Gʼaˬkʼehˇ 16

Pawˇluˆ hawˇ-eu Siˬlaˆ nehˬ-ehˇ Tiˆmoˇseˬ iˇ-euˬ

1Kʼoeˇ naˇ, Deˬbeˬ meuˬ hawˇ-eu Luˇdaˬlaˇ meuˬ-ahˇ Pawˇluˆ iˇ-euˬ meh. Luˇdaˬlaˇ meuˬ-ahˇ Tiˆmoˇseˬ lehˇ myahˇ-euˬ Ka li zaˬ tiˬ gʼaˬ jawˇ-eu meh. Aˬ yawꞈ-euˬ aˬ ma-aˬ, Yuˇdaˆ tsawˇ jeuˬ Ka li zaˬ pyeuꞈ-eu meh. Ehˇ kʼawꞈ, aˬ yawꞈ-euˬ aˬ da-aˬ Heˬlaˬsaˇ tsawˇ jeuˬ meh. 2Luˇdaˬlaˇ meuˬ hawˇ-eu Iˇgawˇniˇ meuˬ-ahˇ jawˇ-eu Ka li zaˬ dawˬ tawˆ luꞈ, Tiˆmoˇseˬ-ahˇ ja ceuˬ-eu meh. 3Pawˇluˆ-aˬ, Tiˆmoˇseˬ-ahˇ sheuˬ-awˇ cah mawꞈ-eu miˇ neh, baˆ kʼoˆ mehˬ dzaˬ yehˬ nehˬ-euˬ meh. Kʼoeˇ gaˇ jawˇ-eu Yuˇdaˆ tsawˇ haˬ dawˬ tawˆ luꞈ Tiˆmoˇseˬ-euˬ aˬ da Heˬlaˬsaˇ tsawˇ jeuˬ pyeuꞈ-eu gaˇ kawˆ siˬ nya jiˇ-eu miˇ neh, kʼoeˇ loꞈ-ehˇ baˆ baˆ kʼoˆ mehˬ dzaˬ yehˬ nehˬ-euˬ jeˬ pyeuꞈ-eu meh. 4Aˬ yawꞈ nyaꞈ tiˬ meuˬ saˇ-iˬ tiˬ meuˬ iˇ-awˇ, jah-eu tsawˇ haˬ deuˬ-ahˇ Yeˬluˇsaˬlehˬ meuˬ-ahˇ jawˇ-eu gʼaˬ kʼehˇ deuˬ hawˇ-eu aˬ yuiꞈ aˬ tsu deuˬ neh bawˬ tsehˆ taˬ-euˬ zahˇ sahˇ kʼoꞈ deuˬ biꞈ nehˬ-awˇ, zahˇ sahˇ kʼoꞈ kʼoeˇ deuˬ-ahˇ caw teh-eu gʼaˇ duˬ mehˬ nehˬ-euˬ meh. 5Kʼoeˇ miˇ neh, Ka li zaˬ aˇ muˇ deuˬ jah-eu paw gʼaˬ kʼaˆ dzehˬ laˇ-awˇ, tiˬ nah saˇ-iˬ tiˬ nah tsawˇ haˬ myaˬ laˇ luꞈ-eu meh.

Yaw sahˇ laꞈ kʼoeˇ Maˬgeˬdawˇniˆ tsawˇ haˬ-ahˇ mawˇ-euˬ

6Aˬshaˆ miˇ kʼahˬ-ahˇ guiˬ lahˬ dawˬ maˬ ya mehˬ-iˇ ni, Muiˬ-eu shawˇ-eu Yaw sahˇ Miˬyehˇ aˬ yawꞈ maꞈ-ahˇ laˆ tsoeˬ-eu miˇ neh, Puˬgiˇ miˇ kʼahˬ hawˇ-eu Gaˬlaˬtiˆ miˇ kʼahˬ-ahˇ aˬ yawꞈ maꞈ le-euˬ meh. 7Muˇsiˇ miˇ kʼahˬ-euˬ miˇ kaˬ-ahˇ le keuˆ ngeh, Beˬtuˇniˇ miˇ kʼahˬ-ahˇ uˇ leˇ-eu lehˇ tiˬ poˆ gʼeh-euˬ meh. Ehˇ kʼawꞈ, Yeˬsuˇ-euˬ Yaw sahˇ aˬ yawꞈ maꞈ-ahˇ aˬ kawˬ-aˬ maˬ biꞈ-a. 8Kʼoeˇ miˇ neh, Muˇsiˇ miˇkʼahˬ nyiˬ tsehˆ-ehˇ iˇ gʼeh-awˇ, Daˬloˇ meuˬ-ahˇ iˇ keuˆ-euˬ meh. 9Kʼoeˇ ngeh miˇ yaw sahˇ laꞈ kʼoeˇ Pawˇluˆ heu loꞈ-ehˇ ya mawˇ-euˬ meh. Maˬgeˬdawˇniˆ tsawˇ haˬ tiˬ gʼaˬ yawꞈ le-awˇ, “Maˬgeˬdawˇniˆ miˇ kʼahˬ-ahˇ laˇ-awˇ, nga maꞈ-ahˇ tiˬ poˆ caw ba laˇ-awˬ” lehˇ shaˇ le-euˬ gaˇ aˬ yawꞈ ya mawˇ-euˬ meh. 10Yaw sahˇ laꞈ kʼoeˇ Pawˇluˆ kʼoeˇ loꞈ-ehˇ ya siˬ ya mawˇ gʼaˬ-euˬ nehˬ-ehˇ, Maˬgeˬdawˇniˆ miˇ kʼahˬ-ahˇ le-eu gʼaˇ duˬ nga maꞈ tiˬ poˆ tehꞈ-ehˇ lehˬ hmˬ-euˬ ma. Aˬ jeˬ miˇ neh ehˇ naˇ, kʼoeˇ gaˇ jawˇ-eu tsawˇ haˬ deuˬ-ahˇ Laˬ kʼaˬ cehˇ-eu Guiˬ lahˬ dawˬ bi mehˬ leˇ-eu gʼaˇ duˬ, Miˬyehˇ nga maꞈ-ahˇ kuˇ le-euˬ ngaˇ lehˇ nga maꞈ noeˬ tsehˆ-euˬ ma.

Piˇliˇpiˆ meuˬ-ahˇ jawˇ-eu Lu diˇ iˇ cuꞈ shawˇ-euˬ

11Nga maꞈ Daˬloˇ meuˬ-ahˇ neh saˇ baoˬ dziˬ-awˇ, Saˬmoˬdaˬlehˇ iˇ jaw lahˇ-ahˇ dawˇ coe ni iˇ-awˇ, yawˬ nah yawˬ Naˬbawˇliˇ meuˬ-ahˇ iˇ keuˆ-euˬ ma. 12Kʼoeˇ gaˇ neh naˇ, Piˇliˇpiˆ meuˬ-ahˇ nga maꞈ le-euˬ ma. Meuˬ kʼoeˇ meuˬ-aˬ, Loˇmaˆ tsawˇ haˬ uˆ lahˇ luꞈ-eu Maˬgeˬdawˇniˆ miˇ kʼahˬ laꞈ kʼoeˇ aˬ cawˬ naˆ maˬ tseˇ huiˬ-eu meuˬ pyeuꞈ-eu meh. Kʼoeˇ gaˇ nga maꞈ gʼawˬ mya nah jawˇ-euˬ ma. 13Jawˇ nah keuˆ laˇ ngeh, nga maꞈ meuˬ laꞈ nyiˇ iˇ doˆ-awˇ, Yuˇdaˆ tsawˇ haˬ deuˬ uiˬ leˇ-awˇ guiˬ lahˬ shaˇ-eu jawˇ duˬ tiˬ tsahˇ mawˇ le tehꞈ-a lehˇ noeˬ-eu laꞈ kʼoeˇ, lawˇ baˬ lawˇ dzeˇ iˇ-euˬ ma. nga maꞈ nuiˇ-awˇ, kʼoeˇ gaˇ uiˬ le taˬ-euˬ zaˬ miˬ zaˬ deuˬ-ahˇ dawˬ mehˬ mehˬ-euˬ ma. 14Saˬdiˬlehˇ meuˬ-ahˇ jawˇ-awˇ aˇ poeˬ kʼaˆ dui dui-eu neˇ naˆ naˆ-eu saˬ paˇ gaꞈ-eu Lu diˇ lehˇ myahˇ-euˬ zaˬ miˬ zaˬ tiˬ gʼaˬ kʼawꞈ, nga maꞈ mehˬ gaˇ naˇ haˬ-euˬ meh. Aˬ yawꞈ-aˬ, Miˬyehˇ-ahˇ uˬ duˬ tahˬ-eu zaˬ miˬ zaˬ tiˬ gʼaˬ pyeuꞈ-awˇ, Pawˇluˆ dawˬ mehˬ mehˬ gaˇ yaw muiˬ paˬ-ehˇ naˇ haˬ ni, SahˬpaˬMiˬyehˇ neh aˬ yawꞈ-euˬ nui ma laˇ gʼoˆ pah nehˬ-euˬ meh. 15Aˬ yawꞈ hawˇ-eu aˬ yawꞈ-euˬ nymˇ kʼahˬ zaˬ dawˬ tawˆ luꞈ iˇ cuꞈ shawˇ gʼaˬ ngeh jawˇ, “Ngaˇ-aˬ, Sahˬpaˬ Miˬyehˇ-ahˇ aˬ diˇ jah-eu tsawˇ haˬ pyeuꞈ-eu ngaˇ lehˇ naw maꞈ noeˬ tsehˆ gʼaˬ-euˬ ngeuˇ naˇ, ngaˬ-euˬ nymˇ-ahˇ yaꞈ laˇ-awˬ” lehˇ ehˇ-awˇ, nga maꞈ-ahˇ aˬ yawꞈ-euˬ nymˇ-ahˇ sheuˬ daˆ gʼeh-euˬ meh.

Pawˇ luˆ hawˇ-eu Siˬlaˆ Piˇliˇpiˆ meuˬ laꞈ kʼoeˇ tawˬ-ahˇ bi nyehꞈ uˇ-euˬ

16Tiˬ nah-aˬ, uˬ duˬ tahˬ-eu jawˇ duˬ-ahˇ nga maꞈ iˇ luꞈ ngeh, ja maw maw nya-eu nehꞈ uˇ-eu aˬ buˇ zaˬ kʼaˆ tiˬ gʼaˬ tahˬ puˬ le-euˬ meh. Aˬ buˇ kʼoeˇ buˇ ja maw maw nehˬ-eu pyuˇ gʼawˬ mya ni za-eu miˇ neh, aˬ yawꞈ-euˬ baw leˬ deuˬ smˇ muiˬ muiˬ laˇ-euˬ meh. 17Aˬ buˇ kʼoeˇ gʼaˬ Pawˇluˆ nga maꞈ-euˬ mehˬ nah caw teh-awˇ, “Tsawˇ haˬ heu deuˬ-aˬ, Huiˬ dui mahˇ dui dui-eu Miˬyehˇ-euˬ zaˬ kʼaˆ pyeuꞈ-awˇ, naw maꞈ ka kʼoꞈ-eu jeˬ za nya-eu gaˇ ma mehˬ le-euˬ meh” lehˇ guˇ guˇ-ehˇ cah-eu meh. 18Aˬ yawꞈ kʼoeˇ loꞈ-ehˇ guˇ guˇ-ehˇ caw teh-eu gʼawˬ mya nah byah laˇ-euˬ miˇ neh, Pawˇluˆ maˬ oˇ oꞈ coeˇ laˇ-ehˇ, naˇ kʼah paw zeuˆ pyawˇ-awˇ, nehꞈ kʼoeˇ mawˇ-ahˇ “Aˬ yawꞈ-euˬ laꞈ kʼoeˇ neh doˆ-iˇ-awˬ lehˇ, Yeˬsuˇ Ka li-euˬ tsawˇ myahˇ uˬ moˆ ngaˇ nawˬ-ahˇ dawˬ biꞈ-eu ma” lehˇ ehˇ nehˬ ngeh, nehꞈ kʼoeˇ mawˇ aˬ buˇ kʼoeˇ buˇ-euˬ laꞈ kʼoeˇ neh tiˬ poˆ tehꞈ-ehˇ doˆ-iˇ-euˬ meh. 19Aˬ buˇ kʼoeˇ buˇ-euˬ baw leˬ kʼoeˇ deuˬ-aˬ, aˬ yawꞈ maꞈ pyuˇ maˬ paˇ za nya ngaˇ lehˇ siˬ leˇ-awˇ, Pawˇluˆ hawˇ-eu Siˬlaˆ aˬ nyaꞈ-ahˇ nyehꞈ-awˇ, lehˆ lehˆ tsmˇ-ahˇ jaˆ-eu miˇ kʼahˬ zaˬ deuˬ baꞈ dzah dzah duˬ-ahˇ sahˬ paˬ sahˬ ma deuˬ jawˇ gaˇ gʼeu gʼeh-euˬ meh. 20Loˇmaˆ tsawˇ haˬ yaw huiˬ yaw mahˇ deuˬ jawˇ gaˇ aˬ yawꞈ nyaꞈ-ahˇ nyehꞈ gʼeh-awˇ heu loꞈ-ehˇ tsaꞈ nehˬ-euˬ meh. “Tsawˇ haˬ heu nyiˬ gʼaˬ Yuˇdaˆ tsawˇ haˬ pyeuꞈ-awˇ, aˬ duiˬ-euˬ meuˬ-ahˇ laˆ suˬ saˬ le-euˬ meh. 21Aˬ dui-euˬ zahˇ sahˇ kʼoꞈ-ahˇ bahˬ-eu zahˇ deuˬ-ahˇ caw teh ni aˬ yawꞈ nyaꞈ mehˬ luꞈ tsoˆ luꞈ-eu meh. Aˬ dui Loˇmaˆ miˇ kʼahˬ zaˬ deuˬ zahˇ heu deuˬ-ahˇ maˬ ha geuꞈ nya-a.” 22Kʼoeˇ naˇ, tsawˇ haˬ aˇ maꞈ kʼoeˇ deuˬ gʼeh, Pawˇluˆ hawˇ-eu Siˬlaˆ aˬ nyaꞈ-ahˇ muiˇ-eu tsawˇ haˬ deuˬ jawˇ paw gm leˇ-awˇ tuˇ laˇ-euˬ meh.

Yaw huiˬ yaw mahˇ kʼoeˇ deuˬ Pawˇluˆ hawˇ-eu Siˬlaˆ aˬ nyaꞈ-euˬ mehˬ tsoeˬ gʼeu paˆ dzeh jiˇ-awˇ, yahˬ caˆ neh bi juiꞈ-eu gʼaˇ duˬ dawˬ biꞈ-euˬ meh. 23Yaw kʼaˆ-ehˇ diˬ naˇ diˬ gawˇ nehˬ gʼaˬ ngeh, tawˬ-ahˇ nyehꞈ ahˇ nehˬ-awˇ, aˬ yawꞈ nyaꞈ-ahˇ yaw muiˬ paˬ-ehˇ loꞈ-eu gʼaˇ duˬ tawˬ-ahˇ haw-eu gʼaˬ-ahˇ dawˬ biꞈ nehˬ-euˬ meh. 24Yaw huiˬ yaw mahˇ deuˬ neh dawˬ biꞈ yaꞈ-euˬ loꞈ-ehˇ, tawˬ-ahˇ haw-eu kʼoeˇ gʼaˬ aˬ yawꞈ nyaꞈ-ahˇ laꞈ kʼoeˇ paw jaˆ-eu paꞈ kuˆ-ahˇ nyehꞈ uˇ-awˇ, diˬ tm tm ma neh kuiˇ tawꞈ tawꞈ-awˇ bi jawˇ-euˬ meh.

25Sehˇ gʼahˇ ceh laˇ ngeh, Pawˇluˆ hawˇ-eu Siˬlaˆ aˬ nyaꞈ guiˬ lahˬ shaˇ shaˇ-ehˇ Miˬyehˇ-ahˇ ja ceuˬ-eu caˇ dawˬ caˇ luꞈ-awˇ, tawˬ-ahˇ uˇ-eu tsawˇ haˬ deuˬ naˇ haˬ luꞈ-eu meh. 26Ja pyuˬ ni, miˇ luˆ luˆ dui dui laˇ-awˇ, tawˬ-euˬ dawˬ pehˬ duˬ puˇ-ahˇ keuˆ ni nyeh laˇ-awˇ, laˇ gʼoˆ deuˬ pah laˇ jiˇ-awˇ, tawˬ-ahˇ uˇ-eu tsawˇ haˬ deuˬ-ahˇ paꞈ tawꞈ taˬ-euˬ shmˇ caˆ dawˬ tawˆ luꞈ ga lehˆ jiˇ-euˬ meh. 27Tawˬ-ahˇ haw-eu gʼaˬ tsawˬ noeˬ laˇ-awˇ, tawˬ laˇ gʼoˆ deuˬ yaw pah-ehˇ jaˆ gaˇ ya mawˇ ngeh, tawˬ-ahˇ nyehꞈ uˇ taˬ-euˬ tsawˇ haˬ deuˬ cehˆ doˆ jiˇ-euˬ ngaˇ lehˇ duˇ-awˇ, mi cehˇ gʼeu doˆ-awˇ yawˬ haˇ yawˬ ha sehꞈ-eu lehˇ gʼeh-eu meh. 28Ehˇ kʼawꞈ, Pawˇluˆ yaw kʼaˆ-ehˇ guˇ-awˇ ehˇ nehˬ-eu, “Nawˬ-euˬ gʼawˇ mawˇ-ahˇ tiˬ jeˬ-iˬ taˬ jahˇ. Nga maꞈ dawˬ tawˆ luꞈ heu gaˇ jawˇ jiˇ ma.”

29Kʼoeˇ ngeh, tawˬ-ahˇ haw-eu kʼoeˇ gʼaˬ miˬ dzaˬ keuˬ leꞈ-awˬ lehˇ guˇ-awˇ, tawˬ laꞈ kʼoeˇ cehˆ uˇ gʼeh-awˇ, guˆ-awˇ yaw dzuˬ dzuˬ-eu laꞈ kʼoeˇ Pawˇluˆ hawˇ-eu Siˬlaˆ aˬ nyaꞈ-euˬ aˬ kuiˇ dawˬ peh pawˬ tsuiꞈ pawˬ dmˬ ga dmˬ-euˬ meh. 30Kʼoeˇ naˇ, aˬ yawꞈ nyaꞈ-ahˇ laꞈ nyiˇ sheuˬ doˆ gʼeh-awˇ ehˇ-eu, “Saˬlaˬ-oˇ, ka kʼoꞈ-eu jeˬ za nya ni ngaˇ aˬ joˆ-ehˇ ya jahˇ ta.”

31Aˬ yawꞈ nyaꞈ ehˇ-eu, “Sahˬpaˬ Yeˬsuˇ-ahˇ jah-awˬ. Ka kʼoꞈ-eu jeˬ za tehꞈ-a. Nawˇ hawˇ-eu nawˬ-euˬ miˬ sawˇ zaˬ dawˬ tawˆ luꞈ za tehꞈ-a.” 32Kʼoeˇ naˇ, aˬ yawꞈ hawˇ-eu aˬ yawꞈ-euˬ nymˇ laꞈ kʼoeˇ kʼaˇ jawˇ-eu tsawˇ haˬ dawˬ tawˆ luꞈ-ahˇ, aˬ yawꞈ nyaꞈ Sahˬpaˬ Miˬyehˇ-euˬ dawˬ mehˬ nehˬ-euˬ meh. 33Uˬ ciꞈ kʼoeˇ miˇ aˇ yamˬ kʼoeˇ yamˬ-ahˇ, tawˬ-ahˇ haw-eu kʼoeˇ gʼaˬ aˬ yawꞈ nyaꞈ-ahˇ sheuˬ gʼeh-awˇ, maˇ kʼehˬ maˇ naˇ tsiˬ shawˇ nehˬ-euˬ meh. Kʼoeˇnaˇ, aˬ yawꞈ hawˇ-eu aˬ yawꞈ-euˬ miˬ sawˇ zaˬ dawˬ tawˆ luꞈ tiˬ poˆ tehꞈ-ehˇ iˇ cuꞈ shawˇ-euˬ meh. 34Pawˇluˆ hawˇ-eu Siˬlaˆ aˬ nyaꞈ-ahˇ aˬ yawꞈ-euˬ nymˇ laꞈ kʼoeˇ sheuˬ uˇ gʼeh-awˇ, bi dzaˬ bi dawˇ-euˬ meh. Aˬ yawꞈ hawˇ-eu aˬ yawꞈ-euˬ miˬ sawˇ zaˬ deuˬ laˬ kʼaˬ cehˇ dui dui-eu meh. Aˬ jeˬ miˇ neh ehˇ naˇ, Miˬyehˇ-ahˇ jah-eu jeˬ aˬ yawꞈ maꞈ za gʼaˬ-euˬ meh.

35Yawˬ shawˬ yawˬ, Loˇmaˆ tsawˇ haˬ sahˬ paˬ sahˬ ma deuˬ neh piˆ liˆ deuˬ-ahˇ dawˬ biꞈ-awˇ, “Tsawˇ haˬ kʼoeˇ nyiˬ gʼa-ahˇ pyehˬ nehˬ-awˬ” lehˇ bi ehˇ gaˬ-iˇ-euˬ meh.

36Kʼoeˇ miˇ neh, tawˬ-ahˇ haw-eu kʼoeˇ gʼaˬ Pawˇluˆ-ahˇ ehˇ nehˬ-eu, “Siˬlaˆ naw nyaꞈ-ahˇ pyehˬ nehˬ-eu gʼaˇ duˬ yaw huiˬ yaw mahˇ deuˬ-euˬ dawˬ oe keuˆ gʼaˬ-euˬ meh. Teu miˇ neh doˆ laˇ-awˇ laˬ kʼaˬ tiˬ cehˇ gʼoꞈ leˇ-awˬ.”

37Ehˇ kʼawꞈ, piˆ liˆ aˬ yuiꞈ deuˬ-ahˇ Pawˇluˆ ehˇ nehˬ-eu, “Nga nyaꞈ Loˇmaˆ miˇ kʼahˬ zaˬ pyeuꞈ-eu ma. Ehˇ kʼawꞈ, nga nyaꞈ-euˬ yaw lehˬ yaw ca tiˬ jeˬ-iˬ maˬ poˆ mawˇ-euˬ gaˇ, miˇ kʼahˬ zaˬ mehˬ shi nga nyaꞈ-ahˇ yahˬ caˆ neh juiꞈ-awˇ tawˬ-ahˇ dawˆ nehˬ laꞈ-euˬ meh. Ehˇ kʼawꞈ, nymˬ-mˇ poˆ jawˇ-aˬ, aˬ cawˬ maˬ bi siˬ ni nga nyaꞈ-ahˇ ciˬ cuˇ ni pyehˬ-awˇ bi gʼoꞈ leˇ-eu gʼeh te loˇ. Ma geuꞈ. Loˇmaˆ tsawˇ haˬ yaw huiˬ yaw mahˇ kʼoeˇ deuˬ oe-awˇ nga nyaꞈ-ahˇ pyehˬ doˆ nehˬ le-eu maˬ ngeuˇ naˇ maˬ geuꞈ.”

38Piˆ liˆ aˬ yuiꞈ kʼoeˇ deuˬ Loˇmaˆ tsawˇ haˬ yaw huiˬ yaw mahˇ kʼoeˇ deuˬ-ahˇ Pawˇluˆ neh ehˇ-euˬ dawˬ dzawˇ nehˬ leˇ-euˬ meh. Pawˇluˆ hawˇ-eu Siˬlaˆ aˬ nyaꞈ Loˇmaˆ miˇ kʼahˬ zaˬ pyeuꞈ-eu gaˇ kawˆ ya siˬ ngeh, guˆ-iˇ-euˬ meh. 39Kʼoeˇ miˇ neh, aˬ yawꞈ maꞈ iˇ-awˇ, aˬ yawꞈ maꞈ lehˬ-iˇ-euˬ gaˇ kawˆ ja mehˬ-awˇ aˬ yawꞈ nyaꞈ-ahˇ tahˬ shaˇ-euˬ meh. Kʼoeˇ naˇ, aˬ yawꞈ nyaꞈ-ahˇ pyehˬ nehˬ-awˇ, meuˬ kʼoeˇ meuˬ-ahˇ neh doˆ-iˇ nehˬ laꞈ lehˇ shaˇ-euˬ meh. 40Pawˇluˆ hawˇ-eu Siˬlaˆ aˬ nyaꞈ tawˬ-ahˇ neh doˆ-iˇ-awˇ, Lu diˇ-euˬ nymˇ-ahˇ le-euˬ meh. Jah-eu tsawˇhaˬ deuˬ-ahˇ kʼoeˇ gaˇ tahˬ dzoeˇ-awˇ gʼaˬ biꞈ nehˬ yaꞈ-euˬ meh. Kʼoeˇ naˇ, meuˬ kʼoeˇ meuˬ-ahˇ neh aˬ yawꞈ nyaꞈ doˆ-iˇ-euˬ meh.

Currently Selected:

Gʼaˬkʼehˇ 16: AHK

Highlight

Copy