Gʼaˬkʼehˇ 14

Iˇgawˇniˇ meuˬ-ahˇ Miˬyehˇ dawˬ kawˬ mehˬ-euˬ

1Pawˇluˆ hawˇ-eu Baˬnaˬbaˇ aˬ nyaꞈ Iˇgawˇniˇ meuˬ-ahˇ le keuˆ-awˇ jawˇ ngeh, Yuˇdaˆ tsawˇ haˬ-euˬ uˬ duˬ tahˬ nymˇ-ahˇ daˆ leˇ-awˇ dawˬ ngehˬ leˇ-euˬ meh. Kʼoeˇ gaˇ kʼawꞈ, Yuˇdaˆ tsawˇ haˬ maˬ ehˇ, aˬ cawˬ tsawˇ jeuˬ maˬ ehˇ, gʼawˬ mya ni jah-eu tsawˇ haˬ pyeuꞈ laˇ-euˬ meh. 2Ehˇ kʼawꞈ, maˬ jah-eu Yuˇdaˆ tsawˇ haˬ deuˬ-aˬ, aˬ cawˬ tsawˇ jeuˬ-ahˇ kawˆ-awˇ, jah-eu tsawˇ haˬ deuˬ-ahˇ muiˇ laˇ ni jahˇ-euˬ meh. 3Gʼaˬ kʼehˇ kʼoeˇ nyiˬ gʼaˬ kʼoeˇ gaˇ gʼawˬ myahˇ ni jawˇ-awˇ, Sahˬpaˬ Miˬyehˇ-euˬ gaˇ kawˆ kʼaˬ duˬ ni mehˬ-euˬ meh. Sahˬpaˬ Miˬyehˇ neh aˬ yawꞈ nyaꞈ-ahˇ zahˬ leˇ paˬ-ehˇ gʼeh-eu jeˬ hawˇ-eu kʼaˆ jeˬ-ehˇ gʼeh-eu gʼawˬ mya jeˬ jahˇ nya-eu baoˬ biꞈ-eu laꞈ kʼoeˇ, aˬ yawꞈ-euˬ gʼawˬ shaˬ gaˬ-eu jeˬ gaˇ kawˆ mehˬ-eu kʼoeˇ tsaˬ-eu jeˬ pyeuꞈ-eu saˇ kiˇ bi doˆ laˇ-euˬ meh. 4Meuˬ kʼoeˇ meuˬ-ahˇ jawˇ-eu tsawˇ haˬ deuˬ nyiˬ paˆ paˆ-iˇ-euˬ meh. Tiˬ paˆ na deuˬ Yuˇdaˆ tsawˇ haˬ deuˬ jawˇ paw pyawˬ-awˇ, tiˬ paˆ na deuˬ-aˬ, gʼaˬ kʼehˇ kʼoeˇ nyiˬ gʼaˬ jawˇ paw pyawˬ-euˬ meh.

5Kʼoeˇ naˇ, aˬ cawˬ tsawˇ jeuˬ tiˬ paˆ na deuˬ hawˇ-eu Yuˇdaˆ tsawˇ haˬ tiˬ paˆ na deuˬ-aˬ, aˬ yawꞈ maꞈ-euˬ aˬ yuiꞈ aˬ tsu deuˬ nehˬ-ehˇ gm leˇ-awˇ, gʼaˬ kʼehˇ kʼoeˇ nyiˬ gʼaˬ-ahˇ yehˬ bawˬ sehˇ lu-ehˇ jahˇ nehˬ-awˇ kʼaˬ lo biˬ-eu lehˇ gʼeh-eu meh. 6Gaˇ kawˆ kʼoeˇ gʼaˬ kʼehˇ kʼoeˇ nyiˬ gʼaˬ ya siˬ ngeh, Luˇdaˬlaˇ meuˬ, Deˬbeˬ meuˬ hawˇ-eu, dawˬ peh jaˆ-eu miˇ kʼahˬ-ahˇ cehˆ-euˬ meh. 7Kʼoeˇ gaˇ, aˬ yawꞈ maꞈ Laˬ kʼaˬ cehˇ-eu Guiˬ lahˬ dawˬ mehˬ-euˬ meh.

Luˇdaˬlaˇ meuˬ laꞈ kʼoeˇ Pawˇluˆ-ahˇ kʼaˬ lo biˬ-euˬ

8Luˇdaˬlaˇ meuˬ-ahˇ, dehꞈ le ngeh neh aˬ kuiˇ yaw cawˆ miˇ neh, gaˇ ma tiˬ toꞈ-iˬ maˬ zoˬ haw-euˬ tsawˇ haˬ tiˬ gʼaˬ jawˇ-eu meh. 9Aˬ yawꞈ nuiˇ-awˇ, Pawˇluˆ dawˬ ngehˬ gaˇ naˇ haˬ luꞈ-eu meh. Aˬ yawꞈ-aˬ, taˬ leˇ nya ni jah-eu nui ma ahˇ luꞈ gaˇ Pawˇluˆ ya mawˇ-euˬ miˇ neh, aˬ yawꞈ-ahˇ haw tsoˆ-awˇ, 10“Tuˇ-awˇ dawˇ coe ni yawꞈ-awˬ” lehˇ, teˇ saˇ yaw kʼaˆ kʼaˆ-ehˇ ehˇ nehˬ-euˬ meh. Tsawˇ haˬ kʼoeˇ gʼaˬ tsawˬ tuˇ laˇ-awˇ, gaˇ ma cah-euˬ meh. 11Pawˇluˆ kʼoeˇ loꞈ-ehˇ mˇ-euˬ gaˇ tsawˇ haˬ aˇ maꞈ ya mawˇ ngeh, “Miˬ yehˇ kʼoeˇ deuˬ tsawˇ haˬ loꞈ-ehˇ pyeuꞈ le-awˇ, aˬ dui jawˇ gaˇ zaꞈ le-euˬ ngaˇ” lehˇ, aˬ yawꞈ maꞈ-euˬ Luˇgawˇni dawˬ-ahˇ neh guˇ-eu meh. 12Baˬnaˬbaˇ-ahˇ Juˇsaˆ lehˇ aˬ yawꞈ maꞈ myahˇ nehˬ-awˇ, Pawˇluˆ gʼaˬ-aˬ ngehˬ zaˬ tmˇ zaˬ pyeuꞈ-eu miˇ neh, Heˬmeˬ lehˇ myahˇ nehˬ-euˬ meh. 13Meuˬ meuˬ dzeˇ jaˆ-eu Juˇsaˆ miˬ yehˇ-euˬ uˬ duˬ tahˬ nymˇ-ahˇ jawˇ-eu piˇ ma tiˬ gʼaˬ, meuˬ-euˬ lahˇ kʼehˬ-ahˇ mawˇ neˇ mawˇ gaw hawˇ-eu aˇ yehˆ hehˇ laꞈ-awˇ, aˬ yawꞈ hawˇ-eu tsawˇ haˬ aˇ maꞈ kʼoeˇ deuˬ gʼaˬ kʼehˇ kʼoeˇ nyiˬ gʼaˬ-ahˇ lawˇ nehˬ-eu lehˇ gʼeh-eu meh.

14Tsawˇ haˬ kʼoeˇ deuˬ kʼoeˇ loꞈ-ehˇ jahˇ-eu lehˇ gʼeh-eu gaˇ kawˆ, Baˬnaˬbaˇ hawˇ-eu Pawˇluˆ aˬ nyaꞈ ya gaˬ ngeh, aˬ yawꞈ nyaꞈ yawˬ ha dm luꞈ-eu mehˬ tsoeˬ gʼeu pyaˬ-awˇ, heu loꞈ-ehˇ guˇ guˇ-ehˇ tsawˇ haˬ aˇ maꞈ yaw kaˬ-ahˇ coeˬ uˇ gʼeh-euˬ meh. 15“Naw maꞈ aˬ jeˬ miˇ neh teu loꞈ-ehˇ jahˇ te. Nga nyaꞈ kʼawꞈ naw maꞈ loꞈ-ehˇ tsawˇ haˬ zaˬ ma. Gaˇ dahˇ maˬ tsoeˬ-eu gaˇ kawˆ heu deuˬ-ahˇ naw maꞈ byehˇ dzeh-awˇ, mˬ, miˇ, iˬ ma laˆ shaˆ hawˇ-eu kʼoeˇ gaˇ kʼaˇ jawˇ kʼaˇ jaˆ-eu yawˬ jeˬ na luꞈ-ahˇ beh-euˬ gʼaˬ pyeuꞈ-eu dehꞈ luꞈ-eu Miˬyehˇ jawˇ paw bi gʼoꞈ pyawˇ laˇ-eu gʼaˇ duˬ, nga nyaꞈ heu gaˇ Laˬ kʼaˬ cehˇ-eu Guiˬ lahˬ dawˬ mehˬ laˇ-euˬ ma. 16Dzeuˇlaˇ-euˬ aˇ yamˬ-ahˇ, tsawˇ jeuˬ dawˬ tawˆ luꞈ yawˬ ha-euˬ zahˇ yawˬ ha tawˬ-awˇ bi dehꞈ tawˬ-euˬ meh. 17Ehˇ kʼawꞈ, aˬ yawꞈ neh mˇ-euˬ yaw muiˬ jeˬ laꞈ kʼoeˇ, aˬ yawꞈ dehꞈ luꞈ jawˇ luꞈ-eu gaˇ kawˆ aˬ myah luꞈ bi siˬ bi mawˇ-euˬ meh. Aˬ yawꞈ naw maꞈ-ahˇ mˬ kʼoeˇ taˆ neh uˬ yehˇ bi yehˇ le-awˇ, aˇ yamˬ tsaˬ ngeh dzaˬ la gʼo cehˇ bi keuˆ le-euˬ meh. Naw maꞈ-ahˇ dzaˬ dzaˬ dawˇ dawˇ biꞈ-awˇ, naw maꞈ-euˬ nui ma laꞈ kʼoeˇ laˬ kʼaˬ cehˇ-eu jeˬ bi byah laˇ-euˬ meh.” 18Aˬ yawꞈ nyaꞈ kʼoeˇ naˆ ni ehˇ keuˆ-awˇ, aˬ yawꞈ maꞈ neh aˬ yawꞈ nyaꞈ-ahˇ maˬ bi lawˇ-eu gʼaˇ duˬ maˬ gʼaˬ maˬ na-ehˇ ja gʼaˬ-euˬ meh.

19Biˇsiˇdiˇ miˇ kʼahˬ Aˬdiˇawˬ meuˬ hawˇ-eu Iˇgawˇniˇ meuˬ-ahˇ jawˇ-eu Yuˇdaˆ tsawˇ haˬ tiˬ deuˬ laˇ-awˇ, tsawˇ haˬ aˇ maꞈ-ahˇ aˬ yawꞈ maꞈ jawˇ paw pyawˬ ni mehˇ shuiˇ shuiˇ tawˆ-awˇ, Pawˇluˆ-ahˇ kʼaˬ lo biˬ-awˇ, shiˇ-euˬ ngaˇ lehˇ noeˬ-awˇ, meuˬ laꞈ nyiˇ gʼeu dzeh ha-iˇ-euˬ meh. 20Ehˇ kʼawꞈ, jah-eu tsawˇ haˬ deuˬ aˬ yawꞈ ga-eu tiˬ jawˬ uiˬ le ngeh, aˬ yawꞈ tuˇ laˇ-awˇ, meuˬ-ahˇ gʼoꞈ uˇ leˇ-euˬ meh. Yawˬ nah yawˬ, Baˬnaˬbaˇ aˬ yawꞈ nyaꞈ-ehˇ Deˬbeˬ meuˬ-ahˇ iˇ-euˬ meh.

Suˇliˆ miˇ kʼahˬ Aˬdiˇawˬ meuˬ-ahˇ gʼoꞈ leˇ-euˬ

21Pawˇluˆ hawˇ-eu Baˬnaˬbaˇ aˬ nyaꞈ Deˬbeˬ meuˬ-ahˇ Laˬ kʼaˬ cehˇ-eu Guiˬ lahˬ dawˬ mehˬ-awˇ, tsawˇ haˬ gʼawˬ mya ni zaˬ lahˇ pyeuꞈ laˇ-euˬ meh. Kʼoeˇ naˇ, Luˇdaˬlaˇ meuˬ, Iˇgawˇniˇ meuˬ, Biˇsiˇdiˇ miˇ kʼahˬ-ahˇ jaˆ-eu Aˬdiˇawˬ meuˬ heu deuˬ-ahˇ, tiˬ meuˬ saˇ-iˬ tiˬ meuˬ gʼoꞈ leˇ luꞈ-eu meh. 22Jah-eu jeˬ laꞈ kʼoeˇ ziꞈ ni, jah-eu tsawˇ haˬ deuˬ-ahˇ aˬ yawꞈ nyaꞈ gʼaˬ biꞈ yaꞈ-euˬ meh. “Miˬyehˇ miˇ kʼahˬ-ahˇ uˇ leˇ-eu gʼaˇ duˬ, shaˬ zahˬ gʼawˬ mya jeˬ-ahˇ aˬ dui ya tahˬ puˬ tehꞈ-a” lehˇ mehˬ nehˬ tsoˆ nehˬ yaꞈ-euˬ meh. 23Ka li zaˬ aˇ muˇ yawˬ muˇ na luꞈ laꞈ kʼoeˇ, aˬ yuiꞈ aˬ tsu tseˇ doˆ nehˬ-awˇ, maˬ dzaˬ-eu zahˇ jahˇ-awˇ guiˬ lahˬ shaˇ-eu laꞈ kʼoeˇ, aˬ yawꞈ maꞈ jah luꞈ-eu Sahˬpaˬ Miˬyehˇ-euˬ aˬ laꞈ laꞈ kʼoeˇ a nehˬ yaꞈ-euˬ meh.

24Biˇsiˇdiˇ miˇ kʼahˬ doe ni cah gʼaˬ-awˇ, Paˬbuˇliˇ miˇ kʼahˬ-ahˇ paˇ gʼoꞈ ka le-euˬ meh. 25Beˬlaˬgeˬ meuˬ-ahˇ Miˬyehˇ dawˬ kawˬ mehˬ nehˬ yaꞈ-awˇ, Aˬdaˬliˇ meuˬ-ahˇ iˇ-euˬ meh. 26Kʼoeˇ gaˇ neh naˇ, lawˬ dziˬ-awˇ Aˬdiˇawˬ meuˬ-ahˇ gʼoꞈ keuˆ-iˇ-euˬ meh. Nymˬ-mˇ aˬ yawꞈ nyaꞈ neh mˇ gʼaˬ-euˬ gaˇ heu deuˬ-ahˇ aˬ yawꞈ nyaꞈ mˇ-eu lehˇ gʼeh ngeh, Aˬdiˇawˬ meuˬ laꞈ kʼoeˇ aˬ yawꞈ nyaꞈ-ahˇ Miˬyehˇ-euˬ aˬ laꞈ laꞈ kʼoeˇ a nehˬ-euˬ meh.

27Aˬ yawꞈ nyaꞈ Aˬdiˇawˬ meuˬ-ahˇ gʼoꞈ keuˆ le ngeh, Ka li zaˬ aˇ muˇ laꞈ kʼoeˇ jawˇ-eu tsawˇ haˬ deuˬ-ahˇ kuˇ uiˬ-awˇ, aˬ yawꞈ nyaꞈ nehˬ-ehˇ Miˬyehˇ neh kʼaˇ mˇ kʼaˇ shaˇ-euˬ gaˇ kawˆ hawˇ-eu, aˬ cawˬ tsawˇ jeuˬ deuˬ jah-eu tsawˇ haˬ pyeuꞈ laˇ ni Miˬyehˇ gaˇ ma aˬ joˆ-ehˇ pah nehˬ laꞈ-euˬ gaˇ kawˆ dzawˇ nehˬ-euˬ meh. 28Kʼoeˇ naˇ, jah-eu tsawˇ haˬ kʼoeˇ deuˬ nehˬ-ehˇ, kʼoeˇ gaˇ aˬ yawꞈ nyaꞈ gʼawˬ myahˇ ni jawˇ-euˬ meh.

Currently Selected:

Gʼaˬkʼehˇ 14: AHK

Highlight

Copy