Aˇ dahˬ 39

Yoˇsehˆ hawˇ-eu Pawˇtiˇpaˬ-euˬ miˬ zaˬ

1Iˇshaˬmeˬlaˇ tsawˇ haˬ deuˬ Yoˇsehˆ-ahˇ Iˇjiˇtuˆ miˇ kʼahˬ laꞈ kʼoeˇ sheuˬ gʼeh-awˇ, Iˇjiˇtuˆ sahˬ paˬ-euˬ gaˇ mˇ-eu yaw huiˬ yaw mahˇ tiˬ gʼaˬ pyeuꞈ-eu, sahˬ paˬ-euˬ nymˇ-ahˇ loꞈ-eu guiˇ maꞈ-ahˇ uˆ lahˇ-eu Pawˇtiˇpaˬ-ahˇ ahˬ nehˬ-euˬ meh. 2Yoˇsehˆ nehˬ-ehˇ Sahˬpaˬ Miˬyehˇ jawˇ-eu miˇ neh, Yoˇsehˆ kʼaˇ mˇ kʼaˇ shaˇ-eu gaˇ dawˬ tawˆ luꞈ huiˬ laˇ mahˇ laˇ luꞈ-eu meh. Aˬ yawꞈ-ahˇ zeuˇ-euˬ Iˇjiˇtuˆ tsawˇ haˬ yaw huiˬ yaw mahˇ kʼoeˇ gʼaˬ-euˬ nymˇ-ahˇ aˬ yawꞈ jawˇ luꞈ-eu meh. 3Yoˇsehˆ nehˬ-ehˇ Sahˬpaˬ Miˬyehˇ jawˇ-awˇ guiˬ lahˬ biꞈ luꞈ-eu miˇ neh, Yoˇsehˆ kʼaˇ mˇ kʼaˇ shaˇ-eu jeˬ guiˬ lahˬ baw gaˇ, yaw huiˬ yaw mahˇ kʼoeˇ gʼaˬ ya mawˇ-euˬ meh. 4Yoˇsehˆ-ahˇ Pawˇtiˇpaˬ nui kʼahˇ shiˇ-eu miˇ neh, aˬ yawꞈ-euˬ nymˇ hawˇ-eu aˬ yawꞈ kʼaˇ jaˆ-eu jeˬ dawˬ tawˆ luꞈ-ahˇ haw-eu pyaˆ-eu gʼaˬ bi geuꞈ-euˬ meh. 5Iˇjiˇtuˆ tsawˇ haˬ kʼoeˇ gʼaˬ-euˬ nymˇ jiˇ-ahˇ Yoˇsehˆ haw pyaˆ dahˬ beh ngeh nah neh, Yoˇsehˆ baˬ da neh nymˇ kʼoeˇ nymˇ-ahˇ Sahˬpaˬ Miˬyehˇ guiˬ lahˬ biꞈ-eu loꞈ-ehˇ, nymˇ laꞈ kʼoeˇ laꞈ nyiˇ kʼaˇ jaˆ-eu tsawˇ haˬ kʼoeˇ gʼaˬ-euˬ pyuˇ shuiˇ myawˬ gahˬ deuˬ myaˬ laˇ luꞈ-eu meh. 6Pawˇtiˇpaˬ-aˬ, aˬ yawꞈ dzaˬ-eu dawˇ-eu gʼaˇ duˬ hawˬ mˇ dzaˇ saꞈ gʼeh-eu gaˇ maˬ ngeuˇ naˇ, aˬ yawꞈ kʼaˇ jaˆ-eu jeˬ dawˬ tawˆ luꞈ Yoˇsehˆ neh bi haw bi pyaˆ-awˇ, kʼahˇ kʼoꞈ duˬ maˬ jaˆ ni dehꞈ-euˬ meh.

Yoˇsehˆ-aˬ, aˬ lmˬ mehˇ-awˇ aˇ gʼehˇ muiˬ dui dui-eu zaˬ guˬ tiˬ gʼaˬ pyeuꞈ-eu meh. 7Aˇ yamˬ ui cuiˆ myahˇ laˇ ngeh jawˇ, Yoˇsehˆ-ahˇ cu luꞈ-eu yaw huiˬ yaw mahˇ kʼoeˇ gʼaˬ-euˬ miˬ zaˬ Yoˇsehˆ-ahˇ mawꞈ dui dui leˇ-eu miˇ neh, Ngaˬ nehˬ-ehˇ yuꞈ kaˇ-euˇ lehˇ, Yoˇsehˆ-ahˇ cawˬ-euˬ meh. 8Ehˇ kʼawꞈ, Yoˇsehˆ maˬ tawˆ leˇ-ehˇ, zaˬ miˬ zaˬ kʼoeˇ gʼaˬ-ahˇ heu loꞈ-ehˇ ehˇ nehˬ-euˬ meh. “Haw sheˇ, ngaˇ heu gaˇ jawˇ luꞈ-eu miˇ neh, ngaˬ-euˬ baw leˬ ngaˬ-ahˇ jah-eu laꞈ kʼoeˇ yawˬ jeˬ na luꞈ a nehˬ laꞈ jiˇ-awˇ, kʼahˇ kʼoꞈ duˬ maˬ jaˆ ni dehꞈ-eu meh. 9“Nymˇ heu nymˇ-ahˇ taꞈ leˇ-eu gaˇ deuˬ-ahˇ ehˇ leꞈ naˇ, ngaˇ-aˬ, aˬ yawꞈ loꞈ-ehˇ baoˬ jaˆ-eu tsawˇ haˬ tiˬ gʼaˬ ma. Nawˬ-ahˇ maˬ ngeuˇ naˇ, nymˇ heu nymˇ laꞈ kʼoeˇ kʼaˇ jaˆ-eu jeˬ dawˬ tawˆ luꞈ-ahˇ, ngaˬ neh kʼaˇ noeˬ-euˬ loꞈ-ehˇ maˬ ya jahˇ-a lehˇ laˆ tsoeˬ taˬ-euˬ tiˬ jeˬ-iˬ maˬ jaˆ-a. Miˬyehˇ mehˬ shi iˬ baˇ huiˬ dui dui-eu maˬ mˇ kʼmˬ-eu heu jeˬ-ahˇ, ngaˇ aˬ joˆ-ehˇ mˇ nya nmˇ.” 10Zaˬ miˬ zaˬ kʼoeˇ gʼaˬ, Yoˇsehˆ-ahˇ aˬ yawꞈ nehˬ-ehˇ bi yuꞈ taꞈ-eu gʼaˇ duˬ, mehˇ shuiˇ shuiˇ kʼawꞈ maˬ shuiˇ tawˆ nya-a.

11Tiˬ nah keuˆ laˇ ngeh, Yoˇsehˆ gaˇ mˇ-eu lehˇ iˇ kahˇ laꞈ kʼoeˇ uˇ leˇ-euˬ meh. Aˇ yamˬ kʼoeˇ yamˬ-ahˇ, iˇ kahˇ laꞈ kʼoeˇ tsawˇ haˬ tiˬ gʼaˬ-iˬ maˬ jawˇ-a. 12Kʼoeˇ ngeh, aˬ yawꞈ-euˬ baw leˬ-euˬ miˬ zaˬ kʼoeˇ gʼaˬ aˬ yawꞈ-euˬ pehˇ kʼahˬ-ahˇ gʼeu tehˬ-awˇ, Ngaˬ nehˬ-ehˇ yuꞈ zaˇ-ahˇ yuꞈ laˇ-awˬ lehˇ cawˬ-euˬ meh. Ehˇ kʼawꞈ, Yoˇsehˆ-aˬ, zaˬ miˬ zaˬ kʼoeˇ gʼaˬ-euˬ aˬ laꞈ laꞈ kʼoeˇ aˬ yawꞈ-euˬ pehˇ kʼahˬ behˇ lehˆ ahˇ yaꞈ-awˇ, nymˇ laꞈ nyiˇ paw coeˬ doˆ gʼeh-euˬ meh. 13Yoˇsehˆ-euˬ pehˇ kʼahˬ aˬ yawꞈ-euˬ aˬ laꞈ laꞈ kʼoeˇ lehˆ ahˇ yaꞈ-euˬ gaˇ zaˬ miˬ zaˬ kʼoeˇ gʼaˬ ya mawˇ-euˬ meh. 14Kʼoeˇ ngeh, zaˬ miˬ zaˬ kʼoeˇ gʼaˬ aˬ yawꞈ-euˬ zaˬ kʼaˆ deuˬ-ahˇ kuˇ uiˬ-awˇ, heu loꞈ-ehˇ ehˇ nehˬ-euˬ meh. “Heu gaˇ haw sheˇ. Ngaˬ-euˬ kʼaˬ dzeˇ zaˬ neh sheuˬ ahˇ laꞈ-euˬ Heˬbyehˇ tsawˇ haˬ kʼoeˇ gʼaˬ, aˬ dui-ahˇ yehˬ bawˬ sehˇ lu-ehˇ jahˇ-eu lehˇ gʼeh-eu meh. Ngaˇ yuꞈ-eu kuˆ lawˆ laꞈ kʼoeˇ aˬ yawꞈ uˇ laˇ-awˇ, ngaˬ nehˬ-ehˇ yuꞈ taꞈ-eu lehˇ leh jeh-eu miˇ neh, ngaˇ yaw kʼaˆ-ehˇ guˇ-euˬ ma. 15Ngaˇ kʼoeˇ loꞈ-ehˇ guˇ-eu miˇ neh, aˬ yawꞈ-euˬ pehˇ kʼahˬ byehˇ yaꞈ-awˇ, laꞈ nyiˇ coeˬ doˆ gʼeh-euˬ meh.”

16Aˬ yawꞈ-euˬ kʼaˬ dzeˇ zaˬ gʼoꞈ laˇ ngeh keuˆ ni, pehˇ kʼahˬ kʼoeˇ kahˇ-ahˇ zaˬ miˬ zaˬ kʼoeˇ gʼaˬ neh yuˇ taˬ-awˇ bi jaˆ-euˬ meh. 17Kʼaˬ dzeˇ zaˬ gʼaˬ gʼoꞈ keuˆ laˇ ngeh, heu loꞈ-ehˇ dzawˇ nehˬ-euˬ meh. “Nawˬ neh sheuˬ ahˇ laꞈ-euˬ Heˬbyehˇ tsawˇ haˬ kʼoeˇ gʼaˬ, ngaˬ-ahˇ yehˬ bawˬ sehˇ lu-ehˇ jahˇ-eu lehˇ, ngaˇ yuꞈ luꞈ-eu kuˆ lawˆ-ahˇ uˇ laˇ-euˬ meh. 18Ehˇ kʼawꞈ, ngaˇ yaw kʼaˆ-ehˇ guˇ-eu miˇ neh, aˬ yawꞈ-euˬ pehˇ kʼahˬ ngaˬ-euˬ dawˬ peh byehˇ dzeh yaꞈ-awˇ, laꞈ nyiˇ coeˬ doˆ gʼeh-euˬ meh.”

19Gaˇ kawˆ kʼoeˇ Yoˇsehˆ-ahˇ zeuˇ cu-euˬ yaw huiˬ yaw mahˇ kʼoeˇ gʼaˬ ya gaˬ ngeh, nui ma pehˇ dui dui-eu meh. 20Kʼoeˇ miˇ neh, Yoˇsehˆ-ahˇ aˬ yawꞈ paꞈ-awˇ, sahˬ paˬ-ahˇ mˇ bahˬ-euˬ deuˬ-ahˇ paꞈ uˇ-eu paꞈ kuˆ-ahˇ dawˆ-euˬ meh. 21Ehˇ kʼawꞈ, Yoˇsehˆ nehˬ-ehˇ Sahˬpaˬ Miˬyehˇ jawˇ-awˇ, aˬ yawꞈ-ahˇ guiˬ lahˬ biꞈ luꞈ-eu miˇ neh, paꞈ kuˆ-ahˇ haw-eu aˬ yuiꞈ geuꞈ-eu gʼaˬ Yoˇsehˆ-ahˇ gʼawˬ shaˬ haw gaˬ-euˬ meh. 22Paꞈ kuˆ-ahˇ haw-eu aˬ yuiꞈ kʼoeˇ gʼaˬ, paꞈ kuˆ laꞈ kʼoeˇ kʼaˇ nyehꞈ uˇ taˬ-euˬ tsawˇ haˬ deuˬ kʼoeˇ taˆ, Yoˇsehˆ-ahˇ aˬ yuiꞈ bi geuꞈ-awˇ bi haw-euˬ meh. Paꞈ kuˆ laꞈ kʼoeˇ jaˆ-eu gaˇ dawˬ tawˆ luꞈ, Yoˇsehˆ-ahˇ a nehˬ-awˇ bi jahˇ jiˇ-euˬ meh. 23Paꞈ kuˆ aˬ yuiꞈ geuꞈ-eu kʼoeˇ gʼaˬ Yoˇsehˆ-ahˇ gaˇ dawˬ tawˆ luꞈ a nehˬ jiˇ-awˇ, kʼahˬ lahˇ kʼaˇ maˬ za ni jawˇ-euˬ meh. Aˬ jeˬ miˇ neh ehˇ naˇ, Yoˇsehˆ nehˬ-ehˇ Sahˬpaˬ Miˬyehˇ jawˇ-awˇ, aˬ yawꞈ neh kʼaˇ mˇ-euˬ jeˬ dawˬ tawˆ luꞈ bi huiˬ bi mahˇ laˇ luꞈ-eu meh.

Currently Selected:

Aˇ dahˬ 39: AHK

Highlight

Copy