Gʼaˬkʼehˇ 27

Pawˇluˆ saˇ baoˬ dziˬ-awˇ Loˇmaˆ meuˬ-ahˇ le-euˬ

1Nga maꞈ-ahˇ Iˇdaˬliˬ miˇ kʼahˬ-ahˇ bi iˇ-eu lehˇ ehˇ tsehˆ gʼaˬ ngeh jawˇ, Pawˇluˆ hawˇ-eu tawˬ-ahˇ dawˆ taˬ-euˬ tsawˇ haˬ nui deuˬ-ahˇ, “Awˇguˆtuˆ guiˇ maꞈ” lehˇ kuˇ-eu Loˇmaˆ guiˇ maꞈ tiˬ maꞈ-ahˇ aˬ yuiꞈ geuꞈ luꞈ-eu Yuˇluˆ lehˇ myahˇ-euˬ gʼaˬ-euˬ aˬ laꞈ laꞈ kʼoeˇ a nehˬ-euˬ meh. 2Aˬshaˆ miˇ kʼahˬ saˇ baoˬ naˬ duˬ jaˆ-eu meuˬ deuˬ-ahˇ iˇ-eu lehˇ lehˬ hmˬ dah taˬ-euˬ, Aˬdaˬmuˇdiˇ meuˬ-ahˇ neh oe-euˬ saˇ baoˬ tiˬ laˇ-ahˇ nga maꞈ dziˬ leˇ-awˇ iˇ gʼeh-euˬ ma. Maˬgeˬdawˇniˆ miˇ kʼahˬ Teˇsaˬloˇni meuˬ-ahˇ jawˇ-eu Aˬliˬdaˬguˇ lehˇ myahˇ-euˬ gʼaˬ kʼawꞈ, nga maꞈ nehˬ-ehˇ tiˬ kawˆ loꞈ-ehˇ iˇ-euˬ ma. 3Yawˬ nah yawˬ, Siˇdoˬ meuˬ-ahˇ nga maꞈ iˇ keuˆ-euˬ ma. Yuˇluˆ lehˇ kuˇ-eu yaw huiˬ kʼoeˇ gʼaˬ Pawˇluˆ-ahˇ gʼawˬ shaˬ gaˬ-eu miˇ neh, cawˬ deuˬ-ahˇ tahˬ puˬ leˇ-awˇ kʼaˇ loˬ-eu jeˬ bi caw ba nehˬ-eu gʼaˇ duˬ, Pawˇluˆ-ahˇ aˬ kawˬ-aˬ biꞈ-euˬ meh. 4Nga maꞈ kʼoeˇ gaˇ neh paˇ luˆ-iˇ-awˇ, jaˬ lehˇ pyawˬ maˬ tsaˬ-ehˇ nga maꞈ jawˇ paw baw kʼoꞈ laꞈ-eu miˇ neh, Guˇbaˬluˇ iˇ jaw lahˇ-ahˇ baˇ shmˇ-awˇ, jaˬ lehˇ maˬ zaw-eu paw dzeˇ pyawˬ-ahˇ neh iˇ-euˬ ma. 5Giˇliˇciˆ miˇ kʼahˬ hawˇ-eu Paˬbuˇliˇ miˇ kʼahˬ dawˬ peh jaˆ-eu iˬ ma laˆ shaˆ iˇ tsehˆ gʼeh-awˇ, Luˇgiˇ miˇ kʼahˬ Muˬlaˇ meuˬ-ahˇ iˇ keuˆ-euˬ ma. 6Kʼoeˇ gaˇ iˇ keuˆ ngeh, Aˬleˬsaˬduˇ meuˬ-ahˇ neh oe-awˇ, Iˇdaˬliˬ miˇ kʼahˬ-ahˇ le-eu lehˇ gʼeh-eu saˇ baoˬ tiˬ laˇ-ahˇ yaw huiˬ kʼoeˇ gʼaˬ poˆ mawˇ-awˇ, nga maꞈ-ahˇ bi dziˬ laꞈ-euˬ meh.

7Nga maꞈ lehˇ baw saˬ paˇ#27.7 ʼLehˇ baw saˬ paˇʼ lehˇ ehˇ-eu-aˬ, saˇ baoˬ-ahˇ jaˬ lehˇ neh bi hehˇ-eu gʼaˇ duˬ jahˇ taˬ-euˬ saˬ paˇ paˇ ma meh. Saˇ baoˬ kʼoeˇ taˆ sheu taw-awˇ, yawˬ ha kʼaˇ iˇ mawꞈ-eu paw jaˬ lehˇ neh bi hehˇ-eu meh. taw-awˇ, aw lawˆ lawˆ-ehˇ gʼawˬ mya nah shaˬ shaˬ-ehˇ iˇ-eu laꞈ kʼoeˇ, Gaˬniˇ meuˬ dawˬ peh shaˬ keuˆ gʼeh-euˬ ma. Nga maꞈ mehˬ hu paw tiˬ pawꞈ-iˬ maˬ iˇ jiˆ nya ni jaˬ lehˇ neh dehˬ tehˬ taˬ-euˬ miˇ neh, Saˬmoˬneˬ meuˬ paw zaꞈ ahˇ-iˇ-awˇ, meuˬ kʼoeˇ meuˬ-euˬ kʼoeˇ paw kʼaˇ iˇ dzeuˇ gʼeh-awˇ, Gaˬleˬdeˬ iˇ jaw lahˇ-ahˇ baˇ shmˇ-awˇ iˇ-euˬ ma. 8Iˬ ma laˆ shaˆ lawˇ dzeˇ paw kʼaˇ laˆ peh nya-eu laˆ peh-awˇ, Laˬsehˇ meuˬ-ahˇ maˬ kaˬ maˬ kaˇ-ehˇ jaˆ-eu Muiˬ dui dui-eu Naˬ duˬ lehˇ ehˇ-eu tsahˇ-ahˇ shaˬ keuˆ-euˬ ma.

9Nga maꞈ kʼoeˇ gaˇ aˇ dzehˬ jawˇ myahˇ dzeuˇ-awˇ, mehˬ hu paw gaˇ ma doˆ-iˇ-eu gʼaˇ duˬ guˆ kʼaˇ za-eu aˇ yamˬ keuˆ laˇ shaw-iˬ-eu meh. Aˬ jeˬ miˇ neh ehˇ naˇ, Iˬ baˇ shaˇ pyehˬ-eu Aˇ nah#27.9 Iˬ baˇ shaˇ pyehˬ-eu Aˇ nah kʼoeˇ nah-aˬ, Sehˆteˇbaˬ ba la jiˇ taw paw maˬ ngeuˇ naˇ, Awˆtoˇbaˬ ba la tsehˬ laˇ ngeh yamˬ-ahˇ tsaˬ-eu meh. Aˇ yamˬ kʼoeˇ yamˬ keuˆ laˇ naˇ, mˬ jeˬ jaˬ lehˇ aˇ dzehˬ dzeuˇ ni kʼaˆ-eu miˇ neh, saˇ baoˬ dziˬ-awˇ gaˇ ma doˆ-iˇ-eu deuˬ gʼaˇ duˬ guˆ dui dui laˇ paˬ-ehˇ gʼeh-eu aˇ yamˬ meh. kʼawꞈ, dzeuˇ-iˇ gʼaˬ-euˬ meh. Kʼoeˇ miˇ neh, aˬ yawꞈ maꞈ-ahˇ Pawˇluˆ heu loꞈ-ehˇ ehˇ nehˬ-euˬ meh. 10“Cawˬ deuˬ-oˇ, aˬ dui heu gaˇ neh mehˬ hu paw gaˇ ma paˇ doˆ-iˇ-eu-aˬ, guˆ kʼaˇ za meh lehˇ ngaˇ haw mawˇ-eu ma. Tawˬ luꞈ-eu myawˬ deuˬ maˬ ehˇ, saˇ baoˬ maˬ ehˇ, yaw kʼaˆ-ehˇ cawˆ-iˇ-awˇ, tsawˇ haˬ kʼawꞈ ca laˇ nya tehꞈ-a.” 11Ehˇ kʼawꞈ, guiˇ maꞈ kʼoeˇ taˆ aˬ yuiꞈ geuꞈ-eu yaw huiˬ kʼoeˇ gʼaˬ, Pawˇluˆ ehˇ gaˇ naˇ haˬ-eu naˆ maˬ tseˇ, saˇ baoˬ teh-eu gʼaˬ hawˇ-eu saˇ baoˬ-euˬ yaw sahˇ gʼaˬ ehˇ gaˇ naˇ haˬ-euˬ meh. 12Kʼoeˇ uˬ taꞈ, aˬ yawꞈ maꞈ naˬ luꞈ-eu saˇ baoˬ naˬ duˬ kʼoeˇ tsahˇ-aˬ, tsahˬ gaˆ yamˬ-ahˇ maˬ jawˇ muiˬ-eu jawˇ duˬ tiˬ tsahˇ pyeuꞈ-eu meh. Kʼoeˇ miˇ neh, gʼeh nya naˇ, Piˇniˇ meuˬ-ahˇ kʼaˇ keuˆ maˬ keuˆ iˇ-awˇ, tsahˬ gaˆ yamˬ-ahˇ kʼoeˇ gaˇ jawˇ naˬ mˇ-eu gʼaˇ duˬ tsawˇ haˬ myaˬ ni nui ma tsaˬ-eu meh. Piˇniˇ meuˬ-aˬ, Gaˬlaˬdeˬ iˇ jaw lahˇ-ahˇ jaˆ-eu, nahˇ ma ga kʼehˬ laꞈ taˆ paw hawˇ-eu nahˇ ma ga kʼehˬ-euˬ laꞈ oˆ paw dzeˇ-ehˇ pyawˇ-eu#27.12 Heu tsahˇ-ahˇ, nahˇ ma doˆ kʼehˬ-euˬ laꞈ taˆ hawˇ-eu nahˇ ma doˆ kʼehˬ-euˬ laꞈ oˆ paw dzeˇ-ehˇ pyawˇ-eu lehˇ kʼawꞈ ehˇ nya-eu meh. saˇ baoˬ naˬ duˬ tiˬ tsahˇ pyeuꞈ-eu meh.

Iˬ ma laˆ shaˆ laꞈ kʼoeˇ jaˬ lehˇ lehˇ ma baw laˇ-euˬ

13Laꞈ oˆ paw neh baw laꞈ-euˬ jaˬ lehˇ kʼoeˇ, aˬ za za-ehˇ tehꞈ-ehˇ baw-eu meh. Kʼoeˇ ngeh, aˬ yawꞈ maꞈ neh noeˬ-euˬ loꞈ-ehˇ geuꞈ nya tehꞈ-a lehˇ noeˬ-awˇ, saˇ baoˬ naˬ ngeh pyehˬ ka-euˬ shmˇ kuˆ seuˬ gʼeu kʼoꞈ daˆ-awˇ, lehˇ baw saˬ paˇ taw-awˇ, Gaˬlaˬdeˬ iˇ jaw lahˇ paw saˇ baoˬ kʼaˇ laˆ peh nya-eu laˆ peh laˆ peh-ehˇ mehˬ hu paw doˆ-iˇ-euˬ ma. 14Ehˇ kʼawꞈ, gʼawˬ myahˇ maˬ gʼeh-ehˇ, “Laꞈ taˆ nahˇ ma doˆ kʼehˬ jaˬ lehˇ” lehˇ kuˇ-eu jaˬ lehˇ lehˇ ma kʼoeˬ bahˬ, dahˇ taˆ paw neh baw ka gʼeh leꞈ-euˬ meh. 15Jaˬ lehˇ lehˇ ma kʼoeˇ saˇ baoˬ-ahˇ ciˬ tahˬ leꞈ ngeh, saˇ baoˬ kʼoeˇ jaˬ lehˇ-ahˇ maˬ ciˬ daˬ coeˇ-ehˇ, nga maꞈ ngehˬ maˬ gʼeh nya ni pyeuꞈ-iˇ-awˇ, jaˬ lehˇ kʼaˇ hehˇ-eu paw bi bu gʼeh-euˬ ma. 16Gawˇdaˬ lehˇ kuˇ-eu iˇ jaw lahˇ lahˇ zaˬ-euˬ laꞈ oˆ pyawˬ-ahˇ nga maꞈ bu gʼeh ngeh, jaˬ lehˇ-ahˇ ui cuiˆ baˇ shmˇ kʼaˇ za-eu miˇ neh, saˇ baoˬ nehˬ-ehˇ caw-eu lawˬ maˬ ya cawˆ-iˇ ni ngehˬ gʼeh dah-euˬ ma. 17Aˬ yawꞈ maꞈ lawˬ kʼoeˇ laˇ-ahˇ saˇ baoˬ kʼoeˇ taˆ gʼeu daˆ-awˇ, saˇ baoˬ paˆ-iˇ gaˇ guˆ-eu miˇ neh, saˇ baoˬ-euˬ tiˬ jawˬ aˇ caˆ neh gahˇ dzahˬ-euˬ meh. Kʼoeˇ uˬ taꞈ, Liˆbyaˇ lawˇ deh paw jaˆ-eu kʼaˇ shuiꞈ deh-ahˇ coeˬ tahˬ-iˇ gaˇ guˆ-eu miˇ neh, lehˇ baw saˬ paˇ#27.17 ʼlehˇ baw saˬ paˇʼ lehˇ ehˇ-eu dawˬ tsuiꞈ 27.7-ahˇ haw-awˬ. kʼoeˇ yuˇ ka-awˇ, saˇ baoˬ-ahˇ jaˬ lehˇ mehˬ nah pyehˬ gʼeh-euˬ meh. 18Jaˬ lehˇ lehˇ ma kʼoeˇ maˬ naˬ leˇ ni baw dui dui-eu miˇ neh, yawˬ nah yawˬ saˇ baoˬ laꞈ kʼoeˇ tawˬ luꞈ-eu myawˬ tiˬ paˆ na deuˬ-ahˇ aˬ yawꞈ maꞈ baꞈ dzeh-euˬ meh. 19Dzaiˇ yawˬ nah yawˬ-ahˇ, saˇ baoˬ-euˬ keu ka tiˬ paˆ na deuˬ paˇ baꞈ dzeh-euˬ meh. 20Gʼawˬ mya nah gʼawˬ mya miˇ , nahˇ ma hawˇ-eu aˬ guiˇ-ahˇ maˬ ya mawˇ ni jaˬ lehˇ lehˇ ma baw dui dui gaˇ ya daˬ-euˬ miˇ neh, ya buˬ-iˇ-eu gaˇ ma maˬ paˇ dahˇ ngaˇ lehˇ noeˬ jiˇ-euˬ ma.

21Tiˬ jeˬ-iˬ maˬ dzaˬ ni dzahˬ luꞈ-eu myahˇ laˇ-euˬ meh. Kʼoeˇ miˇ neh, aˬ yawꞈ maꞈ-euˬ mehˬ shi Pawˇluˆ yawꞈ-awˇ, heu loꞈ-ehˇ ehˇ-eu meh. “Cawˬ deuˬ-oˇ, naw maꞈ ngaˇ ehˇ gaˇ naˇ haˬ-awˇ, Gaˬlaˬdeˬ iˇ jaw lahˇ-ahˇ neh maˬ doˆ le ni jawˇ law nmˇ-aˬ, luˬ-iˇ seˇ-iˇ-eu heu-ahˇ maˬ paˇ ya daˬ-aˇ. 22Ehˇ kʼawꞈ, nui ma taˬ baˬ lehˇ naw maꞈ-ahˇ ngaˇ shaˇ-eu ma. Saˇ baoˬ heu laˇ cawˆ-iˇ tehꞈ-a. Ehˇ kʼawꞈ, naw maꞈ tiˬ gʼaˬ-iˬ shiˇ gaˇ maˬ keuˆ-aˇ. 23Aˬ jeˬ miˇ neh ehˇ naˇ, ngaˇ uˬ duˬ tahˬ luꞈ-eu ngaˬ-ahˇ uˆ lahˇ-eu Miˬyehˇ-euˬ mˬ taˆ gʼaˬ kʼehˇ tiˬ gʼaˬ, miˇ ciꞈ ngaˇ jawˇ gaˇ oe-awˇ heu loꞈ-ehˇ ehˇ le-euˬ meh. 24‘Pawˇluˆ-oˇ, taˬ guˆ. Sahˬ paˬ Gehˇsaˬ mehˬ shi nawˇ ya yawꞈ leˇ tehꞈ-a. Nawˬ-euˬ myaˆ pyawˬ-ahˇ Miˬyehˇ haw-awˇ, nawˬ nehˬ-ehˇ saˇ baoˬ kʼaˇ dziˬ luꞈ-eu tsawˇ haˬ dawˬ tawˆ luꞈ-ahˇ maˬ shiˇ ni bi dzeuˇ-iˇ tehꞈ-a’ lehˇ ehˇ le-euˬ meh. 25Kʼoeˇ miˇ neh cawˬ deuˬ-oˇ, nui ma kʼaˬ duˬ ni jawˇ-awˬ. Ngaˬ-ahˇ kʼaˇ ehˇ nehˬ le-euˬ loꞈ-ehˇ aˬ diˇ aˬ maˇ pyeuꞈ laˇ tehꞈ-a lehˇ Miˬyehˇ-ahˇ ngaˇ jah ma. 26Ehˇ kʼawꞈ, aˬ dui maꞈ dziˬ luꞈ-eu saˇ baoˬ heu laˇ iˇ jaw lahˇ tiˬ tsahˇ na kʼoeˇ taˆ bi tahˬ daˆ gʼeh tehꞈ-a.”

27Kʼoeˇ loꞈ-ehˇ shaˬ luꞈ-eu tseˇ oeˬ miˇ aˬ yawꞈ miˇ-ahˇ, jaˬ lehˇ lehˇ ma kʼoeˇ bahˬ Gʼahˇ ceh-euˬ iˬ ma laˆ shaˆ laꞈ kʼoeˇ nga maꞈ-ahˇ hehˇ gʼeh luꞈ-eu meh. Sehˇ gʼahˇ ceh laˇ ngeh, saˇ baoˬ laꞈ kʼoeˇ gaˇ mˇ-eu tsawˇ haˬ deuˬ, dahˇ taˆ peh le-euˬ duˇ lehˇ noeˬ-euˬ meh. 28Aˇ caˆ-ahˇ yaw kah paꞈ tawꞈ-awˇ iˇ cuꞈ-ahˇ pyehˬ ka haw ngeh, nyiˬ tseˇ lmˇ tehꞈ-ehˇ naꞈ gaˇ ya mawˇ-euˬ meh. Tiˬ kʼehˬ gʼeh-awˇ tiˬ poˆ paˇ pyehˬ ka haw ngeh, tseˇ ngaˬ lmˇ tehꞈ-ehˇ naꞈ gaˇ paˇ ya mawˇ-euˬ meh. 29Saˇ baoˬ kʼoeˇ laˇ kʼaˬ lo lo guˇ-ahˇ ciˬ tahˬ-iˇ gaˇ aˬ yawꞈ maꞈ guˆ-eu miˇ neh, saˇ baoˬ bi naˬ leˇ-eu gʼaˇ duˬ, saˇ baoˬ-euˬ naˇ kʼah paw pyawˬ-ahˇ shmˇ kuˆ seuˬ oeˬ hmˬ pyehˬ ka-awˇ, uˬ bya yaw kawˇ-ehˇ bya laˇ ni guiˬ lahˬ shaˇ luꞈ-eu meh. 30Kʼoeˇ ngeh, saˇ baoˬ laꞈ kʼoeˇ gaˇ mˇ-eu tsawˇ haˬ deuˬ, saˇ baoˬ-ahˇ byehˇ dzeh-awˇ yawˬ ha kʼaˇ buˬ maˬ buˬ cehˆ-eu lehˇ gʼeh-eu meh. Saˇ baoˬ-euˬ uˬ duˬ paw pyawˬ-ahˇ shmˇ kuˆ seuˬ pyehˬ ka-iˇ-eu jahˇ geuꞈ-awˇ, saˇ baoˬ kʼoeˇ taˆ jaˆ-eu lawˬ kʼoeˇ laˇ-ahˇ iˇ cuꞈ-ahˇ pyehˬ ka luꞈ-eu meh. 31Ehˇ kʼawꞈ, yehˇ-euˬ aˬ yuiꞈ kʼoeˇ gʼaˬ hawˇ-eu yehˇ deuˬ-ahˇ Pawˇluˆ ehˇ nehˬ-eu, “Saˇ baoˬ laꞈ kʼoeˇ gaˇ mˇ-eu tsawˇ haˬ teu deuˬ saˇ baoˬ heu laˇ laꞈ kʼoeˇ maˬ jawˇ ni cehˆ jiˇ naˇ, naw maꞈ dehꞈ-iˇ-eu gaˇ ma maˬ paˇ dahˇ meh.” 32Kʼoeˇ ngeh, yehˇ kʼoeˇ deuˬ lawˬ-ahˇ paꞈ taˬ-euˬ aˇ caˆ deuˆ tsehˆ-awˇ, bi bu byoˆ gʼeh-euˬ meh.

33Uˬ bya bya taw taw laˇ ngeh, aˬ yawꞈ maꞈ dawˬ tawˆ luꞈ tiˬ jeˬ paˬ dzaˬ-eu gʼaˇ duˬ Pawˇluˆ gʼaˬ biꞈ-euˬ meh. Aˬ yawꞈ ehˇ-eu, “Naw maꞈ tiˬ jeˬ-iˬ maˬ dzaˬ ni heu loꞈ-ehˇ dzahˬ luꞈ-eu tseˇ oeˬ nah byah laˇ-euˬ meh. 34Kʼoeˇ miˇ neh, tiˬ jeˬ paˬ dzaˬ-awˬ lehˇ, naw maꞈ-ahˇ ngaˇ shaˇ-eu ma. Naw maꞈ maˬ ya shiˇ-eu gʼaˇ duˬ dzaˬ-eu loˬ meh. Naw maꞈ-euˬ uˬ duˬ tsehˇ kahˇ tiˬ kahˇ tehꞈ-ehˇ kʼawꞈ maˬ byoˆ maˬ laˆ-iˇ-aˇ.”

35Kʼoeˇ loꞈ-ehˇ ehˇ gʼaˬ naˇ, Pawˇluˆ kaˬ muˇ yuˇ-awˇ, aˬ yawꞈ maꞈ dawˬ tawˆ luꞈ-euˬ mehˬ shi Miˬyehˇ guiˬ lahˬ-ahˇ ja ceuˬ-awˇ, ngawˬ pyehˬ-awˇ dzaˬ-euˬ meh. 36Aˬ yawꞈ maꞈ kʼawꞈ, nui ma gʼaˬ ahˇ laˇ-awˇ, yawˬ gʼaˬ na luꞈ tiˬ jeˬ paˬ dzaˬ-euˬ meh. 37Nga maꞈ saˇ baoˬ dziˬ luꞈ-eu tsawˇ haˬ dawˬ tawˆ luꞈ, nyiˬ yaˇ shiꞈ tseˇ koꞈ gʼaˬ#27.37 ʼNyiˬ yaˇ shiꞈ tseˇ koꞈ gʼaˬʼ lehˇ ehˇ gaˇ, Jaˇliꞈ tiˬ paˆ na deuˬ laꞈ kʼoeˇ ʼnyiˬ yaˇ shiꞈ tseˇ ngaˬ gʼaˬʼ lehˇ ehˇ taˬ-awˇ, tiˬ paˆ na deuˬ laꞈ kʼoeˇ-aˬ, shiꞈ tseˇ koꞈ gʼaˬ ehˇ gʼaˬ niʼ lehˇ ehˇ taˬ-euˬ meh. byah-eu ma. 38Yawˬ gʼaˬ na luꞈ dzaˬ gʼaˬ ngeh, saˇ baoˬ yaw pyaˇ bi pyaˇ laˇ-eu gʼaˇ duˬ, kʼaˇ tawˬ luꞈ-eu cehˇ dawˬ tawˆ luꞈ iˬ ma laˆ shaˆ-ahˇ shehˆ puꞈ jiˇ-euˬ meh.

Saˇ baoˬ cawˆ-iˇ-euˬ

39Uˬ bya bya laˇ-euˬ kʼawꞈ, saˇ baoˬ laꞈ kʼoeˇ gaˇ mˇ-eu tsawˇ haˬ deuˬ iˬ ma laˆ shaˆ lawˇ deh-ahˇ yaw muiˬ paˬ-ehˇ maˬ mawˇ duˬ nya-a. Ehˇ kʼawꞈ, iˬ ma laˆ shaˆ lawˇ gʼoꞈ lawˇ deh tiˬ tsahˇ haw mawˇ-awˇ, gʼeh nya naˇ, saˇ baoˬ-ahˇ kʼoeˇ gaˇ bi coeˬ daˆ gʼeh ma lehˇ aˬ yawꞈ maꞈ noeˬ tsehˆ-euˬ meh. 40Kʼoeˇ naˇ, saˇ baoˬ-ahˇ gʼeu naˬ taˬ-euˬ shmˇ kuˆ seuˬ deuˬ-euˬ aˇ caˆ deuˆ tsehˆ jiˇ-awˇ, iˬ ma laˆ shaˆ-ahˇ bi ga puꞈ yaꞈ-euˬ meh. Saˇ baoˬ-ahˇ yeuꞈ pyawˇ-eu daˇ laˆ deuˬ-ahˇ paꞈ tawꞈ taˬ-euˬ aˇ caˆ deuˬ kʼawꞈ puiˇ dzeh jiˇ-euˬ meh. Kʼoeˇnaˇ, saˇ baoˬ-ahˇ jaˬ lehˇ neh mehˬ hu paw bi baw gʼeh-eu gʼaˇ duˬ, saˇ baoˬ uˬ duˬ paw-euˬ lehˇ baw saˬ paˇ taw-awˇ, laˆ shaˆ lawˇ deh paw nga maꞈ iˇ-euˬ ma. 41Ehˇ kʼawꞈ, saˇ baoˬ kʼoeˇ laˇ kʼaˇ shuiꞈ-ahˇ coeˬ tahˬ kʼaˆ leꞈ-awˇ naˬ leˇ-euˬ meh. Saˇ baoˬ-euˬ uˬ duˬ paw pyawˬ kʼoeˇ gaˇ coeˬ tsmˬ-awˇ, maˬ luˆ nya-a. Dawˬ dahˬ paw pyawˬ-aˬ, iˇ kʼawˇ neh tahˬ pyaˆ tahˬ shaˆ jiˇ-euˬ meh.

42Yehˇ deuˬ-aˬ, aˬ yawꞈ maꞈ neh sheuˬ laꞈ-euˬ tawˬ-ahˇ uˇ-eu tsawˇ haˬ deuˬ iˇ cuꞈ iˇ diˬ diˬ doˆ-awˇ maˬ bi cehˆ dzeuˇ ni sehꞈ jiˇ-eu lehˇ gʼeh-eu meh. 43Ehˇ kʼawꞈ, yehˇ deuˬ kʼoeˇ taˆ aˬ yuiꞈ geuꞈ-eu gʼaˬ Pawˇluˆ-ahˇ bi dzeuˇ-iˇ mawꞈ-eu miˇ neh, kʼoeˇ loꞈ-ehˇ maˬ bi jahˇ ni laˆ tsoeˬ-euˬ meh. Iˇ diˬ diˬ nya-eu tsawˇ haˬ deuˬ jeˬ huˬ tsawˬ ka-awˇ, iˇ diˬ diˬ doˆ gʼeh-eu gʼaˇ duˬ aˬ yawˬ dawˬ biꞈ-euˬ meh. 44Dzeˇ-eu deuˬ-aˬ, teˇ byaꞈ doe ni, saˇ baoˬ pyaˆ-iˇ-awˇ kʼehꞈ-iˇ kʼoeˆ-iˇ-euˬ daˇ kawˬ hawˇ-eu mˇ myawˬ doe ni dawꞈ tehꞈ-awˇ, lawˇ deh-ahˇ teuˆ doˆ gʼeh-eu gʼaˇ duˬ aˬ yawꞈ dawˬ biꞈ-euˬ meh. Kʼoeˇ loꞈ-ehˇ jahˇ-awˇ, nga maꞈ tiˬ gʼaˬ-iˬ maˬ ca laˇ ni lawˇ dzeˇ tsehˆ doˆ jiˇ-euˬ ma.

Currently Selected:

Gʼaˬkʼehˇ 27: AHK

Highlight

Copy