Gʼaˬkʼehˇ 15

Yeˬluˇsaˬlehˬ meuˬ-ahˇ mehˬ bawˬ bawˬ-euˬ

1Yuˇdaˆ miˇ kʼahˬ-ahˇ jawˇ-eu tsawˇ haˬ tiˬ paˆ na deuˬ Aˬdiˇawˬ meuˬ-ahˇ laˇ-awˇ, “Moˇseˬ-euˬ Zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ loꞈ-ehˇ baˆ kʼoˆ mehˬ dzaˬ maˬ yehˬ naˇ, naw maꞈ ka kʼoꞈ-eu jeˬ-ahˇ maˬ za nya-aˇ” lehˇ, jah-eu tsawˇ haˬ deuˬ-ahˇ mehˬ laˇ-euˬ meh. 2Gaˇ kawˆ kʼoeˇ-ahˇ taꞈ leˇ-awˇ, Pawˇluˆ hawˇ-eu Baˬnaˬbaˇ aˬ nyaꞈ tsawˇ haˬ kʼoeˇ deuˬ nehˬ-ehˇ pyehˇ dui dui-euˬ meh. Kʼoeˇ miˇ neh, gaˇ kawˆ kʼoeˇ hmˬ-ahˇ taꞈ leˇ-awˇ, Pawˇluˆ hawˇ-eu Baˬnaˬbaˇ aˬ nyaꞈ-ahˇ, Aˬdiˇawˬ meuˬ-ahˇ jawˇ-eu tsawˇ haˬ tiˬ paˆ na deuˬ nehˬ-ehˇ Yeˬluˇsaˬlehˬ meuˬ-ahˇ bi iˇ-awˇ, gʼaˬ kʼehˇ deuˬ hawˇ-eu aˬ yuiꞈ aˬ tsu deuˬ nehˬ-ehˇ bi ja cawˬ-iˇ-eu gʼaˇ duˬ ja tsehˆ-euˬ meh.

3Aˬ yawꞈ maꞈ-ahˇ Ka li zaˬ aˇ muˇ neh kʼehˇ-awˇ bi iˇ-euˬ meh. Piˇniˇshaˆ miˇ kʼahˬ hawˇ-eu Saˬmaˬliˇ miˇ kʼahˬ kʼoeˇ deuˬ-ahˇ iˇ luꞈ ngeh, aˬ cawˬ tsawˇ jeuˬ deuˬ Miˬyehˇ jawˇ paw gʼoꞈ pyawˇ laˇ-euˬ gaˇ kawˆ ja mehˬ-euˬ meh. Gaˇ kawˆ kʼoeˇ kʼaˇ ya gaˬ-euˬ jah-eu tsawˇ haˬ dawˬ tawˆ luꞈ, laˬ kʼaˬ cehˇ dui dui-euˬ meh. 4Aˬ yawꞈ maꞈ Yeˬluˇsaˬlehˬ meuˬ-ahˇ iˇ keuˆ ngeh, Ka li zaˬ aˇ muˇ maˬ ehˇ, gʼaˬ kʼehˇ deuˬ maˬ ehˇ, aˬ yuiꞈ aˬ tsu deuˬ maˬ ehˇ, aˬ yawꞈ maꞈ-ahˇ laˬ kʼaˬ tiˬ cehˇ ha-euˬ meh. Kʼoeˇ ngeh, aˬ yawꞈ nyaꞈ-ahˇ gʼoe-awˇ Miˬyehˇ neh kʼaˇ mˇ kʼaˇ shaˇ-euˬ jeˬ dawˬ tawˆ luꞈ, aˬ yawꞈ maꞈ-ahˇ dzawˇ mehˬ nehˬ-euˬ meh. 5Ehˇ kʼawꞈ, Paˬliˬsehˇ aˇ muˇ-ahˇ uˇ-eu jah-eu tsawˇ haˬ tiˬ paˆ na deuˬ tuˇ laˇ-awˇ, “Aˬ cawˬ tsawˇ jeuˬ gʼeh baˆ kʼoˆ mehˬ dzaˬ ya bi yehˬ-awˇ, Moˇseˬ-euˬ Zahˇ dawˬ kʼoꞈ dawˬ-ahˇ ya bi caw teh tehꞈ-a” lehˇ ehˇ-eu meh. 6Kʼoeˇ ngeh, gʼaˬ kʼehˇ deuˬ hawˇ-eu aˬ yuiꞈ aˬ tsu deuˬ uiˬ leˇ-awˇ, gaˇ kawˆ kʼoeˇ bawˬ dzaˬ-euˬ meh. 7Gaˇ kawˆ kʼoeˇ aˬ yawꞈ maꞈ ja dui dui-euˬ meh. Gʼawˬ myahˇ ni ja keuˆ laꞈ ngeh Beˬtuˆluˆ tuˇ laˇ-awˇ, heu loꞈ-ehˇ ehˇ-eu meh. “Aˬ yuiꞈ aˬ nyiˇ deuˬ-oˇ, aˬ cawˬ tsawˇ jeuˬ gʼeh Laˬ kʼaˬ cehˇ-eu Guiˬ lahˬ dawˬ heu-ahˇ ya gaˬ-awˇ jah laˇ nya ni dawˬ mehˬ mehˬ-iˇ-eu gʼaˇ duˬ, aˬ dui maꞈ laꞈ kʼoeˇ yaw beh ngeh neh Miˬyehˇ ngaˬ-ahˇ tseˇ doˆ-euˬ naw maꞈ siˬ nya luꞈ meh. 8Tsawˇ haˬ zaˬ-euˬ nui ma-ahˇ siˬ jiˇ mawˇ jiˇ luꞈ-eu Miˬyehˇ-aˬ, aˬ dui-ahˇ Muiˬ-eu shawˇ-eu Yaw sahˇ Miˬyehˇ biꞈ laꞈ-euˬ loꞈ-ehˇ, aˬ cawˬ tsawˇ jeuˬ-ahˇ kʼawꞈ biꞈ nehˬ-eu laꞈ kʼoeˇ, aˬ yawꞈ maꞈ-ahˇ kʼawꞈ aˬ yawꞈ ha geuꞈ-eu gaˇ kawˆ aˬ dui-ahˇ bya cehˆ ni bi mawˇ laꞈ-euˬ meh. 9Aˬ dui hawˇ-eu aˬ yawꞈ maꞈ-ahˇ aˬ yawꞈ tiˬ jeˬ-iˬ maˬ sawˇ beu-a. Aˬ yawꞈ maꞈ jah-eu miˇ neh, aˬ yawꞈ iˬ baˇ pyehˬ nehˬ-euˬ meh. 10Toˆ-ehˇ ngeuˇ naˇ, aˬ dui-euˬ aˬ poeˬ aˬ bawˇ deuˬ maˬ ehˇ, aˬ dui maˬ ehˇ, maˬ daˬ coeˇ-eu kʼaˆ behˆ kʼoeˇ-ahˇ jah-eu tsawˇ haˬ deuˬ-euˬ naˇ kʼah ciˬ pi nehˬ-eu laꞈ kʼoeˇ, aˬ jeˬ miˇ neh naw maꞈ Miˬyehˇ-ahˇ lawˬ haw-eu gʼeh te. 11Sahˬpaˬ Yeˬsuˇ-euˬ guiˬ lahˬ yaw dzahˇ baˬ da neh aˬ dui ka kʼoꞈ-eu jeˬ za-euˬ ma lehˇ jah-eu ma. Kʼoeˇ loꞈ-ehˇ duˇ ni, aˬ yawꞈ maꞈ kʼawꞈ ka kʼoꞈ-eu jeˬ kʼoeˇ loꞈ-ehˇ za tehꞈ-a.”

12Baˬnaˬbaˇ hawˇ-eu Pawˇluˆ aˬ nyaꞈ, Miˬyehˇ neh aˬ yawꞈ nyaꞈ-ahˇ gʼoe-awˇ aˬ cawˬ tsawˇ jeuˬ-euˬ mehˬ shi mˇ mehˬ-euˬ zahˬ leˇ paˬ-ehˇ gʼeh-eu jeˬ hawˇ-eu kʼaˆ jeˬ-ehˇ gʼeh-eu jeˬ gaˇ kawˆ dzawˇ mehˬ ngeh, uiˬ laˇ taˬ-euˬ tsawˇ haˬ dawˬ tawˆ luꞈ ciˬ cuˇ ni jawˇ-awˇ naˇ haˬ-euˬ meh. 13Aˬ yawꞈ nyaꞈ dzawˇ mehˬ gʼaˬ ngeh, Yaˬkoˆ heu loꞈ-ehˇ ehˇ-eu meh. “Aˬ yuiꞈ aˬ nyiˇ deuˬ-oˇ, ngaˇ ehˇ gaˇ tiˬ poˆ naˇ haˬ sheˇ. 14Aˬ cawˬ tsawˇ jeuˬ laꞈ kʼoeˇ Miˬyehˇ-ahˇ taꞈ-eu aˇ muˇ tiˬ muˇ bi baw laˇ-euˬ laꞈ kʼoeˇ, aˬ cawˬ tsawˇ jeuˬ-ahˇ gʼeh Miˬyehˇ ha geuꞈ dahˬ beh-euˬ gaˇ kawˆ bya cehˆ ni bi siˬ bi mawˇ laꞈ-euˬ kʼoeˇ hmˬ, Siˇmoˬ neh naw maꞈ-ahˇ ja mehˬ gʼaˬ-euˬ meh. 15Gaˇ kawˆ heu Miˬyehˇ gʼaˇ duˬ ngehˬ dah-eu deuˬ neh ehˇ taˬ yaꞈ-euˬ dawˬ-ahˇ tsaˬ dui dui leˇ-eu meh. Jaˇliꞈ laꞈ kʼoeˇ ehˇ taˬ-euˬ-aˬ,

16‘Gaˇ kawˆ heu deuˬ pyeuꞈ laˇ gʼaˬ ngeh,

ngaˬ-euˬ gʼawˇ mawˇ paˇ gʼoꞈ le-awˇ,

Daˬbiˇ-euˬ miˇ kʼahˬ laˆ ziꞈ ma.

Yaw cawˆ deuˬ-ahˇ paˇ gawˬ muiˬ-awˇ,

ziꞈ dah ni paˇ bi pyeuꞈ laˇ ma.

17Dzeˇ-eu miˇ tsaˬ tsawˇ jeuˬ dawˬ tawˆ,

ngaˇ jawˇ gaˇ gʼoꞈ laˇ jiˇ tehꞈ-a.

Ngaˬ-euˬ tsawˇ haˬ bi pyeuꞈ-eu lehˇ,

ngaˬ neh kuˇ-euˬ aˬ cawˬ tsawˇ jeuˬ,

dawˬ tawˆ gʼoꞈ laˇ jiˇ tehꞈ-a lehˇ,

18gaˇ kawˆ heu deuˬ aˇ hu ba neh,

bi siˬ laꞈ-euˬ yaw sahˇ pyeuꞈ-eu,

SahˬpaˬMiˬyehˇ ehˇ taˬ-euˬ meh.’

19“Kʼoeˇ miˇ neh, Miˬyehˇ jawˇ paw gʼoꞈ pyawˇ laˇ luꞈ-eu aˬ cawˬ tsawˇ jeuˬ deuˬ-ahˇ laˆ bahˬ-eu maˬ tsaˬ-a lehˇ ngaˇ ehˇ tsehˆ-eu ma. 20Ehˇ kʼawꞈ, aˬ yawꞈ maꞈ-ahˇ sahˬ boꞈ boꞈ nehˬ-awˇ, tahˬ pahˬ aˬ ma mawˇ kawˇ-ahˇ lawˇ nehˬ-euˬ maˬ shawˇ-eu dzaˇ deuˬ-ahˇ dzaˬ-eu, maˬ tsaˬ maˬ dawˇ-eu laꞈ kʼoeˇ kʼaˬ miˬ sheu taꞈ-eu, shiˬ maˬ sehꞈ dzeˇ ni paꞈ sehꞈ-euˬ shaˬ jiˇ hawˇ-eu shiˬ dzaˬ-eu, heu deuˬ-ahˇ maˬ mˇ ni ya yahˇ meh lehˇ ehˇ nehˬ-eu tsaˬ tehꞈ-a. 21Aˬ jeˬ miˇ neh ehˇ naˇ, Jawˇ nah aˬ yawꞈ nah yawꞈ uˬ duˬ tahˬ nymˇ laꞈ kʼoeˇ aˇ hu ba neh Moˇseˬ-euˬ Zahˇ dawˬ kʼoꞈ dawˬ gui mehˬ ka leꞈ-awˇ, meuˬ yawˬ meuˬ na luꞈ laꞈ kʼoeˇ dawˬ kʼoeˇ deuˬ mehˬ nehˬ-euˬ meh.”

Aˬ cawˬ tsawˇ jeuˬ pyeuꞈ-eu jah-eu tsawˇ haˬ deuˬ-ahˇ boꞈ nehˬ-euˬ sahˬ boꞈ

22Kʼoeˇ naˇ, aˬ yawꞈ maꞈ laꞈ kʼoeˇ tsawˇ haˬ tseˇ doˆ-awˇ, Pawˇluˆ hawˇ-eu Baˬnaˬbaˇ nehˬ-ehˇ Aˬdiˇawˬ meuˬ-ahˇ bi le-eu gʼaˇ duˬ, gʼaˬ kʼehˇ deuˬ hawˇ-eu aˬ yuiꞈ aˬ tsu deuˬ Ka li zaˬ aˇ muˇ nehˬ-ehˇ bawˬ dzaˬ tsehˆ-euˬ meh. Jah-eu tsawˇ haˬ deuˬ yaw zeu baw dui dui-eu Baˬsaˬbaˆ lehˇ kuˇ-eu Yuˇdaˆ hawˇ-eu Siˬlaˆ aˬ nyaꞈ-ahˇ tseˇ doˆ-awˇ, 23sahˬ boꞈ heu taꞈ aˬ yawꞈ nyaꞈ nehˬ-ehˇ dawˆ caw gʼeh-euˬ meh.

“Aˬdiˇawˬ meuˬ, Suˇliˆ miˇ kʼahˬ hawˇ-eu, Giˇliˇciˆ miˇ kʼahˬ heu deuˬ-ahˇ jawˇ-eu Yuˇdaˆ tsawˇ haˬ maˬ ngeuˇ-eu aˬ yuiꞈ aˬ nyiˇ deuˬ jawˇ gaˇ, naw maꞈ-euˬ aˬ yuiꞈ aˬ nyiˇ pyeuꞈ-eu nga maꞈ gʼaˬ kʼehˇ deuˬ hawˇ-eu aˬ yuiꞈ aˬ tsu deuˬ, sahˬ boꞈ boꞈ-awˇ dawˬ cawˬ puˬ ahˇ leꞈ-eu ma. 24Nga maꞈ-euˬ tsawˇ haˬ tiˬ paˆ na deuˬ naw maꞈ jawˇ gaˇ laˇ-awˇ, naw maꞈ-euˬ nui ma suˬ saˬ-awˇ poˆ poˆ laˆ laˆ-ehˇ noeˬ ni mehˬ laˇ-euˬ gaˇ kawˆ ya gaˬ gʼaˬ-euˬ ma. Tsawˇ haˬ kʼoeˇ deuˬ-ahˇ nga maꞈ neh mehˬ-awˇ bi laˇ-euˬ maˬ ngeuˇ. 25-26Kʼoeˇ miˇ neh, nga maꞈ bawˬ dzaˬ-awˇ dawˬ tawˆ luꞈ nui ma tsaˬ-eu laꞈ kʼoeˇ, naw maꞈ jawˇ gaˇ bi laˇ-eu tsawˇ haˬ tseˇ doˆ-euˬ ma. Aˬ dui-euˬ Sahˬpaˬ Yeˬsuˇ Ka li gʼaˇ duˬ yawˬ ha-euˬ gʼawˇ mawˇ shiˇ gaˇ maˬ guˆ ni gaˇ mˇ-eu nga maꞈ zawˇ gaˬ-eu Baˬnaˬbaˇ hawˇ-eu Pawˇluˆ aˬ nyaꞈ nehˬ-ehˇ, nga maꞈ neh tseˇ doˆ-euˬ tsawˇ haˬ bi laˇ caw ma. 27Yuˇdaˆ hawˇ-eu Siˬlaˆ aˬ nyaꞈ-ahˇ bi laˇ ma. Nga maꞈ neh kʼaˇ boꞈ taˬ-euˬ gaˇ kawˆ heu, aˬ yawꞈ nyaꞈ dzawˇ nehˬ laꞈ tehꞈ-a. 28Maˬ caw teh-ehˇ maˬ gʼeh nya-eu zahˇ sahˇ kʼoꞈ heu deuˬ maˬ ngeuˇ naˇ, naw maꞈ-ahˇ kʼaˆ behˆ aˇ dzehˬ maˬ ciˬ pi nehˬ-eu gʼaˇ duˬ, Muiˬ-eu shawˇ-eu Yaw sahˇ Miˬyehˇ hawˇ-eu nga maꞈ nui ma tsaˬ-eu ma. 29Tahˬ pahˬ aˬ ma mawˇ kawˇ-ahˇ lawˇ nehˬ gʼaˬ-euˬ jeˬ taˬ dzaˬ. Shiˬ taˬ dzaˬ. Shiˬ maˬ sehꞈ dzeˇ ni paꞈ sehꞈ-euˬ shaˬ jiˇ taˬ dzaˬ. Maˬ tsaˬ maˬ dawˇ-eu laꞈ kʼoeˇ kʼaˬ miˬ taˬ sheu. Heu deuˬ-ahˇ maˬ mˇ ni gʼeh nya naˇ, muiˬ dui dui tehꞈ-a. Guiˬ lahˬ huiˬ luꞈ-uˇ.”

30Kʼehˇ gʼeh-euˬ tsawˇ haˬ kʼoeˇ deuˬ Aˬdiˇawˬ meuˬ-ahˇ iˇ keuˆ ngeh, jah-eu tsawˇ haˬ dawˬ tawˆ luꞈ kuˇ uiˬ-awˇ, sahˬ boꞈ kʼoeˇ taꞈ biꞈ nehˬ-euˬ meh. 31Aˬ yawꞈ maꞈ sahˬ boꞈ kʼoeˇ taꞈ-ahˇ gui haw ngeh, aˬ yawꞈ maꞈ-ahˇ gʼaˬ biꞈ nehˬ-eu gaˇ kawˆ boꞈ taˬ-euˬ miˇ neh laˬ kʼaˬ cehˇ dui dui-eu meh. 32Yuˇdaˆ hawˇ-eu Siˬlaˆ aˬ nyaꞈ kʼawꞈ, Miˬyehˇ gʼaˇ duˬ ngehˬ dah-eu tsawˇ haˬ pyeuꞈ-eu loꞈ-ehˇ, aˬ yawꞈ maꞈ-ahˇ dawˬ gʼawˬ myahˇ ni ngehˬ-awˇ gʼaˬ biꞈ lahˬ nehˬ-euˬ meh. 33Aˬ yawꞈ nyaꞈ kʼoeˇ gaˇ tiˬ kʼehˬ jawˇ gʼaˬ ngeh, aˬ yawꞈ nyaꞈ-ahˇ kʼehˇ gʼeh laꞈ-euˬ deuˬ jawˇ gaˇ bi gʼoꞈ-iˇ-eu gʼaˇ duˬ, jah-eu tsawˇ haˬ kʼoeˇ deuˬ aˬ yawꞈ nyaꞈ-ahˇ laˬ kʼaˬ cehˇ taˆ ni pyehˬ nehˬ-euˬ meh.#15.33 Jaˇliꞈ tiˬ paˆ na deuˬ laꞈ kʼoeˇ, gaˬ naˇ yaw zaˬ heu hmˬ ahˇ-eu meh. 34Ehˇ kʼawꞈ, Siˬlaˆ gʼaˬ-aˬ, kʼoeˇ gaˇ jawˇ yaꞈ-eu gʼaˇ duˬ noeˬ tsehˆ-euˬ meh.

35Pawˇluˆ hawˇ-eu Baˬnaˬbaˇ aˬ nyaꞈ-aˬ, Aˬdiˇawˬ meuˬ laꞈ kʼoeˇ tiˬ kʼehˬ tiˬ yamˬ jawˇ-awˇ, aˬ cawˬ gʼawˬ mya gʼaˬ nehˬ-ehˇ tiˬ kawˆ loꞈ-ehˇ Sahˬpaˬ Miˬyehˇ-euˬ dawˬ kawˬ mehˬ nehˬ tsoˆ nehˬ-euˬ meh.

Pawˇluˆ hawˇ-eu Baˬnaˬbaˇ gʼawˬ-iˇ-euˬ

36Aˇ nah aˇ yamˬ ui cuiˆ myahˇ laˇ ngeh, Baˬnaˬbaˇ-ahˇ Pawˇluˆ ehˇ nehˬ-eu, “Aˇ nyaꞈ neh Sahˬpaˬ Miˬyehˇ-euˬ dawˬ kawˬ kʼaˇ mehˬ yaꞈ-euˬ meuˬ yawˬ meuˬ na luꞈ-ahˇ dawˬ deh gʼoꞈ gʼa-iˇ-awˇ, jah-eu tsawˇ haˬ pyeuꞈ-eu aˬ yuiꞈ aˬ nyiˇ kʼoeˇ deuˬ aˬ joˆ-ehˇ jawˇ luꞈ nga lehˇ haw-iˇ kaˇ-euˇ.” 37Baˬnaˬbaˇ-aˬ, Maˬkuˆ lehˇ kuˇ-eu Yoˇhaˬ-ahˇ kʼawꞈ sheuˬ gʼeh mawꞈ-eu meh. 38Ehˇ kʼawꞈ, aˬ yawꞈ-ahˇ sheuˬ gʼeh-eu maˬ tsaˬ-a lehˇ Pawˇluˆ noeˬ-eu meh. Aˬ jeˬ miˇ neh ehˇ naˇ, yaw beh Miˬyehˇ dawˬ kawˬ mehˬ-eu cah ngeh jawˇ, aˇ saˬ saˬ ngeh keuˆ ni maˬ cah-ehˇ, Paˬbuˇliˇ miˇ kʼahˬ-ahˇ iˇ keuˆ ngeh aˬ yawꞈ nyaꞈ-ahˇ byehˇ dzeh-awˇ aˬ yawꞈ tiˬ gʼaˬ tehꞈ-ehˇ gʼoꞈ le-euˬ meh. 39Aˬ yawꞈ nyaꞈ yaw kaˬ gaˇ kawˆ kʼoeˇ yaw kʼaˆ-ehˇ ja dzaˬ-awˇ gʼawˬ-iˇ-euˬ meh. Baˬnaˬbaˇ gʼaˬ Maˬkuˆ-ahˇ sheuˬ-awˇ, Guˇbaˬluˇ iˇ jaw lahˇ-ahˇ lawˬ dziˬ-awˇ iˇ-euˬ meh. 40Pawˇluˆ gʼaˬ-aˬ, jah-eu tsawˇ haˬ deuˬ neh aˬ yawꞈ-ahˇ Sahˬpaˬ Miˬyehˇ-euˬ guiˬ lahˬ yaw dzahˇ laꞈ kʼoeˇ bi a nehˬ gʼaˬ miˇ tsa, Siˬlaˆ-ahˇ tseˇ doˆ-awˇ sheuˬ gʼeh-euˬ meh. 41Suˇliˆ miˇ kʼahˬ hawˇ-eu Giˇliˇciˆ miˇ kʼahˬ-ahˇ cah-iˇ-awˇ, Ka li zaˬ aˇ muˇ deuˬ ziꞈ laˇ ni gʼaˬ biꞈ nehˬ-iˇ-euˬ meh.

Currently Selected:

Gʼaˬkʼehˇ 15: AHK

Highlight

Copy