Maꞈtehˬ 13
13
Siˬ yoeˬ sehˬ-eu gaˇ kawˆ yaw jeˬ ma jeˬ dawˬ
(Maˬkuˆ 4.1-9; Luˇkaꞈ 8.4-8)
1Kʼoeˇ ngeh nah Yeˬsuˇ iˇ kahˇ-ahˇ neh doˆ-iˇ-awˇ, lah lah dzeˇ nuiˇ-euˬ meh. 2Aˬ yawꞈ dawˬ peh uiˬ laˇ-euˬ tsawˇ haˬ aˇ maꞈ myaˬ dui dui-eu miˇ neh, aˬ yawꞈ lawˬ laꞈ kʼoeˇ nuiˇ-iˇ-awˇ, tsawˇ haˬ aˇ maꞈ lah lah dzeˇ yawꞈ-euˬ meh. 3Aˬ yawꞈ yaw jeˬ ma jeˬ ja ja-ehˇ, gʼawˬ mya jeˬ mehˬ nehˬ tsoˆ nehˬ-euˬ meh.
“Siˬ yoeˬ sehˬ-eu tsawˇ haˬ tiˬ gʼaˬ siˬ yoeˬ sehˬ-iˇ-euˬ meh. 4Aˬ yawꞈ siˬ yoeˬ sehˬ ngeh, siˬ yoeˬ tiˬ paˆ na deuˬ gaˇ ma-ahˇ ga-iˇ-awˇ, aˇ jiˇ neh bi gʼoˆ dzaˬ jiˇ-euˬ meh. 5Siˬ yoeˬ tiˬ paˆ na deuˬ-aˬ, miˇ tsaˬ baˬ-eu kʼaˬ lo lo yaˇ-ahˇ ga-iˇ-euˬ meh. Miˇ tsaˬ maˬ naꞈ-eu miˇ neh, aˇ ji ji doˆ laˇ-eu yaw kawˇ meh. 6Ehˇ kʼawꞈ, nahˇ tsaˇ kʼaˆ laˇ-awˇ, aˇ ji kʼoeˇ deuˬ-ahˇ lawꞈ zaw ngeh, ciˇ ka maˬ naꞈ-eu miˇ neh, nyoeˬ-iˇ koˆ-iˇ-eu meh. 7Siˬ yoeˬ tiˬ paˆ na deuˬ-aˬ, aˬ gah gah yaˇ-ahˇ ga-iˇ-awˇ, aˬ gah baw duˆ neh bi uˆ tehˬ-euˬ meh. 8Ehˇ kʼawꞈ, siˬ yoeˬ tiˬ paˆ na deuˬ-aˬ, miˇ tsaˬ miˇ muiˬ muiˬ gaˇ ga-iˇ-awˇ, siˬ le loˆ le-euˬ meh. Tiˬ paˆ na deuˬ tiˬ yaˇ bymˇ, tiˬ paˆ na deuˬ koꞈ tseˇ bymˇ, tiˬ paˆ na deuˬ smˬ tseˇ bymˇ za le-euˬ meh. 9Naˬ bawˇ kʼaˇ tsoꞈ-eu deuˬ naˇ haˬ-awˬ.”
Aˬ jeˬ miˇ neh yaw jeˬ ma jeˬ ya ja mehˬ ta
(Maˬkuˆ 4.10-12; Luˇkaꞈ 8.9,10)
10Kʼoeˇ naˇ, zaˬ lahˇ deuˬ Yeˬsuˇ jawˇ gaˇ laˇ-awˇ ehˇ-eu, “Nawˇ tsawˇ haˬ aˇ maꞈ-ahˇ mehˬ nehˬ tsoˆ nehˬ ngeh, aˬ jeˬ miˇ neh yaw jeˬ ma jeˬ ja ja-ehˇ mehˬ nehˬ te.”
11Yeˬsuˇ ehˇ-eu, “Mˬtaˆ Miˇkʼahˬ gaˇ kawˆ aˬ cawˬ maˬ gʼoˆ shaw nya-eu zaꞈ taˬ-euˬ jeˬ-ahˇ gʼoˆ shaw nya-eu tsawˇ gahˇ deuˬ, naw maꞈ-ahˇ biꞈ taˬ gʼaˬ-euˬ meh. Ehˇ kʼawꞈ, aˬ yawꞈ maꞈ-ahˇ maˬ biꞈ taˬ-aˬ. 12Jaˆ-eu tsawˇ haˬ deuˬ bi jaˆ dzehˬ laˇ ni paˇ biꞈ lahˬ nehˬ tehꞈ-a. Ehˇ kʼawꞈ, maˬ jaˆ-eu tsawˇ haˬ deuˬ-ahˇ-aˬ, kʼaˇ jaˆ-eu dawˬ tawˆ luꞈ yuˇ jiˇ nehˬ tehꞈ-a. 13Aˬ yawꞈ maꞈ-ahˇ ngaˇ mehˬ nehˬ tsoˆ nehˬ ngeh, yaw jeˬ ma jeˬ ja ja-ehˇ mehˬ nehˬ tsoˆ nehˬ-eu-aˬ, aˬ yawꞈ maꞈ myaˆ nuiˆ tsoꞈ kʼawꞈ maˬ mawˇ nya gaˇ duˇ-awˇ, naˬ bawˇ tsoꞈ kʼawꞈ maˬ gaˬ nya gaˇ duˇ-eu miˇ neh meh. 14Miˬyehˇ gʼaˇ duˬ ngehˬ dah-eu Iˇsaˬyaˇ neh ehˇ taˬ-euˬ dawˬ heu deuˬ-aˬ, aˬ yawꞈ maꞈ loꞈ-ehˇ gʼeh gaˇ ehˇ taˬ-euˬ dawˬ meh.
‘Tsawˇ haˬ heu deuˬ gaˬ dehˆ-euˬ kʼawꞈ,
tiˬ pawꞈ-iˬ maˬ gʼoˆ shaw nya-a.
Tsawˇ haˬ heu deuˬ mawˇ dehˆ-euˬ kʼawꞈ,
tiˬ pawꞈ-iˬ maˬ siˬ duˬ leˇ-a.
15Nui ma aˬ dzawˬ dzawˬ-iˇ jiˇ-awˇ,
naˬ bawˇ paꞈ tsoeˬ tsoeˬ taˬ jiˇ-awˇ,
myaˆ nuiˆ miˆ tehˬ jiˇ taˬ-euˬ meh.
Kʼoeˇ loꞈ-ehˇ maˬ ngeuˇ law nmˇ-aˬ,
myaˆ nuiˆ-ahˇ mawˇ leˇ-awˇ,
naˬ bawˇ-ahˇ gaˬ leˇ-awˇ,
noeˬ siˬ noeˬ mawˇ nya-awˇ,
naˇ gawˇ bi laˆ saˆ-eu gʼaˇ duˬ,
ngaˇ jawˇ paw ciˬ pyawˇ tehꞈ-a lehˇ,
Miˬyehˇ ehˇ luꞈ-eu meh.’
16“Naw maꞈ-euˬ myaˆ nuiˆ mawˇ nya-awˇ, naˬ bawˇ gaˬ nya-eu miˇ neh, aˇ naˆ ni guiˬ lahˬ huiˬ-eu nga. 17Ngaˇ naw maꞈ-ahˇ maˇ jawˆ ni ehˇ nehˬ nyaˇ. Miˬyehˇ gʼaˇ duˬ ngehˬ dah-eu tsawˇ haˬ hawˇ-eu Miˬyehˇ-euˬ tsawˇ haˬ deuˬ, naw maꞈ ya mawˇ-euˬ jeˬ-ahˇ mawˇ mawꞈ dui dui-euˬ kʼawꞈ, ma ya mawˇ haw-ehˇ, naw maꞈ ya gaˬ-euˬ jeˬ-ahˇ gaˬ mawꞈ dui dui-euˬ kʼawꞈ, maˬ ya gaˬ haw-aˬ.
Siˬ yoeˬ sehˬ-eu gaˇ kawˆ-euˬ dawˬ tsuiꞈ
(Maˬkuˆ 4.13-20; Luˇkaꞈ 8.11-15)
18“Siˬ yoeˬ sehˬ-eu gaˇ kawˆ yaw jeˬ ma jeˬ-euˬ dawˬ tsuiꞈ-ahˇ naˇ haˬ sheˇ. 19Gaˇ ma-ahˇ ga-iˇ-euˬ siˬ yoeˬ lehˇ ehˇ-eu-aˬ, Miˬyehˇ Miˇkʼahˬ gaˇ kawˆ mehˬ gaˇ ya gaˬ-euˬ kʼawꞈ, maˬ gʼoˆ shaw nya-eu tsawˇ haˬ deuˬ-ahˇ ehˇ mawꞈ-eu meh. Haiˬ-eu yaw sahˇ laˇ-awˇ, aˬ yawꞈ maꞈ-euˬ nui ma laꞈ kʼoeˇ sehˬ ahˇ taˬ-euˬ jeˬ-ahˇ ja tawˆ ni yuˇ byoˆ gʼeh-eu meh. 20Kʼaˬ lo lo yaˇ-ahˇ ga-iˇ-euˬ siˬ yoeˬ lehˇ ehˇ-eu-aˬ, Miˬyehˇ Miˇkʼahˬ gaˇ kawˆ mehˬ gaˇ ya gaˬ ngeh, maˬ nyi naˬ ni tiˬ poˆ tehꞈ-ehˇ laˬ kʼaˬ tiˬ cehˇ ha geuꞈ-eu tsawˇ haˬ deuˬ-ahˇ ehˇ mawꞈ-eu meh. 21Ehˇ kʼawꞈ, duˬ ciˇ maˬ toeˬ ziꞈ nya-eu miˇ neh, gʼawˬ myahˇ ni maˬ gmˬ-a. Dawˬ kʼoeˇ deuˬ-ahˇ ha geuꞈ-euˬ baˬ da neh shaˬ-eu zahˬ-eu jeˬ hawˇ-eu kʼehˬ-eu kʼaˆ-eu jeˬ-ahˇ ya daˬ ngeh, tiˬ poˆ tehꞈ-ehˇ coˬ-iˇ-eu meh. 22Aˬ gah gah yaˇ-ahˇ ga-iˇ-euˬ siˬ yoeˬ lehˇ ehˇ-eu-aˬ, dawˬ kʼoeˇ deuˬ-ahˇ ya gaˬ-euˬ kʼawꞈ, shiˬ shaˬ jiˇ gaˇ kawˆ kʼahˬ lahˇ-eu jeˬ hawˇ-eu, pyuˇ shuiˇ myawˬ gahˬ-ahˇ gaˬ-eu nui ma neh bi uˆ tehˬ-awˇ, aˇ siˬ maˬ siˬ le nya-eu tsawˇ haˬ deuˬ-ahˇ ehˇ mawꞈ-eu meh. 23Miˇ tsaˬ miˇ muiˬ muiˬ gaˇ ga-iˇ-euˬ siˬ yoeˬ lehˇ ehˇ-eu-aˬ, dawˬ kʼoeˇ deuˬ-ahˇ ya gaˬ-awˇ gʼoˆ shaw-euˬ tsawˇ haˬ deuˬ-ahˇ ehˇ mawꞈ-eu meh. Kʼoeˇ loꞈ-ehˇ gʼeh-eu tsawˇ haˬ deuˬ-aˬ, aˬ diˇ aˬ maˇ aˇ siˬ siˬ le-eu meh. Tiˬ paˆ na deuˬ tiˬ yaˇ bymˇ, tiˬ paˆ na deuˬ koꞈ tseˇ bymˇ, tiˬ paˆ na deuˬ smˬ tseˇ bymˇ siˬ le-eu meh.”
Shmˇ ma sehˬ-eu gaˇ kawˆ yaw jeˬ ma jeˬ
24Aˬ yawꞈ maꞈ-ahˇ Yeˬsuˇ yaw jeˬ ma jeˬ tiˬ hmˬ heu loꞈ-ehˇ paˇ ja mehˬ nehˬ-euˬ meh. “Miˬyehˇ Miˇkʼahˬ-aˬ, heu loꞈ-ehˇ duˇ-eu meh. 25Tiˬ miˇ-aˬ, aˬ cawˬ yuꞈ tsiˇ jiˇ-euˬ yamˬ-ahˇ, muiˇ-eu tsawˇ haˬ tiˬ gʼaˬ oe-awˇ, cehˇ siˬ yoeˬ sehˬ taˬ-euˬ gaˇ shmˇ ma sehˬ kʼoeˬ-awˇ cah-euˬ meh. 26Cehˇ muiˬ laˇ-awˇ, gʼo bymˬ gʼo doˆ doˆ yamˬ tsaˬ laˇ ngeh, shmˇ ma nawˆ laˇ taˬ-euˬ gaˇ ya mawˇ-euˬ meh. 27Zaˬ kʼaˆ deuˬ deh yaˇ yaw sahˇ gʼaˬ jawˇ gaˇ laˇ-awˇ ehˇ-eu, ‘Baw leˬ-oˇ, nawˇ siˬ yoeˬ yaw muiˬ sehˬ-euˬ maˬ ngeuˇ te loˇ. Shmˇ ma kʼoeˇ deuˬ aˬ gaˇ neh doˆ laˇ-euˬ ta.’ 28Aˬ yawꞈ ehˇ-eu, ‘Muiˇ-eu tsawˇ haˬ tiˬ gʼaˬ na neh jahˇ-euˬ tehꞈ-a.’ Zaˬ kʼaˆ deuˬ ehˇ-eu, ‘Shmˇ ma kʼoeˇ deuˬ moꞈ dzeh jiˇ-awˬ loˇ.’ 29Aˬ yawꞈ ehˇ-eu, ‘Taˬ moꞈ dzeh-iˇ siˬ. aˬ jeˬ miˇ neh ehˇ naˇ, naw maꞈ shmˇ ma moꞈ dzeh ngeh, cehˇ cehˇ bawˬ tiˬ bawˬ na gʼawˇ dzeh-iˬ-eu baw le. 30Cehˇ laˆ luiˆ yamˬ tsaˬ laˇ ngeh keuˆ ni, cehˇ hawˇ-eu shmˇ ma tiˬ kawˆ loꞈ-ehˇ dehꞈ tawˬ luꞈ-uˇ. Shmˇ ma deuˬ jeˬ huˬ gʼawˇ uiˬ-awˇ, aˇ dzahˬ dzahˬ uiˬ-awˇ miˬ dzaˬ-ahˇ baꞈ puiˆ gʼaˬ miˇ tsa, cehˇ yehˬ cehˇ diˬ luiˆ-awˇ cehˇ jiˇ-ahˇ pi ahˇ-awˬ lehˇ, cehˇ yehˬ cehˇ diˬ-eu tsawˇ haˬ deuˬ-ahˇ ngaˇ ehˇ nehˬ ma.’ ”
Gʼawˬ paꞈ aˇ nuiˆ gaˇ kawˆ yaw jeˬ ma jeˬ
(Maˬkuˆ 4.30-32; Luˇkaꞈ 13.18,19)
31Aˬ yawꞈ maꞈ-ahˇ Yeˬsuˇ yaw jeˬ ma jeˬ tiˬ hmˬ heu loꞈ-ehˇ paˇ ja mehˬ nehˬ-euˬ meh. “Mˬtaˆ Miˇkʼahˬ-aˬ, heu loꞈ-ehˇ duˇ-eu meh. Tsawˇ haˬ tiˬ gʼaˬ gʼawˬ paˆ aˇ nuiˆ tiˬ nuiˆ yuˇ-awˇ, aˬ yawꞈ-euˬ yaˇ-ahˇ sehˬ taˬ-euˬ meh. 32Gʼawˬ paˆ aˇ nuiˆ#13.32 Gʼawˬ paꞈ aˇ nuiˆ heu jeˬ-aˬ, Yuˇdaˆ miˇ kʼahˬ-ahˇ jaˆ-eu gʼawˬ paꞈ aˇ nuiˆ tiˬ jeˬ pyeuꞈ-awˇ, aˬ dui jawˇ gaˇ jaˆ-eu gʼawˬ paˆ aˇ nuiˆ-ahˇ maˬ duˇ-ehˇ, aˇ bawˬ huiˬ dui mehˇ dui dui-eu meh. -aˬ, aˇ nuiˆ dawˬ tawˆ luꞈ kʼoeˇ taˆ aˬ cawˬ naˆ maˬ tseˇ nyiˇ teˬ dzehˬ-eu aˇ nuiˆ pyeuꞈ kʼawꞈ, dehꞈ laˇ mehˇ laˇ ngeh, sahˬ lahˬ dawˬ tawˆ luꞈ naˆ maˬ tseˇ huiˬ dzehˬ-awˇ, aˇ bawˬ bawˬ ma ma-iˇ-eu miˇ neh, kʼoeˇ taˆ zaw-eu aˇ jiˇ deuˬ uˬ laꞈ-ahˇ bahˬ bahˬ le-eu meh.”
Dehˬ tseˬ gaˇ kawˆ yaw jeˬ ma jeˬ
(Luˇkaꞈ 13.20,21)
33Aˬ yawꞈ maꞈ-ahˇ Yeˬsuˇ yaw jeˬ ma jeˬ tiˬ hmˬ heu loꞈ-ehˇ paˇ ja mehˬ nehˬ-euˬ meh. “Mˬtaˆ Miˇkʼahˬ-aˬ, heu loꞈ-ehˇ duˇ-eu meh. Zaˬ miˬ zaˬ tiˬ gʼaˬ dehˬ tseˬ ui cuiˆ yuˇ-awˇ, cehˇ meu smˇ puˬ-ahˇ keuˬ-awˇ, dawˬ tawˆ luꞈ bi poˬ laˇ jiˇ gaˇ duˇ-eu meh.”
Yeˬsuˇ yaw jeˬ ma jeˬ ja mehˬ-eu gaˇ kawˆ
(Maˬkuˆ 4.33,34)
34Gaˇ kawˆ kʼoeˇ deuˬ dawˬ tawˆ luꞈ, yaw jeˬ ma jeˬ ja ja-ehˇ, tsawˇ haˬ aˇ maꞈ-ahˇ Yeˬsuˇ mehˬ nehˬ-euˬ meh. Yaw jeˬ ma jeˬ maˬ ja-ehˇ mehˬ nehˬ-euˬ tiˬ jeˬ-iˬ maˬ jaˆ-a. 35Miˬyehˇ gʼaˇ duˬ ngehˬ dah-eu deuˬ neh ehˇ taˬ-euˬ dawˬ heu deuˬ byah laˇ ni, aˬ yawꞈ kʼoeˇ loꞈ-ehˇ mehˬ nehˬ-euˬ meh.
“Ngaˬ-euˬ kʼaˬ meh ngaˇ mˇ nga-awˇ,
yaw jeˬ ma jeˬ ja mehˬ nehˬ-awˇ,
Miˇ beh ngeh neh zaꞈ taˬ-euˬ jeˬ,
aˬ yawꞈ maꞈ-ahˇ dzawˇ duˬ nehˬ ma.”
Shmˇ ma gaˇ kawˆ dawˬ tsuiꞈ
36Yeˬsuˇ tsawˇ haˬ aˇ maꞈ maꞈ ma jawˇ gaˇ neh doˆ-iˇ-awˇ, iˇ kahˇ laꞈ kʼoeˇ uˇ leˇ ngeh, aˬ yawꞈ-euˬ zaˬ lahˇ deuˬ aˬ yawꞈ jawˇ gaˇ laˇ-awˇ ehˇ-eu, “Deh yaˇ-ahˇ dehꞈ-eu shmˇ ma gaˇ kawˆ yaw jeˬ ma jeˬ kʼoeˇ hmˬ-euˬ dawˬ tsuiꞈ tiˬ poˆ ja mehˬ laꞈ sheˇ.”
37Yeˬsuˇ ehˇ-eu, “Siˬ yoeˬ yaw muiˬ sehˬ-eu gʼaˬ lehˇ ehˇ-eu-aˬ, Tsawˇhaˬ-euˬ Zaˬmaˇ-ahˇ ehˇ-eu meh. 38Deh yaˇ lehˇ ehˇ-eu-aˬ, miˇ tsaˬ heu-ahˇ ehˇ-eu meh. Siˬ yoeˬ yaw muiˬ lehˇ ehˇ-eu-aˬ, Miˬyehˇ Miˇkʼahˬ-ahˇ taꞈ-eu tsawˇ haˬ deuˬ-ahˇ ehˇ-eu meh. 39Shmˇ ma sehˬ kʼoeˬ-eu muiˇ-eu gʼaˬ lehˇ ehˇ-eu-aˬ, Nehꞈ sahˬ paˬ-ahˇ ehˇ-eu meh. Cehˇ laˆ luiˆ-eu aˇ yamˬ lehˇ ehˇ-eu-aˬ, miˇ tsaˬ heu aˇ saˬ saˬ-eu aˇ yamˬ-ahˇ ehˇ-eu meh. Cehˇ yehˬ cehˇ diˬ-eu tsawˇ haˬ deuˬ lehˇ ehˇ-eu-aˬ, mˬ taˆ gʼaˬ kʼehˇ deuˬ-ahˇ ehˇ-eu meh. 40Shmˇ ma-ahˇ gʼoˆ uiˬ-awˇ, miˬ dzaˬ-ahˇ baꞈ puiˆ-eu loꞈ-ehˇ, miˇ tsaˬ heu aˇ saˬ saˬ ngeh nah kʼoeˇ loꞈ-ehˇ pyeuꞈ laˇ tehꞈ-a. 41Tsawˇhaˬ-euˬ Zaˬmaˇ-aˬ, aˬ yawꞈ-euˬ mˬ taˆ gʼaˬ kʼehˇ deuˬ-ahˇ pyehˬ gʼeh leꞈ-awˇ, aˬ cawˬ iˬ baˇ mˇ ni jahˇ-eu tsawˇ haˬ dawˬ tawˆ luꞈ hawˇ-eu, yaw haiˬ jeˬ kʼaˇ mˇ-eu tsawˇ haˬ dawˬ tawˆ luꞈ-ahˇ, aˬ yawꞈ-euˬ Miˇ kʼahˬ laꞈ kʼoeˇ neh bi sheuˬ doˆ uiˬ tehꞈ-a. 42Kʼoeˇ naˇ, aˬ yawꞈ maꞈ-ahˇ guˆ dui dui laˇ paˬ-ehˇ gʼeh-eu miˬ dzaˬ jehˆ bymˇ-ahˇ bi baꞈ puiˆ-awˇ, kʼoeˇ gaˇ ngoeˇ ngoeˇ-ehˇ, seuˬ teuꞈ teuꞈ-ehˇ ya shaˬ tehꞈ-a. 43Kʼoeˇ ngeh, Miˬyehˇ-euˬ tsawˇ haˬ deuˬ-aˬ, aˬ yawꞈ maꞈ-euˬ Aˬda-euˬ Miˇkʼahˬ laꞈ kʼoeˇ, nahˇ ma loꞈ-ehˇ yaw shehꞈ bya tehꞈ-a. Naˬ bawˇ kʼaˇ tsoꞈ-eu deuˬ naˇ haˬ-awˬ.
Pyuˇ pahˬ gaˇ kawˆ yaw jeˬ ma jeˬ
44“Mˬtaˆ Miˇkʼahˬ-aˬ, heu loꞈ-ehˇ duˇ-eu meh. Tsawˇ haˬ tiˬ gʼaˬ deh ma tiˬ kawˬ-ahˇ pyuˇ pahˬ mawˇ-awˇ, yaˆ pymˬ taˬ yaꞈ-euˬ meh. Aˬ yawꞈ laˬ kʼaˬ cehˇ dui dui-eu laꞈ kʼoeˇ, kʼaˇ jaˆ-eu jeˬ dawˬ tawˆ luꞈ ahˬ jiˇ-awˇ, deh ma kʼoeˇ kawˬ zeuˇ tsehˆ-euˬ meh.
Aˇ caˇ caˇ kʼawꞈ sehˇ gaˇ kawˆ yaw jeˬ ma jeˬ
45“Tiˬ poˆ paˇ ya ehˇ naˇ, Mˬtaˆ Miˇkʼahˬ-aˬ, heu loꞈ-ehˇ duˇ-eu meh. Tsawˇ haˬ tiˬ gʼaˬ muiˬ dui dui-eu aˇ caˇ caˇ kʼawꞈ sehˇ shaˇ poˆ luꞈ-eu meh. 46Aˇ dzehˬ dzeuˇ ni muiˬ-eu aˇ caˇ caˇ kʼawꞈ sehˇ tiˬ siˬ aˬ yawꞈ mawˇ ngeh, aˬ yawꞈ kʼaˇ jaˆ-eu jeˬ dawˬ tawˆ luꞈ ahˬ-iˇ-awˇ, sehˇ kʼoeˇ siˬ zeuˇ tsehˆ-euˬ meh.
Za dzeh-eu gaˇ kawˆ yaw jeˬ ma jeˬ
47“Tiˬ poˆ paˇ ya ehˇ naˇ, Mˬtaˆ Miˇkʼahˬ-aˬ, za dzeh gaˇ duˇ-eu meh. Iˬ ma laˆ shaˆ laꞈ kʼoeˇ za dzeh ahˇ gʼeh ngeh, ngaˬ shaˬ ngaˬ deˇ yawˬ jeˬ na luꞈ-ahˇ dzeh pymˬ-eu meh. 48Ngaˬ shaˬ tiˬ byah ni dzeh paꞈ gʼaˬ ngeh, lawˇ dzeˇ gʼeu doˆ-eu meh. Kʼoeˇ naˇ nuiˇ-awˇ, ngaˬ shaˬ yaw muiˬ deuˬ kʼaˆ puˬ-ahˇ tseˇ ahˇ-awˇ, maˬ muiˬ-eu deuˬ tseˇ dzeh-eu meh. 49Miˇ tsaˬ heu aˇ saˬ saˬ-eu aˇ nah keuˆ le ngeh, kʼoeˇ loꞈ-ehˇ pyeuꞈ laˇ tehꞈ-a. Mˬ taˆ gʼaˬ kʼehˇ deuˬ doˆ le-awˇ, haiˬ-eu tsawˇ haˬ deuˬ hawˇ-eu yaw tsaˬ yaw dawˇ tsawˇ haˬ deuˬ-ahˇ tseˇ paˆ le tehꞈ-a. 50Haiˬ-eu tsawˇ haˬ deuˬ-aˬ, guˆ dui dui laˇ paˬ-ehˇ gʼeh-eu miˬ dzaˬ jehˆ bymˇ-ahˇ bi biˬ ahˇ-awˇ, ngoeˇ ngoeˇ-ehˇ, seuˬ teuꞈ teuꞈ-ehˇ ya shaˬ tehꞈ-a.
Yaw shuiꞈ yaw oeˇ
51“Gaˇ kawˆ heu deuˬ naw maꞈ gʼoˆ shaw-euˬ ma loˇ” lehˇ Yeˬsuˇ naˇ haˬ ngeh, “Gʼoˆ shaw-euˬ ma” lehˇ aˬ yawꞈ maꞈ ehˇ-eu meh.
52Aˬ yawꞈ ehˇ-eu, “Dawˬ tsuiꞈ-aˬ, heu loꞈ-ehˇ meh. Mˬtaˆ Miˇkʼahˬ-euˬ zaˬ lahˇ pyeuꞈ laˇ-euˬ Zahˇ dawˬ kʼoꞈ dawˬ mehˬ-eu saˬ laˬ aˬ geu gʼaˬ maˬ kaˬ, kuˆ lawˆ laꞈ kʼoeˇ jeˬ hmˬ taˬ-euˬ myawˬ yaw shuiꞈ hawˇ-eu yaw oeˇ yuˇ doˆ laꞈ-eu nymˇ sahˇ aˬ da tiˬ gʼaˬ-ahˇ duˇ-eu meh.”
Naˬzaˬlehˇ meuˬ Yeˬsuˇ-ahˇ maˬ ha geuꞈ-a
(Maˬkuˆ 6.1-6; Luˇkaꞈ 4.16-30)
53Yeˬsuˇ yaw jeˬ ma jeˬ kʼoeˇ deuˬ ja mehˬ gʼaˬ ngeh, jawˇ duˬ kʼoeˇ tsahˇ-ahˇ neh doˆ-iˇ-awˇ, 54aˬ yawꞈ jawˇ-eu meuˬ-ahˇ gʼoꞈ leˇ-euˬ meh. Aˬ yawꞈ uˬ duˬ tahˬ nymˇ laꞈ kʼoeˇ mehˬ nehˬ tsoˆ nehˬ gʼaˬ ngeh, ya gaˬ-euˬ tsawˇ haˬ deuˬ zahˬ leˇ-awˇ, heu loꞈ-ehˇ ehˇ-eu meh. “Heu loꞈ-ehˇ gʼeh-eu zaˬ siˬ tsawˇ gahˇ deuˬ aˬ yawꞈ aˬ gaˇ neh za-euˬ nga. Zahˬ leˇ paˬ-ehˇ gʼeh-eu gaˇ heu deuˬ aˬ yawꞈ aˬ joˆ-ehˇ mˇ nya-eu nga. 55Aˬ yawꞈ laꞈ saˇ maˇ-euˬ aˬ li maˬ ngeuˇ-a loˇ. Maˬliˇ-euˬ aˬ li kʼoeˇ gʼaˬ maˬ ngeuˇ-a loˇ. Yaˬkoˆ, Yoˇsehˆ, Siˇmoˬ, Yuˇdaˆ, aˬ ha mehˇ nmˇ-euˬ aˇ doˆ kʼoeˇ gʼaˬ maˬ ngeuˇ-a loˇ. 56Aˬ yawꞈ-euˬ dmˇ ma dawˬ tawˆ luꞈ heu gaˇ jawˇ jiˇ-eu maˬ ngeuˇ-a loˇ. Teu loꞈ-ehˇ gʼeh-eu zaˬ siˬ tsawˇ gahˇ deuˬ aˬ yawꞈ aˬ gaˇ za-euˬ nga.” 57Kʼoeˇ naˇ, aˬ yawꞈ maꞈ aˬ yawꞈ-ahˇ maˬ ha geuꞈ-a.
Yeˬsuˇ aˬ yawꞈ maꞈ-ahˇ ehˇ nehˬ-eu, “Miˬyehˇ gʼaˇ duˬ ngehˬ dah-eu tsawˇ haˬ-ahˇ, yawˬ gaˇ na luꞈ aˬ cawˬ taˬ huiˬ nehˬ-eu meh. Ehˇ kʼawꞈ, aˬ yawꞈ jawˇ-eu meuˬ hawˇ-eu aˬ yawꞈ-euˬ iˇ kahˇ laꞈ kʼoeˇ, aˬ yawꞈ-ahˇ maˬ taˬ huiˬ nehˬ-a.” 58Aˬ yawꞈ maꞈ nui jah maˬ ahˇ-eu miˇ neh, zahˬ leˇ paˬ-ehˇ gʼeh-eu gʼawˬ mya jeˬ, kʼoeˇ gaˇ aˬ yawꞈ maˬ mˇ mehˬ nehˬ-a.
Currently Selected:
Maꞈtehˬ 13: AHK
Highlight
Share
Copy
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
