Gʼaˬkʼehˇ 18

Gawˇliˬtu meuˬ-ahˇ Pawˇluˆ gʼawˬ myahˇ ni jawˇ-awˇ Miˬyehˇ dawˬ kawˬ mehˬ-euˬ

1Kʼoeˇ naˇ, Aˬteˬ meuˬ-ahˇ neh Pawˇluˆ doˆ-iˇ-awˇ, Gawˇliˬtu meuˬ-ahˇ iˇ-euˬ meh. 2Kʼoeˇ gaˇ, Boˬtuˆ miˇ kʼahˬ-ahˇ dehꞈ le-euˬ Aˬguˇla lehˇ myahˇ-euˬ Yuˇdaˆ tsawˇ haˬ tiˬ gʼaˬ-ahˇ aˬ yawꞈ ya tahˬ puˬ-euˬ meh. Yuˇdaˆ tsawˇ haˬ dawˬ tawˆ luꞈ Loˇmaˆ meuˬ-ahˇ neh ya doˆ-iˇ jiˇ meh lehˇ, Loˇmaˆ sahˬ paˬ Gaˬlawˇdiˇ dawˬ biꞈ-euˬ miˇ neh, aˬ yawꞈ-euˬ mi zaˬ Biˇgiˇla sheuˬ-awˇ Iˇdaˬliˬ miˇ kʼahˬ-ahˇ neh gʼoꞈ doˆ le-euˬ tiˬ dehˬ pyeuꞈ-eu meh. Aˬ nyaꞈ dzeˇ zaˬ-ahˇ Pawˇluˆ tahˬ puˬ leˇ-euˬ meh. 3Aˬ nyaꞈ dzeˇ zaˬ nehˬ-ehˇ aˬ yawꞈ jawˇ-awˇ gaˇ mˇ-euˬ meh. Aˬ jeˬ miˇ neh ehˇ naˇ, aˬ yawꞈ kʼawꞈ, aˬ nyaꞈ dzeˇ zaˬ loꞈ-ehˇ saˬ paˇ sehˬ gʼawˆ guꞈ ahˬ-awˇ dehꞈ-eu tsawˇ haˬ pyeuꞈ-eu meh. 4Yuˇdaˆ tsawˇ haˬ maˬ ehˇ, c tsawˇ haˬ maˬ ehˇ, jah-eu tsawˇ haˬ pyeuꞈ laˇ ni, Jawˇ nah aˬ yawꞈ nah yawꞈ uˬ duˬ tahˬ nymˇ laꞈ kʼoeˇ Pawˇluˆ ja sawˇ-euˬ meh.

5Siˬlaˆ hawˇ-eu Tiˆmoˇseˬ aˬ nyaꞈ Maˬgeˬdawˇniˆ miˇ kʼahˬ-ahˇ neh oe keuˆ ngeh, Pawˇluˆ gʼaˬ-aˬ, Miˬyehˇ dawˬ kawˬ mehˬ-eu gaˇ tehꞈ-ehˇ aˇ yamˬ tiˬ byah ni mˇ-awˇ, Yeˬsuˇ Meˬsiˇya pyeuꞈ-eu gaˇ kawˆ Yuˇdaˆ tsawˇ haˬ deuˬ-ahˇ saˇ kiˇ kamˬ-euˬ meh. 6Aˬ yawꞈ maꞈ aˬ yawꞈ mehˬ gaˇ maˬ naˇ haˬ ni aˬ yawꞈ-ahˇ yaw doeˇ ehˇ ngeh, aˬ yawꞈ pehˇ kʼahˬ byuˬ kʼaˇ-awˇ ehˇ nehˬ-eu, “Naw maꞈ dehꞈ-eu jeˬ-ahˇ smˬ naˇ, naw maꞈ-euˬ iˬ baˇ meh. Ngaˬ-ahˇ tiˬ jeˬ-iˬ maˬ taꞈ. Iˬ nah taꞈ naˇ, aˬ cawˬ tsawˇ jeuˬ-ahˇ ngaˇ mehˬ-iˇ ma.” 7Kʼoeˇ naˇ, aˬ yawꞈ maꞈ jawˇ gaˇ neh aˬ yawꞈ doˆ-iˇ-awˇ, Tiˇtuˆ Yuˇtuˬ lehˇ myahˇ-euˬ, Miˬyehˇ-ahˇ uˬ duˬ tahˬ-eu aˬ cawˬ tsawˇ jeuˬ tiˬ gʼaˬ-euˬ nymˇ-ahˇ jawˇ-iˇ-euˬ meh. Tsawˇ haˬ kʼoeˇ gʼaˬ-euˬ nymˇ-aˬ, uˬ duˬ tahˬ nymˇ-ahˇ nymˇ kaˬ taꞈ-eu meh. 8Gaˬliˇpuˆ lehˇ myahˇ-euˬ uˬ duˬ tahˬ nymˇ-ahˇ aˬ yuiꞈ geuꞈ-eu gʼaˬ hawˇ-eu aˬ yawꞈ-euˬ miˬ sawˇ zaˬ dawˬ tawˆ luꞈ Sahˬpaˬ Yeˬsuˇ-ahˇ jah-euˬ meh. Gawˇliˬtu meuˬ-ahˇ jawˇ-eu tsawˇ haˬ gʼawˬ mya ni Miˬyehˇ dawˬ kawˬ ya gaˬ-awˇ, jah-eu laꞈ kʼoeˇ iˇ cuꞈ shawˇ-euˬ meh.

9Tiˬ miˇ-aˬ, yaw sahˇ laꞈ kʼoeˇ ya siˬ ya mawˇ-eu jeˬ laꞈ kʼoeˇ, Pawˇluˆ-ahˇ Sahˬpaˬ Yeˬsuˇ ehˇ-eu,“Taˬguˆ. Dawˬ mehˬ maˬ mehˬ-ehˇ ciˬ cuˇ ni taˬ jawˇ. 10Ngaˇ nawˬ nehˬ-ehˇ jawˇ ma. Aˬ cawˬ nawˬ-ahˇ laˆ tahˬ laˆ naˇ-eu jeˬ maˬ mˇ nya-a. Aˬ jeˬ miˇ neh ehˇ naˇ, meuˬ heu meuˬ laꞈ kʼoeˇ ngaˬ-euˬ tsawˇ haˬ gʼawˬ mya ni jawˇ ma.” 11Kʼoeˇ miˇ neh, Pawˇluˆ kʼoeˇ gaˇ tiˬ kʼoꞈ uˬ taꞈ ba la koꞈ siˬ jawˇ-awˇ, Miˬyehˇ dawˬ kawˬ mehˬ nehˬ-euˬ meh.

12Gaˬliˬoˬ lehˇ kuˇ-eu gʼaˬ, Aˬgaˬyaˇ miˇ kʼahˬ-ahˇ uˆ lahˇ luꞈ ngeh, Yuˇdaˆ tsawˇ haˬ deuˬ gm leˇ-awˇ Pawˇluˆ-ahˇ nyehꞈ-awˇ, yaˇ kʼaˬ daˇ-eu saˇ naˇ-ahˇ sheuˬ gʼeh-euˬ meh. 13Aˬ yawꞈ maꞈ ehˇ-eu, “Tsawˇ haˬ heu gʼaˬ-aˬ, zahˇ dawˬ kʼoꞈ dawˬ-ahˇ maˬ tsaˬ ni yawˬ jeˬ yawˬ-ehˇ Miˬyehˇ-ahˇ uˬ duˬ tahˬ-eu gʼaˇ duˬ aˬ cawˬ-ahˇ mehˇ shuiˇ shuiˇ luꞈ meh.”

14Pawˇluˆ dawˬ ngehˬ-eu lehˇ gʼeh ngeh, Yuˇdaˆ tsawˇ haˬ kʼoeˇ deuˬ-ahˇ Gaˬliˬoˬ heu loꞈ-ehˇ ehˇ nehˬ-euˬ meh. “Yuˇ daˆ tsawˇ haˬ deuˬ-oˇ, gaˇ kawˆ teu hmˬ-aˬ, yaw haiˬ tiˬ jeˬ paˬ mˇ bahˬ-euˬ loˇ, yaw lehˬ tiˬ jeˬ na jahˇ-euˬ loˇ lehˇ ngeuˇ law nmˇ-aˬ, naw maꞈ ehˇ gaˇ ngaˇ oˇ-awˇ naˇ haˬ nehˬ nya te siˬ. 15Ehˇ kʼawꞈ, dawˬ-euˬ gaˇ kawˆ, tsawˇ myahˇ-euˬ gaˇ kawˆ hawˇ-eu, naw maꞈ-euˬ zahˇ dawˬ kʼoꞈ dawˬ gaˇ kawˆ tsawˇ pyehˇ pyehˇ-eu tehꞈ miˇ neh, naw maꞈ yawˬ haˇ yawˬ ha jahˇ jiˇ-awˬ. Ngaˇ teu loꞈ-ehˇ gʼeh gaˇ yaˇ kʼaˬ daˇ-eu tsawˇ haˬ maˬ ngeuˇ.” 16Kʼoeˇ loꞈ-ehˇ ehˇ gʼaˬ ngeh, aˬ yawꞈ maꞈ-ahˇ yaˇ kʼaˬ daˇ-eu nymˇ laꞈ nyiˇ paw teh doˆ nehˬ-euˬ meh. 17Kʼoeˇ ngeh, aˬ yawꞈ maꞈ ga uiˬ-awˇ uˬ duˬ tahˬ nymˇ-ahˇ aˬ yuiꞈ geuꞈ luꞈ-eu Suˇdeˬ-ahˇ nyehꞈ-awˇ, yaˇ kʼaˬ daˇ-eu nymˇ-euˬ mehˬ shi diˬ-euˬ meh. Ehˇ kʼawꞈ, Gaˬliˬoˬ-aˬ, gaˇ kawˆ kʼoeˇ aˬ yawꞈ-ahˇ tiˬ jeˬ-iˬ maˬ taꞈ-eu loꞈ-ehˇ jawˇ-euˬ meh.

Aˬdiˇawˬ meuˬ-ahˇ gʼoꞈ-iˇ-euˬ

18Pawˇluˆ-aˬ, Gawˇliˬtu meuˬ-ahˇ jawˇ-eu jah-eu tsawˇ haˬ deuˬ nehˬ-ehˇ gʼawˬ mya nah paˇ jawˇ-euˬ meh. Kʼoeˇ naˇ, aˬ yawꞈ maꞈ-ahˇ gʼawˬ-iˇ-awˇ, Biˇgiˇla hawˇ-eu Aˬguˇla aˬ nyaꞈ nehˬ-ehˇ tiˬ kawˆ loꞈ-ehˇ saˇ baoˬ dziˬ-awˇ, Suˇliˆ miˇ kʼahˬ-ahˇ iˇ-euˬ meh. Geˬjeˬ meuˬ-ahˇ iˇ keuˆ ngeh, aˬ yawꞈ dawˬ ma saˇ jaˇ dzaˬ-eu#18.18 ‘Dawˬ ma saˇ jaˇ dzaˬ-eu’ lehˇ ehˇ-eu heu-aˬ, Yuˇdaˆ tsawˇ jeuˬ-euˬ zahˇ sahˇ kʼoꞈ tiˬ hmˬ pyeuꞈ-awˇ, saˇ jaˇ dzaˬ luꞈ-eu gaˇ kawˆ bi siˬ bi mawˇ-eu gʼaˇ duˬ uˬ jehˆ jehˆ dzeh gaˇ ehˇ-eu meh. laꞈ kʼoeˇ uˬ jehˆ jehˆ dzeh-euˬ meh. 19Aˬ yawꞈ maꞈ Eˇpeˇsu meuˬ-ahˇ iˇ keuˆ-awˇ, Biˇgiˇla hawˇ-eu Gaˬguˇla aˬ nyaꞈ-ahˇ kʼoeˇ gaˇ taˬ yaꞈ-euˬ meh. Pawˇluˆ-aˬ, uˬ duˬ tahˬ nymˇ-ahˇ le-awˇ, Yuˇdaˆ tsawˇ haˬ deuˬ nehˬ-ehˇ ja sawˇ-euˬ meh. 20Kʼoeˇ gaˇ tiˬ kʼehˬ jawˇ-eu gʼaˇ duˬ aˬ cawˬ aˬ yawꞈ-ahˇ shaˇ kʼawꞈ, aˬ yawꞈ maˬ jawˇ-a. 21Aˬ yawꞈ doˆ-iˇ ngeh, “Miˬyehˇ nui ma tsaˬ naˇ, naw maꞈ jawˇ gaˇ ngaˇ tiˬ poˆ paˇ laˇ keuˆ ma” lehˇ ehˇ nehˬ yaꞈ-awˇ, saˇ baoˬ dziˬ-awˇ Eˇpeˇsu meuˬ-ahˇ neh doˆ-iˇ-euˬ meh.

22Gehˇsaˬliˇ meuˬ-ahˇ aˬ yawꞈ iˇ keuˆ ngeh, Yeˬluˇsaˬlehˬ meuˬ-ahˇ le-awˇ Ka li zaˬ aˇ muˇ-ahˇ dawˬ cawˬ puˬ nehˬ yaꞈ-awˇ, Aˬdiˇawˬ meuˬ-ahˇ gʼoꞈ-iˇ-euˬ meh. 23Kʼoeˇ gaˇ tiˬ kʼehˬ jawˇ gʼaˬ ngeh, Gaˬlaˬtiˆ miˇ kʼahˬ hawˇ-eu Puˬgiˇ miˇ kʼahˬ-ahˇ cah leˇ-awˇ jah-eu tsawˇ haˬ deuˬ-ahˇ gʼaˬ biꞈ leˇ-euˬ meh.

Eˇpeˇsu meuˬ-ahˇ Aˬpawˇluˆ dawˬ mehˬ mehˬ-euˬ

24Kʼoeˇ ngeh, Aˬleˬsaˬduˇ meuˬ-ahˇ dehꞈ le-euˬ Aˬpawˇluˆ lehˇ myahˇ-euˬ Yuˇdaˆ tsawˇ haˬ tiˬ gʼaˬ Eˇpeˇsu meuˬ-ahˇ oe-euˬ meh. Aˬ yawꞈ-aˬ, dawˬ ngehˬ-eu bym dui dui-awˇ, Jaˇliꞈ yaw muiˬ paˬ-ehˇ siˬ nya-eu tsawˇ haˬ tiˬ gʼaˬ pyeuꞈ-eu meh. 25Aˬ yawꞈ-aˬ, Sahˬpaˬ Yeˬsuˇ-euˬ Gaˇma#18.25 ʼGaˇmaʼ lehˇ-eu dawˬ tsuiꞈ 9:2-ahˇ haw-awˬ. gaˇ kawˆ ya dzaw haw-awˇ, nui ma keuˆ dui dui-eu laꞈ kʼoeˇ, Yeˬsuˇ-euˬ gaˇ kawˆ tiˬ pawꞈ-iˬ maˬ lehˬ ni mehˬ nya tsoˆ nya-eu meh. Ehˇ kʼawꞈ, iˇ cuꞈ shawˇ-eu gaˇ kawˆ-ahˇ taꞈ leˇ-awˇ, Yoˇhaˬ neh iˇ cuꞈ shawˇ-euˬ gaˇ kawˆ tehꞈ-ehˇ aˬ yawꞈ siˬ nya-eu meh. 26Uˬ duˬ tahˬ nymˇ laꞈ kʼoeˇ aˬ yawꞈ kʼaˬ duˬ ni dawˬ ngehˬ dahˬ beh-euˬ meh. Biˇgiˇla hawˇ-eu Aˬguˇla aˬ nyaꞈ dzeˇ zaˬ aˬ yawꞈ-euˬ gaˇ kawˆ ya gaˬ ngeh, aˬ yawꞈ-ahˇ iˇ kahˇ-ahˇ sheuˬ kʼoꞈ laꞈ-awˇ, Miˬyehˇ-euˬ Gaˇma gaˇ kawˆ yaw tsaˬ tsaˬ-ehˇ paˇ mehˬ lahˬ nehˬ-euˬ meh. 27Kʼoeˇ naˇ, Aˬgaˬyaˇ miˇ kʼahˬ-ahˇ iˇ-eu gʼaˇ duˬ Aˬpawˇluˆ noeˬ tsehˆ-euˬ meh. Kʼoeˇ miˇneh, Aˬgaˬyaˇ miˇ kʼahˬ-ahˇ jawˇ-eu jah-eu tsawˇ haˬ deuˬ aˬ yawꞈ-ahˇ ha geuꞈ ni, Eˇpeˇsu meuˬ-ahˇ jawˇ-eu jah-eu tsawˇ haˬ deuˬ neh sahˬ boꞈ boꞈ ahˇ nehˬ-awˇ, aˬ yawꞈ-ahˇ caw ba nehˬ-euˬ meh. Aˬ yawꞈ kʼoeˇ gaˇ iˇ keuˆ ngeh, Miˬyehˇ-euˬ guiˬ lahˬ baˬ da neh jah-eu tsawˇ haˬ pyeuꞈ laˇ-euˬ deuˬ gʼaˇ duˬ gaˇ dahˇ tsoeˬ dui dui leˇ-euˬ meh. 28Aˬ jeˬ miˇ neh ehˇ naˇ, miˇ kʼahˬ zaˬ gʼawˬ mya ni mehˬ shi aˬ yawꞈ Jaˇli -ahˇ gʼoe gʼoe-ehˇ Yuˇdaˆ tsawˇ haˬ nehˬ-ehˇ yaw kʼaˆ kʼaˆ-ehˇ ja-awˇ, Yeˬsuˇ Meˬsiˇya pyeuꞈ-eu gaˇ kawˆ ja gʼaˬ-euˬ meh.

Currently Selected:

Gʼaˬkʼehˇ 18: AHK

Highlight

Copy