Aˇ dahˬ 40

Paꞈ kuˆ-ahˇ uˇ-eu tsawˇ haˬ deuˬ-euˬ yuꞈ maˆ-ahˇ Yoˇsehˆ dawˬ tsuiꞈ yuˇ doˆ nehˬ-euˬ

1Aˇ nah aˇ yamˬ myahˇ laˇ ngeh, Iˇjiˇtuˆ sahˬ paˬ dawˇ-eu aˬ gaꞈ dzaˇ uiˇ jahˇ-eu paw aˬ yuiꞈ geuꞈ-eu gʼaˬ hawˇ-eu, sahˬ paˬ dzaˬ-eu kaˬ muˇ jahˇ-eu paw aˬ yuiꞈ geuꞈ-eu gʼaˬ, sahˬ paˬ-ahˇ mˇ bahˬ-euˬ meh. 2Aˬ yawꞈ nyaꞈ kʼoeˇ loꞈ-ehˇ mˇ bahˬ-euˬ gaˇ, sahˬ paˬ nui ma pehˇ-eu meh. 3Kʼoeˇ miˇ neh, aˬ yawꞈ nyaꞈ-ahˇ kʼawꞈ, sahˬ paˬ-euˬ nymˇ-ahˇ loꞈ-eu guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ kʼoeˇ gʼaˬ-euˬ nymˇ-ahˇ jaˆ-eu, Yoˇsehˆ-ahˇ nyehꞈ uˇ taˬ-euˬ paꞈ kuˆ kʼoeˇ kuˆ -ahˇ dawˆ-euˬ meh. 4Aˬ yawꞈ maꞈ paꞈ kuˆ laꞈ kʼoeˇ gʼawˬ myahˇ ni jawˇ-awˇ, yaw huiˬ yaw mahˇ kʼoeˇ gʼaˬ neh, Yoˇsehˆ-ahˇ tsawˇ haˬ kʼoeˇ nyiˬ gʼaˬ-ahˇ bo saˆ-eu zaˬ kʼaˆ bi geuꞈ-euˬ meh.

5Tiˬ miˇ keuˆ laˇ ngeh, sahˬ paˬ dawˇ-eu aˬ gaꞈ dzaˇ uiˇ jahˇ-eu paw aˬ yuiꞈ geuꞈ-eu gʼaˬ hawˇ-eu, sahˬ paˬ dzaˬ-eu kaˬ muˇ jahˇ-eu paw aˬ yuiꞈ geuꞈ luꞈ-eu paꞈ kuˆ-ahˇ uˇ-eu tsawˇ haˬ kʼoeˇ nyiˬ gʼaˬ, yuꞈ maˆ tiˬ gʼaˬ tiˬ jeˬ maˆ mawˇ-euˬ meh. 6Uˬ shawˬ paw, aˬ yawꞈ nyaꞈ jawˇ gaˇ Yoˇsehˆ oe ngeh, aˬ yawꞈ nyaꞈ nui ma cawˆ-awˇ nyoeˬ kʼeuˇ ni jawˇ luꞈ gaˇ ya mawˇ-euˬ meh. 7“Aˬ jeˬ gaˇ kawˆ noeˬ shaˬ duˬ jaˆ-eu miˇ neh nyoeˬ kʼeuˇ ni jawˇ te” lehˇ, aˬ yawꞈ nyaꞈ-ahˇ Yoˇsehˆ naˇ haˬ-euˬ meh.

8“Nga nyaꞈ nyiˬ gʼaˬ luꞈ yuꞈ maˆ maˆ-euˬ ma. Ehˇ kʼawꞈ heu gaˇ jawˇ-eu tsawˇ haˬ tiˬ gʼaˬ-iˬ yuꞈ maˆ dawˬ tsuiꞈ maˬ yuˇ doˆ nehˬ laꞈ nya-a” lehˇ, Yoˇsehˆ-ahˇ aˬ yawꞈ nyaꞈ ehˇ-eu meh. “Miˬyehˇ tehꞈ-ehˇ yuꞈ maˆ dawˬ tsuiꞈ yuˇ doˆ-eu tsawˇ gahˇ biꞈ nya-eu meh. Naw nyaꞈ neh yuꞈ maˆ maˆ-euˬ gaˇ kawˆ dzawˇ haw sheˇ” lehˇ Yoˇsehˆ ehˇ-eu meh.

9Kʼoeˇ ngeh, aˬ gaꞈ dzaˇ uiˇ jahˇ-eu paw aˬ yuiꞈ geuꞈ-eu gʼaˬ ehˇ-eu, “Ngaˇ yuꞈ maˆ heu loꞈ-ehˇ maˆ mawˇ-euˬ ma. Ngaˬ-euˬ mehˬ shi aˬ gaꞈ ciˇ ni baw duˆ tiˬ duˆ jaˆ-eu meh. 10Baw duˆ kʼoeˇ duˆ-ahˇ uˬ pyaˬ smˇ pyaˬ tsoꞈ-eu meh. Tiˬ kʼehˇ laˇ kʼehˬ laꞈ kʼoeˇ, baw duˆ kʼoeˇ duˆ-ahˇ, aˇ paꞈ tsoꞈ le, aˇ yehˆ yehˆ le, aˇ siˬ siˬ le-awˇ, awꞈ laˇ-euˬ meh. 11Kʼoeˇ ngeh, ngaˬ-euˬ aˬ laꞈ laꞈ kʼoeˇ sahˬ paˬ dawˇ-eu kʼmˬ maˬ tuˆ tehˬ luꞈ-eu ma. Aˬ gaꞈ aˇ siˬ kʼoeˇ deuˬ ngaˇ pyaˆ-awˇ, kʼmˬ maˬ laꞈ kʼoeˇ dzaˇ uiˇ nyehꞈ ahˇ-awˇ, sahˬ paˬ-ahˇ ciˬ miˇ nehˬ leˇ-eu lehˇ maˆ mawˇ-euˬ ma.”

12Yoˇsehˆ ehˇ-eu, “Nawˬ neh yuꞈ maˆ maˆ mawˇ-euˬ dawˬ tsuiꞈ heu loꞈ-ehˇ meh. Uˬ pyaˬ smˇ pyaˬ kʼoeˇ-aˬ, aˇ nah smˬ nah-ahˇ ehˇ mawꞈ-eu meh. 13Smˬ nah laꞈ kʼoeˇ sahˬ paˬ nawˬ-ahˇ pyehˬ doˆ-awˇ, yaw beh nawˬ neh kʼaˇ mˇ-euˬ gaˇ paˇ bi mˇ laꞈ tehꞈ-a. Nawˇ aˬ yawꞈ-ahˇ aˬ gaꞈ dzaˇ uiˇ jahˇ nehˬ-eu aˬ yuiꞈ geuꞈ ngeh, aˬ yawꞈ-ahˇ kʼmˬ maˬ ciˬ miˇ nehˬ-awˇ bi dawˇ haw-euˬ loꞈ-ehˇ, gʼawˬ myahˇ maˬ gʼeh-ehˇ, kʼmˬ maˬ paˇ ya ciˬ miˇ nehˬ tehꞈ-a. 14Ehˇ kʼawꞈ, nawˇ heu gaˇ neh ya doˆ-iˇ-awˇ, yaw muiˬ-ehˇ ya dehꞈ ya jawˇ ngeh, ngaˬ-ahˇ maˬ ngehˇ-ehˇ, ngaˇ kʼawꞈ heu gaˇ neh ya doˆ-iˇ ni, ngaˬ-euˬ gaˇ kawˆ sahˬ paˬ-ahˇ tiˬ poˆ dzawˇ mehˬ nehˬ law. 15Dawˇ coe ni ya ehˇ naˇ, Heˬbyehˇ miˇ kʼahˬ-ahˇ neh aˬ cawˬ ngaˬ-ahˇ kʼoeˬ doˆ laꞈ-euˬ meh. Ngaˇ heu gaˇ jawˇ luꞈ ngeh kʼawꞈ, paꞈ kuˆ laꞈ kʼoeˇ ya uˇ paˬ-ehˇ mˇ lehˬ laˆ lehˬ taˬ-euˬ tiˬ jeˬ-iˬ maˬ jaˆ.”

16Sahˬ paˬ dawˇ-eu aˬ gaꞈ dzaˇ uiˇ jahˇ-eu paw aˬ yuiꞈ geuꞈ-eu gʼaˬ neh yuꞈ maˆ maˆ mawˇ-euˬ gaˇ kawˆ-ahˇ, Yoˇsehˆ dawˬ tsuiꞈ yuˇ doˆ nehˬ-euˬ kʼoeˇ nui kʼahˇ shiˇ paˬ-ehˇ gʼeh gaˇ ya mawˇ ngeh, sahˬ paˬ dzaˬ-eu kaˬ muˇ jahˇ-eu paw aˬ yuiꞈ geuꞈ-eu gʼaˬ kʼawꞈ, Yoˇsehˆ-ahˇ heu loꞈ-ehˇ ehˇ nehˬ-euˬ meh. “Ngaˇ gʼeh, heu loꞈ-ehˇ yuꞈ maˆ maˆ mawˇ-euˬ ma. Ngaˬ-euˬ uˬ duˬ kʼoeˇ taˆ kaˬ muˇ dawˆ ahˇ taˬ-euˬ kʼaˆ puˬ smˇ puˬ boeˬ luꞈ-eu ma. 17Kʼoeˇ taˆ taˆ saˬ jaˆ-eu kʼaˆ puˬ kʼoeˇ puˬ laꞈ kʼoeˇ, sahˬ paˬ dzaˬ-eu gʼaˇ duˬ kaˬ muˇ gʼawˬ mya jeˬ dawˆ ahˇ taˬ-awˇ, aˇ jiˇ deuˬ kaˬ muˇ kʼoeˇ deuˬ-ahˇ toˆ dzaˬ le gaˇ maˆ mawˇ-euˬ ma.”

18Yoˇsehˆ ehˇ-eu, “Nawˬ neh yuꞈ maˆ maˆ mawˇ-euˬ dawˬ tsuiꞈ heu loꞈ-ehˇ meh. Kʼaˆ puˬ kʼoeˇ smˇ puˬ-aˬ, aˇ nah smˬ nah-ahˇ ehˇ mawꞈ-eu meh. 19Smˬ nah laꞈ kʼoeˇ, sahˬ paˬ nawˬ-ahˇ pyehˬ doˆ-awˇ, nawˬ-euˬ uˬ duˬ toˆ tsehˆ-awˇ, nawˬ-euˬ gʼawˇ mawˇ-ahˇ aˇ bawˇ tiˬ bawˇ kʼoeˇ taˆ paꞈ gʼeu taˬ tehꞈ-a. Kʼoeˇ ngeh, aˇ jiˇ deuˬ oe-awˇ, nawˬ-euˬ shaˬ jiˇ-ahˇ toˆ dzaˬ tehꞈ-a.”

20Smˬ nah byah laˇ ngeh, sahˬ paˬ dehꞈ le-euˬ bawˬ-iˬ jahˇ-eu aˇ nah paˇ keuˆ laˇ-euˬ miˇ neh, aˬ yawꞈ-euˬ gaˇ mˇ-eu yaw huiˬ yaw mahˇ deuˬ-ahˇ kuˇ uiˬ-awˇ, bawˬ-iˬ gʼeh-eu laꞈ kʼoeˇ dzaˬ taꞈ dawˇ taꞈ-euˬ meh. Kʼoeˇ ngeh, aˬ yawꞈ gʼaˇ duˬ aˬ gaꞈ dzaˇ uiˇ jahˇ-eu paw aˬ yuiꞈ geuꞈ-eu gʼaˬ hawˇ-eu, kaˬ muˇ jahˇ-eu paw aˬ yuiꞈ geuꞈ-eu gʼaˬ-ahˇ pyehˬ doˆ-awˇ, yaw huiˬ yaw mahˇ deuˬ-euˬ mehˬ shi bi sheuˬ laꞈ-euˬ meh. 21Kʼoeˇ naˇ, aˬ gaꞈ dzaˇ uiˇ jahˇ-eu gʼaˬ-ahˇ, aˬ gaꞈ dzaˇ uiˇ jahˇ-eu gaˇ paˇ bi mˇ-euˬ meh. 22Ehˇ kʼawꞈ, kaˬ muˇ jahˇ-eu gʼaˬ-ahˇ-aˬ, bi sehꞈ-euˬ meh. Yawˬ jeˬ na luꞈ Yoˇsehˆ neh ehˇ taˬ-euˬ loꞈ-ehˇ pyeuꞈ laˇ-euˬ meh. 23Ehˇ kʼawꞈ, aˬ gaꞈ dzaˇ uiˇ jahˇ-eu paw aˬ yuiꞈ geuꞈ-eu kʼoeˇ gʼaˬ-aˬ, Yoˇsehˆ-ahˇ maˬ paˇ noeˬ keuˆ-ehˇ, ngehˇ-awˇ jawˇ-euˬ meh.

Currently Selected:

Aˇ dahˬ 40: AHK

Highlight

Copy