Maˬlaˬkiˇ 3
3
1Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh. “Ngaˇ oe-eu gaˇ ma bi laˆ saˆ-eu gʼaˇ duˬ ngaˬ-euˬ dawˬ tsaꞈ dawˬ dzawˇ mˇ-eu gʼaˬ pyehˬ gʼeh leꞈ ma. Kʼoeˇ naˇ, naw maꞈ loꞈ luꞈ-eu Sahˬpaˬ Miˬyehˇ-aˬ, aˬ yawꞈ-euˬ Uˬ duˬ tahˬ nymˇ nymˇ ma-ahˇ ja pyuˬ ni oe keuˆ tehꞈ-a. Naw maꞈ mawˇ mawꞈ-euˬ ngaˬ-euˬ dawˬ tsaꞈ dawˬ dzawˇ mˇ-eu gʼaˬ oe-awˇ, ngaˬ-euˬ dawˬ ma saˇ jaˇ dzawˇ nehˬ le tehꞈ-a.”
2Ehˇ kʼawꞈ, aˬ yawꞈ oe ngeh nah aˬ suˇ gʼaˬ daˬ coeˇ nmˇ, Aˬ yawꞈ doˆ le ngeh, maˬ shiˇ-ehˇ dzeuˇ-iˇ-eu aˬ suˇ gʼaˬ jawˇ nmˇ. Aˬ yawꞈ-aˬ, taˆ dui dui-eu shaˇ byaˬ hawˇ-eu, shmˇ baw guiˇ-eu miˬ dzaˬ-ahˇ duˇ-eu meh. 3Pyuˇ kʼoˇ baw guiˇ-awˇ laˆ shawˇ-eu loꞈ-ehˇ, yaˇ kʼaˬ daˇ-eu gʼaˇ duˬ aˬ yawꞈ oe tehꞈ-a. Piˇ ma deuˬ Sahˬpaˬ Miˬyehˇ-ahˇ tsaˬ-eu dawˇ-eu lawˇ-eu jeˬ lawˇ nehˬ laˇ ni, baw baw-eu tsawˇ haˬ pyuˇ hawˇ-eu shuiˇ baw guiˇ-awˇ laˆ shawˇ-eu loꞈ-ehˇ, Sahˬpaˬ Miˬyehˇ-euˬ dawˬ tsaꞈ dawˬ dzawˇ mˇ-eu gʼaˬ piˇ ma kʼoeˇ deuˬ-ahˇ shawˇ tehꞈ-a. 4Kʼoeˇ ngeh jawˇ, Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ neh Sahˬpaˬ Miˬyehˇ-ahˇ damˬ laˇ-euˬ jeˬ-aˬ, aˇ hu ba damˬ-euˬ jeˬ loꞈ-ehˇ, Sahˬpaˬ Miˬyehˇ nui ma tsaˬ-eu damˬ-eu jeˬ pyeuꞈ laˇ tehꞈ-a.
5Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh. “Yaˇ kʼaˬ daˇ-eu gʼaˇ duˬ naw maꞈ jawˇ gaˇ ngaˇ oe-awˇ, mah loˬ ja maw mˇ-euˬ deuˬ, aˬ cawˬ-euˬ miˬ zaˬ yo zaˬ-ahˇ bahˬ-euˬ deuˬ, maˬ tsaˬ maˬ dawˇ-eu saˇ kiˇ kamˬ-euˬ deuˬ, gʼaˬ gaˇ poeˬ maˬ biꞈ byah ni mehˇ shuiˇ shuiˇ dzaˬ-euˬ deuˬ, miˬ coeˬ miˬ ma, muˇ coeˬ aˬ nmˇ, aˬ cawˬ tsawˇ jeuˬ, heu deuˬ-ahˇ yehˬ bawˬ sehˇ lu-ehˇ gʼeh-euˬ deuˬ hawˇ-eu, ngaˬ-ahˇ yaw zeu maˬ baw-eu tsawˇ haˬ dawˬ tawˆ luꞈ-ahˇ, ngaˇ pyehˆ tseˇ duˬ ma.
Tseˇ bymˇ tiˬ bymˇ biꞈ-eu
6“Ngaˇ-aˬ, noeˬ poˆ noeˬ paˇ maˬ mˇ-eu Sahˬpaˬ Miˬyehˇ ma. Kʼoeˇ miˇ neh, naw maꞈ Yaˬkoˆ-euˬ zaˬ deuˬ byoˆ jiˇ laˆ jiˇ gaˇ maˬ keuˆ-a siˬ. 7Naw maꞈ-aˬ aˇ hu dehꞈ-euˬ naw maꞈ-euˬ aˬ poeˬ aˬ bawˇ deuˬ loꞈ-ehˇ, ngaˬ-euˬ zahˇ dawˬ kʼoꞈ dawˬ-ahˇ maˬ caw teh ni byehˇ-euˬ meh. Ngaˇ jawˇ gaˇ gʼoꞈ kʼoꞈ laˇ-awˬ. Ngaˇ naw maꞈ jawˇ paw ciˬ pyawˇ nehˬ ma. Ehˇ kʼawꞈ, ‘Nga maꞈ aˬ joˆ-ehˇ jahˇ-awˇ nawˇ jawˇ gaˇ ya gʼoꞈ kʼoꞈ laˇ ta’ lehˇ naw maꞈ ehˇ-eu meh. 8Ngaˇ naw maꞈ-ahˇ naˇ haˬ nyaˇ. Tsawˇ haˬ tiˬ gʼaˬ Miˬyehˇ-ahˇ mehˇ shuiˇ shuiˇ-eu tsaˬ tehꞈ-a loˇ. Maˬ tsaˬ-a. Ehˇ kʼawꞈ, naw maꞈ ngaˬ-ahˇ mehˇ shuiˇ shuiˇ luꞈ meh. ‘Aˬ joˆ-ehˇ shuiˇ taˬ’ lehˇ naw maꞈ ehˇ mawꞈ tehꞈ-a. Tseˇ bymˇ tiˬ bymˇ biꞈ-eu laꞈ kʼoeˇ maˬ ehˇ, ngaˬ-ahˇ damˬ-eu jeˬ laꞈ kʼoeˇ maˬ ehˇ, naw maꞈ ngaˬ-ahˇ mehˇ shuiˇ shuiˇ-euˬ meh. 9Tsawˇ jeuˬ jeuˬ lah ni ngaˬ-ahˇ mehˇ shuiˇ shuiˇ-eu miˇ neh, naw maꞈ dawˬ tawˆ luꞈ yaˬ kʼehˇ yaˬ gaˇ ya daˬ tehꞈ-a. 10Ngaˬ-euˬ Uˬ duˬ tahˬ nymˇ nymˇ ma laꞈ kʼoeˇ dzaˬ dzaˬ dawˇ dawˇ jaˆ laˇ ni, tseˇ bymˇ tiˬ bymˇ tiˬ byah ni yuˇ laꞈ-awˬ. Kʼoeˇ naˇ, naw maꞈ ngaˬ-ahˇ lawˬ haw-awˬ. Mˬ taˆ laˇ gʼoˆ deuˬ pah dzeh jiˇ-awˇ, muiˬ-eu guiˬ lahˬ dawˬ tawˆ luꞈ byah kʼaˇ-iˇ gaˇ keuˆ ni naw maꞈ-ahˇ ngaˇ shehˆ ahˇ nehˬ ma. 11Naw maꞈ neh dzaˬ la gʼo cehˇ ka taˬ-euˬ gaˇ aˇ mawˇ maˬ bi teuꞈ cawˆ-eu uˬ taꞈ, naw maꞈ-euˬ aˬ gaꞈ yaˇ kmˇ-ahˇ aˬ gaꞈ aˇ siˬ bi loˆ le ma. 12Kʼoeˇ naˇ, miˇ kʼahˬ tsawˇ jeuˬ dawˬ tawˆ luꞈ, naw maꞈ-ahˇ guiˬ lahˬ huiˬ-eu tsawˇ jeuˬ lehˇ kuˇ tehꞈ-a. Aˬ jeˬ miˇ neh ehˇ naˇ, naw maꞈ-euˬ miˇ kʼahˬ-aˬ, jawˇ muiˬ dui dui-eu miˇ kʼahˬ meh.”
Miˬyehˇ gʼawˬ shaˬ gaˬ-eu saˇ jaˇ
13Sahˬpaˬ Miˬyehˇ ehˇ-euˬ, “Ngaˬ-ahˇ coeˬ dui dui laˇ-eu dawˬ naw maꞈ ngehˬ-euˬ meh. Ehˇ kʼawꞈ, ‘Nga maꞈ nawˬ-ahˇ aˬ jeˬ ehˇ taˬ-euˬ jaˆ ta’ lehˇ naw maꞈ ehˇ-eu meh. 14Naw maꞈ heu loꞈ-ehˇ ehˇ-euˬ meh. ‘Miˬyehˇ ehˇ dawˬ naˇ haˬ-eu yawꞈ ngehꞈ ngaˇ. Aˬ yawꞈ neh ehˇ-euˬ loꞈ-ehˇ mˇ-awˇ, aˬ dui neh mˇ-euˬ yaw lehˬ jeˬ gʼaˇ duˬ, Baoˬ huiˬ-eu Sahˬpaˬ Miˬyehˇ mehˬ shi noeˬ shaˬ-eu jahˇ geuꞈ-eu tiˬ jeˬ-iˬ gaˇ dahˇ maˬ tsoeˬ-aˇ. 15Aˬ dui neh ya mawˇ-euˬ loꞈ-ehˇ ngeuˇ naˇ, nui ma huiˬ-eu mahˇ-eu tsawˇ haˬ deuˬ guiˬ lahˬ za gahˬ ngaˇ. Haiˬ-eu tsawˇ haˬ deuˬ dehꞈ dzaˬ dui dui-eu uˬ taꞈ, Miˬyehˇ-ahˇ yaw haiˬ jeˬ mˇ haw mˇ haw-ehˇ dehꞈ kʼawꞈ, tiˬ jeˬ-iˬ maˬ guˬ leˇ nga’ lehˇ ehˇ-eu meh.”
16Kʼoeˇ naˇ, Sahˬpaˬ Miˬyehˇ-ahˇ guˆ-eu tsawˇ haˬ deuˬ tiˬ gʼaˬ tiˇ gʼaˬ dawˬ ja ja cawˬ gaˇ Sahˬpaˬ Miˬyehˇ naˇ haˬ-eu meh. Sahˬpaˬ Miˬyehˇ-ahˇ guˆ-awˇ yaw zeu baw-eu tsawˇ haˬ deuˬ gaˇ kawˆ, aˬ yawꞈ-euˬ mehˬ shi jaˆ-eu sahˬ boꞈ paˇ dmˬ laꞈ kʼoeˇ boꞈ ahˇ taˬ-eu meh. 17Sahˬpaˬ Miˬyehˇ ehˇ-eu, “Aˬ yawꞈ maꞈ ngaˬ-euˬ tsawˇ haˬ ya pyeuꞈ tehꞈ-a. Ngaˇ luˆ laˇ ngeh nah, aˬ yawꞈ maꞈ-ahˇ ngaˬ-euˬ tsawˇ haˬ loꞈ-ehˇ sawˇ ma. Aˬ da-euˬ myawˬ kʼehˇ gʼoˆ-eu zaˬ-ahˇ aˬ da gaˬ-eu loꞈ-ehˇ, aˬ yawꞈ maꞈ-ahˇ ngaˇ gʼawˬ shaˬ gaˬ nehˬ ma. 18Yaw tsaˬ yaw dawˇ tsawˇ haˬ hawˇ-eu maˬ tsaˬ maˬ dawˇ-eu tsawˇ haˬ aˬ joˆ-ehˇ beu gaˇ-eu gaˇ kawˆ hawˇ-eu, ngaˬ-euˬ ehˇ dawˬ naˇ haˬ-eu tsawˇ haˬ hawˇ-eu maˬ naˇ haˬ-eu tsawˇ haˬ aˬ joˆ-ehˇ paˆ gaˇ-eu gaˇ kawˆ, ngaˬ-euˬ tsawˇ haˬ deuˬ tiˬ poˆ paˇ ya mawˇ duˬ tehꞈ-a.”
Currently Selected:
Maˬlaˬkiˇ 3: AHK
Highlight
Share
Copy
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
