Gʼaˬkʼehˇ 17

Pawˇluˆ dawˬ mehˬ mehˬ-euˬ miˇ neh Teˇsaˬloˇni meuˬ luiˬ gʼa laˇ-euˬ

1Pawˇluˆ hawˇ-eu Siˬlaˆ-aˬ, Aˬpiˇbawˇliˇ meuˬ hawˇ-eu Aˬpawˇlawˇniˇ meuˬ-ahˇ neh iˇ gʼeh-awˇ, Teˇsaˬloˇni meuˬ-ahˇ iˇ keuˆ-euˬ meh. Meuˬ kʼoeˇ meuˬ laꞈ kʼoeˇ Yuˇdaˆ tsawˇ haˬ-euˬ uˬ duˬ tahˬ nymˇ tiˬ nymˇ jaˆ-eu meh. 2Pawˇluˆ-aˬ, aˬ myah myah loꞈ-ehˇ uˬ duˬ tahˬ nymˇ-ahˇ le-euˬ meh. Jawˇ nah smˬ nah keuˆ ni, aˬ yawꞈ maꞈ nehˬ-ehˇ Jaˇliꞈ gaˇ kawˆ ja sawˇ-euˬ meh. 3Jaˇliꞈ laꞈ kʼoeˇ ehˇ taˬ-euˬ gaˇ kawˆ aˬ yawꞈ maꞈ-ahˇ ja mehˬ-awˇ, Ka li shiˇ-awˇ gʼoꞈ dehꞈ laˇ-euˬ kʼoeˇ-aˬ, maˬ pyeuꞈ laˇ-ehˇ maˬ gʼeh nya-eu gaˇ kawˆ tiˬ hmˬ meh lehˇ mehˬ duˬ nehˬ-euˬ meh. “Ngaˇ naw maꞈ-ahˇ ja mehˬ luꞈ-eu Yeˬsuˇ heu gʼaˬ-aˬ, Ka li meh” lehˇ Pawˇluˆ ehˇ-eu meh. 4Aˬ yawꞈ maꞈ tiˬ paˆ na deuˬ noeˬ pehꞈ-awˇ, Pawˇluˆ hawˇ-eu Siˬlaˆ nehˬ-ehˇ gm leˇ-euˬ meh. Myaˆ pyawˬ naˇ mehˇ jaˆ-eu zaˬ miˬ zaˬ gʼawˬ mya gʼaˬ hawˇ-eu Heˬlaˬsaˇ tsawˇ haˬ gʼawˬ mya ni Miˬyehˇ-ahˇ uˬ duˬ tahˬ-euˬ meh.

5Ehˇ kʼawꞈ, Yuˇdaˆ tsawˇ haˬ deuˬ myaˆ naˆ-eu miˇ neh, aˬ dzawˬ aˇ gah deuˬ deh uiˬ-awˇ aˇ muˇ tiˬ muˇ muˇ doˆ-eu laꞈ kʼoeˇ, meuˬ meuˬ lah-ehˇ laˆ luiˬ-euˬ meh. Pawˇluˆ hawˇ-eu Siˬlaˆ aˬ nyaꞈ-ahˇ miˇ kʼahˬ zaˬ-euˬ mehˬ shi gʼeu doˆ leꞈ-eu gʼaˇ duˬ, Yaˬsoˬ-euˬ nymˇ-ahˇ aˬ yawꞈ maꞈ ga jawˬ-iˇ-euˬ meh. 6Ehˇ kʼawꞈ, aˬ yawꞈ nyaꞈ-ahˇ maˬ poˆ mawˇ nya-eu miˇ neh, Yaˬsoˬ hawˇ-eu jah-eu tsawˇ haˬ tiˬ paˆ na deuˬ-ahˇ, meuˬ-ahˇ uˆ lahˇ-eu sahˬ paˬ sahˬ ma deuˬ jawˇ gaˇ gʼeu gʼeh-awˇ, heu loꞈ-ehˇ ehˇ nehˬ leˇ-euˬ meh. “Miˇ tsaˬ tahˬ kʼawˇ poˆ laˆ paˇ laˇ paˬ-ehˇ laˆ suˬ saˬ-eu tsawˇ haˬ deuˬ meuˬ heu meuˬ-ahˇ oe keuˆ taˬ-euˬ meh. 7Yaˬsoˬ neh aˬ yawꞈ maꞈ-ahˇ aˬ yawꞈ-euˬ nymˇ-ahˇ cu taˬ-euˬ meh. Yeˬsuˇ lehˇ myahˇ-eu sahˬ paˬ tiˬ gʼaˬ jawˇ meh lehˇ aˬ yawꞈ maꞈ ehˇ ehˇ-ehˇ, sahˬ paˬ Gehˇsaˬ neh biꞈ taˬ-euˬ zaˇ sahˇ kʼoꞈ deuˬ-ahˇ laˆ cawˆ luꞈ meh.” 8Aˬ yawꞈ maꞈ kʼoeˇ loꞈ-ehˇ ehˇ-awˇ, tsawˇ haˬ aˇ maꞈ hawˇ-eu meuˬ-ahˇ uˆ lahˇ-eu sahˬ paˬ sahˬ ma deuˬ-ahˇ laˆ luiˬ-euˬ meh. 9Sahˬ paˬ sahˬ ma kʼoeˇ deuˬ Yaˬsoˬ hawˇ-eu aˬ yawꞈ-euˬ cawˬ deuˬ-ahˇ pyuˇ bi doˆ-awˇ pyehˬ kʼoꞈ gʼeh-euˬ meh.

Beˬliˇ meuˬ-ahˇ Miˬyehˇ dawˬ kawˬ mehˬ-euˬ

10Uˬ ciꞈ ciꞈ le-eu nehˬ-ehˇ, jah-eu tsawˇ haˬ deuˬ Pawˇluˆ hawˇ-eu Siˬlaˆ-ahˇ Beˬliˇ meuˬ-ahˇ tiˬ poˆ tehꞈ-ehˇ bi iˇ-euˬ meh. Aˬ yawꞈ nyaꞈ kʼoeˇ gaˇ iˇ keuˆ ngeh, uˬ duˬ tahˬ nymˇ-ahˇ le-euˬ meh. 11Kʼoeˇ gaˇ jawˇ-eu tsawˇ haˬ deuˬ-aˬ, Teˇsaˬloˇni meuˬ-ahˇ jawˇ-eu tsawˇ haˬ deuˬ naˆ maˬ tseˇ nui ma laˇ gʼoˆ pah taˬ-awˇ, guiˬ lahˬ dawˬ-ahˇ nui ma keuˆ-eu laꞈ kʼoeˇ naˇ haˬ-awˇ, Pawˇluˆ neh ehˇ-euˬ kʼoeˇ tsaˬ-eu maˬ tsaˬ-eu siˬ duˬ laˇ ni yawˬ nah na luꞈ Jaˇliꞈ-ahˇ gui haw luꞈ-eu meh. 12Aˬ yawꞈ maꞈ gʼawˬ mya ni jah laˇ-euˬ meh. Myaˆ pyawˬ naˇ mehˇ jaˆ-eu Heˬlaˬsaˇ tsawˇ haˬ kʼaˬ dzeˇ zaˬ deuˬ kʼawꞈ, gʼawˬ mya gʼaˬ jah laˇ-euˬ meh. 13Ehˇ kʼawꞈ, Beˬliˇ meuˬ-ahˇ kʼawꞈ Pawˇluˆ Miˬyehˇ dawˬ kawˬ mehˬ luꞈ-eu gaˇ kawˆ-ahˇ Teˇsaˬloˇni meuˬ-ahˇ jawˇ-eu Yuˇdaˆ tsawˇ haˬ deuˬ ya gaˬ ngeh, aˬ yawꞈ maꞈ oe-awˇ tsawˇ haˬ aˇ maꞈ nui ma zo laˇ ni ja-awˇ laˆ luiˬ-euˬ meh. 14Kʼoeˇ ngeh, jah-eu tsawˇ haˬ deuˬ neh Pawˇluˆ-ahˇ iˬ ma laˆ shaˆ lawˇ deh paw bi iˇ doˆ-euˬ meh. Ehˇ kʼawꞈ, Siˬlaˆ hawˇ-eu Tiˆmoˇseˬ aˬ nyaꞈ-aˬ, Beˬliˇ meuˬ-ahˇ jawˇ yaꞈ-euˬ meh. 15Pawˇluˆ-ahˇ sheuˬ ha-iˇ-euˬ tsawˇ haˬ kʼoeˇ deuˬ Aˬteˬ meuˬ-ahˇ keuˆ ni sheuˬ ha keuˆ-iˇ-euˬ meh. Kʼoeˇ naˇ, Siˬlaˆ hawˇ-eu Tiˆmoˇseˬ aˬ nyaꞈ-ahˇ aˬ yawꞈ jawˇ gaˇ yaw kawˇ-ehˇ bi oe-eu gʼaˇ duˬ aˬ yawꞈ maꞈ-ahˇ Pawˇluˆ dawˬ tsaꞈ tsaꞈ nehˬ-awˇ Beˬliˇ meuˬ-ahˇ bi gʼoꞈ leˇ-euˬ meh.

Aˬteˬ meuˬ-ahˇ Pawˇluˆ Miˬyehˇ dawˬ kawˬ mehˬ-euˬ

16Aˬteˬ meuˬ-ahˇ Siˬlaˆ hawˇ-eu Tiˆmoˇseˬ aˬ nyaꞈ-ahˇ Pawˇluˆ dawˬ luꞈ ngeh, meuˬ kʼoeˇ meuˬ laꞈ kʼoeˇ tahˬ pahˬ aˬ ma mawˇ kawˇ tiˬ byah jaˆ gaˇ ya mawˇ-awˇ, nui ma maˬ saˇ-a. 17Kʼoeˇ miˇ neh, Yuˇdaˆ tsawˇ haˬ deuˬ hawˇ-eu Miˬyehˇ-ahˇ uˬ duˬ tahˬ-eu aˬ cawˬ tsawˇ jeuˬ nehˬ-ehˇ uˬ duˬ tahˬ nymˇ laꞈ kʼoeˇ ja uˇ-eu uˬ taꞈ, lehˆ lehˆ tsmˇ miˇ kʼahˬ zaˬ baꞈ dzah dzah duˬ-ahˇ kʼawꞈ, kʼaˇ iˇ kʼaˇ laˇ doˆ-eu tsawˇ haˬ deuˬ nehˬ-ehˇ ja uˇ haw-euˬ meh. 18Iˇbiˇguˇlu zahˇ#17.18 ‘Iˇbiˇguˇlu zahˇ’ lehˇ-eu-aˬ, Iˇbiˇguˇlu lehˇ kuˇ-euˬ tsawˇ haˬ tiˬ gʼaˬ neh beh-euˬ zahˇ sahˇ kʼoꞈ-ahˇ ehˇ-eu meh. Zahˇ sahˇ kʼoꞈ kʼoeˇ-aˬ, tsawˇ haˬ zaˬ yaw dehꞈ dehꞈ-eu laꞈ kʼoeˇ, laˬ kʼaˬ ehˇ-eu jeˬ aˬ cawˬ naˆ maˬ tseˇ huiˬ dzehˬ meh lehˇ mehˬ-eu meh. mehˬ-eu saˬ laˬ deuˬ hawˇ-eu, Saˬdawˇiˇ zahˇ#17.18 ‘Saˬdawˇiˇ zahˇ’ lehˇ ehˇ-eu-aˬ, Zeˬnoˬ lehˇ kuˇ-euˬ tsawˇ haˬ tiˬ gʼaˬ neh beh-euˬ zahˇ sahˇ kʼoꞈ pyeuꞈ-eu meh. Zahˇ sahˇ kʼoꞈ kʼoeˇ-aˬ, tsawˇ haˬ zaˬ deuˬ yawˬ ha-euˬ nui ma-ahˇ gʼaˬ leˇ ni ya dzaw-awˇ, yaw muiˬ yaw doeˇ tseˇ paˆ nya-eu nui ma mehˬ nah caw teh-awˇ dehꞈ gʼeh-eu tsaˬ meh lehˇ mehˬ-eu meh. mehˬ-eu saˬ laˬ deuˬ kʼawꞈ, aˬ yawꞈ nehˬ-ehˇ ja sawˇ haw-euˬ meh. Aˬ yawꞈ maꞈ tiˬ paˆ na deuˬ ehˇ-eu, “Yaw gahˇ jahˇ geuꞈ-eu dawˇ ga teu gʼaˬ aˬ jeˬ ehˇ-eu nga teu.”

Tiˬ paˆ na deuˬ-aˬ, “Yawˬ kʼahˬ yaw miˇ yawˬ-ahˇ-euˬ miˬ yehˇ deuˬ-euˬ gaˇ kawˆ mehˬ-eu tsawˇ haˬ ngeuˇ-eu jeˬ nga” lehˇ ehˇ-eu meh. Yeˬsuˇ-euˬ gaˇ kawˆ hawˇ-eu gʼoꞈ dehꞈ laˇ-eu jeˬ gaˇ kawˆ Pawˇluˆ dawˬ mehˬ mehˬ-eu miˇ neh, aˬ yawꞈ maꞈ kʼoeˇ loꞈ-ehˇ ehˇ-eu meh.#17.18 Yawˬ kʼahˬ yawˬ miˇ yawˬ-ahˇ jawˇ-eu miˬ yehˇ deuˬ gaˇ kawˆ mehˬ-eu nga lehˇ aˬ yawꞈ maꞈ noeˬ-eu kʼoeˇ-aˬ, heu loꞈ-ehˇ meh. ‘Yeˬsuˇ’ lehˇ ehˇ-eu-aˬ, kʼaˬ dzeˇ zaˬ miˬ yehˇ tiˬ gʼaˬ-ahˇ ehˇ-awˇ, ‘gʼoꞈ dehꞈ laˇ-eu jeˬ’ lehˇ ehˇ-eu kʼoeˇ-aˬ, zaˬ miˬ zaˬ miˬ yehˇ tiˬ gʼaˬ-ahˇ ehˇ-eu nga lehˇ aˬ yawꞈ maꞈ noeˬ-eu meh. Aˬ jeˬ miˇ neh ehˇ naˇ, aˬ yawꞈ maꞈ-euˬ uˬ duˬ tahˬ-eu miˬ yehˇ deuˬ-aˬ, kʼaˬ dzeˇ zaˬ hawˇ-eu zaˬ miˬ zaˬ baw-eu meh. 19Kʼoeˇ miˇ neh, Aˬleˬpaˬguˇ#17.19 ʼAˬleˬ paˬ guˇʼ lehˇ ehˇ-eu-aˬ, Aˬleˬ gawˬ duˇ lehˇ ehˇ mawꞈ-eu meh. Gawˬ duˇ kʼoeˇ duˇ kʼoeˇ taˆ Aˬteˬ meuˬ-ahˇ jawˇ-eu tsawˇ haˬ deuˬ baꞈ dzah dzah-awˇ bawˬ dzaˬ duˬ pyeuꞈ-eu meh. Kʼoeˇ miˇ neh, Aˬleˬpaˬguˇ lehˇ ehˇ naˇ, gawˬ duˇ aˬ yawꞈ-ahˇ ehˇ mawꞈ-eu naˆ maˬ tseˇ, baꞈ dzah dzah gaˇ ehˇ mawꞈ-eu meh lehˇ Jaˇliꞈ-ahˇ taꞈ leˇ-awˇ tsawˇ gahˇ ahˇ-eu deuˬ noeˬ-eu meh. lehˇ kuˇ-eu meuˬ-ahˇ uˆ lahˇ-eu deuˬ-euˬ baꞈ dzah mehˬ shi Pawˇluˆ-ahˇ aˬ yawꞈ maꞈ sheuˬ gʼeh-awˇ heu loꞈ-ehˇ ehˇ nehˬ-euˬ meh. “Nawˇ mehˬ luꞈ-eu gaˇ kawˆ yaw shuiꞈ teu hmˬ nga maꞈ siˬ duˬ mawꞈ miˇ-a. 20Nawˇ ehˇ-eu gaˇ kawˆ tiˬ paˆ na deuˬ nga maꞈ tiˬ jawˇ-iˬ maˬ gaˬ haw-euˬ miˇ neh dawˬ tsuiꞈ siˬ nya mawꞈ miˇ-a.” 21Aˬteˬ meuˬ-ahˇ jawˇ-eu tsawˇ haˬ dawˬ tawˆ luꞈ maˬ ehˇ, aˬ cawˬ miˇ kʼahˬ-ahˇ neh laˇ-awˇ kʼoeˇ gaˇ jawˇ luꞈ-eu deuˬ maˬ ehˇ, shuiꞈ teˇ poˬ ni pyeuꞈ le keuˆ le-euˬ gaˇ kawˆ deuˬ ja-eu, naˇ haˬ-eu, heu-euˬ gʼaˇ duˬ tehꞈ-ehˇ aˇ yamˬ bi jiˇ luꞈ-eu meh.

22Meuˬ-ahˇ uˆ lahˇ-eu deuˬ-euˬ baꞈ dzah mehˬ shi Pawˇluˆ yawꞈ-awˇ heu loꞈ-ehˇ ehˇ-eu meh. “Naw maꞈ Aˬteˬ meuˬ-ahˇ jawˇ-eu tsawˇ haˬ deuˬ-aˬ, yawˬ jeˬ na luꞈ laꞈ kʼoeˇ uˬ duˬ tahˬ-eu zahˇ sahˇ kʼoꞈ-ahˇ taˬ huiˬ dui dui luꞈ gaˇ ngaˇ ya mawˇ-euˬ ma. 23Aˬ jeˬ miˇ neh ehˇ naˇ, meuˬ heu meuˬ doe ni ngaˇ cah-awˇ naw maꞈ uˬ duˬ tahˬ-eu jawˇ duˬ deuˬ-ahˇ haw ngeh, ‘Nga maꞈ maˬ siˬ nya-eu Miˬyehˇ tiˬ gʼaˬ-euˬ gʼaˇ duˬ’ lehˇ boꞈ myahˬ taˬ-euˬ lawˇ duˬ tiˬ tsahˇ mawˇ-euˬ ma. Naw maꞈ maˬ siˬ nya kʼawꞈ uˬ duˬ tahˬ luꞈ-eu kʼoeˇ-aˬ, nymˬ-mˇ ngaˇ naw maꞈ-ahˇ ja mehˬ le-euˬ heu meh. 24Miˇ tsaˬ tahˬ kʼawˇ hawˇ-eu kʼoeˇ-euˬ kʼoeˇ taˆ kʼaˇ jawˇ kʼaˇ jaˆ-eu jeˬ dawˬ tawˆ luꞈ-ahˇ beh-euˬ yaw sahˇ Miˬyehˇ-aˬ, Mˬsahˇ Sahˬpaˬ Miˇsahˇ Sahˬma pyeuꞈ-awˇ, tsawˇ haˬ zaˬ-euˬ aˬ laꞈ neh tsoˆ-euˬ uˬ duˬ tahˬ nymˇ-ahˇ uˇ-eu maˬ ngeuˇ-a. 25Aˬ dui tsawˇ haˬ zaˬ-euˬ aˬ laꞈ neh ngehˬ gʼeh bo saˆ-awˇ mˇ cu nehˬ-eu jeˬ-ahˇ aˬ yawꞈ maˬ loˬ-a. Aˬ jeˬ miˇ neh ehˇ naˇ, tsawˇ haˬ dawˬ tawˆ luꞈ-ahˇ, dehꞈ-eu jeˬ, saꞈ gʼawˇ nya-eu jeˬ hawˇ-eu, yawˬ jeˬ na luꞈ biꞈ-eu gʼaˬ-aˬ, aˬ yawꞈ meh. 26Tsawˇ haˬ tiˬ gʼaˬ o neh miˇ kʼahˬ tsawˇ jeuˬ dawˬ tawˆ luꞈ-ahˇ aˬ yawꞈ beh taˬ-euˬ jeˬ pyeuꞈ-awˇ, miˇ tsaˬ tahˬ kʼawˇ bi jawˇ byah taˬ-euˬ meh. Aˬ yawꞈ maꞈ yaw dehꞈ ya dehꞈ-eu aˇ yamˬ hawˇ-eu jawˇ duˬ-ahˇ, aˇ dahˬ beh ngeh neh neh lehˬ hmˬ taˬ-awˇ toꞈ tsaˬ jiˆ tsaˬ jiˇ taˬ-euˬ meh. 27Miˬyehˇ-ahˇ laꞈ sawˆ sawˆ sawˆ-ehˇ poˆ naˇ, sawˆ zaˬ-awˇ poˆ mawˇ nya ni, kʼoeˇ loꞈ-ehˇ beh taˬ nehˬ-euˬ jeˬ pyeuꞈ-eu meh. Kʼoeˇ loꞈ-ehˇ ehˇ-eu kʼawꞈ, Miˬyehˇ-aˬ, aˬ dui yawˬ gʼaˬ na luꞈ nehˬ-ehˇ gaˇ mahˇ kaˬ-eu maˬ ngeuˇ-a.

28‘Aˬ yawꞈ laꞈ kʼoeˇ aˬ dui dehꞈ luꞈ, jawˇ luꞈ, luˆ luꞈ, laˆ luꞈ-eu ma’

lehˇ, aˬ cawˬ neh ehˇ taˬ-euˬ jaˆ-eu loꞈ-ehˇ meh. Dawˬ caˇ boꞈ-eu naw maꞈ-euˬ tsawˇ haˬ deuˬ kʼawꞈ,tiˬ tsahˇ na,

‘Nga maꞈ kʼawꞈ aˬ yawꞈ-euˬ zaˬ ma’

lehˇ ehˇ taˬ-euˬ gaˇ duˇ-eu meh. 29Aˬ dui-aˬ, Miˬyehˇ-euˬ zaˬ pyeuꞈ-eu miˇ neh, Miˬyehˇ-aˬ, tsawˇ haˬ zaˬ-euˬ zaˬ siˬ tsawˇ gahˇ neh noeˬ doˆ-awˇ jahˇ taˬ-euˬ shuiˇ mawˇ kawˇ, pyuˇ mawˇ kawˇ, kʼaˬ lo mawˇ kawˇ heu deuˬ-ahˇ duˇ tehꞈ-a lehˇ aˬ dui noeˬ-eu maˬ tsaˬ-a. 30Aˇ hu tsawˇ haˬ deuˬ aˬ yawꞈ-ahˇ maˬ siˬ nya ngeh mˇ dzeuˇ shaˇ dzeuˇ yaꞈ-euˬ jeˬ-ahˇ Miˬyehˇ iˬ baˇ maˬ taˬ-a. Ehˇ kʼawꞈ, nymˬ-mˇ poˆ jawˇ-aˬ, yawˬ gaˇ na luꞈ jawˇ-eu tsawˇ haˬ dawˬ tawˆ luꞈ iˬ baˇ noeˬ poˆ-eu gʼaˇ duˬ Miˬyehˇ neh dawˬ biꞈ taˬ-euˬ meh. 31Aˬ jeˬ miˇ neh ehˇ naˇ, aˬ yawꞈ neh tseˇ doˆ-euˬ tsawˇ haˬ-ahˇ gʼoe-awˇ, miˇ tsaˬ heu dawˬ tawˆ luꞈ-ahˇ yaw tsaˬ yaw dawˇ jeˬ neh yaˇ kʼaˬ daˇ-eu gʼaˇ duˬ, Miˬyehˇ neh toꞈ taˬ-euˬ aˇ nah tiˬ nah jaˆ meh. Tsawˇ haˬ kʼoeˇ gʼaˬ-ahˇ shiˇ-euˬ gaˇ paˇ bi gʼoꞈ dehꞈ laˇ-eu laꞈ kʼoeˇ, aˬ yawꞈ neh kʼoeˇ loꞈ-ehˇ lehˬ hmˬ taˬ-euˬ jaˆ-eu gaˇ kawˆ, tsawˇ haˬ dawˬ tawˆ luꞈ-ahˇ bi siˬ duˬ-euˬ meh.”

32Shiˇ-euˬ tsawˇ haˬ-ahˇ paˇ bi gʼoꞈ dehꞈ laˇ-eu gaˇ kawˆ Pawˇluˆ ehˇ gaˇ ya gaˬ ngeh, tsawˇ haˬ tiˬ paˆ na deuˬ aˬ yawꞈ-ahˇ yehˬ bawˬ sehˇ lu-ehˇ ehˇ niˇ gʼa-awˇ uiˇ-eu meh. Ehˇ kʼawꞈ, tiˬ paˆ na deuˬ-aˬ, “Gaˇ kawˆ teu nawˇ ja gaˇ tiˬ poˆ paˇ naˇ haˬ mawꞈ nya siˬ” lehˇ ehˇ-eu meh. 33Kʼoeˇ naˇ, Pawˇluˆ-aˬ, baꞈ dzah-ahˇ neh doˆ-iˇ-euˬ meh. 34Tsawˇ haˬ tiˬ paˆ na deuˬ aˬ yawꞈ nehˬ-ehˇ nui ma gm-awˇ jah-euˬ meh. Jah laˇ-euˬ tsawˇ haˬ kʼoeˇ deuˬ laꞈ kʼoeˇ, meuˬ kʼoeˇ meuˬ-ahˇ uˆ lahˇ-eu baꞈ dzah aˇ muˇ-ahˇ ahˇ-eu Daˬyawˇnaˬsiˇ hawˇ-eu Daˬmaˬliˇ lehˇ myahˇ-euˬ zaˬ miˬ zaˬ tiˬ gʼaˬ uˬ taꞈ, nui deuˬ kʼawꞈ ahˇ-eu meh.

Currently Selected:

Gʼaˬkʼehˇ 17: AHK

Highlight

Copy