˇ Heˬloˆ ehˇ nehˬ-euˬ meh.

8Aˬ ma gʼaˬ neh mehˬ gahˇ nehˬ-euˬ loꞈ-ehˇ, “Iˇ cuꞈ shawˇ-eu Yoˇhaˬ-euˬ uˬ duˬ, kʼmˬ maˬ sehˇ byehˇ-ahˇ dawˆ ahˇ-awˇ, nymˬ-mˇ heu gaˇ bi ciˬ ha laˇ-awˬ” lehˇ, aˬ buˇ kʼoeˇ buˇ shaˇ-eu meh.

9Sahˬ paˬ Heˬloˆ noeˬ shaˬ dui dui-eu meh. Ehˇ kʼawꞈ, daˬ yah kʼoeˇ myaˆ ni gʼeh-eu mehˬ shi aˬ yawꞈ saˇ jaˇ dzaˬ dzeuˇ-euˬ miˇ neh, aˬ buˇ kʼoeˇ buˇ kʼaˇ ehˇ-eu loꞈ-ehˇ jahˇ nehˬ-eu gʼaˇ duˬ, aˬ yawꞈ dawˬ biꞈ-euˬ meh. 10Aˬ yawꞈ tsawˇ haˬ kʼehˇ gʼeh-awˇ, tawˬ laꞈ kʼoeˇ uˇ luꞈ-eu Yoˇhaˬ-euˬ uˬ duˬ bi deuˆ tsehˆ laˬ-iˇ-euˬ meh. 11Uˬ duˬ kʼoeˇ siˬ kʼmˬ maˬ sehˇ byehˇ-ahˇ dawˆ ahˇ-awˇ, aˬ buˇ kʼoeˇ buˇ-ahˇ ciˬ ha nehˬ laˇ-awˇ, aˬ buˇ kʼoeˇ buˇ neh aˬ yawꞈ-euˬ aˬ ma-ahˇ ciˬ nehˬ-euˬ meh. 12Yoˇhaˬ-euˬ zaˬ lahˇ deuˬ laˇ-awˇ, Yoˇhaˬ-euˬ gʼawˇ mawˇ-ahˇ baꞈ pahˬ-iˇ-euˬ meh. Kʼoeˇ naˇ, gaˇ kawˆ kʼoeˇ Yeˬsuˇ-ahˇ aˬ yawꞈ maꞈ dzawˇ nehˬ-iˇ-euˬ meh.

Yeˬsuˇ tsawˇ haˬ ngaˬ heˇ gʼaˬ-ahˇ bi dzaˬ-euˬ

(Maˬkuˆ 6.30-44; Luˇkaꞈ 9.10-17; Yoˇhaˬ 6.1-14)

13Yoˇhaˬ-euˬ gaˇ kawˆ Yeˬsuˇ ya gaˬ ngeh, jawˇ duˬ kʼoeˇ tsahˇ-ahˇ neh doˆ-iˇ-awˇ, ciˬ cuˇ ni gʼeh-eu jawˇ duˬ-ahˇ tiˬ gʼaˬ tehꞈ-ehˇ iˇ-euˬ meh. Aˬ yawꞈ iˇ-euˬ gaˇ kawˆ tsawˇ haˬ aˇ maꞈ ya siˬ ngeh, aˬ yawꞈ maꞈ jawˇ-eu meuˬ deuˬ-ahˇ neh doˆ laˇ-awˇ, aˬ yawꞈ-euˬ mehˬ nah kuiˇ zoˬ caw teh-iˇ-euˬ meh. 14Yeˬsuˇ lawˬ laꞈ kʼoeˇ neh doˆ laˇ-awˇ, tsawˇ haˬ aˇ maꞈ maꞈ ma-ahˇ ya mawˇ ngeh, aˬ yawꞈ maꞈ-ahˇ gʼawˬ shaˬ haw gaˬ dui dui-awˇ, naˇ-eu tsawˇ haˬ deuˬ-ahˇ laˆ taˬ nehˬ-euˬ meh.

15Kʼoeˇ ngeh nah uˬ ciꞈ uˬ taw paw, aˬ yawꞈ-euˬ zaˬ lahˇ deuˬ aˬ yawꞈ jawˇ gaˇ laˇ-awˇ ehˇ-eu, “Iˬ nah uˬ ciꞈ ciꞈ le shaw-iˬ miˇ-a. Jawˇ duˬ heu tsahˇ pu-ahˇ gaˇ mahˇ kaˬ-eu miˇ neh, tsawˇ haˬ aˇ maꞈ heu deuˬ-ahˇ pyehˬ nehˬ-awˇ, pu doe ni dzaˬ dzaˬ dawˇ dawˇ bi poˆ dzaˬ-iˇ-eu maˬ tsaˬ-a loˇ.”

16Yeˬsuˇ ehˇ-eu, “Aˬ yawꞈ maꞈ-ahˇ bi iˇ-eu maˬ loˬ-aˇ. Naw maꞈ dzaˬ dzaˬ dawˇ dawˇ biꞈ nehˬ-awˇ bi dzaˬ-awˬ.”

17Zaˬ lahˇ deuˬ ehˇ-eu, “Nga maꞈ kaˬ muˇ ngaˬ yaˆ hawˇ-eu ngaˬ shaˬ nyiˬ mawˇ ahˇ-eu tehꞈ ma.”

18Kʼoeˇ ngeh, “Ngaˇ jawˇ gaˇ yuˇ laꞈ-awˬ” lehˇ Yeˬsuˇ ehˇ nehˬ-euˬ meh. 19Tsawˇ haˬ aˇ maꞈ-ahˇ, daˬ zawˬ deh kʼoeˇ taˆ nuiˇ-eu gʼaˇ duˬ, Yeˬsuˇ dawˬ biꞈ-euˬ meh. Kʼoeˇ naˇ, kaˬ muˇ kʼoeˇ ngaˬ yaˆ hawˇ-eu ngaˬ shaˬ kʼoeˇ nyiˬ mawˇ aˬ yawꞈ yuˇ-awˇ, mˬ paw gʼawˇ leuˇ-awˇ, Miˬyehˇ-euˬ guiˬ lahˬ-ahˇ ja ceuˬ-euˬ meh. Kʼoeˇ naˇ, kaˬ muˇ kʼoeˇ deuˬ aˬ yawꞈ ngawˬ pyehˬ-awˇ, zaˬ lahˇ deuˬ-ahˇ biꞈ nehˬ-awˇ, tsawˇ haˬ aˇ maꞈ-ahˇ bi biˇ nehˬ-euˬ meh. 20Aˬ yawꞈ maꞈ dawˬ tawˆ luꞈ tiˬ dehˆ dzaˬ gʼaˬ-awˇ, maˬ dzaˬ jiˇ-ehˇ dzeˇ laˇ-euˬ deuˬ-ahˇ zaˬ lahˇ deuˬ paˇ gʼoˆ uiˬ ngeh, kʼaˆ puˬ tseˇ nyiꞈ puˬ byah laˇ-euˬ meh. 21Kʼaˇ dzaˬ-euˬ tsawˇ haˬ deuˬ,zaˬ miˬ zaˬ hawˇ-eu zaˬ deuˬ maˬ sawˇ-ehˇ, kʼaˬ dzeˇ zaˬ tehꞈ-ehˇ ngaˬ heˇ gʼaˬ dawˬ peh byah-eu meh.

Yeˬsuˇ iˇ cuꞈ kʼoeˇ taˆ gaˇ ma cah-euˬ

(Maˬkuˆ 6.45-52; Yoˇhaˬ 6.15-21)

22Kʼoeˇ naˇ, Yeˬsuˇ tsawˇ haˬ aˇ maꞈ maꞈ ma-ahˇ bi gʼoꞈ-iˇ-awˇ, zaˬ lahˇ deuˬ-ahˇ lawˬ laꞈ kʼoeˇ bi uˇ-iˇ-awˇ, aˬ yawꞈ-euˬ mehˬ hu lah nui baˬ paw bi iˇ tsehˆ tawˬ-euˬ meh. 23Tsawˇ haˬ aˇ maꞈ-ahˇ bi gʼoꞈ-iˇ gʼaˬ ngeh, gawˬ duˇ-ahˇ guiˬ lahˬ shaˇ leˇ-eu lehˇ, aˬ yawꞈ tehꞈ-ehˇ daˆ leˇ-euˬ meh. Uˬ ciꞈ ciꞈ le ngeh, Yeˬsuˇ tiˬ gʼaˬ tehꞈ-ehˇ kʼoeˇ gaˇ jawˇ luꞈ-eu meh. 24Kʼoeˇ ngeh, zaˬ lahˇ deuˬ dziˬ luꞈ-eu lawˬ kʼoeˇ laˇ-aˬ, lah gʼahˇ ceh gaˇ mahˇ kaˬ gaˇ iˇ keuˆ-awˇ, jaˬ lehˇ lehˇ ma baw tehˬ leꞈ-euˬ miˇ neh, iˇ luˆ dzeh laˇ-awˇ, lawˬ-ahˇ yaw kʼaˆ-ehˇ ciˬ tahˬ ciˬ tuˆ-eu meh.

25Ya poeˇ doeˇ taw paw Yeˬsuˇ iˇ cuꞈ kʼoeˇ taˆ cah-awˇ, zaˬ lahˇ deuˬ jawˇ gaˇ oe-euˬ meh. 26Aˬ yawꞈ iˇ cuꞈ kʼoeˇ taˆ cah gaˇ zaˬ lahˇ deuˬ ya mawˇ ngeh, guˆ dui dui-eu miˇ neh, “ Shaˆ shiˇ yaw sahˇ ngaˇ” lehˇ ehˇ-awˇ guˇ-eu meh.

27Yeˬsuˇ ehˇ-eu, “Taˬ guˆ. Nui ma taˬ baˬ. Ngaˇ ma.

28Beˬtuˆluˆ ehˇ-eu, “Sahˬ paˬ-oˇ, nawˇ jeˬ maˇ-iˬ ngaˇ iˇ cuꞈ kʼoeˇ taˆ cah-awˇ nawˇ jawˇ gaˇ oe nya ni dawˬ biꞈ-awˬ.”

29Kʼoeˇ naˇ, “Oe-awˬ tawˇ” lehˇ Yeˬsuˇ ehˇ ngeh, Beˬtuˆluˆ lawˬ laꞈ nyiˇ doˆ-iˇ-awˇ, iˇ cuꞈ kʼoeˇ taˆ cah cah-ehˇ Yeˬsuˇ jawˇ gaˇ iˇ-euˬ meh. 30Ehˇ kʼawꞈ, jaˬ lehˇ yaw kʼaˆ-ehˇ baw gaˇ aˬ yawꞈ mawˇ ngeh, guˆ-eu nui ma ahˇ laˇ-awˇ, iˇ cuꞈ-ahˇ ga nuiꞈ-iˇ-euˬ meh. Kʼoeˇ ngeh, “Sahˬ paˬ-oˇ, ngaˬ-ahˇ ka kʼoꞈ nehˬ laꞈ-awˬ” lehˇ aˬ yawꞈ guˇ-euˬ meh.

31Tiˬ poˆ tehꞈ-ehˇ Yeˬsuˇ aˬ laꞈ cawˬ ja-awˇ, aˬ yawꞈ-ahˇ nyehꞈ tehˬ-awˇ, “Jah-eu gʼaˬ baˬ-eu tsawˇ haˬ-oˇ, aˬ jeˬ miˇ neh poˆ poˆ laˆ laˆ-ehˇ noeˬ te” lehˇ ehˇ nehˬ-euˬ meh.

32Aˬ yawꞈ nyaꞈ nyiˬ gʼaˬ luꞈ lawˬ laꞈ kʼoeˇ uˇ-iˇ ngeh, jaˬ lehˇ baw-eu naˬ leˇ-euˬ meh. 33Kʼoeˇ naˇ, lawˬ laꞈ kʼoeˇ uˇ luꞈ-eu zaˬ lahˇ deuˬ Yeˬsuˇ-ahˇ uˬ duˬ tahˬ-euˬ meh. Aˬ yawꞈ maꞈ ehˇ-eu, “Nawˇ-aˬ, maˇ maˇ ni Miˬyehˇ-euˬ Zaˬmaˇ ngaˇ.”

Geˬneˬsaˬlehˇ miˇ kʼahˬ laꞈ kʼoeˇ naˇ gawˇ laˆ taˬ nehˬ-euˬ

(Maˬkuˆ 6.53-56)

34Aˬ yawꞈ maꞈ lah tsehˆ doˆ-awˇ, Geˬneˬsaˬlehˇ miˇ kʼahˬ-ahˇ le-euˬ meh. 35Kʼoeˇ gaˇ jawˇ-eu tsawˇ haˬ deuˬ Yeˬsuˇ-ahˇ haw siˬ-awˇ, miˇ kʼahˬ kʼoeˇ kʼahˬ doe ni tsawˇ haˬ pyehˬ gʼeh-awˇ, naˇ-eu tsawˇ haˬ dawˬ tawˆ luꞈ aˬ yawꞈ jawˇ gaˇ bi sheuˬ uiˬ laꞈ-euˬ meh. 36Aˬ yawꞈ-euˬ pehˇ kʼahˬ pehˇ dahˬ-ahˇ tehꞈ-ehˇ kʼawꞈ bi toeˬ ciˆ laꞈ lehˇ aˬ yawꞈ maꞈ shaˇ-awˇ, kʼaˇ ya toeˬ ciˆ-euˬ deuˬ naˇ gawˇ taˬ leˇ jiˇ-euˬ meh.

Currently Selected:

Maꞈtehˬ 14: AHK

Highlight

Copy