Gʼaˬkʼehˇ 26

Sahˬ paˬ Aˬgiˇpaˆ mehˬ shi Pawˇluˆ dawˬ ngehˬ-euˬ

1Sahˬ paˬ Aˬgiˇpaˆ Pawˇluˆ-ahˇ ehˇ-eu, “Nawˬ-euˬ gaˇ kawˆ nawˇ ngehˬ-eu aˬ kawˬ-aˬ jaˆ meh.” Kʼoeˇ ngeh, Pawˇluˆ aˬ laꞈ caw ja-awˇ, aˬ yawꞈ-euˬ gaˇ kawˆ heu loꞈ-ehˇ ehˇ-eu meh.

2“Sahˬ paˬ Aˬgiˇpaˆ-oˇ, Yuˇdaˆ tsawˇ haˬ neh ngaˬ-euˬ gaˇ kawˆ kʼaˇ daˬ taˬ-euˬ yawˬ jeˬ na luꞈ-ahˇ, iˬ nah nawˬ-euˬ mehˬ shi ngaˇ ya ngehˬ kʼoꞈ-eu heu-aˬ, ngaˬ-euˬ gʼaˇ duˬ guiˬ lahˬ huiˬ-eu tiˬ jeˬ meh lehˇ noeˬ miˇ-a. 3Aˬ jeˬ miˇ neh ehˇ naˇ, Yuˇdaˆ tsawˇ haˬ-euˬ zahˇ sahˇ kʼoꞈ hawˇ-eu aˬ yawꞈ maꞈ tiˬ kʼehˬ maˬ taˬ ni ja dzaˬ-eu gaˇ kawˆ nawˇ yaw muiˬ paˬ-ehˇ siˬ nya-eu meh. Kʼoeˇ miˇ neh, nui ma gʼawˬ mahˇ ni taˬ-awˇ ngaˇ ja gaˇ tiˬ poˆ naˇ haˬ nehˬ laꞈ lehˇ shaˇ-eu ma.

Pawˇluˆ Paˬliˬsehˇ geuꞈ-euˬ gaˇ kawˆ dzawˇ-eu

4“Ngaˇ nyiˇ ngeh neh aˬ joˆ-ehˇ dehꞈ daˆ jawˇ daˆ laꞈ-euˬ gaˇ kawˆ, Yuˇdaˆ tsawˇ haˬ deuˬ siˬ nya jiˇ meh. Yaw beh ngaˬ-euˬ miˇ kʼahˬ-ahˇ aˬ joˆ-ehˇ dehꞈ yaꞈ-awˇ, aˇ nah Yeˬluˇsaˬlehˬ meuˬ-ahˇ aˬ joˆ-ehˇ dehꞈ-euˬ aˬ yawꞈ maꞈ siˬ nya jiˇ meh. 5Aˬ yawꞈ maꞈ ehˇ doˆ mawꞈ law nmˇ-aˬ, aˬ dui-euˬ uˬ duˬ tahˬ-eu zahˇ sahˇ kʼoꞈ laꞈ kʼoeˇ aˬ cawˬ naˆ maˬ tseˇ zahˇ sahˇ kʼoꞈ-ahˇ caw teh byah dui dui-eu aˇ muˇ pyeuꞈ-eu Paˬliˬsehˇ aˇ muˇ laꞈ kʼoeˇ, yaw beh neh ngaˇ uˇ leˇ-euˬ aˬ yawꞈ maꞈ siˬ nya jiˇ meh. 6Nymˬ-mˇ ngaˇ heu gaˇ heu loꞈ-ehˇ bi paꞈ-awˇ bi naˇ haˬ luꞈ-eu heu kʼawꞈ ni, aˬ dui-euˬ aˬ poeˬ aˬ bawˇ deuˬ-ahˇ Miˬyehˇ neh dzaˬ taˬ yaꞈ-euˬ saˇ jaˇ-ahˇ ngaˇ noeˬ tmˬ-eu baˬ da neh ya daˬ-eu jeˬ pyeuꞈ-eu ma. 7Aˬ dui-euˬ tsawˇ jeuˬ tseˇ nyiꞈ jeuˬ luꞈ, uˬ ciꞈ nah gʼahˇ maˬ ehˇ, Miˬyehˇ-ahˇ uˬ duˬ tahˬ tahˬ-ehˇ noeˬ tmˬ luꞈ-eu kʼoeˇ kʼawꞈ, nymˬ-mˇ ngaˇ noeˬ tmˬ luꞈ-eu heu hmˬ meh. Sahˬ paˬ-oˇ, kʼoeˇ loꞈ-ehˇ noeˬ tmˬ-eu heu hmˬ baˬ da neh Yuˇdaˆ tsawˇ haˬ deuˬ ngaˬ-ahˇ yaˇ kʼaˬ ja-eu meh. 8Aˬ jeˬ miˇ neh naw maꞈ heu gaˇ uiˬ laˇ taˬ-euˬ tsawˇ haˬ deuˬ, shiˇ-euˬ tsawˇ haˬ-ahˇ Miˬyehˇ bi gʼoꞈ dehꞈ laˇ nya meh lehˇ ehˇ gaˇ maˬ jah coeˇ te.”

Jah-eu tsawˇ haˬ deuˬ-ahˇ kʼehˬ haw-euˬ gaˇ kawˆ Pawˇluˆ dzawˇ-eu

9“Naˬzaˬlehˇ tsawˇ haˬ Yeˬsuˇ-euˬ tsawˇ myahˇ-ahˇ kʼaˇ coeˬ kʼaˇ ciˆ-eu jeˬ dawˬ tawˆ luꞈ mˇ-eu tsaˬ tehꞈ-a lehˇ ngaˇ noeˬ-euˬ ma. 10Yeˬluˇsaˬlehˬ meuˬ-ahˇ ngaˇ maˇ maˇ ni kʼoeˇ loꞈ-ehˇ mˇ-euˬ ma. Piˇ ma aˬ yuiꞈ deuˬ-ahˇ aˬ kawˬ-aˬ shaˇ-awˇ, Miˬyehˇ-euˬ tsawˇ haˬ gʼawˬ mya ni nyehꞈ-awˇ tawˬ-ahˇ dawˆ-euˬ uˬ taꞈ, aˬ yawꞈ maꞈ-ahˇ sehꞈ-eu gʼaˇ duˬ bawˬ dzaˬ tsehˆ gaˇ ngaˇ kʼawꞈ ahˇ leˇ-euˬ ma. 11Aˬ yawꞈ maꞈ-ahˇ uˬ duˬ tahˬ nymˇ laꞈ kʼoeˇ gʼawˬ mya poˆ bi kʼehˬ bi kʼaˆ ni ngaˇ jahˇ-awˇ, aˬ yawꞈ maꞈ-euˬ jah-eu jeˬ-ahˇ bi byehˇ dzeh-eu gʼaˇ duˬ ngaˇ leh jeh dui dui-euˬ ma. Aˬ yawꞈ maꞈ-ahˇ ngaˇ nui ma pehˇ dui dui-euˬ miˇ neh, aˬ cawˬ miˇ kʼahˬ-ahˇ jaˆ-eu meuˬ deuˬ-ahˇ keuˆ ni le le-ehˇ aˬ yawꞈ maꞈ-ahˇ kʼehˬ haw kʼaˆ haw-euˬ ma.

Pawˇ luˆ jah-eu tsawˇ haˬ pyeuꞈ laˇ-euˬ gaˇ kawˆ dzawˇ-eu

12“Kʼoeˇ loꞈ-ehˇ mˇ leˇ-eu gʼaˇ duˬ, piˇ ma aˬ yuiꞈ deuˬ-ahˇ aˬ kawˬ-aˬ shaˇ-awˇ, Daˬmaˬsehˇ meuˬ-ahˇ ngaˇ le-euˬ ma. 13Sahˬ paˬ-oˇ, gaˇ pehˇ-ahˇ nah loˆ ceh laˇ ngeh, nahˇ ma naˆ maˬ tseˇ kʼaˆ dui dui-eu yaw shehꞈ mˬ-ahˇ neh tahˬ tehˬ leꞈ-awˇ, ngaˇ hawˇ-eu ngaˬ nehˬ-ehˇ le luꞈ-eu tsawˇ haˬ deuˬ-euˬ tiˬ jawˬ bya le-euˬ meh. 14Nga maꞈ yawˬ gʼaˬ na luꞈ miˇ tsa coˬ dzeh-euˬ ma. Kʼoeˇ naˇ, Heˬbyehˇ dawˬ-ahˇ neh, ngaˬ-ahˇ heu loꞈ-ehˇ ehˇ-eu teˇ saˇ-ahˇ ngaˇ ya gaˬ-euˬ ma. ‘Sawˇluˆ-oˇ, Sawˇluˆ-oˇ, aˬ jeˬ miˇ neh nawˇ ngaˬ-ahˇ kʼehˬ te. Mawˇ neˇ-ahˇ tsawˆ-eu daˇ ceh-ahˇ behˆ-eu mawˇ neˇ loꞈ-ehˇ, yawˬ haˇ yawˬ ha laˆ tahˬ laˆ naˇ-eu jeˬ nawˇ mˇ-eu nga’ lehˇ ehˇ-eu meh. 15‘Sahˬpaˬ-oˇ, nawˇ aˬ suˇ gʼaˬ te’ lehˇ ngaˇ naˇ haˬ ngeh, heu loꞈ-ehˇ ehˇ kʼoꞈ nehˬ laꞈ-euˬ meh. ‘Ngaˇ-aˬ, nawˇ kʼehˬ luꞈ-eu Yeˬsuˇ ma. 16Tuˇ-awˇ gawˬ yawꞈ yawꞈ-awˬ. Nawˬ-ahˇ ngaˬ-euˬ gaˇ bi mˇ-eu lehˇ, nawˬ-euˬ mehˬ shi ngaˇ doˆ le-euˬ ma. Iˬ nah ngaˬ-ahˇ nawˇ ya mawˇ-euˬ gaˇ kawˆ heu hawˇ-eu, mehˬ hu paw ngaˬ neh nawˬ-ahˇ bi mawˇ-euˬ gaˇ kawˆ deuˬ, aˬ cawˬ-ahˇ nawˇ ya dzawˇ mehˬ nehˬ meh. 17Iˇsaˬleˬlaˆ tsawˇ haˬ deuˬ hawˇ-eu aˬ cawˬ tawˇ jeuˬ deuˬ jawˇ gaˇ nawˬ-ahˇ ngaˇ kʼehˇ gʼeh-awˇ, aˬ yawꞈ maꞈ-euˬ aˬ laꞈ laꞈ kʼoeˇ nawˬ-ahˇ ngaˇ bi buˬ-iˇ ma. 18Aˬ yawꞈ maꞈ jah-eu laꞈ kʼoeˇ iˬ baˇ pyehˬ nehˬ-euˬ jeˬ-ahˇ za-awˇ, Miˬyehˇ neh tseˇ doˆ-euˬ tsawˇ haˬ deuˬ nehˬ-ehˇ jawˇ duˬ za nya ni aˬ yawꞈ maꞈ-euˬ myaˆ nuiˆ nawˇ pah nehˬ-awˇ, yaw zahˇ laꞈ kʼoeˇ neh yaw shehꞈ-ahˇ ya sheuˬ kʼoꞈ laꞈ nehˬ-awˇ, Saˬdaˬ-euˬ baoˬ uˬ moˆ jawˇ luꞈ-eu deuˬ-ahˇ Miˬyehˇ jawˇ paw ya sheuˬ kʼoꞈ laꞈ nehˬ meh’ lehˇ ehˇ-eu meh.

Pawˇluˆ gaˇ mˇ-euˬ gaˇ kawˆ dzawˇ-euˬ

19“Kʼoeˇ miˇ neh, sahˬ paˬ Aˬgiˇpaˆ-oˇ, mˬ kʼoeˇ taˆ neh oe-euˬ yaw sahˇ laꞈ kʼoeˇ bi siˬ bi mawˇ-le-euˬ jeˬ-ahˇ ngaˇ maˬ naˇ haˬ geuꞈ ni maˬ byehˇ-aˬ. 20Daˬmaˬsehˇ meuˬ-ahˇ neh aˇ dahˬ beh-awˇ, Yeˬluˇsaˬlehˬ meuˬ-ahˇ maˬ ehˇ, Iˇsaˬleˬlaˆmiˇ kʼahˬ kʼahˬ lah ni-ahˇ maˬ ehˇ, aˬ cawˬ tsawˇ jeuˬ deuˬ-ahˇ maˬ ehˇ, iˬ baˇ noeˬ poˆ-awˇ Miˬyehˇ jawˇ paw gʼoꞈ kʼoꞈ laˇ-eu uˬ taꞈ, aˬ yawꞈ maꞈ iˬ baˇ noeˬ poˆ-euˬ ngaˇ lehˇ siˬ duˬ laˇ ni mˇ-awˬ shaˇ-awˬ lehˇ ngaˇ dawˬ mehˬ mehˬ-euˬ ma. 21Ngaˇ kʼoeˇ loꞈ-ehˇ mehˬ-euˬ baˬ da neh, Uˬ duˬ tahˬ nymˇ nymˇ ma laꞈ kʼoeˇ Yuˇdaˆ tsawˇ haˬ deuˬ ngaˬ-ahˇ nyehꞈ-awˇ sehꞈ-eu lehˇ leh jeh-euˬ meh. 22Ehˇ kʼawꞈ, iˬ nah keuˆ ni Miˬyehˇ ngaˬ-ahˇ caw ba nehˬ laꞈ-eu miˇ neh, heu gaˇ yawꞈ-awˇ, huiˬ zaˬ nyiˇ zaˬ heu myaˆ ni gʼeh-eu mehˬ shi saˇ kiˇ ya kamˬ luꞈ-eu ma. Nymˬ-mˇ ngaˇ ehˇ luꞈ-eu gaˇ kawˆ heu-aˬ, Miˬyehˇ gʼaˇ duˬ ngehˬ dah-eu deuˬ hawˇ-eu Moˇseˬ neh aˬ kaˇ heu loꞈ-ehˇ pyeuꞈ laˇ tehꞈ-a lehˇ ehˇ taˬ yaꞈ-euˬ gaˇ kawˆ aˬ yawꞈ tiˬ hmˬ ma. 23Ka li-aˬ, shiˇ-euˬ jeˬ-ahˇ ya daˬ-awˇ, gʼoꞈ dehꞈ beh beh laˇ-euˬ gʼaˬ pyeuꞈ-awˇ Yuˇ daˆ tsawˇ haˬ-ahˇ maˬ ehˇ, aˬ cawˬ tsawˇ jeuˬ deuˬ-ahˇ maˬ ehˇ, ka kʼoꞈ-eu yaw shehꞈ gaˇ kawˆ tahˇ kʼawˬ tehꞈ-a lehˇ ehˇ-eu gaˇ kawˆ kʼoeˇ hmˬ meh.”

Sahˬ paˬ Aˬgiˇpaˆ-ahˇ Pawˇluˆ dawˬ mehˬ mehˬ-euˬ

24Pawˇluˆ aˬ yawꞈ-euˬ gaˇ kawˆ ngehˬ kʼoꞈ-awˇ kʼoeˇ loꞈ-ehˇ dzawˇ luꞈ ngeh, sahˬ paˬ Beˬtuˇ aˬ yawꞈ-ahˇ guˇ-awˇ ehˇ-eu, “Pawˇluˆ-oˇ, nawˇ uˬ tsehˆ-euˬ ngaˇ. Nawˇ tsawˇ gahˇ aˇ dzehˬ dzaw dzeuˇ-awˇ dzaw uˬ-euˬ ngaˇ.”

25Pawˇluˆ ehˇ-eu, “Sahˬ paˬ Beˬtuˇ-oˇ, ngaˇ uˬ-iˇ-euˬ maˬ ngeuˇ. Aˬ diˇ aˬ maˇ ngeuˇ-eu jeˬ-ahˇ ngaˇ ehˇ luꞈ-eu ma. 26Sahˬ paˬ Aˬgiˇpaˆ-oˇ, gaˇ kawˆ heu deuˬ nawˬ-euˬ mehˬ shi kʼaˬ duˬ ni ngaˇ ehˇ peuˬ ma. Aˬ jeˬ miˇ neh ehˇ naˇ, gaˇ kawˆ heu nawˇ siˬ luꞈ-eu meh. Gaˇ kawˆ heu baˇ zaꞈ-ahˇ pyeuꞈ laˇ-euˬ maˬ ngeuˇ-eu miˇ neh, yawˬ jeˬ na luꞈ nawˇ siˬ jiˇ meh lehˇ ngaˇ ehˇ tsehˆ peuˬ ma. 27Sahˬ paˬ Aˬgiˇpaˆ-oˇ, Miˬyehˇ gʼaˇ duˬ ngehˬ dah-eu deuˬ-ahˇ nawˇ maˬ jah loˇ. Nawˇ jah meh lehˇ ngaˇ siˬ nya ma.”

28Sahˬ paˬ Aˬgiˇpaˆ Pawˇluˆ-ahˇ ehˇ-eu, “Aˇ yamˬ heu myah tehꞈ laꞈ kʼoeˇ, ngaˇ Ka li zaˬ pyeuꞈ laˇ ni nawˇ jahˇ nya ma lehˇ noeˬ te loˇ.”

29Pawˇluˆ ehˇ-eu, “Aˇ yamˬ yaw nymˇ yaw myahˇ taˬ ehˇ. Nawˇ hawˇ-eu iˬ nah ngaˇ ehˇ gaˇ kʼaˇ naˇ haˬ luꞈ-eu tsawˇ haˬ heu deuˬ dawˬ tawˆ luꞈ, ngaˇ shmˇ caˆ daˬ luꞈ-eu heu tiˬ hmˬ maˬ ngeuˇ naˇ, ngaˬ loꞈ-ehˇ jah-eu tsawˇ haˬ pyeuꞈ laˇ ni, Miˬyehˇ-ahˇ ngaˇ guiˬ lahˬ shaˇ luꞈ ma.”

30Kʼoeˇ naˇ, sahˬ paˬ Aˬgiˇpaˆ maˬ ehˇ, sahˬ paˬ Beˬtuˇ maˬ mehˇ, Beˬlaˬniˇ maˬ ehˇ, aˬ yawꞈ maꞈ nehˬ-ehˇ kʼaˇ nuiˇ luꞈ-eu deuˬ maˬ ehˇ, gʼoꞈ-iˇ-eu lehˇ tuˇ laˇ jiˇ-euˬ meh. 31Aˬ yawꞈ maꞈ gʼoꞈ doˆ le-awˇ tiˬ gʼaˬ tiˇ gʼaˬ ehˇ-eu, “Tsawˇ haˬ heu gʼaˬ-ahˇ sehꞈ paˬ-ehˇ, maˬ ngeuˇ naˇ tawˬ-ahˇ dawˆ paˬ-ehˇ mˇ lehˬ taˬ-euˬ tiˬ jeˬ-iˬ maˬ jaˆ law hawˇ ngaˬ laˬ.” 32Beˬtuˇ-ahˇ Aˬgiˇpaˆ ehˇ nehˬ-eu, “Tsawˇ haˬ heu gʼaˬ sahˬ paˬ Gehˇsaˬ neh yaˇ kʼaˬ bi daˇ laꞈ lehˇ maˬ shaˇ law nmˇ-aˬ, aˬ yawꞈ-ahˇ pyehˬ nehˬ nya lawˇ hawˇ nga.”

Currently Selected:

Gʼaˬkʼehˇ 26: AHK

Highlight

Copy