Maˬlaˬkiˇ 4
4
Sahˬpaˬ Miˬyehˇ-euˬ aˇ nah keuˆ le luꞈ-eu
1Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh. “Nui ma huiˬ-eu mahˇ-eu tsawˇ haˬ deuˬ hawˇ-eu haiˬ-eu tsawˇ haˬ deuˬ gʼo yoeˬ loꞈ-ehˇ bi puiˆ dzeh-eu aˇ nah keuˆ le luꞈ meh. Aˇ nah kʼoeˇ nah keuˆ le ngeh, aˬ yawꞈ maꞈ tiˬ jeˬ-iˬ maˬ dzeˇ ni, juiˇ heu ni bi puiˆ dzaˬ jiˇ tehꞈ-a. 2Ehˇ kʼawꞈ, ngaˬ-euˬ ehˇ dawˬ naˇ haˬ-eu deuˬ pyeuꞈ-eu naw maꞈ kʼoeˇ taˆ, ngaˬ-euˬ ka kʼoꞈ-eu jeˬ nahˇ ma loꞈ-ehˇ doˆ laˇ-awˇ, naˇ gawˇ laˆ taˬ-eu jeˬ nahˇ ma yaw shehꞈ loꞈ-ehˇ keuˆ le tehꞈ-a. Kuˆ-ahˇ neh pyehˬ doˆ nehˬ-euˬ mawˇ neˇ mawˇ zaˬ loꞈ-ehˇ, naw maꞈ laˬ kʼaˬ ya cehˇ dui dui tehꞈ-a. 3Ngaˇ luˆ laˇ ngeh nah, maˬ tsaˬ maˬ dawˇ-eu tsawˇ haˬ deuˬ-ahˇ naw maꞈ gʼaˬ leˇ-awˇ, aˬ yawꞈ maꞈ-aˬ, naw maꞈ-euˬ aˬ kuiˇ pehˬ zaˬ uˬ moˆ jaˆ-eu kʼaˬ lehˇ-ahˇ duˇ tehꞈ-a.
4“Iˇsaˬleˬlaˆ tsawˇ haˬ dawˬ tawˆ luꞈ bi naˇ haˬ geuꞈ-eu gʼaˇ duˬ, Siˇnaˆ gawˬ jawˬ-ahˇ ngaˬ-euˬ za kʼaˆ Moˇseˬ-ahˇ ngaˬ neh biꞈ-euˬ zahˇ dawˬ kʼoꞈ dawˬ pyeuꞈ-eu, Moˇseˬ neh mehˬ nehˬ tsoˆ nehˬ-euˬ dawˬ kʼoeˇ deuˬ-ahˇ naw maꞈ taˬ ngehˇ.
5“Ehˇ kʼawꞈ, guˆ dui dui laˇ paˬ-ehˇ gʼeh-eu Sahˬpaˬ Miˬyehˇ-euˬ aˇ nah nah huiˬ kʼoeˇ nah maˬ keuˆ-euˬ nmˇ kaˬ, Miˬyehˇ gʼaˇ duˬ ngehˬ dah-eu Eˇliˇyaˆ-ahˇ naw maꞈ jawˇ gaˇ ngaˇ pyehˬ gʼeh leꞈ ma. 6Aˬ da hawˇ-eu zaˬ deuˬ dehꞈ taꞈ dehꞈ dzoeˇ nya ni aˬ yawꞈ jahˇ le tehꞈ-a. Kʼoeˇ loꞈ-ehˇ maˬ ngeuˇ naˇ, naw maꞈ-euˬ miˇ kʼahˬ-ahˇ ngaˇ oe-awˇ, yaˬ kʼehˇ yaˬ-awˇ laˆ cawˆ paˬ-ehˇ gʼeh nya.”
Currently Selected:
Maˬlaˬkiˇ 4: AHK
Highlight
Share
Copy
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
